1 Abhakörintö 12
12
Imituho ighya Umwika Ömöhörëëru
1Bhoono abhakumya bharikyane, nkutuna ndë momanye bhuuya amangʼana agha imituho gheno ghikurwa ku-Mwika Ömöhörëëru. 2Mmomanyirë igha, enkaagha eno mwaarenga motaraamanya Waryobha, mwaangʼainirwë kora mokatangatwa na amatöndö ghano kora ghatakoghamba. 3Ku bhuyö nkutuna ndë bhëënyu momanye igha, taaho ömöntö ono akotangatwa na Umwika uwa Waryobha, amare aghambe igha, “Yëësu aihiimwe.” Ghwiki ömöntö ono atakotangatwa na Umwika Ömöhörëëru uwa Waryobha, takotora okoghamba igha, “Yëësu we Omonene.”
4Imituho ighya Umwika Ömöhörëëru n-gya seteemo sinsharu, kasi umutwëni uwa imituho ghiyö, nu-Mwika Ömöhörëëru uyöuyö. 5Seeho seteemo sinsharu isya okokora emeremo, kasi Omonene ono tokokorra emeremo, nu-yöuyö. 6Kora emeremo ghyonswe ngeeho ighya seteemo nsharu, kasi Waryobha nö-ömwë uyöuyö, we akokora emeremo ghyonswe igho mo-bhantö bhonswe igho. 7Umwika Ömöhörëëru nkohonyorra arë kera ömöntö, okore abhantö bhonswe igho bhanyoore ehoorohooro. 8Umwika Ömöhörëëru nkohaana arë ömöntö engʼana iya obhongʼaini, uwöndë amohaana engʼana iya obhomanyi ubhwa amangʼana. 9Umwika Ömöhörëëru uyöuyö, nkohaana arë uwöndë ituho iya okobha na umukumo ghono ghonaghirë, kasi uwöndë amohaana ituho iya ukuhwënia abharööyë. 10Nkohaana arë uwöndë obhotoro ubhwa okokora amakono, na uwöndë öbhörööti ubhwa amangʼana ghano ghakurwa ku-Waryobha. Uwöndë obhomanyi ubhwa amangʼana igha, ghano nku-Mwika Ömöhörëëru gharuurë, handë igha nku-risambwa gharuurë. Uwöndë amohaana ituho iya okoghamba ebheghambo ebhehya. Uwöndë amohaana ituho iya okosesora ebheghambo bhiyö. 11Umwika Ömöhörëëru uyöuyö, we akokora emeremo ghiyö ghyonswe igho. Nkohaana arë kera ömöntö ituho bhono akutuna.
Ömöbhërë n-gömwë kasi imyaho ighya-ko m-myaru
12Ömöbhërë n-gömwë, imyaho ighya-ko m-myaru. Kasi imyaho imyaru ghiyö, ngyo ghekokora ömöbhërë öghömwë ghuyö. Mbe, kya igho ömöbhërë ghörë, ni-igho ërë na kö-möbhërë ughwa Yëësu Kiristo. 13Nkoghamba ndë igho, ko bhoora igha, bhëëtö bhonswe igho, ntokaabha Abhayahudi handë igha Abhakyaro, ntokaabha abhaghorwa handë igha abhatöönööni, ntwaabhatiisiibhwi ku-Mwika Ömöhörëëru uyöuyö, tokanyoora Umwika Ömöhörëëru uyöuyö, okore tobhe ömöbhërë öghömwë.
14Ömöbhërë teghoona umwaho ghömwë ughwene igho hë, kasi imyaho ighya-ko m-myaru. 15Hano ököghörö koraaghambe igha, “Öni tëndëngë okobhoko hë, ku bhuyö öni te-wa kö-möbhërë ndë hë,” engʼana iyö neghera kwange okobha umwaho ughwa kö-möbhërë? 16Na hano ökötwë koraaghambe igha, “Öni tëndëngë iriiso hë, ku bhuyö öni tu-wa kö-möbhërë ndë hë,” engʼana iyö neghera kwange okobha umwaho ughwa kö-möbhërë? 17Hano ömöbhërë ghwonswe igho ghokaabhaayë iriiso, iyakë ömöntö akaaighuurë amangʼana? Handë igha ömöbhërë ghwonswe igho ghokaabhaayë ökötwë, iyakë ömöntö akaaighuurë ubhunyunku? 18Kasi bhoono Waryobha yaasëëmya bhuuya imyaho ighya ömöbhërë, kera umwaho yaghösëëmya kya bhono umwene yaatunanga. 19Singa ömöbhërë ghwonswe igho m-mwaho ghömwë, teghokaabhaayë ömöbhërë hë. 20M-maheene igha, imyaho ighya kö-möbhërë m-myaru, kasi ömöbhërë n-gömwë.
21Iriiso tereetore ökötëëbhya okobhoko igha, “Tinkukutuna hë.” Kora omotwe teghootore ökötëëbhya amaghörö igha, “Tenkobhatuna hë.” 22Kasi ekenene ni-igha, imyaho gheno ghekomaahekana igha m-metaaniinu kö-möbhërë, ghiyö ngyo ghikutunwa bhököngʼu. 23Ghwiki imyaho gheno ghekomaahekana igha, teghekosookwa hë, ghiyö ngyo tokosooka bhököngʼu. Imyaho ighyëtö gheno ghekomaahekana igha, nkösöökërrya ghërë, ghiyö ngyo tokokarabherra bhököngʼu. 24Kasi imyaho ighyëtö gheno ghetakösöökërrya, ghiyö tegheena obhokaraabhërri bhököngʼu kya ighyëndë ghiyö. Waryobha umwene m-buuya yaasëëmya ömöbhërë. Imyaho gheno ghetakosookwa bhököngʼu, yaaghekora ghesookwenga, 25okore ömöbhërë ghotakaahokana, kasi ni-igha, imyaho ghyonswe igho ghetorraninga. 26Hano umwaho öghömwë ghwanyahaareka, imyaho ghyonswe igho nkunyahaareka ghërë hamwë nagho. Na hano umwaho öghömwë ghwatöönibhwa, ömöbhërë ghwonswe igho nkushomerwa ghörë.
27Mbe, bhëënyu bhonswe igho nö-möbhërë ughwa Kiristo mörë. Kera ömwë uwëënyu, nu-mwaho ughwa kö-möbhërë kuyö. 28Abhatomwa mbo Waryobha yaatoora mo-kanisa abha mbere, abha kabhërë abharööti, abha katatö abhëëghya. Ghwiki yaatoora-mo bhano bhakokora amakono, na abha ituho iya ukuhwënia abharööyë, na abha ökötöörrya abhandë, na bhano bhakotangata bharikyabho, na abha ituho iya okoghamba ebheghambo ebhehya. 29Bhoono nköbhööri-ko igha, abhantö bhonswe igho, m-batomwa? Bhonswe igho, m-barööti? Bhonswe igho, m-bëëghya? Bhonswe igho, m-baköri abha amakono? 30Bhonswe igho, mbaana ituho iya ukuhwënia abharööyë? Bhonswe igho, nkoghamba bharë ebheghambo ebhehya? Bhonswe igho, bhahaanwa obhotoro ubhwa okosesora ebheghambo ebhehya bhiyö? 31Mbe, ku bhuyö ni-igha mokore omotono ughwa ukutuna imituho emenene. Kasi ekenene, bhoono tigha mbööröki enshera inshiiya bhököngʼu.
Currently Selected:
1 Abhakörintö 12: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.