Matio 24

Yěsô gɔ̌ɔn ngie mé ge táa tága jʉ’ʉ Ssé

(Malékuse 13.1-13; Lukase 21.5-19)

1Yěsô fó *jʉ’ʉ Ssé ńkẅɛ ne ńgee, *ngàŋa kwò yé tóo lejʉ́ŋ yé, ńgɔɔn ngie à líe ntí gie mé la kwɛ́ *jʉ’ʉ Ssé tá ńgyá. 2Tá Yěsô gɔɔn né pɔb ngie: Pi kaa gyá jʉ’ yɛ̂ wa? Tà mèŋ n ké shwóŋó gẅí, kwà’ nénʉ́, àtsɔ́ lyɛ̌’ ge gÿo gwɔ́, mé pú ńtág tà tóon le gíŋe ńzébe nà tsɔ̌ wɔ́.

Ànò ngʉ̀ngʉ̀ gie e ge lá’ vɔg tó tá Míŋ Nyìŋ tó

3Yěsô gʉa tà ńnéŋe ndùm lekwɔ’ɔ́ metÿǒ mèvɛ olive, *ngàŋa kwò yé fag nnɛ́ ńtó ńzɛ́te yé ngie: Shwóŋo wég fʉ̀’ gie yɔɔn nò ge lá’ gÿo. Shwóŋo wég liŋé gie mé ge lá’ lɔg zsé ngie ɔ̀ ne ńtóo, mbɔɔ gie á ge gyo mé zsé ngie lyɛ̌’ gie njÿó ge mag kǔ’. 4Yěsô tsɔ́’ɔ mbwó pɔ́b ngie: Pi laga twó gí, ḿbɔ́ɔn nyìŋ léfʉ gẅí. 5Á nue pʉ̀a tà ńgyɔ́ɔn ge gÿo tÿɔ́g lezíŋ sɔ́ɔn mvfò, wɔ̌wɔɔ ná pɔ́b wɔ́ gɔɔn ngie: Aa *Nzà’nkÿo, é gɔɔn pú’u lɔg fʉte pʉ̀a tà ńgyɔ́ɔn. 6Pi ge lá’ jú’ mé ne ńgɔɔn nò ná mencù mie é kẅɛ̌ nà gẅi shÿó ka ngʉ̀a shʉ̀shʉ̀a wɔ́, tá’ tà pi ké ńdá’ ńcÿɔ’. Á ne ńzɛ́te ngie sɛ̌ shúm vɔg ńcʉate, tá á lěen ńdɔgɔ ńgwɔ́ ngie njÿó mǎg wɔ́. 7«Àlá’ ge lá’ lu ssé, é lÿɔ́’ɔ yetsɔ́, àfùɔ túm lu ssé, ńdÿɔ́’ɔ wetsɔ̌», tsetsá’ ge là’ pú cʉ’e ná mejʉ’ ta ńgyɔ́ɔn, gwáŋá gíŋe ngwe ná mejʉ’ ta ńgyɔ́ɔn. 8Mɔɔn menò ge lá’ lɔgɔ gwɔ́ pá’ manzwě gẅie à zyete lélúme la.

9Mé gwoon gẅi ńná mé nyɛɛ gẅi ngɔ́’, é gÿo mé zẅé gẅí. Melá’ ntsèm ge lá’ pú pʉ̀a gẅi mélà’ mɔ́ɔn 10Á ge lá’ gwɔ́ gwɔ́ tà pʉ̀a tà ńgyɔ́ɔn tsetsɛ̀ɛ pi le gíŋe ńzáb ntʉ́m ná mèŋ wɔ́, pɔ́ sele sẅiŋ mennɛ́ mɔ́b, ésele ḿbʉa mennɛ́ mɔ́b. 11Pà *ntsẅì nkʉ̀ Ssé pe cÿɔ’ nò kẅɛte tà ńgyɔ́ɔn, éfʉte lelÿò pʉ̀a. 12Menò tepòŋ kẅi’i ńgyɔ́ɔn, tà lelÿò pʉ̀a le gíŋe ńkwoŋe tà ńkwoŋe wɔ́. 13Tá, nyìŋ gẅie à shÿɔg shÿɔg té kʉa zɔ́ gÿo ńtsẅɛ́. 14Mé ge lá’ tsẅi wɔɔn nkʉ̀ mbòŋo we nò *lefùɔ Ssé á nzɔ̌ nzɔ̌ ndùmo ssé tsetsá’, légwɔ́ gie melá’ melá’ ntsèm ge jú’, njÿó leen ńké ḿmag.

Ànò ná ngʉ̀ngʉ̀ yé lÿò

(Malékuse 13.1-13; Lukase 21.5-19)

15Á ge lá’ gwɔ́ fʉ̀’ó, pi gyá nyìŋ gẅie *ntsẅì nkʉ̀ Ssé Ndaniɛ la tóŋo yé lê «nkʉ̀’ʉ ntàgte jʉ’». Á tó ńtyé kwà’ tsɛ̀ɛ jʉ’ gie e Ssé ee wo. Nyìŋ tóŋo jʉ’ʉ ŋwà’né yɔɔn, á kag tʉ lenyɛte ńjú’. 16Á poŋ ngie, mé lɔɔn ńdá’ ńgwɔ́ tà ńgyá yé, pʉ̀a pie ee Jẅidea kÿo ńdɔg ye mekwɔ’ɔ́ ńgʉa ńdyeen. 17Nyìŋ gẅie à ge lá’ gwɔ́ nà tetʉ́a gie aa ntsɔ̀’ ndá, á pɔ́ɔn lésẅɛ́’ ngie à ge píi mmó ndá tá lɔg kÿo. 18Nyìŋ gẅie à ge lá’ gwɔ́ nká’, à pɔ́ɔn le gɔɔn ngie à ge piŋe ndá pí nzsǒ fÿɔ́g ye.

19Yee ngɔ́’ pànzwě pie é ge lá’ gwɔ́ shwoŋ, mbɔɔ pie é ge là’ ne nóŋe pûɔ mepÿɛ́ nà mɛ̌ melyɛ̌’ le! 20Pi sẅíŋte Ssé ngie tà lekÿo ŋwɛ́ lá’ ńgwɔ́ fʉ̀’e tyɛb tyɛb mbʉ̀ŋ, ka pɔ́ lyɛ’ɛ́ nzsè wɔ́. 21«Á nue ngʉ̀ngʉ̀ gie e ge lá’ kú pʉ̀a, ge lá’ gyɔ́ɔn tɛ’, tà mbà mé laa zɔɔn ńgyá tsɔ̌ pú’u wɔ́, tà fó pá’ Ssé la nuŋe njÿó, ńgʉa kú fʉ̀’ɔɔn», mé ké le la’ ngíŋe ńgyá tsɔ̌ pú’u, wɔ́. 22Tá ńgwɔ́ gie e Ssé laa pé’e, ńzɔɔn tè gyá ngie à ge tsẅɛ́te mɛ̌ melyɛ̌’ wɔ́, mbà à gwe tsɔ́ nyìŋ lá’ le tsẅɛ́. Tá à la lɔgɔ nò pʉ̀a pie à la tsɔ́’, tá ńtsẅɛ́te melyɛ’ɛ́ lá’ amɛ̌.

23Pú’u la, nyìŋ ké ńdá’ ńgɔɔn né pi ngie: À *Nzà’nkÿo wɔɔn jʉ’ɔɔn, ka pɔ́ ngie à gẅi jʉ’e wɔ́ tà pi zẅíŋ, 24mélà’mie pà nzà’ nkÿo pe cÿɔ̌ nò, lâ pà *ntsẅì nkʉ̀ Ssé pe cÿɔ̌ nò ge lá’ kẅɛ, é nyɛ memáa meliŋé, é gÿo menò mmɔɔn mmɔɔn lélɔg fʉte pʉ̀a tà ńgyɔ́ɔn, tà ńgwáa we pɔ́ gwe’e ńku’, mbà à lɔɔn ńgwɔ́ pɔ́ fʉte mbɔɔ pʉ̀a pie Ssé la tsɔ́’. 25Á yɔɔn, mbà mèŋ n kě ńtʉ́ njÿó shwóŋó gẅí.

26Pú’u la, mé lɔɔn ńgɔɔn né pi ngie: Pi gyá, *Nzà’nkÿo gẅi nkwòŋo tsẅɛ, tà pi gʉa wó, ńgɔɔn né pi ngie: Pi gyá, à wɔɔn ńdyeen jʉ’ɔɔn, tà pi zẅíŋ. 27Pi zsé ngie á lɔɔn ńgwɔ́ gie nně mbʉ̀ŋ gÿo lê ŋwaŋ, éfó sǎ’ nèm, ńgʉa ńkú mbyě nèm mé pú ńgyá lêkɔ́ wɔ́, mbà *Míŋ Nyìŋ ge lá’ tó pɔ́ pú’u. 28«Àpfó mmó ge gÿo gwɔ́ nzɔ̌ wɔ́, megúm cú’te jʉ’ó».

Míŋ Nyìŋ ge gÿo tó

29Mɛ̌ melyɛ̌’ɛ ngʉ̀ngʉ̀ ge lá’ gwóon tɔ́g, «nèm sele síŋ, saŋ á le gíŋe ńtʉ́a wɔ́, mecÿɔ́’ saŋ fó tÿǒ lefaŋ ńgwete ssé, àkɔ́ɔkɔ́ gie áa lefaŋ wɔ́ à pú ńtága». 30Àliŋé *Míŋ Nyìŋ leen ńké ńkẅɛɛ lefaŋ. «Mengwòŋo mengwòŋ mie ée ndùmo ssé tsetsá’ kɔ́’ legwé ńdʉa, mé leen ńké ńgyá *Míŋ Nyìŋ gwɔ́ tsɛ̀ɛ melɔ́ɔn tÿǒ lefaŋ ne ńtóo, ńgẅiin shʉ́shÿɔ́g mbɔɔ máamáa metʉ́», 31é túm mecÿɔ́’ pé, pɔ́ tóŋo máamáa ntaŋ, ńdɔg ńcú’te pʉ̀a pé pie à la tsɔ́’ɔ tsɛ̀ɛ njÿó mesǎg lekùɔ, pɔ́ fó meshÿó meshÿó ńtó.

Ánò nà tÿǒ mbÿě ngem

32Pi pí fʉ̀’ ná tÿǒ mbÿě ngem, pi gwɔ́ tà ńgyá meffo kwo tà á gíŋe ńzye létáb, pi zsé ngie, àfʉ̀’e lùm ne ńtóo. 33Ndʉŋ ndʉŋ pú’u, pi la’ ńgwɔ́ tà ńgyá mɔɔn menò, pi zsé ngie: *Míŋ Nyìŋ tǒ tà ńgwɔ́ ncwò ndá. 34Mèŋ shwóŋó gẅí, kwà’ nénʉ́, pʉ̀a pie ee tsɛ̀ɛ njÿó fʉ’ɔɔn té ńge lá’ kwéte tà mag té gwɔ́ gie mɔɔn menò ntsèm é tǒ wɔ́. 35Lefaŋ pɔ́ tsetsá’ ge gÿo mag tá shwóŋó yɔ́ɔn lá’ le pyé.

E Ssé gile yé zɔ zsé lyɛ’ɛ́ nzsònzèm

(Malékuse 13.32-37; Lukase 17.26-30,34-35)

36Tá’, á ké ńgʉa ná lyɛ̌’ ayɛ̌, pɔ́ fʉ̀’ gie mɔɔn menò ge gÿo cʉa, mbà sɔɔn nyìŋ tè zsé tà mbɔɔ *mecÿɔ́’ Ssé pie ée tÿǒ lepwó, tà mbɔɔ Míŋ Ssé, ńda’ Tá gíle yé zɔ zsé. 37*Míŋ Nyìŋ ge lá’ gwaa tó, menò mie é la gÿo fʉ̀’e Nóa gíŋe ńgÿo. 38Ntse la gwaa kwɔ́’ jÿó jʉ’, epʉ̀a mesoŋ ne ḿpfɛ́ɛ shúm, ńně ńnúu melù’, ńně ńdɔ́ɔn ndá, ńnáa púɔ pɔ́b lɔ́ɔn ndá, tà ńkú lyɛ̌’ gie Nóa lá kúu tsɛ̀ɛ páŋ, 39àlá’ zɔɔn tè ne ńgû’u tsɔ́ nò wɔ́, tà ntse gÿo ńkwɔ́’, ḿbú ḿbyága wɔ́b metsèm. *Míŋ Nyìŋ ge là’ gwaa tó à gíŋe ńgwɔ́ pɔ́ pú’u. 40Mbàŋa yépʉ́a ge lá’ gwɔ́ nká’, mé lɔgɔ tà’ ńgʉa, ńnyé wetsɔ̌. 41Pànzwě mépʉ́a ne ńgwɔ’ɔ mmó lùŋo, mé lɔgɔ tà’ ńgʉa, ńnyé wetsɔ̌. 42Áa yɛ̌ tá pi pɔ́ɔn légwá’a lÿɔ̀g, á nue pi tè ne ńzsé lyɛ̌’ gie Cʉ̀apʉ̀a gẅi ge tó wɔ́. 43Pi gíŋe ńzsé mbòŋo ngie, nyìŋ laa pé’e ńgwɔ́ gie à ńgwɔ́ á ńnéŋe mbʉ̀a yé, ńzsé fʉ̀’ gie ntsǒŋ ge tó, mbà à lɔɔn ńgwɔ́ á lá’ té lyé, ḿbyɛ́b tà ntsǒŋ le kúu mbʉ̀a yé wɔ́. 44Pú’u, mbaa pi gí, pi cwoŋte mbùm gi ḿbyɛ́b, mélà’mie *Míŋ Nyìŋ ge gÿo vege vege tó.

Ànò ngàŋa fà’ we mbòŋo pɔ́ we tepòŋ

(Lukase 12.41-48)

45Ngàŋa fà’ gẅie à jǔ’, ḿbiŋ ńgẅiin legye à gwá’a la? Aa gẅie tá fà’ we la cʉ́me pʉ̀a pé mbwó yé, pá’ à ge cʉ́’ ná shúm léjÿó mbwó pɔ́b á nà fʉ̀’ gie á ne ńzɛ́te. 46Àa shÿó mbòŋo pá’ tá fà’ we lɔɔn ńgwaa piŋ nzèm, ńgyá á ne fa’a yɛ̌ fà’. 47Mèŋ shwóŋó gẅí, kwà’ nénʉ́, tá fà’ we ge cʉ́me shúm sé ntsèm ntsèm mbwó yé. 48Tá’ ńké ńgwɔ́ gie à lɔɔn ńgwɔ́ ngàŋa fà’ we tepòŋ, ńgɔɔn lóŋ yé ngie: Tá fà’ wɔ̀ɔn tè lwo tó wɔ́, 49ńzye lécúɔ pʉ̀a pie pâ pɔ́ fa’a, pâ mepʉ̀a melù’ cú’te ḿpfɛ́ shúm, ḿbiŋ ńnú melù’. 50Mbà tá fà’ we ge vege vege tó, á nà fʉ̀’ gie à tè ne ńzsé wɔ́, 51é tó, é néŋ ngʉ̀ngʉ̀ twó yé tɛ’, é jwoŋo yé, à gʉa né jʉ’ gie mé jwoŋo pʉ̀a tepòŋ ńnáa wó, é ńnéŋe jʉ’ó ne lʉa, lóŋ we ne ffó.

Currently Selected:

Matio 24: NGBM

Highlight

Copy