2 Abhakörintö 9
9
Ekehaheeno ko abhakumya abha Yërusarëëmu
1Teneena engʼana eno eraaghere mbandekere ko amangʼana agha ökötöörrya abhahörëëru abha Yërusarëëmu, 2ko bhoora, nemanyirë kya bhono mukwighomba okobhatöörrya. Öni naaihashanga ko-bhantö abha Makedonia ko okoghera iya bhëënyu, naabhatëëbhyanga igha, “Abhantö abha Akaaya, mbaaisëëmëri ukuruusya, ukurwa mooka.” Eteemo iyö, yaaghërrë abhantö abhandë abhaaru, bhonswe bhakaighomba ukuruusya. 3Mbe, bhoono ntömirë abhakumya bharikyëtö bhayö, okore ukwihasha ukwëtö ukwa omosorro ughwënyu, kotakaabha ukwa amangʼana agheene igho, kasi mwisëëmi kya bhono naaghambirë igha, mwaamara ukwisëëmya. 4Nengambirë igho, ko bhoora hano nkataka nishirë iyö hamwë na Abhamakedonia, nyoore igha temoraisëëmya hë, hayö m-bëëtö toraasooke, ko bhono toona ubhweseghe kö-bhëënyu ko okoghera iya engʼana iyö. Kora na bhëënyu bhonswe, mmoraasooke bhököngʼu. 5Ku bhuyö ndööshë igha, ni-igha ntëëbhi abhakumya bharikyëtö bhano, bhatangate ukuusha iyö, okore bhakore ësëëmyö iya omosorro ghono mwaaraghaini, ghobhe ughwa okohansha ukwënyu bhëënyu abheene, te-kwa ukusingʼirribhwa na ömöntö hë.
Ukuruusya ukwa enkoro inshiiya
6Muhiite engʼana eno igha, “Ömöntö ono akwëmya hake igho, okoghesa ukwaye kwonswe n-koke igho. Kasi ono akwëmya ahanene, okoghesa ukwaye kwonswe n-kwaru.” 7Kera ömöntö aruusi kya bhono akutuna mo-nkoro iyaaye, atakaaruusya kwa okobhaabhayera handë kwa ukusingʼirribhwa, ko bhoora Waryobha, nahanshirë ömöntö ono akuruusya kwa nkoro nshiiya. 8Hayö ho Waryobha araabhangʼoore bhököngʼu, okokera bhono mukutuna, okore nkaagha syonswe igho, mobhe na kera ëkëntö keno mukutuna. Ni-igho araabhakorre, okore möghëndërri okokora amangʼana amaiya amaaru agha ökötöörrya abhantö. 9Iyö n-kya bhono Amaandeko Amahörëëru ghakoghamba igha,
“Anyaraghaini ëbhëntö, ahaayë abhatöbhu,
obhoheene ubhwaye, m-bwa amakora ghonswe igho.”#9:9 Maaha mo-ketabho ikya Zabhuri 112:9.
10Waryobha we akohaana abhantö imbusiro, bhëmya, na ibhyakorya ibhya okorya, naraabhaane imbusiro insharu iya ukubhusura, igha, naraabhakore mobhe abhantö abha heene ko okohaana abhantö ëbhëntö. 11Moraamëhibhwi kö-bhëntö ibhyaru, okore möghëndërri okobha abhantö abha ökösërëënia abhantö abhandë nkaagha syonswe igho. Hayö ho abhantö bharaakumi Waryobha ko okoghera iya ëbhëntö bheno tokobhaherra. 12Engʼana iya ökösërëënia eno mokokora, te-ko okoghera iya obhohabhë ubhwa abhahörëëru ukwene igho hë, kasi neraaghere abhantö abhaaru bhatööni Waryobha bhököngʼu. 13Ndabhatëëbhya igha, mbaraatööni Waryobha, ko bhoora emeremo ighyënyu nkwörökya ghërë igha, bhëënyu m-baköri abha emeremo abhaiya mörë. Ghwiki mbaraatööni Waryobha, ko okoghera iya ukwighwera ukwënyu ukwa ukwikërrya Amangʼana Amaiya agha Yëësu Kiristo, na ökösërëënia ukwënyu kono mokobhasërëënia, kora na ko-bhantö bhonswe igho. 14Engʼana iyö, neraaghere bhaabhasabherenga ku-Waryobha kwa okobhaighomba, ko okoghera iya örööbhö urwaru rono Waryobha yaabhahaana. 15Waryobha akumibhwi ko okoghera iya ituho iyaaye eno ëhëtërëëyë bhyonswe igho.
Currently Selected:
2 Abhakörintö 9: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.