Məfaʼə 1
1
1Á mə́m ntsɛɛmbiə aŋwaʼlə mə á mbô Tiyofilos, maŋ nə ŋ́ŋwaʼlə̂ mənu mətsəm páʼ Yeso a nə ə́faʼ nə́ ńkə́ ńdzéʼkə, ə́fɛ́d nə́ ndɛd páʼ a nə ńchúʼ nə́ afaʼə ajíə, 2tə ńkoʼ nə́ ndɛd páʼ pə́ nə ńdɔg nə́ yí ńkɔ́ʼ ńgɛnə̂ á nəpóolə. Pə́ nə ńjǐ tə́ lɔgə̂ yí kɔ́ʼ ghɛnə̂ nəpó lə́, a fɛ̂ məntəgə́ ńdaŋə̂ á mə́m mətɨ mə́ Ajwǐəsê á mbô məntú mí mə̂ a nə ńtsɔ́ʼ nə́ lə́. 3Ndzaŋə ándó ngə́ʼ əjǐ ə́ nə ḿměe nə́ lə́, a yǐəə á mbi pó ńnɨd mbɨ əjǐə á mbô pó ńkə́ ńnɨd mənu mimə nɨ́ nə́ páʼ mbɔʼ mɨ́d mə́ ghɛd pó pí ńgə́ a chîə á mbîə. A nə̈ ńgabkə̂ ə́fɛ́lə á mbi pó tə ńkoʼ əlěmbî məghə́m mɛ́n nəkwa ə́sóŋə anu ńté Anuə Nəfoonə Əsê. 4Ndzaŋ pó po nə ńtə́ nə́ ńjîə məjîə#1.4 Pətsɨ́ əŋwaʼlə sóŋ ńgə́, “ndzaŋ páʼ pó kə kyeetə̂ nə́ táʼə aliʼ lə́”. alě yitsə̌ lə́, a sóŋə á mbô pó ńgə́, “Kɔ nə́ fɛ́lə Jɛlusalɛmə, pyáb nə́ ńdaʼnə̂ Tǎ mə a nə ńdaʼnə̂ nə́ áwɨ́ ə́wə́, páʼ maŋ nə ə́fiʼtə̂ nə́ áwɨ́ ńté lə́. 5Jɔnə a kə̈ ə́fɛ̂ lə́ nkǐ nə́ pəənə, lə́ nə́ pɔ́ pə́ əlě pətsə́ nə́ yǐ kwá nkǐ Ajwǐəsê.”
Pə́ Lɔgə̂ Yeso Ńkɔ́ʼ Ńgɛnə̂ á Nəpóolə
6Əghâ ándó Yeso pópə məntú mí nə́ ńgyǐ nə́ ńkyeetə̂ aliʼə́ mɔʼə́ lə́, pó pítə Yeso ńgə́, “Mmaʼmbî, gho yǐ pɨnkə̂ nəfoonə á mbô pɨ pə́ Islɛl nə́ ndɛd jɨ́d zə́?”
7Yeso a sóŋə á mbô pó ńgə́, “Lə́ kě aliʼə́nuə azə́ənə́ á mə́ jî nə́ ndɛd yi wɨ́ kɨ əghâ yi wɨ́ páʼ Tǎ mə a tsɔʼ nə́ nə́ məmí mətɨ pô. 8Lə́ pə́ yǒ fɛ̂ mətəənə á mbô pɨ əghâ ándó Ajwǐəsê a yǒ nə́ tsóolə á ndu pəənə́; pɨ̈ tíʼə fiʼtə̂ pɨ nə́ anu páʼ nə́ jî nə́ ńté mə á mə́m Jɛlusalɛm pópə Judya tsɔʼə ntsəm, nə́ Samalya tə ńkoʼ nə́ məndwigtə mə́ mbî tsɔʼə mətsəmə.”
9Əghâ ándó a nə sóŋ nə́ anu jɨ ḿməgtə̂ lə́, pə́ lɔgə̂ yí ńtə́ ńkɔ́ʼə ńgɛnə̂ á nəpó, pó tɨ́ ńtíʼə náŋ ndzaŋə á kɔ́ʼ nə́, tə alə́mə a yǐ ńdyáŋə yə́ á əmə́g pó.
10Pó nə ḿbɛ́d ńtə́g əmə́g mɔ́b ńtə́ ńnáŋə nəpó ndzaŋə a nə̈ ńgɛn nə́. Tsɔʼə əghâ yi wɨ́ pɨ pə́ pɛ̌ pə́ wê pəfú pə́ ətsəʼ ńtə́əmə á nəpɛnə́ pó, 11ḿbítə ághɔ́b ńgə́, “Pɨ pə́ Galili, pɨ tə́əmə aliʼə́ nə́ ńnáŋə nəpó lə́ ńgə́ akə̂? Yeso ghɛn páʼ pə́ lɔg nə́ yə́ á mbô pɨ ńkɔ́ʼ ńgɛnə̂ á nəpó lə́, a yǒ kə́ pɨ pɨ tsɔʼə ndzaŋ páʼ nə́ jɨ́ nə́ yə́ ä kɔ́ʼə ńgɛnə̂ á nəpó lə̂.”
Pə́ Tsɔ́ʼə Matyasə ńgə́ a Lɔgə̂ Aliʼə́ Juda
12Məntú mə́ Yeso mə̂ mə́ tíʼ ńdǒ á nkwəənə mətǐ mə́ Olif ḿbəənə̂ á Jɛlusalɛm páʼ lə́ nə ḿbə́ nə́ mɔ́ akəmtə nənyinə ándó táʼ kilóméta á mə́ koʼ nə́ aláʼə. 13Pó kwúnə á Jɛlusalɛm ńkɔ́ʼ ńgɛnə̂ á mə́mə atɔ́gə ndɛ̂ pó nə̈ ńchî nə́ ə́wə́ á atǐə. Pɨ pə́ nə ńchî nə́ aliʼ yi wɨ́ lə́ nə ḿbə́ Pita pó Jɔnə, nə́ Jɛmsə ḿbéenə Andəlu, nə́ Filibə ḿbéenə Tɔməsə, nə́ Batolomiə, nə́ Matyo, nə́ Jɛmsə mɔ́ Alfɔsə, ḿbɨ ḿbə́ nə Saamun páʼ a nə ńchî nə́ á mə́m nkyeetə yitsə̌ páʼ pə́ nə fóŋ nə́ nə́ Zilɔlə ḿbɨ ḿbə́ nə́ Juda mɔ́ Jɛmsə. 14Pó nə ńdzá ńkyeetə̂ aliʼə́ mɔʼə́ ńchaʼtə́sê nə́ táʼ apímnə pópə pəngyě pə̂ páʼ pó nə ńdzoŋ nə́ Yeso lə́, ḿbéenə Mɛɛlə mǎpə Yeso pópə pɔ́pə́mɛ́ pə́ Yeso pipə́ mbyâŋnə.
15A mə́m əlě pɨ́d pə̂ Pita a lǒo əsê ńtə́əmə a ndzɔʼ pəlimə́ á mə́m Yeso. (Pó nə ńkoʼə̂ ándó pó táʼ nkɛd ńchúʼ məghə́m mɛ́n mə́ mbɛ̌) 16ə́sóŋ ńgə́, “Pəlimə́ mə, anu páʼ aŋwaʼlə Əsê á nə sóŋ nə á lɔgə̂ aliʼə́ ndzaŋ páʼ Ajwǐəsê a nə ə́sóŋ nə́ á ngoʼ pəchə́ ńdaŋə̂ á mbô Debid ńté Juda páʼ a nə ńnɨd nə́ ndúmə á mbô pɨ pə́ nə ńgwam nə́ Yeso. 17Juda a nə ḿbə́ lə́ táʼ ŋwunə á mə́m nkyeetə əzɛ̂n ńté ńgə́ pə́ nə ńtsɔ́ʼə yí ńgə́ pɛ̌npo tə́ faʼə̂.”
18(Juda a nə ńdɔg nkáb páʼ a nə ńkwá nə́ ńté anuə təpɔŋ páʼ a nə ńgɛd nə́ ájɨ́d lə̂ ńjúnə aliʼə́ ndəsê ə́wə́; a nə ḿbɛn ńgwǔ ə́wə́ atoŋə́tóŋə, nəpəm jí nə́ shwegnə̂, mətô mí mə́ túmnə ə́fɛ́lə. 19Ŋwu ntsəm a Jɛlusalɛmə a nə ńdzóʼə anu zəənə́ ńtíʼ ə́fóŋ əlɛ́nə aliʼə́ ndəsê yi wɨ́ nə́ atséebə aláʼə azɔ́b ńgə́, Akɛldama, páʼ wɨ́d sóŋ nə lə́ ńgə́, “Aliʼə́ Ndəsê Achǐə.”)
20Ńté ńgə́ pə́ ŋwaʼlə̂ á mə́mə aŋwaʼlə Pəsamsə ńgə́,
“Tíʼ ndɛ̂ əjǐ ə́ tə́əmə afəmə́;
kɔ ŋwu tsə̌ a láʼ ńchî ə́wə́.”
Pə́ kə́ ŋ́ŋwaʼlə̂ ńgə́,
“Tíʼ ŋwu tsə̌ a lɔgə̂ aliʼə́ ajíə á mə́ faʼ nə́.”
21Lə́ələ́ pə́ ńgə́ á pyádnə ḿbɔŋ ńgə́ pɛn tsɔ́ʼə táʼ ŋwunə á mə́m pɛn páʼ pɛ̌npo nə̈ ńchî nə́ ndɛd ntsəm páʼ Mmaʼmbî Yeso a nə̈ ńkád nə́ ńnyinə̂ pɛn pó.
22Ə́fɛ́d nə́ ndɛd páʼ Jɔnə a nə̈ fɛ̂ nə́ nkǐ tə ńkoʼ nə́ ndɛd pə́ nə ńdɔg nə́ Yeso á mə́m pɛn ńkɔ́ʼ ńgɛnə̂. Ńjî ńgə́ táʼ ŋwunə á mə́m pɨ pɨ́d pɨ a shib ńtɨ́ pɛn pô á mə́ sóŋ nə́ anu ńté mə júmnə nə́ míə.
23Pó tíʼ ńtə́g pɨ pɛ́n pɛ̌: Jɔsɛf páʼ pə́ nə̈ fóŋ nə́ nə́ Basabasə (pə́ nə ńkə́ ə́fóŋə yí nə́ Justusə), ḿbɨ ḿbə́ nə́ Matyasə. 24Pó tíʼ ńchaʼtə́sê ə́sóŋ ńgə́, “Mmaʼmbî gho jî ntɨ́ ŋwu ntsəmə. Nəələ̂ áwə́g ńgə́ á mə́m pɨ pɨ pɛ́n pɛ̌ gho tsɔ́ʼ lə́ wə́ənə́ 25á mə́ lɔg nə́ aliʼə́ afaʼ zəənə́ á mə́ pə́ nə́ ntúmə, aliʼ páʼ Judasə a nə ḿmɛdtə̂ nə́ á mə́ ghɛn nə́ nə́ ajíə aliʼə́.” 26Pó tíʼ ńtə́m pilə́ á mə́ tsɔ́ʼ nə́ táʼ ŋwunə á mə́m pɨ pə̂ pɛ́n pɛ̌, pid wə̂ á wǔəə á ndu Matyasə. Pə́ tíʼ ḿbegə̂ yə́ á mə́m məntú mə́ Yeso mə̂ ntsɔb mɔʼə́.
Currently Selected:
Məfaʼə 1: azo
Highlight
Share
Copy
Want to have your highlights saved across all your devices? Sign up or sign in
