Kut 17
17
1Aburahamu ku yaabaire ahikize emyaka makumi mwenda na mwenda y'obukuru, Ruhanga yaamubonekyera, yaamugira ati: Niinye Ruhanga omushoboorozi wa byona. Guma otwaze gye omu maisho gangye, otaine ky'okuhaahuuzibwa. 2Naanye ndyakora endagaano yangye naiwe, nkukanyise munonga.
3Mpaho Aburahamu yaagwa ahansi ajuumaire, na Ruhanga yaamugira ati: 4Reeba, naakora naiwe endagaano, oryaba ishenkuru w'amahanga maingi. 5Eiziina ryawe tiryakiba Aburahamu, kureka niriija kuba Aburahamu, ahabw'okuba naakuhindura ishenkuru w'amahanga maingi. 6Ndyakuzaarukanisa munonga, nkwihemu amahanga, n'abagabe bakukomookyemu. 7Ndyahamya endagaano yangye naiwe, kandi ngihamye na baijukuru baawe waarugireho omu nzaaro zaabo zoona. Ebe endagaano etarihwaho, Nyowe okuba Ruhanga waawe kandi owa baijukuru baawe iwe waarugireho. 8Ndyakuha, mpe na baijukuru baawe abarikukurata, ensi ei oshuuhuukiiremu, ensi yoona eya Kanaani, kuba eyaanyu ebiro byona; kandi ndyaguma ndi Ruhanga waabo.
Ruhanga okuragiira Aburahamu kusharwa
9Bwanyima Ruhanga akagambira Aburahamu, ati: Mbwenu iwe oryaguma orinde endagaano yangye, iwe na baijukuru baawe abarikukurata omu nzaaro zaabo zoona. 10Egi niyo ndagaano yangye ei origuma noorinda ahagati yangye naiwe na baijukuru baawe abarikukurata. Buri mushaija weena omuriimwe aryasharwa. 11Muryasharwa ekikoba ky'omubiri gwanyu, kabe akamanyiso k'endagaano yangye naimwe. 12Omwojo weena omuriimwe omu nzaaro zaanyu zoona ku arihitsya ebiro munaana azairwe, asharwe; yaaba azairwe omu ka yaanyu, nari mumuguzire empiiha aha munyaihanga otari w'omu ruzaaro rwawe. 13Abarizaarwa omu ka yaawe, n'abaguzirwe empiiha zaawe boona basharwe, endagaano yangye etyo ebe aha mubiri gwanyu endagaano etarihwaho. 14Omushaija weena otashazirwe ou ekikoba kye ky'omubiri kiriba kitashazirwe, aryacuubwa omu ihanga rye, ahabw'okuba aryaba aitsire endagaano yangye.
Ruhanga okuraganisa Aburahamu okuzaara Isaaka
15Kandi Ruhanga akagira Aburahamu ati: Omukazi waawe Sarai otarimweta Sarai obundi, kureka eiziina rye riryaba Saara. 16Ndyamuha omugisha akuzaarire omwana omwojo. Ndyamuha omugisha abe nyinenkuru w'amahanga, abagabe b'amahanga bamukomookyeho. 17Aburahamu atyo agwa ajuumaire, haza asheka naayebuuza ati: Ebyo omushaija w'emyaka igana naabaasa kuzaara omwana? 18Mpaho Aburahamu agira Ruhanga, ati: Ku okureka Ishimaeli akaba niwe yaaguma aine amagara omu maisho gaawe! 19Ruhanga amugarukamu ati: Ngaaha, kureka Saara niwe arikuzaarira omwana omwojo, omwete Isaaka. Ndyahamya endagaano yangye nawe, ebe endagaano etarihwaho aha baijukuru abarimukurata. 20Kandi ahabwa Ishimaeli, naakuhurira. Reeba nawe ndyamuha omugisha, mmuzaarukanise, mmukanyise munonga. Aryaba ishenkuru w'abategyeki ikumi na babiri, kandi ndyamwihamu eihanga rihango. 21Kwonka endagaano yangye ndyagihamiza ahari Isaaka, ou Saara arikuzaarira omu bunaku nk'obu omwaka ogurikwija.
Aburahamu okusharwa n'eka ye yoona
22Ruhanga ku yaaherize kugaaniira na Aburahamu, Ruhanga ogwo yainamuka omu iguru, yaatsigaho Aburahamu. 23Bwanyima Aburahamu yaatwara Ishimaeli omutabani n'abahuuku boona abaazaariirwe omu ka ye, nari abu yaaguzire empiiha ze, oyetwa omushaija weena ow'omu bashaija b'omu ka ya Aburahamu, yaabasharaho ekikoba ky'omubiri gwabo eryo izooba nk'oku Ruhanga yaamuragiire. 24Aburahamu obu yaasharwa ekikoba ky'omubiri gwe akaba ahikize emyaka makumi mwenda na mwenda y'obukuru, 25kandi omutabani Ishimaeli akaba aine emyaka ikumi n'eshatu obu yaasharwa. 26Eryo izooba Aburahamu na Ishimaeli omutabani bakasharwa. 27Kandi abashaija boona ab'omu ka ye, abaazaariirwemu, n'abaaguzirwe empiiha aha banyamahanga, nabo baasharwa hamwe nawe.
Ruhanga okuhamya endagaano y'okuha Aburahamu omwana
Currently Selected:
Kut 17: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
