Kut 14
14
1Omu biro bya Amurafeeli omugabe wa Shinaari, Arioko omugabe wa Elasari, Kedorilaomeri omugabe wa Elamu, na Tidali omugabe wa Goimi, 2abo bagabe bakateera Beera omugabe wa Sodoma, Birisha omugabe wa Gomora, Shinabi omugabe wa Aduma, Shemeberi omugabe wa Zeboimu, n'omugabe wa Beela niyo Zoari.
3Abo boona baateeranira amahe gaabo omu ruhanga rwa Sidimi, aha nyanja y'omwonyo. 4Omu myaka ikumi n'ebiri bakaba nibategyekwa Kedorilaomeri, kwonka omu mwaka gwa ikumi n'eshatu baagoma. 5Omu mwaka gwa ikumi n'ena Kedorilaomeri n'abagabe abaabaire bakwataniise nawe baahurura, baagomoora Abareera omuri Ashiterooti-Karianimu n'Abazuzimi omuri Haamu n'Abaemimi omuri Sahave-Kiriyatamu, 6n'Abahoori b'omu nsi y'enshozi eya Seiri, okuhika Eliparani aharikwatana n'eihamba. 7Bwanyima baakubuuka, baahika Enimishipate (niyo Kadeshi), baakubuura ensi zoona ez'Abaamaleki n'ez'Abaamori abaabaire batwire omuri Hazazonitamari. 8Bwanyima omugabe wa Sodoma n'omugabe wa Gomora n'owa Aduma n'owa Zeboimu n'owa Beela (niyo Zoari), bakahurura, baatengyera orugamba omu ruhanga rwa Sidimi, 9kuteera Kedorilaomeri omugabe wa Elamu, Tidali omugabe wa Goimi, Amurafeeli omugabe wa Shinaari, na Arioko omugabe wa Elasari; batyo abagabe bana baarwanisa bataano. 10Obwo oruhanga rwa Sidimi rukaba rwijwire ebiina bya koroto. Mbwenu abagabe, owa Sodoma n'owa Gomora ku baahungire baabigwamu; abaatsigaraho baahungira omu nshozi. 11Abazigu nikwo kunyaga ebintu byona eby'omuri Sodoma na Gomora, n'ebyokurya byamwo byona, batyo bakagyenda. 12Baakwata na Looti mutabani wa murumuna wa Aburahamu, owaabaire atwire omuri Sodoma, baamutwara n'ebintu bye; batyo baagyenda.
13Bwanyima omwe aha baahungire yaija yaabigambira Aburahamu Omuheburaayo, owaabaire atwire haihi n'emivure ya Mamure. Ogwo muntu akaba ari Omuamori, murumuna wa Esikooli na Aneri, abaabaire bakwataniise na Aburahamu omu by'orugamba. 14Aburahamu, ku yaahuriire ngu mwene waabo bamutwaire ari enkwatwa, yaahurura n'abashaija be enkwata-ngabo magana ashatu na ikumi na munaana, abaazaariirwe omu ka ye, yaagyenda abakuratiire, yaahika Daani. 15Ku yaahikireyo yaabaganisa amahe ge kubateera nyekiro. Mpaho we n'engabo ze baabasingura, baababinga, baabahitsya Hoba, aha bukiizi bwa bumosho obwa Damasiko. 16Bwanyima yaagarura ebintu byona ebi baabaire banyagire, kandi yaagarura na Looti mwene ishe, hamwe n'ebintu n'abakazi n'abandi bantu abaabaire bakwatsirwe.
Ebya Melikizedeki
17Aburahamu ku yaagarukire naaruga kusingura Kedorilaomeri n'abagabe abu yaabaire akwataniise nabo, omugabe wa Sodoma yaija kumubugana omu ruhanga rwa Shave (hati orurikwetwa Oruhanga rw'Omugabe). 18Reero Melikizedeki omugabe wa Saleemu, kandi omuhongyerezi wa Ruhanga Rukiraboona, yaareeta omugaati na viino. 19Ku yaabaire naabisiimira, yaagira ati:
Ruhanga Rukiraboona, omuhangi
w'eiguru n'ensi, ahe Aburahamu omugisha;
20kandi Ruhanga Rukiraboona,
okusingwize abazigu baawe, ahimbisibwe.
Na Aburahamu yaamuha kimwe kya ikumi ky'eminyago yoona. 21Mpaho omugabe wa Sodoma yaagira Aburahamu ati: Mbwenu ompe abantu, reero iwe eminyago ogyetwarire. 22Kwonka Aburahamu yaagira ogwo mugabe wa Sodoma ati: Nindahira Nyakubaho Ruhanga Rukiraboona, omuhangi w'eiguru n'ensi, 23ku ntarikwija kutwara kahuuzi, nobu kaakuba akakoba k'enkaito, nari ekintu kyona ekyawe, otakaagira oti: Niinye ntungiise Aburahamu. 24Nyowe tindikwija kutwara kantu habwangye, kureka ebi abatsigazi bariire, hamwe n'omugabo gw'abashaija bu naagyenzire nabo; nikwo kugira ngu Aneri na Eshikoli na Mamure batware omugabo gwabo.
Ruhanga okuraganisa Aburahamu n'okumukorera endagaano
Currently Selected:
Kut 14: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
