Kut 13
13
1Aburahamu akainamuka, yaaruga Misiri, we n'omukazi we, na byona ebi yaabaire aine na Looti ari hamwe nawe, baataaha Negebu.
2Mbwenu Aburahamu akaba atungire munonga amatungo n'efeeza n'ezaabu. 3Atyo yaaruga omuri Negebu, yaagumizamu yaahika Beteli, omu mwanya ogu eihema rye ryabaire ririmu bwabiso, rwagati ya Beteli na Aayi, 4omu mwanya ogu yaayombekiremu eitambiro omu kubanza. Haza okwo Aburahamu yaaramizayo Nyakubaho. 5Reero Looti owaagyenzire na Aburahamu, nawe akaba aine amasyo g'entaama n'ag'ente n'amahema. 6N'ahabw'ekyo egyo nsi ekaba etarikubahika bombi batuuraine, ahabw'okuba amatungo gaabo gakaba gari maingi munonga, batarikubaasa kutuura kumwe. 7Kandi abariisa ba Aburahamu n'aba Looti bakagirirana empaka. Omu bunaku obwo, Abanyakanaani n'Abaperizi bakaba batwire omuri egyo nsi.
8Reero Aburahamu yaagira Looti ati: Reeba nyowe naiwe twine obuzaare. Mbwenu ka turekye kugirirana empaka, abashumba baawe n'abangye bakaguma nibatongana. 9Mbwenu egi nsi yoona tekwanami omu maisho? Taana naanye. Ku oraatoore orubaju rwa bumosho, naanye niinyija kugarura orwa buryo, nari shi ku oraatoore orubaju rwa buryo, naanye ndabugarure orwa bumosho.
10Looti atyo ainamura amaisho, areeba omwegyeego gwa Yorudaani ogurikugarura Zoari gubobeire hoona. Obwo Nyakubaho atakacwekyereize Sodoma na Gomora; guri nk'omusiri gwa Nyakubaho, nari nk'ensi ya Misiri. 11Looti atyo ayetooranira oruhanga rwa Yorudaani rwona, kandi atoora ogwa burugwa-izooba; bataanuukana batyo. 12Aburahamu atuura omu nsi ya Kanaani, na Looti atuura omu ndembo z'omuri orwo ruhanga. Arugaho afurura eihema rye ariteera haihi na Sodoma. 13Obwo abantu ba Sodoma bakaba bari enyabibi, nibacumura munoga ahari Mukama.
Ruhanga okuraganisa Aburahamu
14Looti ku yaaherize kutaana na Aburahamu, Nyakubaho yaagira Aburahamu ati: Naga amaisho nooyema ah'ori, oreebe orubaju rw'obukiizi-bwa-bumosho n'orw'obwa buryo, burugwa-izooba na burengyerwa-izooba. 15Manya egyo nsi yoona ei orikureeba, ndyagikuha iwe na baijukuru baawe ebiro byona. 16Ndyakanyisa baijukuru baawe, babe nk'omucuucu gw'ahansi. Omuntu ku yaakubara omucuucu gw'aha nsi, na baijukuru baawe bakaabarwa. 17Mbwenu imuka ogyende nooraba omuri egyo nsi yoona, ahabw'okuba ndyagikuha. 18Aburahamu atyo afurura eihema rye, agyenda atuura haihi n'emivure ya Mamure omuri Heburooni; ayombekyerayo Nyakubaho eitambiro.
Aburahamu okwiha Looti omu bazigu
Currently Selected:
Kut 13: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
