2 Abhakörintö 10
10
Amahonshora agha Pauro ko-bhantö bhano bhakomosera
1Mbe, ndabhasaasaama ko obhohaabhu na kö öbhöntö ubhwa heene ubhwa Yëësu Kiristo, nö-öni Pauro ono bhakoghamba igha, hano naabha hamwë na bhëënyu, nkobha ndë omohaabhu, kasi hano naabha hare na bhëënyu, ndabha omokarë. 2Ndabhasabha igha, motakaakora mbe omokarë kö-bhëënyu hano ndiisha iyö. Nkoghamba ndë igho, ko bhoora nemanyirë igha, ndatora okobha omokarë ko bhano bhonswe igho bhakokanya igha, öbhömënyi ubhwëtö, m-bwa kinyamöbhërë. 3Bhëëtö nokaanyoora igha nko-kebhara kono tömënyirë, kasi titukwitana riihë kya abhantö abha ko-kebhara kono hë. 4Ibhyöghë ibhyëtö bheno toonabhyo ko okoghera iya riihë iryëtö, ti-bhya kinyamöbhërë hë, kasi ibhyöghë ibhyëtö, mbeena obhotoro ubhwa Waryobha, ubhwa ukughwësya obhogho ubhwa umubhisa, na obhokorokombania bhwonswe igho. 5Nkotemora bhërë amaitegherro na amangʼana ghonswe igho agha ubhwihashi, ghano ghakoghera abhantö bhanga okomanya Waryobha. Nkoghoota törë këghötërëëyë amaitegherro ghonswe igho okore ghaighwere Yëësu Kiristo. 6Hano moraabhe abhantö abha ukwighwera amangʼana agha heene, hayö ho bhëëtö toraabhe na obhotoro ubhwa ukushibhya amangʼana ghonswe igho agha ukwanga ukwighwera Kiristo.
7Bhëënyu na-mangʼana agha kebhara agheene igho, ngo mokomaaha. Nyoore aaho ömöntö wowonswe igho ono akwimaaha igha nu-uwa Yëësu Kiristo, mbe, ömöntö uyö amanye igha, kya igho we arëngë uwa Yëësu Kiristo, na bhëëtö bhonswe na-abha Yëësu Kiristo törë. 8Nokaanyoora igha nkwihasha ndë bhököngʼu, okoheteera ekerengere ikya ubhwera bhono Omonene Yëësu Kiristo yaatohaana. Nokaanyoora ni-igho, tenkosooka hë, ko bhoora obhotoro bhuyö tebhokobhatemora hë, kasi nkobhakora bhörë igha monaghe ku-mukumo. 9Tinkutuna igha, mmaahekane kö-bhëënyu igha, nkutuna ndë ököbhööbhöhërrya okohetera ko-matashandighi aghaane. 10Nkoghamba ndë igho, ko bhoora abhantö bhandë nkoghamba bharë igha, “Amatashandighi agha Pauro m-marito kora amangʼana aghaaye ngaana singuru, kasi hano aaho umwene, m-mötëntëëru, kora amashumaasho aghaaye, teghaana ubhwera hë.” 11Mbe, abhantö bhano bhakoghamba amangʼana ghayö, bhamanye igha, amangʼana ghano tokobhandekera ko-matashandighi enkaagha eno ukunyoora totarëngë hamwë na bhëënyu, ni-ighoigho tokokora amangʼana aghëëtö kora hano tohamwë na bhëënyu.
12Bhëëtö tetootore ukwitoora mu-rikomo rimwë, handë ukwirengʼaania na bhayö bhakwihasha igha, mbaana ubhwera. Nkwirengʼaania bharë abheene ko abheene, kuyö nu-kwiyörökya igha, tebhamanyirë ngʼana hë. 13Kasi bhëëtö, titwikumi toheteerani hë. Ekerengo ikyëtö, ne-meremo gheno twaahaanwa na Waryobha, na emeremo ghiyö, ngyo tokokora kö-bhëënyu hayö. 14Enkaagha eno twaaishirë kö-bhëënyu hayö, tetwahëtërëëyë orotonga urwa ghano twaatörëëywë-ho hë. Bhëëtö, mbo twaatangatirë okobhareetera Amangʼana Amaiya agha Yëësu Kiristo. 15Ghwiki ni-igha, titukwihashera emeremo ighya abhantö abhandë, okokera ekerengere keno twaahaanwa. Kasi ubhweseghe ubhwëtö ni-igha, hano umukumo ughwënyu ghoraaghëndërri ukwaruha, hayö ho emeremo ighyëtö kö-bhëënyu, gheraagharehe. 16Ni-igho ërë, okore toraareke Amangʼana Amaiya ku-bhyaro ibhyëndë bheno bhërëngë hare na bhëënyu. Ko bhoora titukutuna ukwihashera emeremo gheno ghyaamara okokorwa ahasë nyabhorebhe na ömöntö uwöndë. 17Amaandeko Amahörëëru nkoghamba gharë igha, “Ömöntö wowonswe igho ono akwihasha, aikumi ko okoghera iya Omonene Waryobha.”#10:17 Maaha mo-ketabho ikya Yeremia 9:24. 18Tërëngë igha ömöntö ono akwihasha umwene we akwikërribhwa na Omonene Waryobha, kasi no-oora Omonene Waryobha umwene akukumya, uyö we akwikërribhwa nawe.
Currently Selected:
2 Abhakörintö 10: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.