Matyê 27

Pə́ laghʼ Yěso ńdə́r lə̂ mbi Piláto

(Mks 15.1; Lks 23.1; Jâŋ 18.28)

1Nzʉ̂ ghʉ̂ fóghʼ, pətə́-ndə̂ pənuŋú-poʼ Sê, gháp pə pəkə̌m lâʼ* mə̂ʉ mbaʼa-mbaʼ, ə́ nkə̂itə́ ə́ ntághʼ ńgó gháp wo ghʉ̌ pə jwí Yěso, 2ə́ ngʉ̌ pə́ kə̂r yé, ə́ ngwo ŋə́ yé lə́ ngə́mnaa Piláto*.

Yúda kâp njʉ̂ʼ

3Yúda yi a lə féi Yěso ŋə́ zûʼ ghíʼ pə́ záʼ kôr ńgó pə́ wo jwí Yěso, ə́ ncʉ́ʼ nkə́ ə́ njí lə̂ fʉ̂ zə̂u yi a kə ghʉ̌, ə́ mbyé nkâp yi a kə pfú paghʼ mə̂m-tárə́ lə̂, ə́ ndaghʼ ńgwó ńjwó pətə́-ndə̂ pənuŋú-poʼ Sê gháp pə pəkə̌m lâʼ*. 4Ə́ ndǎʼ lə́ páp ngô: «Məŋ kə ghʉ no tə́poŋ ghíʼ n nkə féi tâʼ mbə̌uʼ ŋə́ ńgó pə jwí yé.» Gháp zûʼ mbwôr ngô: «Káa paghʼ ghwô wághʼ no mə́u, ə́ zúʼu lə́ gho.» 5Yúda mêʼ nkâp ndə̂ Sê*, ə́ fú yʉʼ wó ndə́r, ə́ ncʉ́ʼ ngwó nkǎp njʉ̂ʼ. 6Pətə́-ndə̂ pənuŋú-poʼ Sê* laghʼtə nkâp, ə́ ndǎʼ ngô: «Kâa ləpə̌ʉ zághʼə pə́ túŋu yé ńgó mboʼ pə́ côghʼ mbə̂u nkâp yo lə̂ nkâp ndə̂ Sê, ńté ńgó ə̂ nkâp məci ŋuu.» 7Gháp pyêtə tə ḿbə́ tâʼ ntsʉ, ə́ ndǎghʼ nkâp zei ńgwó ńzə́u nkâʼ mbou-məkhʉŋ-tsaʼá, ə́ nzə́u yə́rə́, ə́ ndǎghʼ ńgʉ́ yʉʼ lətʉ̌ŋ pəghəʉ. 8Tə fú mpfu wêi tə nkə́u leʼé wo, pə́ lə̌i ncʉ́ʼ fûŋ wêi nkâʼ pə́ ngô: «Nkâʼ məci.» 9No zêi pə̂ yə́rə́, ə́ ndaghʼ ḿbə̂utə lə̂ no yi Jərəmî ntsətə-nkəʉ Sê* lə lǎʼ ngô: «Gháp kə mpfû nkâp zei paghʼ mə̂m-tárə́, ə́ pə̂ ndwuŋ yi pə Ísə́lahêl lə záʼ ńgó pə́ laghʼ ńzə́u yé. 10Gháp kə ŋə́ zêi nkâp ńdaghʼ ńzə́u nkâʼ mbou-məkhʉŋ-tsaʼá, ə́ pə̂ zə̂u yi Nde lə láʼ ntsə́tə́ ńgó məŋ ngʉ̂.»

Yěso pə́ mbi Piláto

(Mks 15.2-15; Lks 23.2-5,13-25; Jâŋ 18.29-40; 19.4-16)

11Yěso kə̂u mbi Ngə́mnaa Piláto*, a túŋu yé ngô: «Ô fou pəyúda mo?» Yěso pwôr lə́ zʉ́ ngô: «O lâʼ yə́rə́.» 12Ə́ pə̂ yə́rə́ pətə́-ndə̂ pənuŋú-poʼ-Sê* gháp pə pəkə̌m lâʼ cʉ̂ʼ mə́ nzápə sôu tû Yěso lə́ məno tə nzáa, lə́u a tsâp yé no po. 13Piláto* cʉ̂ʼ ndáʼ lə́ zʉ́ ngô: «Kôo pə́ nzûʼ ndwuŋ məno mi pə́ lâʼ ńté gho lo mo?» 14Lə́ Yěso kâa pwôr yé. Ngə́mnaa jwô ə́ fû nkəʼə́ yé gháʼate.

Pə́ záʼ kôr ńgó pə́ wo jwí Yěso

15Ə́ lə pə̂ leʼé lətsei Pásʉ́ka* tsəm, Ngə́mnaa kwárə tâʼ ngaŋə-tsâŋ yi lâʼ tsoʼó. 16Ə́ lə ghí pə́ mpfu wêi, cǒ ŋuu pə̂ ndə̂-tsâŋ, ləjôghʼ yé pə̂ Yěso Pənə́páasʉ, lâʼ jî yé gháʼate ńté fəʼə yé. 17Piláto* túŋu lâʼ yi ə́ kəitə́ ngô: «Pei koŋ ńgó n ńgwó lə́ pye pwo ə́ nyér pə́ Yěso Pənə́páasʉ kəʉ pə́ Yěso yi pə́ fûŋ yé ńgó Kəlísto?» 18Piláto* lə lâʼ yə́rə́, ńté no a tsuŋu mə́ njî ńgó pə́ ŋwə́itə́ Yěso Kəlísto ŋwəitə́ mboŋə́ féi yé ńŋə́. 19Piláto* lə pə́ fêʼ no Yěso, ngwě ye tə̂u ńgó pə wó ndǎʼ lə́ zʉ́ ńgó a laghʼə́ tû yé lə̂ kôr ŋuu wə̂, ńgó a gháʼá ḿbə́ tâʼ mbə̌uʼ, ńgó pə láʼ lə́ zʉ́ ńgó a yǎa ndé-njwo ńté ŋuu Wêi, ə́ ghaghʼə yé gháʼate. 20pətə́-ndə̂ pənuŋú-poʼ Sê* gháp pə pəkə̌m lâʼ pə̂ ncʉ́ŋə lâʼ ńgó gháp láʼ lə́ Piláto* ńgó a nyér pə́ Pənə́páasʉ ə́ ngʉ̌ pə jwí Yěso. 21Ngə́mnaa kə̂ ncí ndáʼ mbó lâʼ ngô: «Məŋ ngwo nyér tâʼ ngaŋə-tsâŋ lə́ pei. Pei koŋ ńgó məŋ ngwó lə́ pye pwo pə́pwô, ə́ nyér wó?» Gháp pwor ngô: «Pənə́páasʉ!» 22Piláto* kə̂ ncí ntúŋú ngô: «Tə məŋ ngwo ghʉ̌ pə́ gháʼá lə́ Yěso yi pə́ fûŋ yé ńgó Kəlísto?» Mâa ŋuu tsəm pwôr ngô: «Kʉ̌ʉ yé lə̂ tʉ̌-mbʉ̂ŋtə!» 23Piláto* túŋu gháp ngô: «Kwaʼ no tə́poŋ yi a ghʉ̌ pə́ pə̂ hó?» Lə́ lâʼ kʉʼʉ máʼ wâr, ə́ ndâʼ pə́ ngô: «Kə́ nkʉ̂ʉ yé kʉ̌ʉ!» 24Piláto* jwô ńgó káa pə pə́ nzûʼ yé no yi a laʼ zěi, ə́ mə́ njwô ńgó mboʼ ə́ shə́rə́ pye maʼ tághʼə́, ə́ ncʉ́ʼ nkə́ nkhwór nci, ə sǒghʼ mbô mé mbi lâʼ, ə́ ndǎʼ ngô: «Kâa ngwô ghâa no lə́ ləwʉ̂ ŋuu wə̂, ə́ pə́ njwô pə́ wéi.» 25Mâa ŋuu tsəm pwôr ngô: «Məci ŋuu wə̂ shíʼ ndəu paghʼ tə mbaa ndəu ghəpə́ zághʼ.» 26Piláto* cʉ̂ʼ ńkə́ nkwárə́ Pənə́páasʉ ndə̂-tsâŋ, ə́ ngʉ̌ pə́ laghʼ ngwaa ńsə́u Yěso, ə́ mbou ńŋə́ yé ńgó pə laghʼ yé ńgwo, ə́ nkʉ̂ʉ yé lə̂ tʉ̌-mbʉ̂ŋtə.

pəlwóʼó-ntso pə̂ nzôutə Yěso

(Mks 15.16-20; Lks 23.11; Jâŋ 19.2-3)

27Pəlwóʼó-ntso Piláto* cʉ̂ʼ nkə́ ndághʼ Yěso ńdə́r lə̂ ntôʼ Ngə́mnaa, ə́ nkə́u wó gháp pə́tsəm kəitə nkárə́ yé ŋə́ soŋ, 28nǎa sâr məndǐ mé, ə́ ncʉ́ʼ máʼ pə́ paŋ ndǐ pəsóghəi ndəu zʉ́, 29mbou ndághʼ mə́kǎp-kǎp ḿbáʼ nkaghʼə-ləfou ńsô tû zʉ́, ə́ cóghʼ kəkaʼa lə́ pô yé yi təʉ, ə́ mə́ nkʉ̂ʼtə mbi zʉ́, ə́ nzôutə yé ńdâʼ ngô: «Zaa-môu, fou pəyúda!» 30Ə́ mə́ ntyə̂ghʼ mətê lə́ zʉ́, ə́ mpfû kəkaʼa, ə́ sə́u tû zʉ́, 31ə́ nzoutə́ yé tə nkáa, ə́ fú ndəu zʉ́ sâr paŋ-paŋ ndǐ ləfou zêi, ə́ nkə́ ncí mâʼ kwaʼ mé məndǐ ndəu zʉ́. Tə ə́ kuʼ gháp laghʼ yé ńfú yʉʼ wó ńkwár, lə̂ ngwó nkʉ̌ʉ yé lə̂ tʉ̌-mbʉ̂ŋtə.

Pə́ kʉʉ Yěso lə̂ tʉ̌-mbʉ̂ŋtə

(Mks 15.21-32; Lks 23.26-43; Jâŋ 19.17-22)

32Pəlwóʼó-ntso laghʼ yé fú túsoŋ ńkwár, ə́ mə́ ndə́r, ə́ mbəutə́ cǒ ŋuu Silêinə yi pə́ fûŋ yé ńgó Síməu, ə́ fárə́ yé a khwór tʉ̌-mbʉ̂ŋtə Yěso. 33Gháp pə Pǎp lər tə nkə̂u có yʉʼ yi pə́ fûŋ ńgó Golgóta, ə́ laghʼ ńdâʼ ngô: «Yʉʼ Kwěi-tû.» 34Gháp kə̂u yʉʼ wó, ə́ ndǎghʼ có zə̂u yi ə́ li lǐ mvuŋú məluʼ, ə́ ŋə́ ńgó Yěso nó. Yěso zʉ̂ʼ ə́ ndə̂ʼ yé lə̂ nó. 35pəlwóʼó-ntso cʉ̂ʼ nkə́ nkʉ̂ʉ yé lə̂ tʉ̌-mbʉ̂ŋtə, ə́ tə́m pyêr ńdaghʼ ńgâptə́ məndǐ mé, ə́ ŋə́ yi maa wǒwó təcər páp 36Tə ə́ kuʼ, gháp nyâŋtə sê yʉʼ wó mə́ mbâp Yěso. 37Pə́ ŋwáʼa no yi a fǎa zěi, ə́ nkʉ̌ʉ tʉ́ lə̂ yʉʼ yi tû yé lə pə́ wó ngô: «Yo Yěso, fou pəyúda.» 38Gháp lə kə́ cí nkʉ̂ʉ pətsǒŋ pə́pwô lə̂ máp mətʉ̌-mbʉ̂ŋtə, tâʼ pə̂ lə̂ ndyə́ghʼə́ pô Yěso yi təʉ, cǒ pə̂ lə̂ ndyə́ghʼə́ pô yé yi kwap. 39Pəndei-laŋə́-ndə̂u pə̂ nzôutə záp Yěso tə ncʉ̂ʼ tû záp 40ə́ ndâʼ ngô: «Lə́u o kə laʼ ńgó mboʼ o wo vǒghʼ ndə̂ Sê*, ə́ lǎghʼ leʼé tárə́ ńkə́r péh? Kwaʼ gho zô pfú tû zô, ghíʼ o lə̌i ḿbə́ Môu Sê, ə́ fú lə̂ tʉ̌-mbʉ̂ŋtə shíʼ.» 41Pətə́-ndə̂ pənuŋú-poʼ Sê*, gháp pə pəkeʼtə́-lə́pə́ʉ Mə̌usə̂i*, gháp pə pəkə̌m lâʼ pə̂ nzôutə záp Yěso lə́wó ndâʼ ngô: 42«A kə ghʉ pəcó pye cwôr, a pou mbə́ mpfu wo káa kûʼ yé lə̂ mpfú tû yé ə́ mbó ləwʉ̂! A lə̌i ḿbə́ fou pə Ísə́lahêl, a fû lə̂ tʉ̌-mbʉ̂ŋtə mpfu wo ə́ shíʼ paghʼə jwô, ə́ ncóghʼ ntə̂ʉ lə́ zʉ́. 43A lə côghʼ ntə̂ʉ yé lə̂ Sê, Sê lə̌i mə́ nkôŋ yé kwaʼ lə́nə́ʉ, a ghʉ̂ a cwôr mpfu wo! Ŋuu wə̂ lə yaa ndǎʼ ngô: “Mə̂ŋ Môu Sê.”» 44Tə mbaa pətsǒŋ pi pə́ lə kʉ̌ʉ gháp lə̂ mətʉ̌-mbʉ̂ŋtə mbəʉ Yěso kə̂ mə́ nzôutə záp yé pə́ yə́rə́.

Yěso kwʉ̂

(Mks 15.33-41; Lks 23.44-49; Jâŋ 19.25-30)

45Ntə̌ʉ-nəu lə kuʼ, yʉʼ tsəm cər ngoŋ naa shʉ́ŋ, tə ndáʼ nkə́u lə́ pəmə́nəu pə́tárə́ mbwǒr-nəu. 46Ə́ pə̂ ndə́u pəmə́nəu pə́tárə́, Yěso gheʼtə lə́ tə́koʼ njî ə́ ndáʼ ngô: «Eloyî, Eloyî lama sabatanî?» Ə́ ndaghʼ ndâʼ ngô: «Sê zâa, Sê zâa, o mêʼ ghâa ńté hó?» 47Pəcó pye lə́ pye pi ə́ lə pə́ yʉʼ wó zûʼ, ə́ ndáʼ ngô: «A wə̂ a pə̂ mə́ fûŋ Elyê* lə̂!» 48Cǒ tâʼ ŋuu lə́ páp tôghʼ nkhʉ́tə́, ngwo ndôu kucáa, ə́ tsə̌p cər kəkə́i məluʼ, ə́ shóghʼə́ lə̂ kəkaʼa, ə́ ncághʼə́ ə́ ncóghʼ ntsʉ Yěso ńgó a shwétə́. 49Pəcó pye pə̂ ndâʼ ngô: «Pei cʉ́ʼ paghʼə jwó kəʉ Elyê* wo tó ghʉ̌ a cwór ló!» 50Yěso kə̂ ncí ngêʼtə́ lə́ tə́koʼ njî ə́ ntsə́ʉ. 51Yěso tsə̂ʉ yə́rə́, ndǐ yi pə́ lə lǎghʼ ńkhʉ́ŋə́ yʉʼ lənuŋú poʼ Sê cər ndə̂ Sê* fû tʉ́ sáa paghʼ pwô tə nkə́u sê. Ndesé cʉʼʉ, məghǒ sêitə, 52mətû-lə́shi ŋéʼe ńtə́ʉ, pəpfû pi gháp lə cóghʼ ntə̂ʉ gháp lə̂ Sê zʉ̂ʉ tə nzáa, 53ə́ fú cər məshi nkwátə́. Yěso ghʉ̂ nzʉ́ʉ yé lə̂ ləwʉ̂, gháp pə pǎp naa nkə́u Yelúsalêm, ə́ túsoŋ ndêi-lěi, pye tə nzáa jwô gháp. 54Yěso lə kwʉ́ yə́rə́, tə́-ndə̂ pəlwóʼó-ntso pəlóma gháp pə pəlwóʼó-ntso pi ə́ lə pə́ mbâp yé jwô ghíʼ ndesé naa ncʉʼʉ́, ə́ nkə́ ncí njwó zə̂u tsəm yi ə́ lə pə́ ndêi, ə́ fú mbóghʼ gháʼate, ə́ ndǎʼ ngô: «Kwaʼ lə́nə́ʉ Yěso kə pə́ Môu Sê.» 55Məno mêi mə́tsəm lə pə́ ndêi, pəngyě tə nzáa tə̂ʉ ndǐ təsə mə́ njwó, mə́i gháp lə zuŋ nzəm Yěso tə fú Galilêi, ə́ ŋəi mpfûtə yé. 56Ə́ lə pə́ təcər páp, yo pə̂ Mǎyaa Mǎghʼdala, ə́ ngʉ̌ Mǎyaa mə́ pə Jâghʼ gháp Yosêp, ə́ nkə́ ncí ngʉ́ mə́ pə ghəpə́ Zebede.

Yosêp côghʼ Yěso cər ləshi

(Mks 15.42-47; Lks 23.50-56; Jâŋ 19.38-42)

57Ə́ ghʉ mbə́ mpfu-ngwʉ̂ cǒ ngaŋə zə̂u tô, ləjôghʼ yé pə̂ Yosêp, a pə̂ ŋuu túsoŋ Arimatê, ə́ mbə̂ yé cǒ ngaŋə-jyêʼ-no* Yěso. 58Ə́ ngwo njwó Piláto*, ə́ ndóu pfû Yěso lə̂ ngwó ndoʼó. Piláto* pə̂i, ə́ tsətə́ ńgó pə ŋə́ lə́ zʉ́. 59Pə́ kêʼ, Yosêp pfû, ə́ ndǎghʼ mbalaŋ shwî ńzə́mtə́ pfû yé, 60ə́ nkhwór yé ńdághʼ ngwó ńcóghʼ cər ndʉʉ ləshi ye yi a kə pyér shʉ̂ʼ shʉʼʉ́ lə́ tə́koʼ ləghǒ. Ə́ cóghʼ Yěso cər wó, ə́ ncʉ́ŋə́ tə́koʼ tuʼú-lə́ghó ńdághʼ ńtsághʼə́ ntsʉ wei ə́ ndər yé. 61Yosêp lə pə́ ntʉ̂ŋ Yěso yə́rə́, Mǎyaa Mǎghʼdala gháp cǒ Mǎyaa nyâŋ ngʉŋ ləshi, ə́ mə́ njwó.

pəlwóʼó-ntso pə́ mbâp ləshi Yěso

62Pə́ lə tʉ̂ŋ Yěso gháʼa, leʼé yi pə́ lə ntsúŋtə́ leʼé nji Sê. Nzʉ̂ cʉ̂ʼ fóghʼ pətə́-ndə̂ pənuŋú-poʼ Sê* gháp pə pəfalísia* naa nkə̂itə́ nzeʼ Piláto*, 63ə́ ndǎʼ lə́ zʉ́ ngô: «Zaa-môu, paghʼ pə̌ nkʉ̂ʉtə có no.» Ngaŋə məlaa wə̂ kə pyér ḿbə́ pə̂ ntəʉ, ə́ ndáʼ ngô: «Məŋ n ngwo láʼ zʉ́ʉ lə̂ ləwʉ̂ lə̂ mbâatə leʼé tárə́.» 64Ə́ pə̂ yə́rə́, paghʼ pə̂ ndâʼ ńgó o lâʼ pəlwóʼó-ntso páp yʉʼ ləshi tə kə́u lə̂ mbâatə leʼé tárə́. Tə ə́ ndə́iʼ pə́ yə́rə́ po, mə́i mboʼ ngaŋə-jyêʼ-no yé tô ńjú pfû yé, ə́ ncʉ́ʼ ńgwó ndǎʼ lâʼ ńgó a zʉ̌ʉ lə̂ ləwʉ̂! Mêi məlaa ə́ kʉ́ʼʉ́ shwôr tə ńdéi mi tsəmbi. 65Piláto* lâʼ lə́ páp ngô: «Pəlwóʼó-ntso pə́ lə̂. Pei wó ngʉ̌ pə páp ləshi ghíʼ pei kǒŋ!» 66Gháp wo nyáŋ sê, ə́ ntsuŋtə́ mbə̂u yi pə́ wo lǎghʼ páp ləshi, tə ə́ kuʼ gháp laghʼ có zə̂u ncóghʼ ləiʼi lə̂ ləghǒ yi pə́ yǎa ndaghʼ ńtsághʼə́ ləshi, ə́ ncʉ́ʼ ntághʼ pəlwóʼó-ntso, gháp pə̂ mbáp.

Currently Selected:

Matyê 27: NLA

Highlight

Copy