Matio 23

Yěsô gɔ̌ɔn ngie tà mé gÿo pá’ pʉ̀a farisay lâ pàkyagte ŋwà’ne Ssé

(Malékuse 12.38-40; Lukase 11.39-52; 20.45-47)

1Yěsô gÿo ńgɔɔn mbwó menùɔ lá’ tà mbɔɔ mbwó *ngàŋa kwò yé ngie: 2*pàkyagte lepʉ̌ Mǒsê pâ pà *farisay gẅiin lékyagte *lepʉ̌ Mǒsê. 3Pú’u, á ne ńzɛ́te ngie pi jú’ ncwò wɔ́b, ńgÿo kɔ́ɔkɔ́ gie pɔ́ ne ńgɔɔn né pi. Tá’ tà pi fʉ̀’e tsẅé yɔ́b. Á nue mmó gie pɔ́ zí’i pʉ̀a pɔ́ té yɛ̌ gÿo. 4Pɔ́ kâ pi’ gie á zɛ tɛ’, ńzába mekẅi pʉ̀a mesoŋ, tá ńdʉ’ʉ légwɔ́ gie kwà’ pɔ́b ge fó lɔgɔ mentsě tepwó e tsẅi’te mbɔɔ tsẅi’tě. 5Pɔ́ gwɔ́ gÿo kɔ́ wɔ́ nně ńtsɔ́ɔn ngie mé gyá wɔ́b. Áa mmó gie á gÿo, pɔ́ gʉa ná shwóŋó Ssé gie mé ŋwe’e ńnéŋe tsɛ̀ɛ tétɔ́’, á gie mé kwɛ́ɛ ná zǐ ka ná pwó wɔ́ la, pɔ́ gÿo pɔ́b metétɔ́’ é gú’ pɔ́ nà ntí yé ndyɛ̀’ɛ. Pɔ́ gíŋe ńgÿo yɔb nzsǒ gie mé ma’a ńdɔgɔ ńtsyɛ’te Ssé, metsɔ̌ɔn sag tɛ’ 6Pɔ́ kúu jʉ’e melínɔ́ɔn, ńnéŋe pɔ́ nà jʉ’e melÿò, ńkúu *mendá cú’tè ńkaŋa yɔ́b jʉ’ pɔ́ mvfò. 7Pɔ́ kwoŋ ngie mé tyé mangǐɛ, ńtsyɛ’te wɔ́b lê mekù’, epʉ̀a piŋ ńnéŋe ńtóŋo wɔ́b lê tsítsà.

8Tá ńgʉa ná pi, tà pi gÿo ngie mé tóŋo gẅi ngie tsítsà, á nue pi gwɔ́ pɔ́ mefɛ́ mefɛ́, ḿbiŋ ńgẅiin pɔ́ tà’ tsítsà wémɔ’ɔ́. 9Tà pi tóŋo tsɔ́ nyìŋ ndùmo ssé tsetsá’ lê tá gẅi, á nue pi gẅiin pɔ́ tà’ tá wémɔ’ɔ́ á gwɔ́ tÿǒ lepwó. 10Tà pi zẅíŋ mé tóŋo gẅi ngie pàtyé mvfò, á nue nyìŋ gẅie à tyé mvfò à gwɔ́ pɔ́ wémɔ’ɔ́, ńgwɔ́ nzá’nkÿo gẅie Ssé la ka’. 11Á poŋ ngie nyìŋ ndÿò tsetsɛ̀ɛ pi lɔg mbùm ye pɔ́ pá’ nkwɔɔn gi la 12Nyìŋ lɔɔn ńŋá’te nnɛ́, mbà Ssé ge sẅé’e yé náa ssé, ésẅé’e mbùm yé ńnáa ssé, mbà Ssé ge kwé’e yé

Yěsô ne ńgɔɔn ngie àtsẅé pàkyagte lepʉ̌ Mǒsê lâ ye pà farisay té poŋ

13Pi ee pàshÿó tepòŋ, pi *pàkyagte lepʉ̌ Mǒsê lâ pi pà *farisay. Pi ee pànkwòŋ menÿɔ́g, pi ne ńkíle ncwò ndá gẅie pʉ̀a mesoŋ pfó mǒ tá ńkúu tsɛ̀ɛ nò *lefùɔ Ssé, pú’u, pi tè tsɛ̀ɛ wó kú, ńké tè nyé pʉ̀a pie é ne ńkwoŋo lékúu tsɛ̀ɛ wó kúu wó wɔ́.

14Pi ee pàshÿó tepòŋ, pi pà *farisay lâ pi *pàkyagte lepʉ̌ Mǒsê, pi ee ngàŋ mepàb, pi zɔ gwoon mepfɔ̌g ńkẅé mendá mɔ́b, ńcʉ́’ʉ lésẅíŋte Ssé, ńgɔɔn nò á sag, lélɔg ḿbab menÿɔ́g pʉ̀a, pɔ́ kwaŋ ngie pi ee pʉ̀a membòŋo. Á ge cʉa pú’u, pi lá’ ńkúu tsɛ̀ɛ ngʉ̀ngʉ̀ ye lÿò.

15Pi ee pàshÿó tepòŋ, pi pà *farisay lâ pi *pàkyagte lepʉ̌ Mǒsê, pi ee ngàŋ mepàb, pi kag tʉ̀ tɛ’ légÿo nyìŋ gẅie à tè Ssé zsé cʉ́me nzèm pi, tá á ké ńgwɔ́ tà ké cʉ́me nzèm pi, pi zɔ̌ gÿo á cʉ́’ʉ nyìŋ gẅie à ge kú pɔ́ tsɛ̀ɛ tsɛ̀ɛ mmɔ̌g tà cʉa gẅí.

16Pi ee pàshÿó tepòŋ, pi pie pi ee mefʉ̀ menÿɔ́g, ḿbiŋ ne ńkíbe pwó petsɔ́ pʉ̀a, ńnyɛɛ wɔ́b mánzsè. Pi gɔɔn ngie nyìŋ lɔɔn ńdɔgɔ *jʉ’ʉ Ssé ńkʉa nò, mbà e tsɔ̌ ntsaŋ tè gwɔ́ wɔ. Tá ńké ńdɔg pɔ́ tʉ̌ ngɔl gie áa tsɛ̀ɛ *jʉ’ʉ Ssé ńkʉa nò, mbà à kwǎ’ ńkʉa nénʉ́. 17Pi tè mecʉ̀cʉ̀ŋ ńgwɔ́ mefʉ̀ menÿɔ́g wɔ́ pé’e, á gʉa ná tʉ̌ ngɔl pɔ́ *jʉ’ʉ Ssé àkɔ́ cʉa kɔ́? *Jʉ’ʉ Ssé zɔ̌ té gÿo tá tʉ̌ ngɔl cʉ́’ʉ yé Ssé wɔ́ le? 18Pi gɔɔn ngie nyìŋ lɔɔn ńdɔgɔ jʉ’ gie mé nuŋe pwɔ́’ wó, ńkʉa nò, mbà e tsɔ̌ ntsaŋ tè gwɔ́ wɔ́. Tá ńké ńdɔg pwɔ́’ gẅie ée ndùm wó ńkʉa nò, mbà à kwǎ’ ńkʉa nénʉ́. 19Pàfʉ̀ menÿɔ́g, á gʉa ná jʉ’ gie mé nuŋe pwɔ́’ wó, pɔ́ pwɔ́’, àkɔ́ cʉa kɔ́? Àjʉ’ gie mé nuŋe pwɔ́’ wó zɔ̌ té gÿo e pwɔ́’ cʉ́’ we Ssé wɔ́ le? 20Pú’u, nyìŋ lɔɔn ńdɔgɔ jʉ’e mé nuŋe pwɔ́’ wó ńkʉa nò, mbà à lɔgɔ yɛ̌ jʉ’ mbɔɔ mmó gie áa ndùm wó ńkʉa. 21Nyìŋ gẅie à lɔgɔ́ *jʉ’ʉ Ssé ńkʉa nò, à lɔgɔ *jʉ’ʉ Ssé mbɔɔ Ssé gẅie aa jʉ’ wó ńkʉa. 22Nyìŋ lɔɔn ńdɔgɔ tÿǒ lepwó ńkʉa nò, mbà à lɔgɔ lʉŋe Ssé, mbɔɔ Ssé gẅie à ńnéŋe mǒ ńkʉa.

23Pi ee pàshÿó tepòŋ, pi *pàkyagte lepʉ̌ Mǒsê lâ pi pà *farisay, pi ee megàŋ mepàb, pi gabte shúm nná’ sí tà mbɔɔ nzab gi, nzsè legém, ńnáa tà’ nzsè mbwó Ssé, tá’, ńgwágte nò ná menò mie mé zí’i ná mbʉ̌, é gwɔ́ kwà’ menò mie é kẅéte. Ànò pá’ leshwoŋó nò nénʉ́, letsɔ̌ɔn mezìŋe, legù’te pɔ́ ndà’ Ssé, tá yɛ̌ zɔ gwɔ́ mmó gie á kɔ’ɔ́ ne ńzɛ́te ngie pi gÿo. Pi gÿo pú’u, tá ńké le wetsɔ̌ gígyé shúm lege. 24Pi pie pi ee mefʉ̀ menÿɔ́g, ḿbiŋ ne ńkíbe pwó petsɔ̌ pʉ̀a, ńnyɛɛ wɔ́b mánzsè, pi pɔ́gɔ lémi nzeenzse á ná mmó gie pi gee núu, ḿbiŋ ḿmii nɔ̀ɔn nnɛ́.

25Pi ee pàshÿó tepòŋ, pi *pàkyagte lepʉ̌ Mǒsê lâ pi pà *farisay, pi ee megàŋ mepàb. Pi tsí’i mbùm ntú’ lɔg ńnú melù’ mbɔɔ ye káŋ, tá shúm sie pi lɔg tsóŋ lâ ngáte ńgẅiin zɔ̌ gwɔ́ tsɛ̀ɛ wó. 26Nyìŋ *farisay, ɔ́ɔ fʉ̀ menÿɔ́g, ɔ̀ lɔɔn ḿvɔg ńtsí’i tsɛ̀ɛ ntú’, tà é lʉ́a, mbà nzème pǐ ge pɔ́ɔnte lʉ́a.

27Pi ee pàshÿó tepòŋ, pi *pàkyagte lepʉ̌ Mǒsê lâ pi pà *farisay, pi ee megàŋ mepàb, pi gwɔ́ pɔ́ pá’ mesyè me mbwǒon, mie mé lɔgɔ mbwǒon ńzɔ́’ tà e ne fɔ́gɔ. Ee nzèm pǐ ésí tɛ’, tá’ mekẅǐ mepfó lâ melʉ̀ʉ shúm zɔ̌ gwɔ́ tsɛ̀ɛ wó. 28Á gíŋe ńgwɔ́ pɔ́ ndʉŋ ndʉŋ pá’ mé líe gẅi gí, ńgyá pi gwɔ́ mvfò pʉ̀a mesoŋ, ńgwɔ́ pʉ̀a Ssé tɛ’, tá ńgwɔ́ megàŋ mepàb, nkwaŋá tepòŋ gwɔ́ ntʉ́m pi tá ńdúe.

Yěsô ne ńda’te ngɔ́’ gie e ge tóo nà pàkyagte lepʉ̌ Mǒsê lâ pà farisay

29Pi ee pàshÿó tepòŋ, pi *pàkyagte lepʉ̌ Mǒsê lâ pi pà *farisay, pi ee megàŋ mepàb, pi ne nyɛte ḿbwóon mesyè á na mejʉ’ mie mé la tuŋ pà *ntsẅì nkʉ̀ Ssé wó, pi ne nkẅiŋe mesyè pʉ̀a pie pɔ́ la gwaa kwé nně ńkíbe *lepʉ̌ mbòŋo. 30Tà á ku’ pi gɔɔn ngie: Peg laa pé’e ńgwɔ́ yég wɔ́ nà fʉ̀’ ye pàmangʉa njʉ’ pég, mbà peg la tè zẅíŋ ngie mé zẅé pà *ntsẅì nkʉ̀ Ssé wɔ́. 31Pi lɔgɔ pú’u, ńzẅíŋe ngie pi ee púɔ pʉ̀a pie é la zẅéte pà *ntsẅì nkʉ̀ Ssé. 32Pú’u la, pi lɔgɔ fà’a pàmangʉa njʉ’ pí, ńgʉa lê mvfò. 33Pi ee ngẅɛ̀ mennú, ńgwɔ pà másèm nnú, ńgwɔ́ pí gǎ ńdá’ ńtsó té kúu tsɛ̀ɛ mmɔ̌g?

34Pi ké ńjú’, mèŋ n ge gÿo túm pà *ntsẅì nkʉ̀ Ssé, pâ pàzsé nò, pâ *pàkyagte lepʉ̌ Mǒsê. Pi zẅéte petsɔ̌, ńkim petsɔ̌ ná tÿǒ nkǐ, ńcúɔ petsɔ́ nê mengwɔɔn á tsɛ̀ɛ *mendá cú’tè mí, éfó metÿǒsoŋ metÿǒsoŋ ńnɔ́ɔn wɔ́b. 35Pú’u, metse pàteŋag metsèm mie mé lǎ pfɛte ndùmo ssé tsetsá’ e pú sẅɛ́’ɛ ndù pi. Léfó ná metse Abe gẅie à lɔ̌ɔn ńkú’te *lepʉ̌ Ssé, ńgʉa ńkúu nà me Sakarîɛ, míŋ Mbarashi, gẅie pi la zẅé yé á na shʉa gie ee na lekye mɔ́g pwɔ́’ pɔ kwà’ tsɛ̀ɛ jʉ’ gie e Ssé ee wó 36Mèŋ shwóŋó gẅí, kwà’ nénʉ́, mé ge lá’ tsɔ́’ ndu ndú menò ámɛ̌, é ná né pʉ̀a pie ee tsɛ̀ɛ njÿó fʉ’ɔɔn.

Ànò gie Yěsô la gɔɔn ná Yerósalem

(Lukase 13.34-35)

37Àfʉ̀’ ku’ Yěsô gɔɔn ngie: Pà Yerósalem, pà Yerósalem, pi pie pii ńzẅé pà *ntsẅì nkʉ̀ Ssé zẅé, ńdɔgɔ metóon ńtéme pʉ̀a pie Ssé túmo wɔ́b mbwó pí ńzẅéte, ée ngʉ̀a shÿɔ́’ɔ pá’ mèŋ fa’á lécú’te gẅí, pá’ mêngáb cú’te púɔ pé lepàb yé, pi ké ńdʉ’ʉ lʉ’? 38Áa fʉ̀’ɔɔn pá’ɔɔn jʉ’ gie pi la kwɛ́ légu’te Ssé tsɛ̀ɛ wó, yé Ssé ge kyé a tyé sẅɛ̀ɛ 39Áa yɛ̌ tá mèŋ n ge shwóŋó gẅi ngie: Tà fó fʉ̀’ɔɔn, pi tè gíŋe gyá wɔ̀ɔn mɔ́, tà lá’ kú lyɛ̌’ gie pi ge gɔɔn ngie: «E Ssé gwɔ́ né nyìŋ gẅie à tóo ná lezíŋ sé».

Currently Selected:

Matio 23: NGBM

Highlight

Copy