Matayo 13
13
Nkitanyanyukoto e launoni laa lantarara
(Marko 4:1–9; Luka 8:4–8)
1Kore ake te inia parri nabo, neipung Yeso ta nkang, nelo awuon tabata mpaso. 2#Luka 5:1–3Neiturrurrokino ninye ꞉lturrur kitok ana metidira meli, newuon taatua aiteng'en, eitache ilo turrur tabata mpaso. 3Neliki ninche mbaa kumo tee nkitanyanyukot, ajoki, <<Kore apa, nelo launoni lo lchampa aisuaaya lantarara. 4Naa kore eisuaaya aun, nedoki lkulie nkoitiei, nepuonu nkueeny, nenya aamut. 5Nedoki lkulie ng'ojitin e lkarkar, nemetii nkulupo kumo, nebulu aasieku amu megut nkulupo teinie. 6Kake kore payie eiliepu ndama, nepejori. Netoii aitoki, amu keidorropi ntana enche. 7Nedoki lkulie atua lkuku, nebulu ꞉lkeek loo lkuku, neiding'aki, negor. 8Nedoki lkulie nkuluponi supat, kore lobo, neiu ip, neiu likae ntomoni ile, neiu likae osom. 9Kore loata nkiyiaa, nchoo ening.>>
Eibalakinyie ꞉Yeso nkisudorot e nkitoria e Nkai looiteng'eni lenyena aapeny
(Marko 4:10–23; Luka 8:9–10)
10Nepuonu looiteng'eni lenyena, neipar Yeso aajoki, <<Aanyo payie irorie ltung'ana tee nkitanyanyukot?>>
11Newoliki ꞉Yeso ninche ajoki, <<Eichooki ntae enteyielo nkisudorot e nkitoria e chumata, kake eitu eichori ninche. 12#Mat 25:29; Mrk 4:25; Luka 8:18, 19:26Amu kore pooki ng'ae oata ntoki, naa keponikini aaitodooyo. Kake kore pooki ng'ae lemeata, neoruni abaki naata. 13Tankaraki inia naa, payie airorie ninche tee nkitanyanyukot, paa
<Kore abaki eing'or
nemedol,
Nening tee nkiyiaa,
kake mening anaa mening'u.>
14 #
Isa 6:9,10 <<Tee ninche ebaya naibon e Isaya,
<Ining'ning, kake mining'ung'u hooyia,
ning'orng'or, kake nimumusoso katukul.
15Amu kore ltauja loo kulo tung'ana naa ketogolito,
nemening oleng tee nkiyiaa,
neikeno nkonyek enche,
metaa kore too nkonyek enche, nemedol,
nemening too nkiyiaa enche,
nemening'u taa ltauja lenche,
payie etum aaibelekenyata, naichiunyie nanu ninche.>
16 #
Luka 10:23,24 <<Kake emayiana nkonyek inchi amu kedolicho, o nkiyiaa inchi amu kening'icho. 17Kedede kajoki ntae, kore loibonok o ltung'ana loosipat kumo, naa keyieu apa oleng payie edol nening mbaa nidolitata o nining'itoto, kake neitu edol anaa ening.
Etilika ꞉Yeso looiteng'eni lenyena ntoki naipirita nkitanyanyukoto e launoni
(Marko 4:13–20; Luka 8:11–15)
18<<Entining naa ntoki naipirita nkitanyanyukoto e launoni: 19Kore pooki ng'ae oning lkilikuai le nkitoria, nemening'u, naa kelotu ilo torno aisimarie inia apa natuunoki taatua ltau lenye. Naaku kore ilo lemening'u, ninye inia oitiei duo natodoka lantarara. 20Kore ilo karkar otodokita ꞉lantarara naa ltung'ani oning rerei, neng'amaa asioki te ng'ida. 21Kake kore amu meata ntana, newuon ake te nkini kata. Kore payie etum nyamali o sina oitami tankaraki ilo rerei, nesioki arriaa. 22Kore lkuku ootodokita lantarara atua, naa ltung'ani oning ilo rerei, kake kore payie etum irran e ana kop o mpong'ori e parakuoicho, neiding'aki, negor ilo rerei, metaa meiu lng'anayio. 23Kake kore nkuluponi supat natodokita ꞉lantarara, naa ltung'ani oning ilo rerei, neibung. Neiu lng'anayio ip, anaa sii ntomoni ile, tanaa sii osom.>>
Nkitanyanyukoto e ndeti
24Neitoki aicho ninche nkae kitanyanyukoto ejo, <<Keitinyinyukoreki nkitoria e chumata ltung'ani oisuaaya aun lantarara supati ta lchampa lenye, 25kake kore eilura ltung'ana, nelotu lmang'antita lenye, neun ndeti taatua nkano, neing'uaa. 26Kore payie ebulu lperes le nkano, nerrek lperesi, nelioi te inia kata ndeti. 27Nepuonu laisiaayiak lo lopeny nkaji aajoki ninye, <Laitoriani, aa mara lantarara supati apa ituuno ta lchampa lino? Aji naa eing'uaa ndeti?> 28Nejoki ninche, <Lmang'antita otaasa ana.> Nejoki, <Iyieu nikipuo aadotu aaiturrur?> 29Kake newoliki ajoki, <Emias inia, amu kore inturrurrutoto ndeti, indimdim nidotutu nkano supat tenebo o ndeti. 30Enchoo ebulu tenebo, metaa tenebau nkata e ndung'ore, najoki ladung'ok, <<Enturrurro ang'as ndeti, nienien too rridat, payie ipejoo, kake kore nkano supat, enturrurroki atua lkompe lai.>> > >>
Neiko nkitoria e chumata tenebulaa
(Marko 4:30–32; Luka 13:18–21)
31Neitaki ꞉Yeso nkae kitanyanyukoto ejo, <<Kore nkitoria e chumata naa inji etuwuana lantararai kini oji karadali owa ltung'ani aun to lchampa lenye. 32Kore ilo antararai naa keikini ninye alang lantarara pooki, kake kore payie ebulu neaku kitok arepaa lkeek pooki lo lchampa ana metaa lcheni sapuk, nepuonu nkueeny e ai aapik nkajijik enche.>>
33Neitoki aliki ninche nkae kitanyanyukoto ejo, <<Kore nkitoria e chumata naa inji etuwuana mukate kini naisiicho, naituchulaka ꞉nkitok ncharaan uni e nkuruma e nkano, nepal ana meisiichoi pooki.>>
Eirorie ꞉Yeso lturrurri tee nkitanyanyukot
34Ketiaka ꞉Yeso lturrurri kuna pooki too nkitanyanyukot, nemeata hooyia ntoki natiaka mara ake too nkitanyanyukot. 35#SNk 78:2Paa kore nairoro apa Nkai aimu loiboni lenye ajo,
<<Kabol nkutuk ai tee nkitanyanyukot,
nalimu inia naisudoyieki apake ang'asu te nkitibirata e nkop,>>
netum atabai.
Etilimua Yeso nkitanyanyukoto e ndeti
36Kore te inia kata neing'uaa ꞉Yeso lturrur, nechuko alo nadei aji enye.#13:36 Kore inia aji natuchukokine naa inia duo natupukunyie ana nejo lkereri 13:1. Ng'urai aitoki 8:14 o 9:10 o 9:28. Nepuonu looiteng'eni lenyena netii, nejoki, <<Tiliki iyioo aibalakinyie kipirte e nkitanyanyukoto e ndeti e lchampa.>> 37Newoliki ajoki, <<Kore ilo oisuaaya aun lantararai supat naa Nkerai e Ltung'ani. 38Kore lchampa naa ana kop, kore lantarara supati naa nkera e nkitoria, kore ndeti naa nkera e ilo aitarruoni. 39Kore lmang'antita otuuno ndeti naa Chitani, kore ndung'ore naa nkiting'oto e ana ng'amata, kore ladung'ok la champa naa lmalaikani. 40Kore ana netiiu ndeti teneiturrurri, nepeji te nkima, nejia kenya etiu te nkiting'oto e nkop. 41Kereu kenya ꞉Nkerai e Ltung'ani lmalaikani lenyena meiturrurru taatua nkitoria enye mbaa pooki naaitopong'oo ltung'ana, neitoki aaiturrurru lagilak loo nkitanapat, 42nenang'aki atua lmoti le nkima, inie neichirie ltung'ana, neonyie lala. 43Kore inia kata, neong'u loopeny sipat ana ndama taatua nkitoria e Papa lenche. Kore ilo oata nkiyiaa nchoo ening.
Meitoki naisul nkitoria e chumata
44<<Keinyinyukore nkitoria e chumata ntoki e tipat oleng naisudoro ta lchampa. Kore pootum ꞉ltung'ani, neisudoo, nelo te ng'ida amir nenia pooki naata, neinyiang'u ilo champa.
45<<Kore aitoki, inji etuwuana nkitoria e chumata ana ltung'ani omiricho oyiaya soito le tipat#13:45 Kore kulo soito le tipat naa ntoki natumi tee sikira le mpaso, nagol ninye atuwuana soit. 46naa kore payie etum ninye lobo loo lolo soito le tipat, lemetumoi, nelo amir pooki naata, neinyiang'u.
Nkitanyanyukoto naipirita ngelata ee sinkirri
47<<Keinyinyukore aitoki nkitoria e chumata ana lgiitani ooibung'ieki sinkirri oaatanang'akaki atua mpaso, neibung mpukunot pooki ee sinkirri. 48Kore payie eboreii, neyietu ꞉laibung'ak loo sinkirri meeu nchepata e mpaso, neitoki aawueni, neor supati o ltorrok. Kore supati, nepik atua loket, kore ltorrok, nenang'aa. 49Naa nejia kenya etiu te nkiting'oto e ana ng'amata. Kepuonu lmalaikani aagelu ltung'ana torrok taatua loopeny sipat, 50nenang'aki ninche atua lmoti le nkima, inie neichirie ltung'ana, neonyie lala. 51Itining'utua nenia pooki?>> Newoliki ꞉looiteng'eni lenyena aajoki, <<Ee, ikitining'utua.>> 52Nejoki, <<Tankaraki inia, paa kore laiteng'enani pooki loo nkitanapat oiteng'enaki mbaa e nkitoria e chumata naa keinyinyukore lopeny nkaji oitai ntokitin ng'ejuko o musan to lchumati le parakuoicho enye.>>
Etanyaki Yeso te lkerenket le Nasaret
(Marko 6:1–6)
53Kore payie eidip Yeso kuna kitanyanyukot, nelo aing'uaa inie. 54Naa kore payie ebaki ilo kerenket oamanya apa le Nasaret, neiteng'en ltung'ana te Sinagogi enche, meing'asiata, nejo, <<Taaji etumo ꞉ele ana ng'eno o ana kidimata naasie mbaa e nking'asia? 55Amaa ele, mara layieni le laitibirani loo ntokitin ee nkeek, mara ng'otonye eji Maria? Naa mara lalachera lenyena Yakobo o Yosep o Simon o Yuda? 56Metii nkanachera enyena tenebo o iyioo? Taaji naa etumo ele tung'ani kuna pooki?>> 57#Yoa 4:44Nejur ꞉ninche ninye, kake newoliki ꞉Yeso ajoki, <<Meatae nkae ng'oji nelaunyie loiboni le Nkai nkanyit, mara ake nkop enye o nkaji enye.>>
58Naa eitu eas ninye mbaa kumo e nking'asia teinie, tankaraki nemeata ninche nkurukoto.
Currently Selected:
Matayo 13: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
