Amangʼana agha Abhatomwa 21
21
Pauro araghya Yërusarëëmu
1Hano twaamarrë okoraghana na abhaghaaka abha ekanisa iya Ëfësö, tokariina mu-ryato, tokaghya këmwë tokahika kwi-ghinga irya Köösi. Hano bhwaakëëyë, tokaghya kwi-ghinga irya Roodo. Ukurwa hayö, ghwiki tokaghya igho tokahika Patara. 2Tokanyoora-ho iryato reno ryaambokanga ukughya ku-kyaro ikya Föinikë. Mbe, tokariina-mo, tokaghya. 3Hano twaahikirë ahasë hano twaamaherraini na righinga irya Kiipuro, tokaheta orobhareka urwa syömya yaaryo. Tokaheta mu-kyaro ikya Siria, tokahika mo-keghobho ikya mu-mughi ghono ghwaabherekerwanga igha Tiiro. Hayö ho iryato ryaaikiryanga imirigho. 4Tokamaahana na Abhakiristo abha hayö. Tokaikara nabho sinsikö muhungatë. Abhakiristo bhayö, bhakatëëbhya Pauro ko obhotoro ubhwa Umwika Ömöhörëëru igha, atakaaghya Yërusarëëmu. 5Hano sinsikö muhungatë syaahööyë, tokatanora. Abhakiristo bhonswe igho abha Tiiro hayö, abhashaasha na bhakaabho kora na abhaana abhaabho, bhakatoherekerra ukurwa mu-mughi muyö. Hano twaahikirë ko-morambo, tokatema hansë ibhiru, tokasaasaama Waryobha. 6Tokaraghana, bhëëtö tokariina mu-ryato, abheene bhakakyora yeeka.
7Mbe, tokarwa Tiiro hayö, tokaghya igho tokahika mu-mughi ghono ghwaabherekerwanga igha Toremai. Tokakëërya-ho abhakumya bharikyëtö, tokaikara nabho urusikö urughima. 8Hano bhwaakëëyë, tokarwa hayö, tokaghya Kaisaaria. Tokaikara wa Firipö omoraarëki uwa Amangʼana Amaiya agha Yëësu. Firipö uyö, yaarë mo-bhatöörrya muhungatë bhano bhaashaaghööywë Yërusarëëmu haara.#21:8 Maaha mo-ketabho ikya Amangʼana agha Abhatomwa 6:1-6. 9Yaarë na abhaisëkë abhane sintindë. Kora mbaarë na ituho iya öbhörööti.
10Tokaikara hayö sinsikö nyabhorebhe. Enkaagha eno waanyöörrë tökërëngë hayö, akaasha-ho ömörööti ono yaarwërëëyë Yudea, ono yaabherekerwanga igha Aghaabho. 11Hano yaahikirë kö-bhëëtö hayö, akaghegha umushibhi ughwa Pauro, akaghwibhoha ko-mabhoko na ko-maghörö aghaaye. Akaghamba igha, “Umwika Ömöhörëëru aghambirë igha, ‘Ni-igho mwene umushibhi ghono, araakorrwe. Ni-igho eraabhe, hano araaghi Yërusarëëmu. Abhayahudi abha iyö mbaraamoghoote, bhamobhohe, bhamare bhamöghööti mo-mabhoko agha Abhakyaro.’ ”
12Mbe, hano twaaighuurë amangʼana ghayö, bhëëtö na bharikyëtö abha Kaisaaria hayö, tokasaasaama Pauro bhököngʼu, okore atakaaghya Yërusarëëmu. 13Kasi umwene akatohonshora igha, “Motakaakuura, mokambe munyite omotwe bhosa igho! Öni te-kebhohe ikyene igho hë, nenkakwera Yërusarëëmu iyö ko okoghera iya iriina irya Omonene Yëësu, te-ngʼana hë.”
14Hano twaarööshë igha Pauro takutwighwera hë, tokakira, tokaghamba igha, “M-bono bhonswe Omonene Waryobha araahanshe.”
15Mbe, hano ghayö ghaahööyë, tokamanora, tokasimya oroghendo urwa ukughya Yërusarëëmu. 16Abhakiristo abhandë abha Kaisaaria hayö, bhakatoherekerra, bhakatuhikya Yërusarëëmu wa Monaasööni. Omonaasööni uyö, m-möntö wa kwi-ghinga irya Kiipuro yaarë. Kora m-Mukiristo uwa mo-Bhakiristo abha mbere bhaara yaarë. Hayö ho twaaghyanga ukwikara.
17Hano twaahikirë Yërusarëëmu, abhakumya abha hayö bhakatösërëënia, bhasambaarokire.
Pauro araghya ökökëërya Yaakobho
18Hano bhwaakëëyë, tokahinana na Pauro ökökëërya Yaakobho, na abhaghaaka abha ekanisa bhonswe igho, ho bhaarë. 19Pauro akabhakëërya, akabhatëëbhya ghonswe igho ghano Waryobha yaakörëëyë Abhakyaro, okohetera ko-meremo ighyaye.
20Hano bhaaighuurë ghayö, bhakatöönia Waryobha, bhakatëëbhya Pauro igha, “Uwe umukumya murikyëtö, nomanyirë kya igho ëbhëkwë na ëbhëkwë ibhya Abhayahudi bhakumiri Yëësu. Bhonswe igho bhayö, mbaana omotono bhököngʼu, ughwa okosooka amaraghërryö agha Mosa. 21Bhaatëëbhibhwa igha, nkwëghya örë Abhayahudi bhonswe igho bhano bhaikaayë mu-bhyaro ibhya Abhakyaro igha, bhatighe okoghoota amaraghërryö ghayö. Okabhakaania igha bhatakaasaara abhaana abhaabho, handë ököröndërrya seteemo isya Ikiyahudi. 22Mbe, iyakë tokaakora? Rëndë mbe mbaraaighwe igha waasha Yërusarëëmu hano örë. 23Ku bhuyö, kora kya bhono toraakoraghërri. Mö-bhëëtö mono, bhaamo abhashaasha abhane, bhano bhaihiimirriiyi ku-Waryobha. 24Bhoono hinana nabho, mwisaabhuure hamwë. Obhahakere öbhöghöri ubhwa ukughingirwa situukya isyabho. Hano oraakore igho, abhantö bhonswe igho mbaraamanye igha, amangʼana ghonswe igho ghano bhaatëëbhiibhwi, n-ga bhorongo ghaarë, kasi uwe umwene, nköghëndërrya örë okokora bhono amaraghërryö agha Mosa ghakoraghërrya. 25Mbe, ko orobhareka urwa Abhakyaro bhano bhakukumya Yëësu, twaabhandëkëëyë kya bhono twaarööshë igha tobhandekere. Tokabhandekera igha, bhatakaaryanga ibhyakorya bheno bhimwënsëywë ëbhëtöndö. Bhatakaarya handë ukunywa amaanyinga. Bhatakaarya ibhibhuuse kora bhatakaakora obhosooraare.”
26Mbe, hano bhwaakëëyë, Pauro akahira abhashaasha abhane bhayö, akaisaabhuura hamwë nabho. Akasoha mo-bhogho ubhwa risengerro irya Waryobha, okore atëëbhi abhantö urusikö rono bhakaamarrë okosaabhuurwa, na ikimwenso keno kera ömöntö akaaruusiri.
Pauro araghootwa
27Hano sinsikö muhungatë isya ukwisaabhuura syaangʼatirë okohwa, Abhayahudi bhano bhaarwërëëyë mu-kyaro ikya Asia Enke, bhakamaaha Pauro mo-bhogho ubhwa risengerro irya Waryobha. Bhakasëëghërrya abhantö bhonswe igho muyö bhaghoote Pauro. 28Bhaakonganga igha, “Bhëënyu bhare Abhaisiraëri, motohaheenere! Ömöntö ono we akwëghya abhantö abha ahasë honswe igho, igha bhatosere, na okosera amaraghërryö agha Mosa na risengerro irya Waryobha reno. Ghwiki kora arëëtirë Abhayunaani mu-risengerro. Ku bhuyö anyankuhiri Ahasë Ahahörëëru hano.” 29Mbaaghambirë igho, ko bhoora bhaarööshë Pauro aana Turofimo Yërusarëëmu hayö. Na mbe Turofimo uyö m-Muyunaani uwa Ëfësö yaarë. Bho bhakakanya igha, yaasöhirë nawe mo-bhogho ubhwa risengerro irya Waryobha.
30Hano bhaaighuurë amangʼana ghayö, ekaghera umughi ghonswe igho ughwa Yërusarëëmu ghoromaane riihë. Abhantö bhakakenyerra Pauro, bhakamoghoota, bhakamungʼuura ukurwa mo-bhogho ubhwa risengerro irya Waryobha. Bhakasiika-ho ebhesaku bhöngöbhöngö.#21:30 Mughiro ghwaarë ukwita ömöntö mu-risengerro, nkyo kyaaghërrë bhakasiika-ho ebhesaku okore atakangʼosera-mo. 31Enkaagha eno abhantö bhayö bhaatunanga enshera iya ukwita Pauro, amangʼana ghakahekeera omonene uwa ritabhë irya abhasirikare righana imwë igha, riihë reromaini umughi umughima ughwa Yërusarëëmu. 32Kamwë igho, akaghegha abhasirikare abhaaye, hamwë na abhanene bhaabho, bhakakenya ukughya ku-riihë hayö. Hano abhantö bhayö bhaarööshë abhasirikare bhayö bhaana omonene uwaabho, bhakatigha okotema Pauro.
33Mbe, omonene uwa abhasirikare uyö, akasuntarra Pauro, akamoghoota, akahamera igha, abhohwe na ebheraangʼani bhibhërë. Akabhöörya abhantö bhayö igha, “Kana, ono m-möntö kë? N-kë asarri?” 34Kamwë igho abhantö bhayö bhakashaghana bhököngʼu. Kora ekaghera omonene uwa abhasirikare uyö akataamibhwa okomanya obhoheene. Akahamera igha Pauro ahirwe mo-bhogho ubhwabho ubhwa abhasirikare. 35Hano Pauro yaarenga ko-bhoreenero ubhwa obhogho bhuyö, abhasirikare bhakamongʼangʼaara, ko okoghera iya riihë irya abhantö bhayö. 36Abhantö bhayö mbaabharwanga nyuma, bharakora ikituri bharaghamba igha, “Mumwite aruho!”
Pauro araikoorerra ko-Bhayahudi
37Mbe, enkaagha eno abhasirikare bhaahiranga Pauro mo-bhogho ubhwabho, Pauro akatëëbhya omonene uwaabho uyö igha, “Ndatuna nkötëëbhi-ko engʼana.” Umwene akamohonshora igha, “Kana, uwe wonswe nomanyirë Ikiyunaani! 38Tu-uwe Umumiisiri omomangarru oora yaatangatirë abhaiti ëbhëkwë bhine bhöngö hano, akabhahira ku-riköngö?”
39Pauro akamohonshora igha, “Öni m-Muyahudi ndë, umwebhorwa uwa mu-mughi ughwa Tariso, eno ërëngë mo-mokowa ughwa Kirikia. Umughi ghuyö ngomanyekaini bhököngʼu. Ndakosaasaama nshumaashe-ko na abhantö bhano.”
40Omonene uyö akaikërrya. Pauro akaimerra ko-bhoreenero bhuyö, akainyökërya abhantö bhayö okobhoko, okore bhakire. Hano bhaakirrë bhonswe igho, akabhatëëbhya ko-keghambo ikyabho ikya Ikiëbhuraania igha,
Currently Selected:
Amangʼana agha Abhatomwa 21: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
