Kut 18
18
1Ruhanga akabonekyera Aburahamu aha mivure ya Mamure, ashutami aha muryango gw'eihema rye, omu ihangwe. 2Ku yaimukize ati amaisho, yaareeba abashaija bashatu bamwemereire omu maisho. Ku yaabareebire, yairuka naaruga aha muryango gw'eihema kubabugana; yainama ahansi kubatangirira. 3Yaagira ati: Nyakubaho wangye, ku oraabe nooreeba kinshemereire, naakweshengyereza otampingura nyowe omuheereza waawe. 4Ka bareete otwizi munaabe ebigyere, mube muhuumwireho ahansi y'omuti, 5naanye mbareetere akagaati, mugarukwemu amaani, haza mubone kugyenda. Manya mwahunguka aha muheereza waanyu. Nabo bamugira bati: Gira nk'oku waagamba. 6Aburahamu atyo ayehuuta naataaha omu ihema, ashangamu Saara, amugira ati: Rahuka otebeekanise encuro ishatu z'esaano y'obunono, ozikande, oziteekyemu otugaati tunuzire. 7Atyo Aburahamu airuka, aza omu busyo bw'ente, aihamu enyana nto nungi, agiha omuheereza we, n'onu arahuka kugiboneza. 8Bwanyima Aburahamu abatwarira amajuta n'amate n'enyama y'enyana ei yaaboneza, abibata omu maisho, kandi aguma abeemereire aha rubaju, nibariira ahansi y'ogwo muti.
9Reero bamubuuza bati: Saara omukazi waawe ari nkahi? Abagarukamu ati: Ari omu ihema. 10Nyakubaho amugira ati: Omwaka ogurikwija, omu bunaku nk'obu, tindibura kugaruka ah'ori, kandi na Saara omukazi waawe aryazaara omwana omwojo. Mbwenu obwo, Saara akaba ari aha muryango gw'eihema enyima ya Aburahamu, abategire okutu. 11Obwo Aburahamu na Saara bakaba bakuzire, bahikize engingo za bukuru, na Saara atakiza mu kwezi nk'oku abakazi baba. 12Saara nikwo kweshekyera, akagira ati: Mbwenu obu naakaikwire, na ibanye yaabaire eboote, omubiri gwangye nigukibaasa kushemerererwa eby'obushwere? 13Nyakubaho atyo abuuza Aburahamu ati: Ahabw'enki Saara yaasheka, kandi akagira ati: Kwokwo, ebyo ndi ow'okuzaara omwana obu naakaikwire? 14Mbwenu shi, hariho ekirema Nyakubaho? Manya omwaka ogurikwija, omu bunaku nk'obu, ndyagaruka ah'ori, na Saara azaare omutabani. 15Kwonka Saara ahabw'okutiina ayehakana naagira ati: Nyowe tinaasheka; n'onu amugarukamu ati: Ngaaha! Okusheka kwo waasheka.
Ruhanga okumanyisa Aburahamu eby'okucwekyereza Sodoma
16Bwanyima abo bashaija bakarugayo, baahika aharikureebana na Sodoma; na Aburahamu abashendekyereize kubooreka omuhanda. 17Nyakubaho yaagira ati: Mbwenu nsherekye Aburahamu eki ndikuza kukora? 18Manya Aburahamu ogu aryakomookwamu eihanga rikuru kandi ery'amaani, n'amahanga goona ag'omu nsi aryagahaisa omugisha. 19Ngaaha! Nkamutoorana ngu agume aragiire abaana be n'ab'eka ye abarimukurata, bagume nibaanyorobera nibakora ebihikire kandi eby'oburyo; Nyowe Nyakubaho mbone kuhikiiririza Aburahamu ebi naamuraganiise. 20Bwanyima Mukama yaagira ati: Ahabw'okuba orwari rw'abarikuborooga nibeetomboitera Sodoma na Gomora ni rwingi, kandi ekibi ky'ab'ezo ndembo kirengyesereize, 21n'ahabw'ekyo niinyija kushuuma, ndeebe yaaba ebi barikukora biri nk'oku abarikubeetomboitera babaregire; nari ku kiraabe kitari kwo, nabwo nkimanye.
Aburahamu okweshengyerereza aba Sodoma
22Batyo abo bashaija baarugayo, baagyenda baatoora ogurikuza Sodoma; Aburahamu we yaaguma ayemereire omu maisho ga Nyakubaho. 23Bwanyima Aburahamu akairira haihi Nyakubaho, yaamubuuza ati: Ebyo buzimazima noija kucwekyereza abahikiriire hamwe n'enyabibi? 24Mbwenu omu rurembo orwo ku haakubamu abahikiriire makumi ataano, ogwo mwanya okaagucwekyereza; oreka kugusaasira ahabw'abahikiriire makumi ataano abagurimu? 25Nikikabure! Iwe kukora ekintu nk'ekyo, okwita abahikiriire hamwe n'enyabibi, abahikiriire bakatwazibwa orugyero rumwe n'ababi! Ekyo nikikabure ahariiwe! Nk'oku ori Omuramuzi w'ensi yoona torikwija kukora ebihikire? 26Na Nyakubaho yaamugarukamu ati: Ku ndaashangye omu rurembo rwa Sodoma abahikiriire makumi ataano, niinyija kusaasira ogwo mwanya gwona ahabwabo.
27Aburahamu agarukamu ati: Nyowe omucuucu kandi eiju onsaasire okwehanga nkagira eki naakugambira, iwe Nyakubaho wangye. 28Mbwenu aha bahikiriire makumi ataano, ku haakuburaho bataano? Obwo nabwo okaacwekyereza orurembo rwona ahabw'okuburaho bataano? Nawe amugarukamu ati: Tindikwija kurucwekyereza, naaba nshangiremu makumi ana na bataano. 29Atyo agaruka amugambira naagira ati: Mbwenu shi, ku haakushangwamu makumi ana? Onu amugarukamu ati: ahabw'abo amakumi ana, tindikwija kukikora.
30Bwanyima agira ati: Nyakubaho wangye otaguubwa kubi, naakweshengyereza ondekye ngambe. Mbwenu ku haakushangwamu makumi ashatu? N'onu amugarukamu ati: Tindikwija kukikora, ku ndaashangyemu makumi ashatu. 31Ayongyera agira ati: Reeba, naayehanga kugira eki naakugambira iwe Nyakubaho. Mbwenu shi, ku haakushangwamu makumi abiri? Nawe amugarukamu ati: Ahabw'abo amakumi abiri, tindikwija kurucwekyereza. 32Bwanyima amugira ati: Nyakubaho wangye otaguubwa kubi, naagaruka kugamba, kwonka omurundi ogu gwonka. Mbwenu shi, ku haakushangwamu ikumi? Nawe amugarukamu ati: Ahabw'abo eikumi, tindikwija kurucwekyereza.
33Nyakubaho ku yaaherize kugambira atyo Aburahamu, yaayegyendera, na Aburahamu yaagarukayo owe omuka.
Aba Sodoma okwenda kukora eby'enshoni ahari baamaraika
Currently Selected:
Kut 18: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
