Kut 21
21
1Nyakubaho akagirira Saara embabazi nk'oku yaagambire, yaamukorera nk'oku yaaraganiise. 2Saara yaabaka enda, yaazaarira Aburahamu omutabani omu myaka ye ey'obugurusi, omu bunaku obu Nyakubaho yaabaire amugambiire. 3Aburahamu, omwana we, ou Saara yaamuzaariire, yaamweta eiziina Isaaka. 4Kandi Aburahamu, ogwo mutabani Isaaka yaamushara ahikize ebiro munaana azairwe, nk'oku Ruhanga yaabaire amuragiire. 5Aburahamu obu azaara omutabani Isaaka, akaba ahikize emyaka igana y'obukuru. 6Na Saara nikwo kugira ati: Ruhanga anshekize, n'oraakihurire weena naija kusheka naanye. 7Agaruka agira ati: Mbwenu n'oha owaakugizire Aburahamu ngu Saara nawe aryayontsya abaana? Kwonka mbwenu omu bugurusi bwe mmuzaariire omwana omwojo.
Okubingwa kwa Hagari na Ishimaeli
8Omwana Isaaka akakura yaacuuka; Aburahamu yaateeka obugyenyi buhango aha izooba ri yaacuukiireho. 9Mbwenu obundi Saara akareeba mutabani wa Hagari Omunyamisirikazi, ou Aburahamu yaabaire amuzaireho, naazaana n'omutabani Isaaka. 10Yaagira Aburahamu ati: Binga ogu muzaana n'omutabani, ahabw'okuba mutabani w'ogu muzaana tarihungura hamwe na mutabani wangye Isaaka. 11Ekyo kikagwisa kubi Aburahamu ahabw'omutabani Ishimaeli. 12Kwonka Ruhanga yaagira Aburahamu ati: Otaguubwa kubi ahabw'ogwo mwojo n'ahabw'omuzaana waawe. Kyona eki Saara araakugambire obe nikyo waakora, ahabw'okuba omuri Isaaka nimwo baijukuru baawe baryetererwa. 13Kandi hoona mutabani w'omuzaana waawe ndyamwihamu eihanga, ahabw'okuba nawe n'oruzaaro rwawe. 14Mpaho Aburahamu aimuka kare omu kasheeshe, aihayo omugaati n'endyanga y'amaizi, abiha Hagari, amuheekyesa omwana we amwohereza. Hagari agyenda, aguma naazengyerera omu ihamba rya Beerisheba. 15Amaizi ku gaahwaire omu ndyanga, yaatsiga yaarambika ogwo mwana omunda y'orushaka. 16Yaagyenda yaamushutama hangahari nk'ah'omwambi gugarukira baagurasha; agira ati: Ka ndekye kureeba omwana wangye naakaba! Mbwenu ku yaabaire akishutami ashungaine nawe; omwana yaimutsya eiraka yaarira. 17Ruhanga nikwo kuhurira eiraka ry'ogwo mwana, na Maraika wa Ruhanga omu iguru akeeta Hagari akamugira ati: Waaba ota, Hagari? Huumura! Manya Ruhanga yaahurira eiraka ry'ogwo mwana ahu ari. 18Mbwenu imuka, oiheho ogwo mwana omubumbatire, ahabw'okuba ndyamwihamu eihanga rihango. 19Bwanyima Ruhanga yaamwigura amaisho, yaareeba eiziba, yaagyenda yaijuza endyanga ye amaizi, yaaha omwana ekyokunywa.
20Ruhanga yaaguma n'ogwo mwojo; yaakura, yaatuura omu ihamba, yaaba omushaija enkwata-buta. 21Akatuura omu ihamba rya Parani, na nyina yaamushwererera omukazi naamwiha omu nsi ya Misiri.
Aburahamu okukora endagaano na Abimeleki
22Omuri ago magingo, Abimeleki, aine Fikoli omukuru w'eihe rye, akagira Aburahamu ati: Ruhanga ari hamwe naiwe omu bi orikukora byona. 23Mbwenu nu ndahirira Ruhanga aha ku otaringobeza, nobu baakuba abaana bangye nari baijukuru bangye; kureka ngu nk'oku naakutwarize n'omutima murungi, naiwe obe nikwo wantwaza, kandi otwaze otyo egi nsi ei oshuuhuukiiremu. 24Aburahamu nawe yaamugira ati: Eego naaza kurahira.
25Bwanyima Aburahamu yaahaahuuza Abimeleki ahabw'eiziba rye eri abairu b'Abimeleki baanyagire. 26Abimeleki yaamwehohoora ati: Ekyo ka ntarikumanya owaakikozire. Naiwe torakingambiire, kandi tinkakihuriraga okuhitsya eri izooba. 27Mpaho Aburahamu agira entaama n'ente abiha Abimeleki; haza bombi bakorerana endagaano. 28Reero Aburahamu ashoroora omu busyo bwe abaagazi b'entaama mushanju; 29na Abimeleki abuuza Aburahamu ati: Abo baagazi b'entaama mushanju abu waashoroora n'ab'enki? 30Onu amugarukamu ati: Aba baagazi b'entaama mushanju obatware, naabakuha obone kuhamya ku niinye naafukwire eri iziba. 31Ogwo mwanya nikyo gwayeteirwe Beerisheba, ahabw'okuba bombi bakarahirirayo.
32Batyo baakora endagaano bari Beerisheba. Bwanyima Abimeleki na Fikoli omukuru w'amahe ge baimutsya baagaruka omu nsi y'Abafilisiti. 33Aburahamu nawe yaabyara omuti omushebeya omuri Beerisheba, yaaramizayo Mukama Ruhanga otahwaho. 34Bwanyima Aburahamu yaamara omwanya muraingwa omu nsi y'Abafilisiti ashuuhuukiireyo.
Aburahamu okuragiirwa kutamba Isaaka
Currently Selected:
Kut 21: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
