Matyê 26

Pə́ pə́ ndou lə̂ njwí Yěso

(Mks 14.1-2; Lks 22.1-2; Jâŋ 11.47-53)

1Yěso lə jyêʼ mwo məno mbó pye tə nyér, ə́ ndǎʼ lə́ ngaŋə-jyêʼ-no* yé ngô: 2«Pei jí ńgó, ə́ cʉ́ʼ mə́ mbûŋ pə̂ leʼé pwô pə zʉ́ lətsei Pásʉ́ka*. Pə́ wo féi Môu Ŋuu ŋə́*, pə kʉ̂ʉ yé lə̂ tʉ̌-mbʉ̂ŋtə.»

3Ə́ pə̂ pə́ lə́ məleʼé mêi, pətə́-ndə̂ pənuŋú-poʼ gháp pə pəkə̌m lâʼ* kəitə ntôʼ Kayífa, a pə̂ nuŋu-poʼ Sê yi njwǐ*, 4ə́ nkə́itə́ yə́rə́, ə́ ntághʼ ńgó pə́ wo nyéʼtə́ ghǒu Yěso, ə́ jwí yé. 5Lə́ koo pə́ ghou yé leʼé lətsei, ə́ mbóghʼ lâʼ lə̂ sâŋ yʉʼ.

Cǒ məngyě laghʼ ləmə́ndaa ńzóʼ tû Yěso

(Mks 14.3-9; Jâŋ 12.1-8)

6Yěso ghʉ̂ mbə́ Mbetanî, ə́ ndə̂ Síməu, ngaŋə-tsóʼ-páp#26.6 Síməu wêi lə yaa mbə́ ngaŋə tsóʼ-páp lə́nə́ʉ. Lə́, ə mpfu yi Yěso lə wo ndə̂ zʉ́ lə ghí pə́ mə́i a lə mə́ shwítə́. 7ə́ nyáŋ sê mə́ nzʉ̂ zə̂u, cǒ məngyě kə̂u yé ndə̂, ə́ ngǐ tó mbəʉ Yěso, ə́ ngwǒ có tôʼ yi lətəi ndwuŋ, có ləmə́ndaa yi ə́ cóghʼ gháʼate pə̂ cər wó, a cwə́tə tû Yěso. 8Ngaŋə-jyêʼ-no Yěso* jwô, ə́ záŋə gháp gháʼate, gháp ləmtə ngô: «A fǔ ncoŋ yo ləmə́ndaa ńté hó? 9Ə̂ yi mboʼ pə́ tə̂i fə̂i, ə́ pfú tə́koʼ nkâp, ə́ ŋə́ mbó pəpûŋ.»

10Yěso jî məkwaŋtə máp, ə́ ndǎʼ lə́ páp ngô: «Pei tsâr tə́poŋ ńté məngyě wo ńté hó? A ghʉ pə̂ no shʉʼʉ lə́ məŋ. 11Pei wo pə́ jwô pəpûŋ pə́ mpfu tsəm, lə́ ngwo lə́ məŋ, mə́i káa paghʼə pə́ ngwô pə́ wághʼə mpfu tsəm. 12Məngyě wo laghʼ yo ləmə́ndaa ńzôʼ mbəʉ zâa, ə́ ndaghʼ nzâʼ nzʉ̂ ńzôʼ ghâa záʼa ndě pə́ táa mboŋə́ cóghʼ ghâa ləshi. 13Məŋ ndâʼ wéi, kwaʼ lə́nə́ʉ, maa yʉʼ tsəm yi pə́ táa ntsətə́ Nkəʉ Shʉʼʉ wó cər nzʉ̂, pə́ táa laghʼ pə̂ zə̂u yi məngyě wo ghʉ̌ zěi, ə́ cí kʉ̂ʉtə yé.»

Yúda wo féi Yěso ŋə́

(Mks 14.12-16; Lks 22.7-13)

14Cǒ tâʼ ŋuu lə́ ngaŋə-jyêʼ-no Yěso ntsap pwô lə̂ ləghə̂m, ləjôghʼ yé pə̂ Yúda Isəkaryôtə, wô njwó pətə́-ndə̂ pənuŋú-poʼ Sê*, 15ə́ ndǎʼ lə́ páp ngô: «N ndə̌i nyárə́ wéi ghíʼ pei wo ghʉ̌ poŋə́ ghǒu Yěso, pei ŋə̂ hó lə́ məŋ?» Gháp ŋə̂ nkâp paghʼ mə̂m tárə́ lə́ zʉ́. 16A pfû, ə́ njǐ lə̂ ndôu sʉ̂ ghíʼ a wo féi Yěso ńŋə́ mbó páp.

Yěso tə̂u ngaŋə-jyêʼ-no yé lə̂ ngwo tsuŋú məzə̂u Pásʉ́ka

17Ə́ ghʉ ḿbə́ nduŋ-mbi leʼé lâʼ lə́ ngap yi pə́ lə̌i mpfâr mbələ̂ghʼ tə mvuŋ*, ə́ ndaghʼ ńzʉ̂ lətsei Pásʉ́ka*, ngaŋə-jyêʼ-no* Yěso tô ńtúŋú yé ngô: «O koŋ ńgó paghʼ wó ghó, ə́ ntsuŋú yʉʼ yi o wo zʉ́ Pásʉ́ka* wó?» 18Yěso lâʼ lə́ páp ngô: «Pei wó túsoŋ, ə́ njwó ŋuu yi, ə́ ndáʼ lə́ zʉ́ ngô: Cícye tsətə ńgó paghʼ lâʼ lə́ gho ńgó ye mpfu paatə́ mə́, a pə̂ nkôŋ ńgó gháp pə ngaŋə-jyêʼ-no* yé zʉ̂ záp lətsei Pásʉ́ka* pə́ nzeʼ gho.» 19Ngaŋə-jyêʼ-no* yé ghʉ ndʉŋ-ndʉŋ ghíʼ a tsətə́, ə́ ntsuŋú məzʉ̂ Pásʉ́ka* yʉʼ wó.

Yěso laʼ ńgó pə́ wo féi yé ńŋə́

20Ə́ ghʉ ḿbə́ mpfu-ngwʉ̂, Yěso gháp pə ngaŋə-jyêʼ-no* yé ntsap pwô lə̂ ləghə̂m nyáŋə sê lə̂ mpfár zə̂u. 21Gháp pə̂ mpfâr zə̂u, Yěso lâʼ ngô: «Məŋ ndâʼ wéi, kwaʼ lə́nə́ʉ, cǒ tâʼ ŋuu təcər pei wo féi ghâa ńŋə́.» 22Gháp zûʼ, ə́ fú fʉ̂, ŋuu ntsəm lə́ páp túŋu ngô: «Ə́ Nde, tə mboʼ a pə̂ məŋ?» 23Yěso pwôr lə́ páp ngô: «Ŋuu yi pô zághʼ zʉ́ wo pəutə́ cər kâŋ, â ŋuu yi a wo féi ghâa ńŋə́. 24Môu Ŋuu* wo kwʉ́, ə́ pə́ ghíʼ pə́ lə ŋwaʼá cər ŋwaʼa Sê. Lə́, ndʉʉ tə́poŋ â ŋuu yi a wo féi yé ńŋə́. Mboŋə́ mə́i káa pə́ kə jí yé yé.» 25Yúda, ngaŋə mənyaŋ wêi, túŋu yé Yěso ngô: «Cícye tə mboʼ ə́ pə̂ məŋ?» Yěso pwôr lə́ zʉ́ ngô: «Gho lə̂ kə̌ ndǎʼ!»

Ə no məzʉ̂ ndêi-lěi

(Mks 14.22-25; Lks 22.15-20; 1Ko 11.23-25)

26Gháp pə pǎp pə̂ nzʉ̂ məzʉ̂, Yěso pyê mbələ̂ghʼ, ə́ ŋə́ nkhwo mbó Sê, ə́ mbwóʼtə́ ə́ ngí ŋə́ mbó ngaŋə-jyêʼ-no* yé, ə́ ndáʼ ngô: «Pei ko ḿpfár, yo mbap mbəʉ zâa», 27ə́ mbǒu nkhwór ntə̂uʼ məluʼ, ə́ ŋə́ nkhwo mbó Sê, ə́ ngí ŋə́ mbó ngaŋə-jyêʼ-no* yé, ə́ ndǎʼ ngô: «Pei ko nâa ńnó pə́tsəm. 28Ńté no yo məci mâa, ə́ məci mi Sê laghʼ ńgwâr kaa, ə́ mi ə́ cwərə lə̂ tû pye tə nzáa, ghíʼ Sê wo lǎghʼ lyəghʼə́ məno tə́poŋ máp. 29Məŋ ndaʼ wéi, məŋ ndáʼ kə́ pǒu ńnó mwo məluʼ po, tə paghʼə táa cʉ́ʼ nó pə́ mi shwî ə́ mpfu yi paghʼə wo pə́ cər ləfou Tə́ ghâa.» 30Gháp pə pǎp cʉ̂ʼ nkə́ nzâp mənci ndághʼ ńgúʼtə́ Sê, mpfu kûʼ gháp kwar, ə́ ndə́r lə́ ndəu ləkôr mətʉ̌ məwə̂r olîvə.

Yěso lâʼ ńgó Pyêh táa muŋú yé

31Gháp pə̂ ndə́r, Yěso lâʼ lə́ páp ngô: «Ə́ wo kə́ pə́ pə̂ lətwûʼ leʼé wo, pei pə́tsəm mêʼ ghâa ńkhʉ̌, ə̂ lághʼ ḿbəutə́ lə̂ no yi pə́ lə ŋwaʼá cər ŋwaʼa Sê ngô: “N ntáa jwí mbapə mbî, məndənzʉ* mé sâr yʉʼ tyer”. 32Yěso kə̂ ncí ndáʼ ngô: “N ntáa nzʉ́ʉ lə́ ləwʉ̂, ə́ pyə̌ghʼ Galilêi nzʉ́ʼtə́ wéi.”» 33Pyêh lâʼ lə́ zʉ́ ngô: «pəcó pye lə̌i méʼ ghô ńkhʉ̌ pə́tsəm, mə́i mboʼ n ndâʼ mêʼ ghâa ghô po.» 34Yěso pwôr lə́ zʉ́ ngô: «Kwaʼ lə́nə́ʉ cʉ́ʼ məŋ ndâʼ ghô, mənkhwoʼ táa ghǐ tóŋ lətwûʼ leʼé wo, mə́i o muŋú mə́ ghâa mpfu tárə́.» 35Pyêh lâʼ lə́ zʉ́ ngô: «Ə́ ngə́! Ə́ lə̌i mbə́i mə́ ntúŋu pə́ ńgó poghʼo nâa nkwʉ́, po mə́i mboʼ məŋ múŋu ghâa ghô po!» Pəcó ngaŋə-jyêʼ-no* yé pə́tsəm kə̂ ndâʼ záp pə́ yə́rə́.

Yěso pə̌ sʉ̂ʉtə Sê Getsémane

(Mks 14.32-42; Lks 22.39-46)

36Yěso gháp pə ngaŋə-jyêʼ-no* yé lər tə nkə̂u có yʉʼ yi pə́ fûŋ ńgó Getsémane, a lâʼ lə́ páp ngô: «Pei nyáŋ yaʼa, n ngwó yiʼi sʉ́ʉtə́ Sê», 37ə́ fǎghʼ Pyêh gháp pə ghəpə́ Zebede pə́pwô, gháp pə pǎp lər, a jî lə̂ nzúʼ tə́poŋ ntə̂ʉ zʉ́, ləwʉ̂ pə̂ ncâtə yé, 38a ncʉ́ʼ nkə́ ndáʼ lə́ páp ngô: «Ntə̂ʉ ghâa gháʼa mə́ ncâtə́ pə́ lə̂ mbə̂u yi mboʼ n nkwʉ̂. Pei nyáŋ yaʼa, ə́ mbáa ŋuu waghʼə lə̂ ngwaʼá mbəʉ ye ndé», 39ə́ ndǎʼ yə́rə́, ə́ nyéʼ ńgwó mbi, ə́ shíʼ ńkʉ́ʼtə́ sê, ə́ sáp sʉ̂ yé sê, ə́ mə́ sʉ̂ʉtə Sê ndâʼ ngô: «Tǎa, ə́ lə̌i ḿbə́ yi mboʼ ə́ pə̂ yə́rə́, o ghʉ̂ yo ntə̂uʼ ngwôʼ fû mbəʉ məŋ ncʉ́ŋtə́! Lə́, koo ghʉ̂ pə̂ ghâa ləkoŋtə, ghʉ̌ pə́ gho ləkoŋtə.» 40Yěso sʉ̂ʉtə Sê yə́rə́, ə́ mbə̌ʉ nzəm lə́ mbəʉ ngaŋə-jyêʼ-no* yé, ə́ njwó gháp pə̂ ndé. A lâʼ lə́ Pyêh ngô: «Káa pei fú nkûʼ wéi ghíʼ mboʼ paghʼə nâa shə̂ghʼ ləlê tə mbaa pə́ lə́ tâʼ mə́nəu áa! 41Koo pei kə̂ ndé, pei sʉ́ʉtə́ Sê, ə́ mbóghʼ lə̂ mpfúŋ cər nkwaʼtə. Ntə̂ʉ ŋuu ghwo ləkoŋtə gháʼate lə́, mbap mbəʉ pwôr.»

42Yěso kə̂ ncí fú mbəʉ páp ndə́r lə̂ mbâatə mpfu pwô, ə́ sʉ́ʉtə́ Sê ndǎʼ ngô: «Tǎa, ə́ lə̌i ḿbə́ yi cǒ lə́ ghʉ tə ncʉ́ŋə́ yo ntə̂uʼ ngwôʼ mbəʉ məŋ kâa pə́ wó, ə́ ḿbə́ yi n nkə́ ńnó nó, o ghʉ ghíʼ o kǒŋ», 43ə́ ndǎʼ yə́rə́, ńkə́ ncí mbə̂ʉ nzəm, ə́ njwó gháp kə̂ mə́ ndê lě, ńté no lə ghí pə́, mə́i ləlê fû mə́ ngǒu gháp. 44Yěso nyêr gháp, ə́ nkə́ ncí ngwó lə̂ mbâatə mpfu tárə́ ə́ sʉ̂ʉtə Sê, ə́ nkə́ ncí ndáʼ pə́ no yi a yaa mə́ ndǎʼ, 45ə́ ngʉ̌ yə́rə́, ə́ nkə́ ncí fú yʉʼ wó mbə̌ʉ nzəm, ńkwátə́ ngaŋə-jyêʼ-no* yé, ə́ ndáʼ lə́ páp ngô: «Pei tsúŋú ndé, ə́ njwítə́ shʉʼʉ. Pei jwó, mpfu kûʼ mə́! Pə́ wo féi Môu Ŋuu ńŋə́* lə́ pəghaŋə məfaa. 46Pei lesê paghʼə lə́r! Ŋuu yi a wo féi ghâa ńŋə́ mbó páp, â wó lə́ a tô lə̂!»

Pə́ ghou Yěso

(Mks 14.43-50; Lks 22.47-53; Jâŋ 18.2-11)

47Yěso pyêr mə́ ndâʼ laʼá, Yúda, yi â cǒ tâʼ ŋuu lə̂ ngaŋə-jyêʼ-no* yé ntsap pwô lə̂ ləghə̂m tô, ə lâʼ pə̂ nzəm zʉ́ tə nzáa, ə́ ngwǒ mənyǐ ntso gháp pə pəkə́shʉŋ, ə́ mbə́ pye pi pətə́-ndə̂ pənuŋú-poʼ Sê gháp pə pəkə̌m lâʼ pəyúda* tə̌u gháp. 48Ə́ ghi pə́, mə́i Yúda lə laʼ gháp ghíʼ a wo ghʉ̌ tə gháp poŋə́ lə̌i Yěso, zêi ləiʼi pə̂ ńgó a lə̌i ntsêʼtə́ ŋuu, ə́ mbáʼá yé gháp jî ńgó â zʉ́ ə́ ngǒu yé. 49Yúda tôghʼ ncʉ́ŋə́, ńtó lə̂ mbəʉ Yěso, ə́ ndǎʼ ngô: «N ntsêʼtə!» Ə́ nkə́ ntóghʼ mbáʼá yé. 50Yěso pwôr lə́ zʉ́ ngô: «Ə sə̌u ghâa, ghʉ̌ pə̂ zə̂u yi o tô ngʉ̌ wó.» Lâʼ kə̂ ntóghʼ ncʉ́ŋə́ mbáatə́ Yěso, ə́ ngôu yé. 51Cǒ tâʼ ŋuu lə̂ ngaŋə-jyêʼ-no Yěso, sôŋ nyǐ ntso ye cər ngwâa lə̂ ndághʼ nkhwóʼ ngaŋə-faʼ nuŋu-poʼ Sê yi njwǐ*, ə́ kwâtə lətuŋú yé, ə́ njʉ́ŋ ḿmêʼ. 52Yěso lâʼ lə́ zʉ́ ngô: «Cóghʼ nyǐ zô cər ngwâa, ŋuu yi a sôŋ nyǐ táa kwʉ́ pə̂ nyǐ. 53Koo pə́ njî ńgó tə́i ngíʼi ḿbə́ no ntso, mə́i məŋ tə̌i fúŋ Tə́ ghâa a fâtə ntə́u pəcwôʼ pé, tə ə́ lei mənou ntsap pwô lə̂ ləghə̂m gháp zoŋ məno mâa mo? 54N ndə̌i nkə́ ngʉ́ yə́rə́, zə̂u yi pə́ lə ŋwaʼá cər ŋwaʼa Sê ghʉ ghaʼá mboŋə́ pəutə́? Ńté no pə́ lə ŋwaʼá cər wó ngô: “Məno táa leitə́ pə́ ghíʼ ə́ leitə mpfu wo lo.”»

55Yěso cʉ̂ʼ ńkə́ ndáʼ mbó lâʼ ngô: «Pei ghí tô lə̂ ngôu ghâa, ə́ ngwǒ mənyǐ ntso gháp pə pəkə́shʉŋ ghíʼ mpfu yi pei wo ngou ntsǒŋ gháʼa ńté hó? N nkə pə̂ ndə̂ Sê* pə̂ leʼé tsəm, ə́ njyêʼ pye no Sê! Káa pei ghôu wéi ghâa. 56Lə́ məno mi ə́ leitə lo laghʼ ḿbə̂utə lə̂ no yi pətsətə́-nkəʉ Sê* lə ŋwaʼá.» Pə́ ghou Yěso yə́rə́, ngaŋə-jyêʼ-no* yé pə́tsəm naa méʼ yé nkhʉ̂ gháp.

Yěso pə́ mbi pəsǎʼ lâʼ

(Mks 14.53-65; Lks 22.54-55,63-71; Jâŋ 18.12-14,19-23)

57Pye pi ə́ ghǒu Yěso laghʼ yé ńdə́r lə̂ ntôʼ Kayífa. A pə̂ nuŋu-poʼ Sê yi njwǐ*. Mə́i pəkeʼtə́-lə́pə́ʉ Mə̌usə̂i* gháp pə pəkə̌m lâʼ naa nkəitə́ wó. 58Pyêh tsə̂ʉ nzəm zʉ́ lə́ ḿbə́ pə́ ndǐ təsə, ə́ ndə́r tə nzéʼ nkə́u tətáa nuŋu-poʼ Sê yi njwǐ*, ə́ ngwó nyáŋ sê təcər pəghaŋə-faʼ, ə́ mə́ ndôu lə̂ njwó ghíʼ yo no ghǐ lyəghʼtə́, ə́ pə́. 59pətə́-ndə̂ pənuŋú-poʼ Sê gháp pə pəsǎʼ lâʼ*, ə́ pə̂ ndôu məlaa mi gháp wo ntáŋ tû Yěso poŋə́ lǎghʼ ghʉ̌ pə jwí yé. 60Káa pə́ jwô gháp. Tə mbaa pə́ ghíʼ ngaŋə-məlaa lə tó tə nzáa mə́ ntâŋ məlaa tû Yěso. Ə́ ghi lyəghʼtə́, pəcó pye pə́pwô tô ndáʼ ngô: 61«Ŋuu wo kə lâʼ ńgó a kuʼ lə̂ nkə̂m ndə̂ Sê*, ə́ ndǎghʼ leʼé tárə́ ḿbóu.» 62Nuŋu poʼ Sê yi njwǐ* cʉ̂ʼ nkə́ ndésê ntúŋú Yěso ngô: «O nâʼ naʼá mo? Kôo pə́ nzûʼ məno mi pə́ lâʼ ńté gho lo mo?» 63Lə́ Yěso kâa tsáp yé có no. Nuŋu poʼ Sê yi njwǐ* lâʼ lə́ zʉ́ ngô: «Lǎghʼ ləjôghʼ Sê yi a pə̌ ntəʉ ńkâa ńgó ô Nzaʼ-nkʉ* yi â Môu Sê kəʉ kôo pə́ wěi ló?» 64Yěso pwôr lə́ zʉ́ ngô: «O lâʼ mə́, cʉ́ʼ məŋ tsuŋú ńdǎʼ wéi, lə̂ fú mpfu wo, pei táa jwó Môu Ŋuu* nyáŋ lə̂ ndyə́ghʼə́ pô təʉ yi Ngaŋə-mətəʉ məntsəm, ə́ kə́ cí jwó a pə́ fû cər məlâm tʉ̌-lə́pû ntó». 65Nuŋu poʼ Sê yi njwǐ* zûʼ yə́rə́, ə́ shərə́ sətə́ ndʉʉ məndǐ* mé, ə́ ndáʼ ngô: «A zoutə Sê, paghʼə pou nkə́ ncí ndôu lə̂ njwó zarə́ mbə̂u pənzǔʼ-njwó. Kwaʼ pei zéi zúʼ ghíʼ a zoutə Sê. 66Pei kwâŋ zéi ńgó hó?» Pəsǎʼ lâʼ pwôr ngô: «Â ŋuu yi mboʼ pə́ jwî yé jwí.» 67Gháp cʉ̂ʼ nkə́ ntyə̂ghʼ mətê sʉ̂ Yěso, ə́ ntî yé, pəcó pye pə̂ ntə̂m mbô mətuŋú zʉ́, 68ndâʼ ngô: «Nzaʼ-nkʉ*, tóghʼ ŋuu yi a sə̂u ghô.»

Pyêh muŋu Yěso mpfu tárə́

(Mks 14.66-72; Lks 22.56-62; Jâŋ 18.15-18,25-27)

69Ə́ ghi pə́ yə́rə́, Pyêh nyâŋ tətáa. Cǒ ngaŋə-faʼ yi məngyě tô, ə́ ndáʼ lə́ zʉ́ ngô: «Tə mbaa gho zô pei pə Yěso ŋuu Galilêi wə̂ kə pə́ nou.» 70Pyêh tə́ʉ mbi maa ŋuu tsəm, ə́ muŋú yé ə́ ndáʼ ngô: «N kâa ńjí no yi o lou ndâʼ zěi! 71Ncʉ́ʼ nkə́ ngwó nyáŋ ntsʉ nkâʼ. Cǒ ngaŋə-faʼ yi məngyě jwô yé, ə́ ndǎʼ lə́ pye pi ə́ lə pə́ yʉʼ wó ngô: “Ŋuu wo gháp Yěso ŋuu Nǎzalêi tə́i mbə́.”» 72Pyêh kə̂ ncí muŋú, ə́ ndǎʼ tə nkâa ngô: «Kâa m mə́ njî ghâa ŋuu wo.» 73Pə́ nyêʼ nyáŋ, pye pi tə́i mbə́ yʉʼ wó tô lə̂ mbəʉ Pyêh, ə́ ndǎʼ ngô: «Kâa pə́ no lou lǒu, ô cǒ ŋuu ghap. Zô mbə̂u laghʼ ntsár lə́ ghʉ̌ tə paghʼ lâʼ yə́rə́.» 74A jî lə̂ ndâʼ ngô: «Ngâa zâa ée, kâa m mə́ njî ghâa ŋuu wo, n ndə̌i ndáʼ gháʼa, ə́ ndághʼ ńtâŋ məlaa, ə Sê côghʼ ndou tû məŋ. Mənkhwoʼ lêi-lěi ntóŋ.» 75Pyêh cʉ̂ʼ nkʉ́ʉtə́ ghíʼ Yěso yǎa ndǎʼ lə́ zʉ́ ńgó mənkhwoʼ táa ghǐ tóŋ, mə́i o muŋu mə́ ghâa mpfu tárə́, ə́ fú tətáa ńkwár, ə́ fú ndâa gháʼate.

Currently Selected:

Matyê 26: NLA

Highlight

Copy