Kut 23
23
1Saara akamara emyaka igana na makumi abiri na mushanju y'amagara ge. 2Saara akagwa Kiriyataraba, niyo Heburooni, omu nsi ya Kanaani; Aburahamu yaija kumucurira n'okumuririra.
3Bwanyima Aburahamu yaaruga aha mufu we, yaagira Abahiiti ati: 4Ndi omunyamahanga kandi omushuuhuuki omuriimwe, nimumpe omuriimwe omwanya gw'okuziikamu, mbone kuziika omufu wangye, andugye omu maisho. 5Abahiiti baagarukamu Aburahamu, bati: 6Mukama waitu, tuhurire, manya ori omuntu mukuru rugambwa omuriitwe. Ziika omufu waawe ah'oraasiime omu bituuro byaitu, tihariho n'omwe omuriitwe oraakwime ekituuro kye, nari kukuzibira kuziikamu omufu waawe. 7Atyo Aburahamu aimuka, ainama omu maisho g'Abahiiti, bakama b'egyo nsi, 8abagira ati: Ku muraabe mwaikiriza ngu nziikye omufu wangye, andugye omu maisho; nimumpurire, muunyeshengyerereze Efurooni mwene Soohari, 9abone kumpa enyanga ya Makipeela ei aine; eri aha muheru gw'ekibanja kye. Agingurize omu maisho gaanyu obuguzi bwayo bwona, gube omwanya gwangye gw'okuziikamu. 10Mbwenu obwo Efurooni akaba ashutami omuri abo Bahiiti. Efurooni Omuhiiti nikwo kugarukamu Aburahamu, Abahiiti boona abaabaire baizire aha irembo ry'orurembo rwe bahuriire, ati: 11Ngaaha, mukama wangye, mpurira! Naakuha ekyo kibanja n'enyanga yaamwo. Ebyo naabikuheera omu maisho g'abantu b'eihanga ryangye, mbwenu nu ziika omufu waawe.
12Aburahamu ainama omu maisho g'abantu b'egyo nsi. 13Agambira Efurooni abantu b'omuri egyo nsi bamuhuriire ati: Kwonka shi ku oraabe nookisiima mpurira; niinyija kwihura nk'obuguzi bw'ekibanja oku buri; ekyo okiinyikirize, mbone kuziikamu omufu wangye. 14Efurooni agarukamu Aburahamu; ati: 15Mukama wangye, ntega okutu. Ekicweka ky'ekibanja ekirikugura empiiha magana ana z'efeeza ni kintu ki ahariiwe naanye? Yeziikire omufu waawe. 16Aburahamu atyo aikirizana na Efurooni. Aburahamu arengyera Efurooni efeeza ezi yaagambire, Abahiiti nibahurira, empiiha magana ana z'efeeza, nk'oku abashuubuzi baabaire nibazirenga omu biro ebyo.
17Kityo ekibanja kya Efurooni eky'omuri Makipeela, ekyabaire kiri aha burugwa-izooba bwa Mamure, kyona hamwe n'enyanga yaamwo n'emiti yoona, kyona nk'oku kirikwingana kyarekurirwa 18Aburahamu omu maisho g'Abahiiti, n'omu maisho ga boona abaizire aha irembo ry'orurembo rwe, kuba ekye. 19Bwanyima Aburahamu yaaziika Saara omukazi we omu nyanga y'omu kibanja ky'omuri Makipeela, oburugwa-izooba bwa Mamure; niyo Heburooni ey'omu nsi ya Kanaani. 20Ekyo kibanja n'enyanga yaamwo Abahiiti nikwo baabirekuriire Aburahamu, bikaba ebye kuba omwanya gw'okuziikamu.
Aburahamu okutuma ow'okuriimira omutabani omukazi
Currently Selected:
Kut 23: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
