Máakúsʉ 11
11
Yěso kə̌u Yelúsalêm
(Mat 21.1-11; Lks 19.28-40; Jâŋ 12.12-19)
1Yěso gháp pə ngaŋə-jyêʼ-no* yé lə pə́ ndə̂r lə́ Yelúsalêm, ə́ ŋə̌i tə mə́ mbâatə Mbedfajê gháp Mbetanî, ə́ nkə́u ləkôr mətʉ̌ məwə̂r olîvə. A tə̂u ngaŋə-jyêʼ-no* yé pi pə́pwô ə́ ndǎʼ lə́ páp ngô: 2«Pei wó cər lâʼ yi ə́ pə́ mbi pei lə̂. Pei wo lěi tə kə́u wó, ə́ jwó môu naʼá yi pə́ yǎa nkǎp, a pə́ yi ŋuu laa kə́ nyâŋ yé ndəu zʉ́. Pei kéʼ yé ndaghʼ ntó ńŋə́ lə́ məŋ. 3Pei lə̌i mə́ nkêʼ yé, ŋuu túŋú wéi ńgó pei kêʼ yé ndaghʼ ńgwô ghó? Pei lâʼ lə́ zʉ́ ngô: Nde pə̌ nkoŋ wěi. Pei wo lǎʼ yé yə́rə́, a lâʼ ńgó pei lâghʼ yé ndə̌r.»
4Gháp lər ńkə́u wó, ə́ njwó môu naʼá yi pə́ nkǎp yé nkaŋ laŋə́ ə́ ntsʉ mbuʼ, ə́ nkéʼ yé. 5Pəcó pye pi gháp yǎa mbə́ yʉʼ wó túŋu gháp ngô: «Zə̂ hó? Pei kêʼ naʼá wə̂ ńté hó?» 6Gháp pwor ghíʼ Yěso yǎa ndǎʼ, pəghaŋ nyêr yé; gháp laghʼ yé ńdə́r. 7Gháp laghʼ môu naʼá wêi ńtó ńcə́r Yěso, ə́ nzápə́ məndǐ fwôghʼ máp ndəu zʉ́, Yěso kôʼ ńnyáŋ lə́ wěi; 8ə́ mə́ ńdághʼ ŋə̌i, pye tə nzáa laghʼ məndǐ fwôghʼ máp ńzə́tə́ laŋə́. Pəcó pye laghʼ záp pə̂ mbô tʉ̌ shwî mi gháp faghʼtə́ cər mənkâʼ ə́ nkwə̌i laŋə́. 9Pye pi gháp lə pə́ mbi zʉ́ gháp pə pi ə́ lə pə́ nzəm zʉ́ cʉ̂ʼ mə́ ŋə́i nzap ngô:
Ghûʼtə pə́ mbó Sê,
mbwórə pə́ lə́ ŋuu yi a tô lə̂ ləjôghʼ Nde. 10Ə́ Sê cóghʼ mbwórə lə́ ləfou yi ə́ pə́ ntó, ə́ ləfou yi ə́ pə́ ghíʼ yi Tə́ waghʼə fou Ndavîd. Ghûʼtə pə́ mbó Sê tʉ̌-lə́pû.
Yěso kə̌u Yelúsalêm
11Yěso kə̂u Yelúsalêm, ə́ ndə̌r lə̂ ndə̂ Sê*. Ə́ ntsuŋu njwó zə̂u tsəm yi ə́ lə pə́ ndêitə́ tə ə́ kuʼ, gháp pə ngaŋə-jyêʼ-no* yé ntsap pwô lə̂ ləghə̂m pəʉ lə́ Mbetanî, ńté no ə́ lə ghí pə́, mə́i zâʼ nzʉ̂ lei mə́.
Yěso côghʼ ndou lə̂ tʉ̌
(Mat 21.18-19)
12Nzʉ̂ fôghʼ, gháp pə̂ fû Mbetanî mbə̂ʉ lə̂ Yelúsalêm, ə nji záŋə Yěso. 13A tə̂ʉ ndǐ təsə máʼ nyôghʼ mé, ə́ njwó cǒ mbə̂u tʉ̌ yi pə́ fûŋ ńgó figyê, məfu mêi pə̂ shwítə́, a ghi lə̌r lə́ ləcʉŋə́ wó, ə́ mə́ nkwâŋ yé ńgó a kə́u jwó məntǎa mə́u tə zʉ́, ə́ nkə́u yʉʼ wó ńjwó pə̂ ndaʼ məfu měi. Ńté no káa ə̂ lə pə̂ yé mpfu mbə̂u tʉ̌ zêi zə̂m. 14A cʉ̂ʼ ndáʼ lə̂ tʉ̌ zêi ngô: «Ŋuu láʼ nkə́ pǒu zʉ̂ yé məntǎa mô po; ə́ ndǎʼ yə́rə́, ngaŋə-jyêʼ-no* yé zûʼ.»
Yěso fǔ ndə̂ Sê ńzǔŋ pətáŋ-mə́táa
(Mat 21.12-17; Lks 19.45-48; Mjw 2.13-16)
15Gháp lər tə nkə́u Yelúsalêm, Yěso kə̂u ndə̂ Sê*, ə́ njǐ lə̂ saŋ pye pi gháp pə́ wó ə́ mə́ fə̂i zə̂u gháp pə pəzə̌u-zə̂u, ə́ ncǐ məkə̌u mətǎa pəkə́pə́ nkâp ḿmáʼtə́ sê, ə́ ntsóʼtə́ məlwoŋ pəfə̌i pəpə́ptə́, 16káa pə̂i yé tə ŋuu khwór có zə̂u ndaghʼ ńzáʼá ńdêi. 17Ə́ ncʉ́ʼ njí lə̂ njyéʼ gháp ngô: «Ə́ pə́ cər ŋwaʼa Sê ə́ mbə́ ngô: “Ndə̂ zâa láʼ cí pə̂ pə́ ndə̂ sʉ̂ʉtə mbó ngoŋ tsəm.” Lə́ pei, pei cʉ̌ʼ ndaghʼ ńgʉ́ ləpəutə́ pətsǒŋ.»
18Pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i* zûʼ, ə́ njǐ lə̂ ndôu məsʉ̂ lə̂ ndághʼ ńjwí yé. Gháp lə yaa mə́ mbôghʼ yé ńté ńgó lâʼ lə pə́ fə́tə no yi a lə jyêʼ gháp zěi.
19Ə́ pə̂ mpfu-ngwʉ̂, Yěso gháp pə ngaŋə-jyêʼ-no* yé fû túsoŋ nkwár.
Pei cóghʼ ntə̂ʉ wéi lə̂ Sê
(Mat 21.20-22)
20Gháp mə̂ʉ mbaʼa-mbaʼ mə́ ndêi, ə́ njwó mə́i tʉ̌ figyê zə̂ zə̂u mə́ tə nkə́u lə̂ məŋaŋə. 21Pyêh kʉ̂ʉtə no yi ə́ kə lěi, ə́ ndǎʼ lə́ Yěso ngô: «Cícye, jwó ghíʼ tʉ̌ zə̂ yi o lə tə́m kwâʼ yé lə́ nǎa nzə́u tə ncʉ́ʼ mbə́.» 22Yěso cʉ̂ʼ ndáʼ lə́ páp ngô: «Məŋ ndâʼ wéi ə̂ no lə́nə́ʉ, pei cóghʼ ntə̂ʉ wéi lə̂ Sê.» 23Məŋ ndaʼ wéi kwaʼ lə́nə́ʉ, ŋuu lə̌i ndáʼ lə̂ ləkôr yo ngô: «Tsóʼó yʉʼ wə̂, ə́ ngwo ntsə́ʉ cər mə̂i-nci.» Ə́ ndǎʼ tə́ mʉ̂ŋtə, ə́ ngwǒ pə̂i-ntə̂ʉ ńgó zə̂u yi a túŋu wo pə́ yə́rə́, mə́i ə́ wo pə́ yə́rə́. 24Ə̂ zə̂u yi ə́ ghʉ̌, m mə̂ ndâʼ wéi ngô: «Pei lə̌i mə́ ndâghʼ sʉ̂ʉtə ńdôu zə̂u mbó Sê, ə́ fú ngwó cər ntə̂ʉ péi ńgó pei ghwo mə́ zêi zə̂u, mə́i a wo ŋə́ zěi lə́ pei.» 25O lə̌i mə́ ngwô ngʉ sʉ̂ʉtə, ə́ pə́ yi o pə̌ nzáŋə́ lóŋ ńté ŋuu, o lyə́ghʼə ńŋə́ lə́ ngaŋ. Ə̂ lei yə́rə́, Tə́ wei yi a pə́ tʉ̌-lə́pû poŋə́ lyəghʼə́ wei məfaa ńŋə́ lə́ pei. [26Pei lə̌i ndə́iʼ lyəghʼə́ məfaa pəcó pye po, mə́i Tə́ wei yi a pə́ tʉ̌-lə́pû kə́ lyəghʼə yé wei məfaa po.]
Yěso laghʼ ləjôghʼ wǒ fáʼ?
(Mat 21.23-27; Lks 20.1-8)
27Yěso gháp pə ngaŋə-jyêʼ-no* yé kə̂ ncí ndə́r tə nkə́u Yelúsalêm, a kə̂u ndə̂ Sê*. Ə́ mə́ ŋáa ŋə̂itə́, pətə́-ndə̂ pənuŋú-poʼ-Sê gháp pə pəkeʼtə́-lə́pə́ʉ Mə̌usə̂i* tə mbaa pəkə̌m lâʼ tó ncə́r yé, 28ə́ ntúŋú yé ngô: «O laghʼ mətəʉ wǒ ngʉ̂ mwo məno? Wǒ ŋə̌ ghô mətəʉ lə̂ ngʉ̌ měi?» 29Yěso pwôr lə́ páp ngô: «Məŋ zâa lə́wó, m mbǎa ntúŋú wéi tâʼ no, pei lə̌i mbwôr, mə́i n ngwo lǎʼ wéi ŋuu yi a ŋə̌ ghâa mətəʉ lə̂ ngʉ́ zə̂u pei. 30Wǒ lə ghíʼi ntə́u Jâŋ lə̂ ŋə́ pye nci, ə Sê kəʉ pye-mə́soŋ? Pei láʼ ghâa.» 31Gháp zûʼ, ə́ nkwaŋə́ tû záp təcər páp ngô: «Paghʼə lə̌i ndáʼ ngô: “Ə Sê lə tə́u yé”, mə́i a wo túŋú wághʼə ngô: “Tə ńté hó káa paghʼə lə pə́i no Jâŋ?” 32Lə́ tə mboʼ paghʼə kə̂ myághʼə́ ndáʼ ngô: “Ə̂ pye-mə́soŋ?”» Gháp lə pə́ mbôghʼ lâʼ, ŋuu ntsəm lə pə́ njwô Jâŋ ghíʼ kwaʼ ntsətə-nkəʉ Sê*. 33Gháp kwaŋ yə́rə́, ə́ ncʉ́ʼ mbwôr lə́ Yěso pə́ ngô: «Káa paghʼ jî wághʼ.» Yěso kə̂ ndâʼ yé lə́ páp ngô: «Məŋ zâa lə́wó, n ngwo lâʼ ghâa wéi ŋuu yi a ŋə̌ ghâa mətəʉ lə̂ ndághʼ ngʉ̌ zə̂u pei po.»
Currently Selected:
Máakúsʉ 11: NLA
Highlight
Share
Copy
Want to have your highlights saved across all your devices? Sign up or sign in
