Matio 25

Sagá nò pûɔ ngùɔ legém

1Yěsô gíŋe ńgɔɔn ngie: Pú’u la, nò *lefùɔ Ssé ge lá’ sẅé nò pûɔ ngùɔ legém pie pɔ́ la kaa melâm pɔ́b, ńgʉa ńzá’ mámbàŋa gẅie à gee ńzɔ́’ɔ. 2Epe métʉ̀a gwɔ́ tsetsɛ̀ɛ pɔ́b pɔ́ té legye gẅiin, epe metʉ̀a gẅiin legye. 3Pie é la tè legye gẅiin la gwaa kaa melâm mɔ́b, pɔ́ té gẅiin tsɔ́ mèvɛ tsɛ̀ɛ tsɔ́ mmó ndyɛ̀’ɛ wɔ́. 4Epie é la gẅiin legye la gwaa kaa melâm pɔ́b, ńgíŋe ńnéŋ tsɔ́ mèvɛ tsɛ̀ɛ tsɔ́ mmó ndyɛ̀’ɛ ńgẅiin. 5Nyìŋ gẅie à gee ńzɔ́’ɔ, à tè tɔ́g ńtó wɔ́, pɔ́ ńnéŋe tà lelɔ́g gwoon wɔ́b pɔ́ lyéte.

6Tsɛ̀ɛ tsẅɛ́’ ku’, mé jú’ nyìŋ lɔg ngyè tetʉ̀ ngie: Nyìŋ gẅie à ge ńzɔ́’ɔ wɔɔn gẅie à tóo lɔɔn, pi kẅɛ ńgʉa ńzá’a yé. 7Epûɔ ngùɔ pà metsèm leen ńzyeen, wɔ̌wɔɔ kwé’e nkÿo lâm wé. 8Epie é té legye gẅiin la, gɔɔn mbwó pie é gẅiin legye ngie: Epég melâm ne ḿbyé, pi náa wég mejʉ’ ná mèvɛ mí. 9Epie é gẅiin legye tsɔ́’ ngie: Peg tè ná wɔ́, peg lɔɔn ńná, mbà még ge zág. Pi gʉa pɔ́ ndá sɔ̌ɔn ńjú mí. 10Pɔ́ gʉa ńjúu, nyìŋ gẅie à zɔ́’ɔ cʉ́’ ńtó, pâ pûɔ ngùɔ pie tsɔ́ mmó la tè ne ńzága wɔ́b gwɔ́ kúu ndá línɔ́ɔn lɔ́ɔn ndá, mé jÿɔ́’ ncwò ndá. 11Mé ńnéŋe tà ńjú’ pá’ petsɔ́ pûɔ ngùɔ pie pɔ́ ně ńgʉa ńjú mèvɛ la pú’te ncwò ndá, ńně ńgɔɔn ngie: À Ndè, à Ndè, mé tsɔ́’ ncwò ndá ńná né peg. 12Tá á gɔɔn né pɔ́b ngie: Tá mèŋ shwóŋó gẅí, kwà’ nénʉ́, mèŋ n tě ne ńzsé gẅi wɔ́. 13Yěsô ma’a twó ngie: Áa yɛ̌ tá pi pɔ́ɔn légwá’a lÿɔ̀g, á nue pi tè ne ńzsé lyɛ̌’ wɔ́, ńké tè ne ńzsé fʉ̀’ gie *Míŋ Nyìŋ ge lá’ tó wɔ́.

Esagá nò ná megàŋa fà’ méntá

(Lukase 19.11-27)

14Á ge lá’ gwɔ́ pɔ́ pá’ nò nyìŋ gẅie à la cʉ́’ʉ légʉa legiŋ, ńtóŋ megàŋa fà’ pé, ńnyé nkáb ye mbwó pɔ́b, 15ńdʉŋte ye wɔ̌wɔɔ pɔ́ ná yé, ńnyé nkáb pàg nkÿo tʉ̀a mbwó ndùŋ mvfò, ńnyé nkáb pàg nkÿo pʉ́a mbwó mbɔ́ɔntè, ńnyé pàg nkÿo mbwó mbɔ́ɔntè yétá, ńdeen ńké ńgʉa. 16Ngàŋa fà’ gẅie mé la nyé nkáb pàg nkÿo tʉ̀a né ye, cʉ́’ ńgwóon ńdwo ńtáŋ ye, tà ńjÿó tsɔ̌ pàg nkÿo tʉ̀a. 17Nyìŋ gẅie mé la nyé ye pàg nkÿo pʉ́a, gíŋe ńjÿó yé tsɔ̌ pàg nkÿo pʉ́a. 18Tá’, nyìŋ gẅie mé la nyé pàg nkÿo né yé la, gʉa ńtúŋo gem tsɛ̀ɛ tsetsá’, ńde’e nkáb tá we tsɛ̀ɛ wó.

19Ntyě ná’a sag, tá pà megàŋa fà’ pɔɔn méntá piŋ nzèm, ńtóŋo wɔ́b ńzɛ́te pá’ pɔ́ ka cʉ̌’ ńgÿo ná nkáb pú’u. 20Nyìŋ gẅie à la nyé nkáb pàg nkÿo tʉ̀a né yé tó, ńnyɛɛ yé tsɔ̌ pàg nkÿo tʉ̀a, ńgɔɔn ngie: À Ndè ɔ̀ la nyé nkáb pàg nkÿo tʉ̀a né mèŋ, n gÿǒ pàg nkÿo tʉ̀a zébe mǒ. 21Tá we gɔɔn né yé ngie: Áa mboŋ, ɔ́ɔ ngàŋa fà’ we mbòŋo, ɔ̀ ka gÿo mmó gie n ka ne ńzẅí’te mbwó gù, pá’ ɔ̀ ka pɔ́ɔn mûɔ mémmó mboŋó la, mèŋ n ge cʉ́me shúm mbwó gù tɛ’. Tóo pɔgɔ pú ńkág.

22Nyìŋ gẅie à la nyé nkáb pàg nkÿo pʉ́a né yé lá tó yé, ńgɔɔn ngie: À nde, ɔ̀ la nyé nkáb né mèŋ pàg nkÿo pʉ́a, gyá yetsɔ̌ pàg nkÿo pʉ́a gie e zebé mǒ. 23Tá we gɔɔn né yé ngie: Áa mboŋ, ɔ́ɔ ngàŋa fà’ we mbòŋo, ɔ̀ ka gÿo mmó gie n ka ne ńzẅí’te mbwó gù, pá’ ɔ̀ ka pɔ́ɔn mûɔ mémmó mboŋó la, mèŋ n ge cʉ́me shúm mbwó gù tɛ’. Tóo pɔgɔ pú ńkág.

24Tá nyìŋ gẅie à la nyé nkáb pàg nkÿo né yé la tó yé, ńgɔɔn ngie: À nde, n ka ne ńzsé ngie ɔ́ɔ nyìŋ ńtiŋ tɛ’, ńkába mmó jʉ’ gie ɔ̀ ka tè wó ma’, ḿbwɔ́’ɔ mmó jʉ’ gie ɔ̀ ka tè wó pye. 25N ka ne ḿbɔ́gɔ gú, ńgʉa ńde’e mepàg nkáb mú tsɛ̀ɛ tsetsá’, é mɔɔn! Nkáb jù yɛ̂. 26Tá’, tá we tsɔ́’ɔ mbwó yé ngie: Ɔ̀ɔ ngàŋa fà’ we tepòŋ, ńgwɔ́ ndóŋ, ɔ̀ ka ne ńzsé ngie mèŋ n gee ńkába mmó jʉ’ gie mèŋ n ka tè wó ma’, ḿbwɔ́’ɔ mmó jʉ’ gie mèŋ n ka tè wó pye. 27Ɔ̀ ka ne ńzsé pú’u, àkɔ́ gÿo, ɔ̀ tè gʉa ńná nkáb yɔ̀ɔn mbwó pàtáŋ nkáb pá’ mèŋ n ge gÿo gwɔ tó kẅé, àpì zébe mǒ wɔ́? 28Pi kẅé nkáb mɛ́ pàg nkÿo mbwó yé, ńnáa mbwó nyìŋ gẅie à gẅiin pàg ntsá’, 29mélà’mie nyìŋ lɔɔn ńkag tʉ̀ tá ńgẅiin mmó, mbà mé ge kẅi’i, à gẅiin à gyɔ́ɔn, tá nyìŋ ké tè kag tʉ̀ wɔ́, mbà mé ge fó mbwó yé kẅé mbàa mejʉ’ gẅie à gẅiin. 30Pi gwoon ngàŋa fà’ we tè ku’u ná tsɔ́ nò wɛ̂, ḿma’a yé pí tsɛ̀ɛ mwòon nzém. À ńnéŋe wó ńdʉa, lóŋ we ne ffó

Míŋ Nyìŋ ge gÿo tó ŋág pʉ̀a tsɛ̀ɛ njÿó

31 *Míŋ Nyìŋ ge gwɔ́ tà tóo tsɛ̀ɛ legú’ we, tà pâ mecÿɔ́’ pé gwɔ́, à ńnéŋe ná lʉŋ yé, ńgwɔ́ fùɔ gẅie tsɔ̌ tè yé cʉa. 32Melá’ ntsèm cú’te mvfò yé, à tyɛ́te pʉ̀a, éfag pá’ mbyɛ̀b mvfó faga *menjʉ̀njÿò á nà mvfó ntʉ̀ la, 33é tÿɔ́g *menjʉ̀njÿò ná gwǒŋo pwó yé ye tʉ̀, é tÿɔ́g mvfó ntʉ̀ ná gwǒŋo pwó yé ye kyɛ̀bɛ.

34Fùɔ leen ńké ńgɔɔn né pʉ̀a pie ée nà gwǒŋo pwó yé ye tʉ̀ ngie: Pi pie tá wɔ̀ɔn kěen ńnéŋ mbʉ́lè ná pi, pi tó ńkúu tsɛ̀ɛ lefùɔ sie e Ssé la lá’ nyɛte ńdɔg ńzẅí’te gẅi tà fó lénuŋe ngwòŋ. 35Á nue, nzyè la ne ńgyáŋa wɔ̀ɔn, pi náa mmó m pfɛ́, àgág yɔ́ɔn ne shÿó, pi ná ntse n nú, n daa ngʉ̀ pie kúe wɔ̀ɔn. 36N daa tè nzsǒ pi ná nzsǒ, m ma’. N da ne ńguɔ, pi tó fóŋo wɔ̀ɔn. N daa ndá tsǎŋ, pi tó ńdíe wɔ̀ɔn.

37Pʉ̀a ápɛ̌ pie pɔ́ la gÿo mmó gie Ssé ne ńkwoŋo jú’ pú’u, ńzɛ́te ngie: Cʉ̀apʉ̀a, nzyè la gyáŋa gú síŋe, tà peg gyá gú ńnáa mmó ɔ̀ pfɛ́? Ágág jú shÿó síŋe, tà peg gyá gú ńnáa ntse, ɔ̀ núu? 38Ɔ̀ laa ngʉ̀ pá’ɔɔn síŋe, tà peg kúe gú? Ɔ̀ laa tè nzsǒ síŋe tà peg ná nzsǒ ɔ̀ ma’? 39Ɔ̀ laa síŋe ne ńguɔ, ńgwɔ́ ndá tsǎŋ síŋe tà peg tó ńdíe gú? 40Àfùɔ tsɔ́’ɔ mbwó pɔ́b ngie: Mèŋ shwóŋó gẅí, kwà’ nénʉ́, mbàa yɛ̌ fʉ̀’ wɔ́ gie pi la gÿo mɔɔn menò, ná wɛ̌ mûɔ ményìŋ gẅie aa fɛ́ wɔ̀ɔn mɔ́, mbà pi lɔ̌ɔn ńgÿo pɔ́ ná mèŋ.

41É leen ké gíŋe gɔɔn mbwó pʉ̀a pie ée ná gwǒŋo pwó yé ye kyɛ̀bɛ, é ye: Pi ee megàŋ ndòon, pi fó lejʉ́ŋ mèŋ ńgʉa tà ngʉ̀a sag, ńkúu tsɛ̀ɛ mmɔ̌g gẅie é té ńdá’a ḿbyé wɔ́, é gẅie mé la nyɛte ńtí Sátà paa mecÿɔ́’ pé. 42Á nue nzyè la gyáŋa wɔ̀ɔn, pi tè náa mmó m pfɛ́ wɔ́, àgág yɔ́ɔn shÿó, pi tè ná ntse mèŋ n nú wɔ́. 43N daa ngʉ̀, pi tè wɔ̀ɔn kúe. N daa tè nzsǒ, pi tè ná nzsǒ mèŋ m ma’ wɔ́. N da ne ńguɔ, ńgíŋe ńgÿo ńgwɔ́ ndá tsǎŋ, pi tè wɔ̀ɔn líe. 44Pɔ́b yɔ́b e gíŋe ńgɔɔn ngie: Cʉ̀apʉ̀a, peg la gyá gú síŋe, nzyè ne ńgyáŋa gú, ńgyá gú síŋe, àgág jú ne shÿó, ńgyá gú síŋe, ɔ̀ gwɔ́ ngʉ̀, ńgyá gú síŋe ɔ̀ gwɔ́ tè nzsǒ, ńgyá gú síŋe, ɔ̀ ne ńguɔ, ńjú’ síŋe ɔ̀ gwɔ́ ndá tsǎŋ, peg tè gú kẅéte? 45Fùɔ tsɔ́’ɔ mbwó pɔ́b ngie: Mèŋ shwóŋó gẅí, kwà’ nénʉ́, mbàa yɛ̌ fʉ̀’ wɔ́ gie pi la tè gÿó mɔɔn menò á ná wɛ̌ mûɔ ményìŋ gẅie aa fɛ́ wɔ̀ɔn mɔ́, mbà pi la gíŋe tè mmó ná mèŋ gÿo. 46Pɔɔn pʉ̀a leen ńké ńgʉa lê jʉ’ gie pɔ́ ge lá’a tsẅé wó, é gyá pɔ́ ngɔ́’ tèmi. Pʉ̀a pie é la gÿo mmó gie e Ssé ne ńkwoŋo, pɔ́ gẅiin le gwɔ́ tèmi

Currently Selected:

Matio 25: NGBM

Highlight

Copy