Kut 20
20
1Aburahamu akaruga Mamure, yaatoora ogurikuza omu nsi ya Negebu, yaatuura rwagati ya Kadeshi na Shuuri, bwanyima yaashuuhuukira Gerari. 2Haza Aburahamu ogwo yaagamba ahari Sara omukazi we, ati: Ni munyaanyazi. Na Abimeleki omugabe wa Gerari yaatuma, baamureetera Saara. 3Mbwenu Ruhanga nyekiro yaabonekyera Abimeleki omu kirooto, yaamugira ati: Reeba waafa waazira omukazi ou otwaire, ahabw'okuba ni muk'omushaija. 4Kwonka Abimeleki akaba atakahikire ogwo mukazi; nikwo kugira ati: Mukama wangye, hoona shi, oite eihanga ritaine rubanja? 5Tiwe anyegambiriire ati: Ni munyaanyazi? N'onu nawe akagira ati: Ni munyaanyazi? Manya nyowe ekyo nkikoreise omutima gw'amazima, n'engaro zitaine rubanja. 6Mpaho Ruhanga omuri ekyo kirooto, amugira ati: Eego, nimmanya ku ekyo okikozire n'omutima gw'amazima, kandi niinye nkurinzire kutakora kibi ky'okuncumuraho, nikyo ntakurekyeire kumukoraho. 7Mbwenu nu garurira ogwo mushaija omukazi we, ahabw'okuba n'omurangi, haza naija kukushabira ogumeho. Kwonka ku oraabe otamumugaruriire, omanye buzimazima ku ori ow'okufa iwe n'abaawe boona.
8Mpaho Abimeleki aguruka kare omu kasheeshe, ayeta abairu be boona abibagambira byona, abo bantu batiina munonga. 9Bwanyima Abimeleki ayeta Aburahamu, amugira ati: Otutuzire ki? Nkucumwireho ki waaza kwenda kungwisiza akagwe, nyowe n'obugabe bwangye? Manya onkoreire ebitakorwa. 10Abimeleki agaruka ateekurana Aburahamu, ati: Beitu waaza kukora ekyo, obaire nooteekateeka ki? 11Aburahamu amugira ati: Ekinkoreise ekyo n'ahabw'okuteekateeka ngu omu mwanya ogu tiharimu kutiina Ruhanga n'akakye, kandi ngu nibaija kuunyita banture omukazi wangye. 12Kwonka orundi rubaju, ni munyaanyazi orikuzaarwa tata, otarikuzaarwa maawe, nikyo yaabeeraire omukazi wangye. 13Mbwenu Ruhanga ku yaanyihire omu ka ya tata, yampindura ow'okuzengyerera, naagira ogu mukazi nti: Eki nikyo ky'embabazi eki oshemereire kunkorera. Ahi turaahikye hoona ogume ongambeho oti. Ni munyaanyazi. 14Bwanyima Abimeleki areeta entaama n'ente n'abahuuku n'abazaana, abiha Aburahamu kandi amugarurira omukazi we Saara. 15Reero Abimeleki agira ati: Reeba ensi yangye ekuri omu maisho; tuura ah'oraasiime hoona. 16Kandi agira Saara ati: Reeba munyaanyako naamuha ebicweka by'efeeza rukumi, kukwihaho ekihemu omu maisho g'abari hamwe naiwe boona, abantu boona bamanyireho ku otaine ki oshobize. 17Bwanyima Aburahamu ashaba Ruhanga, na Ruhanga akiza Abimeleki n'omukazi we n'abazaana baabo bazaara abaana. 18Manya Nyakubaho akaba aimire oruzaaro ab'eka ya Abimeleki, naabatura Saara muka Aburahamu.
Okuzaarwa kwa Isaaka
Currently Selected:
Kut 20: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
