Kut 16
16
1Mbwenu Sarai muka Aburahamu akaba atamuzaariire baana. Ogwo mukazi akaba aine omuzaana Omunyamisiri, orikwetwa Hagari. 2Mpaho Sarai yaagira Aburahamu ati: Reeba Nyakubaho akaanyima oruzaaro; mbwenu irooko obyame n'omuzaana wangye, obundi akanzaarira abaana. Atyo Aburahamu aikiriza eki Sarai yaamugambira. 3Mbwenu Aburahamu ku yaabaire amazire emyaka ikumi omu nsi ya Kanaani, Sarai muka Aburahamu ogwo yaatwara Hagari Omunyamisiri omuzaana we, yaamuha Aburahamu iba kuba omukazi we. 4Nawe yaabyama na Hagari: n'onu yaabaka enda, kwonka ku yaamanyire ngu aine enda, yaatandika kugaya mugore we. 5Sarai nikwo kugira Aburahamu ati: Nkaahenwa ki bakugaya nk'oku bangayire! Nkakuha omuzaana wangye kukufumbata, mbwenu reeba ku amanyire ngu abakire enda, yaatandika kungaya. Nyakubaho k'abe niwe yaacwa orubanja rwangye naiwe! 6Aburahamu nikwo kumugira ati: Reeba omuzaana waawe niiwe omwineho obushoboorozi; omukore nk'oku orikwenda. Sarai atyo atandika kumwitsa omwaga, n'onu nikwo kumuhunga.
7Bwanyima maraika wa Nyakubaho akamushanga omu ihamba aha iziba eriri aha muhanda gurikutoora Shuuri, 8yaamugira ati: Hagari omuzaana wa Sarai, nooruga hi, kandi nooza hi? Onu ati: Nimpunga mugore wangye Sarai. 9Maraika wa Nyakubaho nawe amugira ati: Garuka ahari mugore waawe, haza omworobere. 10Maraika wa Nyakubaho agaruka amugira ati: Ndyakanyisa munonga baijukuru baawe, bareme eibara ahabw'obwingi. 11Kandi maraika wa Nyakubaho amugira ati: Reeba oine enda, kandi oryazaara omwana omwojo, omwete Ishimaeli; ahabw'okuba Nyakubaho ahuriire okuborooga kw'okwitwa kubi kwawe. 12Ogwo mwana aryaba nk'enturegye omu bantu, arwanise ibara muntu, na buri muntu amurwanise, kandi aryaguma atwire hangahari abaabo boona.
13Mpaho Hagari ayeta Nyakubaho owaagambire nawe eiziina “Niiwe Ruhanga oreeba”; ahabw'okuba Hagari akagira ati: Buzimazima naareeba Ruhanga, haza ku naamureeba naaguma mpuriire. 14Nikyo eryo iziba ry'ahagati ya Kadeshi na Beredi ryeterwa Beeri-lahai-roi.#16:14 Beeri-lahai-roi: Amakuru, eiziba ry'Ogwo ohuriire, ondeeba.
15Bwanyima Hagari akazaarira Aburahamu omwana omwojo; Aburahamu ogwo mwana omwojo ou Hagari yaazaire yaamweta Ishimaeli. 16Obu Hagari yaazaarira Aburahamu Ishimaeli, Aburahamu akaba ahikize emyaka makumi munaana na mukaaga y'obukuru.
Ruhanga okuhindura Aburahamu eiziina
Currently Selected:
Kut 16: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
