Kut 22
22
1Ebyo ku byahwaire, Ruhanga yaagyeza Aburahamu, yaamweta ati: Aburahamu? Onu yaamwetaba ati, Ndi aha, Nyamuhanga! 2Yaamugira ati: Twara mutabani waawe Isaaka, omwana waawe nyamunegyere ou okunda; haza oze omu nsi ya Moriya, omuntambirire aha rushozi oru ndaakworekye; abe ekitambo ekicwekize. 3Atyo Aburahamu yaimuka kare omu kasheeshe, yaatematema enku z'okuhemberera ekitambo, yaatandiika endogoya, yaatwara babiri aha batsigazi be, hamwe n'omutabani Isaaka; yaimutsya yaaza omu mwanya ogu Ruhanga yaabaire amugambiire. 4Aha izooba rya kashatu Aburahamu yaimutsya amaisho, yaarangiza hare ogwo mwanya. 5Mpaho Aburahamu agira abo batsigazi be ati: Mugume aha n'endogoya, nyowe n'ogu mwojo tuze kuriya turamye, reero tugarukye tubashangye aha. 6Aburahamu atyo akiriza enku z'okuhembereza ekitambo, azeekoreza Isaaka omutabani; kandi we akwata omu ngaro omuriro n'omusyo gw'endiga; bombi bagyenda kumwe. 7Mbwenu Isaaka ayakura Aburahamu ishe ati: Taata! Onu amwetaba ati: N'enki mwana wangye! Amubuuza ati: Beitu omuriro n'enku ka tubiine, mbwenu omwana gw'entaama ogw'ekitambo ky'okucwetsya gurahi? 8Aburahamu amugarukamu ati: Mwana wangye, Ruhanga niwe araayebonere omwana gw'entaama ogw'ekitambo ekicwekize. Batyo bombi bagumizamu.
9Ku baahikire omu mwanya ogu Ruhanga yaabaire amugambiire, Aburahamu yaayombekayo eitambiro, yaaritungikaho enku, reero yaaboha omutabani Isaaka, yaamurambika ahari eryo eitambiro aha nku. 10Bwanyima Aburahamu yaagorora omukono yaakwata omusyo kurezya omutabani. 11Kwonka maraika wa Nyakubaho yaamweta naayema omu iguru, naagira ati: Aburahamu, Aburahamu! Onu amwetaba ati: Ndi aha, Nyamuhanga! 12Onu amugira ati: Otabangira ogwo mwojo omukono, nari kugira eki waamukora. Manya mbwenu naamanya ku orikutiina Ruhanga, ahabw'okuba tiwaanyima mwana waawe omwe nyamunegyere. 13Mpaho Aburahamu ku yaimukize amaisho, ahonaaho yaareeba enyima ye hariyo empaya y'entaama ekwatsirwe ebikamba omu mahembe; atyo agyenda aihayo egyo mpaya y'entaama, agitamba kuba ekitambo ekicwekize omu mwanya gw'omutabani. 14Aburahamu nikwo kweta ogwo mwanya, Nyakubaho niwe araayebonere; nk'oku kigambwa n'eri izooba kiti: Aha rushozi rwa Nyakubaho niho kiraabonerwe.
Ruhanga okugaruka kuraganisa Aburahamu omugisha
15Kandi maraika wa Nyakubaho akeema omu iguru, yaayakura Aburahamu omurundi gwa kabiri, 16yaamugira ati: Mukama naagira ati: Naayerahira, ahabw'okukora ekyo, otaime mwana waawe omwe nyamunegyere, 17buzimazima ndyakuha omugisha, nkanyise baijukuru baawe, babe nk'enyonyoozi z'omu iguru nari nk'omusheenyi gw'aha mwegyeego gw'enyanja. Haza baijukuru baawe abo baryakubuura amarembo g'abazigu baabo. 18Kandi omuri baijukuru baawe, amahanga goona ag'omu nsi nimwo gariheerwa omugisha, ahabw'okuba waikiriza kukora eki naakuragiira. 19Bwanyima Aburahamu yaagaruka ah'abatsigazi be baabaire bari, batyo baimutsya, baaza kumwe Beerisheba. Beerisheba egyo Aburahamu yaaba niyo yaatuura.
Oruzaaro rwa Nahori
20Ebyo ku byahwaire, baagambira Aburahamu bati: Manya Milika nawe azaariire Nahori murumuna waawe abaana aba: 21Uuzi niwe mujigaijo, Buuzi n'omurumuna, na Kemueli ishe wa Aramu, 22na Dedesi, Haazo, Pilidaashi, Gidilaafi, na Beetueli. 23Beetueli ogwo niwe yaazaire Rebeka. Abo omunaana nibo Milika yaazaariire Nahori murumuna wa Aburahamu. 24Reero kandi omukazi we ekinyanshunju owaabaire naayetwa Reuma, akazaara Teeba, Gahamu, Tahashi, na Maaka.
Okufa kwa Saara
Currently Selected:
Kut 22: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
