Máakúsʉ 10
10
Yěso pə̌ njyêʼ pye no lə̂ lâa-ndə̂
(Mat 19.1-12)
1Yěso fû cər Galilêi ńtə́u nci Yuudêŋ ńdə́r lə̂ Yudêi. Mənou lâʼ kə̂ ncí nkə́itə́ mbəʉ zʉ́, a jî lə̂ njyéʼ gháp no Sê ghíʼ a yaa ncí njyéʼ. 2Pəcó pəfalísia* tô záp lə̂ ńkwaʼtə́ Yěso, ə́ ntúŋú yé ngô: «Ləpə̌ʉ* gháʼa mbə́i ńgó ŋuu zúŋ ngwě ye?» 3Yěso túŋu gháp ngô: «Ləpə̌ʉ Mə̌usə̂i pə́ ndaʼ* ńgó hó?» 4Gháp lâʼ ngô: «Mə̌usə̂i lə pə́i ńgó mboʼ ŋuu zûŋ ngwě ye, lə́ ntsə̌mbi ŋə́ yé ŋwaʼa yi a nyarə ńgó gháp zʉ́ sei.» 5Yěso lâʼ lə́ páp ngô: «Mə̌usə̂i lə ŋə̂ wo ntǎghʼ* lə́ pei, ńté ńgó pei təi ndəʼ lə̂ nzúʼ no Sê lâʼ.» 6Lə́ tə fú lənuŋú ngoŋ, Sê tsúŋu ŋuu mbiŋə gháp məngyě.
7Ə̂ zə̂u yi ə́ ghʉ̌, ŋuu mbiŋə ghwo lə̂ nyáŋ
tə fâghʼ mbəʉ ye lə́ tə́ ye gháp mə́ ye,
ə́ ngwo ncə́r ngwě ye#10.7 Káa pə kʉ̂ʉ yé no ntə́mtə́ cər pəcó pəŋwaʼa pi pə́ lə lǎghʼ mbô ńŋwaʼá..
8Gháp zʉ́ tə̂mtə́ ńcʉ́ʼ tâʼ ŋuu.
Ə́ leitə yə́rə́, lə́u gháp kə̂ mbə̂ gháp pye pə́pwô po, ə́ ncʉ́ʼ ḿbə́ pə́ tâʼ ŋuu.
9Ghíʼ ə́ kə́ mbə́ yə́rə́ lə̂, ŋuu-məsoŋ páa lə̂ shághʼə́ zə̂u yi Sê təmtə́.
10Gháp kə pou mbə̌ʉ tə nkə́u ndə̂, ngaŋə-jyêʼ-no* yé túŋu yé no ńté no zêi. 11A lâʼ lə́ páp ngô: «Ŋuu lə̌i nzûŋ ngwě ye, ə́ nzóʼ yi ndeʼe, mə́i ə́ wo pə́ mbó nduŋ-mbi məngyě, ə́ pə́ məghap yi gháp mbâatə məngyě ghʉ wěi. 12Məngyě póu nkwǎr mbó ndə̌u ye, ə́ ngwo ńzóʼ cǒ ŋuu ndeʼe, mə́i ə́ wo pə́ mbó ndə̌u, ə́ pə́ məghap yi gháp wêi ŋuu ghʉ wěi.»
Yěso gháp pə pəmə́ceʼé ghəpə́
(Mat 19.13-15; Lks 18.15-17)
13Ə́ pə̂ có leʼé, pye pə̂ ndâghʼ pəmə́ceʼé ghəpə́ ńtô ńgó Yěso zápə́ mbô lə́ páp, ə́ ncóghʼ mbwórə lə́ páp; lə́ ngaŋə-jyêʼ-no* yé pə̂ ntôʼ gháp. 14Yěso jwô yə́rə́ ə́ nzáŋə lóŋ, ə́ ndǎʼ lə́ páp ngô: «Pei nyér ghəpə́, gháp tó ńcə́r ghâa. Koo pei kə̂ʼtə gháp, ńté ńgó Ləfou Sê* yi pye pi gháp pə́ ghíʼ páp.» 15Məŋ ndâʼ wéi kwaʼ lə́nə́ʉ ńgó ŋuu lə̌i ndə́iʼ pfú no Ləfou Sê ghíʼ mə́ceʼé môu po, a lâʼ nkə̂u yé cər wó po. 16A lâʼ yə́rə́, ə́ cʉ́ʼ mə́ mpfû gháp, ə́ nzápə́ mbô lə́ páp, ə́ ncóghʼ mbwórə lə́ páp.
Ə́ pôŋ lə̂ nyér zə̂u tsəm, ə́ ntsə́ʉ nzəm Yěso
(Mat 19.16-30; Lks 18.18-30)
17Yěso pôu ntsə́ʉ laŋə́ mə́ ndə́r, cǒ ŋuu khʉ̂tə ńtó ńkʉ́ʼtə́ mbi zʉ́, ə́ ntúŋú yé ngô: «Cícye yi shʉʼʉ. Mboʼ n ngʉ̂ gháʼá tə ndáʼ ngwô zâa ləcwôr tə me?» 18Yěso túŋu yé ngô: «O fûŋ ghâa ńgó ŋuu shʉʼʉ ńté hó? Ə Sê zə́ghʼə́-zʉ́ lə̂ pə̌ ŋuu shʉʼʉ. 19O pə̌ njî məntǎghʼ Sê: koo jwî ŋuu, koo o ghʉ̂ məghap, koo o jû, koo o zâp sôu tû ŋuu, koo o fûtə ŋuu, ŋə́ məkuʼ tə́ gho gháp mi mə́ gho.» 20Ŋuu wêi pwôr lə́ Yěso ngô: «Cícye, tə fú ghíʼ n ndə pyér mbə́ pə́ môu ngwəsəu, n ndə̌i nkə́ ŋə̂i pə́ ghíʼ məntǎghʼ mêi mə́tsəm pə́ ntúŋú.» 21Yěso nâŋ yé, no yé poŋ yé, a lâʼ lə́ zʉ́ ngô: «Tâʼ zə̂u pyěr mə́ mbúŋ yi o wo ghʉ̌. Wo nǎa fə̂i məzə̂u mô mə́tsəm, ə́ ngaptə́ nkâp zěi lə́ pəpûŋ, ə́ ngʉ̌ ngwô mǐ lěi měi tʉ̌-lə́pû. Wo ngʉ̌ yə́rə́, ə́ mbə̌ʉ ńtó ńtsə́ʉ nzəm məŋ.» 22Ŋuu wə̂ zûʼ yo tsâr, ə́ shʉ́ŋə́ sʉ̂ yé; ə́ shə́rə́ ńdə̂r yé, ńté no a lə pə́ ngaŋə-zə̂u.
23Yěso shə́rə ńnáŋ pye pǐ lə pə́ yʉʼ wó, ə́ ndǎʼ lə́ ngaŋə-jyêʼ-no* yé ngô: «Ə́ təi mbó pəghaŋə-zə̂u lə̂ nkə́u cər Ləfou Sê gháʼate.» 24Ngaŋə-jyêʼ-no* yé zûʼ tsâr zei, ə́ kəʼə gháp. Lə́ Yěso kə̂ ncí ndáʼ lə́ páp ngô: «Ghəpə́ zâa, ə́ təi lə̂ nkə́u cər Ləfou Sê gháʼate! 25Ə́ zaŋə mbó shwô lə̂ só cər ngwʉ̂ lyaghʼə, ə́ nděi mbó ngaŋə-zə̂u lə̂ nkə́u cər Ləfou Sê.» 26Ə́ fû nkəʼə́ ngaŋə-jyêʼ-no* yé gháʼate, tə gháp cʉ̂ʼ mə́ ntúŋu təcər páp ngô: «Tə lə̌i mbə́ gháʼa, wǒ táa cwór?» 27Yěso nâŋtə gháp tə ndáʼ ngô: «Ə́ tsə̂ pə̂ pye-mə́soŋ, mboʼ ə́ tsə̂ yé Sê po, ńté no a kûʼ lə̂ ngʉ́ zə̂u tsəm.»
28Pyêh cʉ̂ʼ ndáʼ lə́ Yěso ngô: «Tə ngwó lə́ paghʼ pi paghʼ lə nyér zə̂u tsəm, ə́ ntsə́ʉ nzəm gho lə́?» 29Yěso pwôr lə́ zʉ́ ngô: «N ndaʼ wéi kwaʼ lə́nə́ʉ ńgó ŋuu lə̌i nyér ndə̂ ye, ə́ nyér pəfə̌r pé pi mbiŋə, ə́ nyér pi pəngyě, ə́ nyér mə́ ye, ə́ nyér tə́ ye, ə́ nyér ghəpə́ yé, ə́ nyér mənkâʼ mé, ńté ghâa mbaa ńté Nkəʉ Shʉʼʉ, 30mə́i a wo kə́ pyér pə́ pə́ cər nzʉ̂ yo, ə́ ghwǒ məzə̂u mêi mpfu nkʉ: ə́ məndə̂, ə́ pəfə̌r pi mbiŋə, ə́ pəfə̌r pi pəngyě, ə́ pəmə́, ə́ pətə́, ə́ ghəpə́, ə́ mənkâʼ, ə́ ghwǒ mbaa məngaghʼə ńté pə̂i-ntə̂ʉ yé; ə̂ póu ntáa mbə́ cər ngoŋ shwî, a ghwô ləcwôr tə me. 31Lələʉ lə́ pəluŋ-mbi pye táa cʉ́ʼ pəlyəghʼ-nzəm, lələʉ lə́ pəlyəghʼ-nzəm póu cʉ́ʼ pəluŋ-mbi.»
Yěso kə̂ ncí ndáʼ mbəu ləwʉ̂ yi a wo kwʉ́ zěi
(Mat 20.17-19; Lks 18.31-34)
32Gháp lə pə́ laŋə́ ə́ mə́ nkóʼ ńdə̂r lə̂ Yelúsalêm, Yěso pə̂ mbi mə́ ŋə̂i, ngaŋə-jyêʼ-no yé pə̂ nzəm mə́ fʉ̂, ə pye pi ə́ lə zuŋtə́ nzəm gháp cʉ̂ʼ mə́ mbôghʼ poghʼə́. Yěso fâghʼ ngaŋə-jyêʼ-no* yé ntsap pwô lə̂ ləghə̂m, ə́ njǐ lə̂ ndêʼtə́ gháp no yi ə́ wo ncə́r zʉ́ Yelúsalêm. 33Ə́ ndǎʼ lə́ páp ngô: «Pei tsúŋú nzúʼ, paghʼə kôʼ lə̂ Yelúsalêm gháʼa, ə́ kə́u wó, ə́ pə féi Môu Ŋuu* ŋə́ lə́ pətə́-ndə̂ pənuŋú-poʼ Sê* gháp pə pəkeʼtə́-lə́pə́ʉ Mə̌usə̂i*. Gháp záʼ ńgó pə jwí yé, ə́ ncʉ́ʼ ŋə́ yé lə́ pətəpə̌i-no Sê. 34Gháp zôutə́ yé, ə́ tyə̌ghʼ mətê lə́ zʉ́, ə́ ndǎghʼ məngwaa ńsə́u yé, ə́ njwí yé, lə́ a ghʉ́ mbə́ lə̂ mbâatə leʼé tárə́, â zʉ́ʉ lə̂ ləwʉ̂.»
Ə ndôu lə̂ ngwô lətə̌ʉ jwǐ
(Mat 20.20-28; Lks 22.25-27)
35Jâghʼ gháp Jâŋ, ghəpə́ Zebede cʉ́ŋə mbáatə́ Yěso, ə́ ndǎʼ lə́ zʉ́ ngô: «Cícye, paghʼ pə̌ ntsâa ńgó o ghʉ́ no yi paghʼ wo túŋu gho lo ńŋə́ lə́ paghʼ.» 36Yěso túŋu gháp ngô: «Pei koŋ ńgó məŋ ngʉ́ hó ńŋə́ lə́ pei?» 37Gháp pwor lə́ zʉ́ ngô: «O lə̌i ntáa ḿbə́ cər ləghûʼ gho, o nyáŋə wághʼ mbəʉ gho, tâʼ ŋuu pə̂ lə̂ ndyəghʼə́ pô ghô yi təʉ, cǒ pə́ lə̂ ndyəghʼə́ pô ghô yi kwap.» 38Yěso lâʼ lə́ páp ngô: «Káa pei pə́ njî wéi zə̂u yi pei lôu zěi. Pei kuʼtə̂ lə̂ nó ntə̂uʼ ngwôʼ yi n ngwo nó wó? Kəʉ pei kuʼtə̂ pə́ lə̂ shə̂ghʼ ndwuŋ ngwôʼ yi n ngwo njwó wó?» 39Gháp pwor lə́ zʉ́ ngô: «Paghʼ kuʼtə̂.» Yěso lâʼ lə́ páp ngô: «Ə̂ no lə́nə́ʉ ńgó pei yǎa táa nó ntə̂uʼ yi məŋ ngwo nó wó, ə́ pǒu shə̌ghʼ ngwôʼ yi n ngwo njwó wó mpfu wo. 40Lə́, káa məŋ lə̂ ngwô ghâa lə̂ ntsóʼ pye pi gháp wo nyáŋ lə̂ ndyəghʼə́ pô ghâa yi təʉ kəʉ lə́ yi kwap, lə́ mêi məyʉʼ pə́ pə́ mi pye pi Sê lə tsúŋtə́ ńté gháp.»
41Pəcó ngaŋə-jyêʼ-no* Yěso ləghə̂m pou zúʼ no yi Jâghʼ gháp Jâŋ yǎa ndǎʼ, ə́ njǐ lə̂ ńzáŋə́ lóŋ ńté gháp. 42Yěso cʉ̂ʼ fúŋ gháp pə́tsəm, ə́ ndǎʼ lə́ páp ngô: «Pei pə̌ njî ńgó pəfou məlâʼ pə́ sâʼ məlâʼ gháʼá, ə́ noʼtə pye noʼtə́, pye jwǐ pou ŋə́itə lə́ páp ŋəitə́. 43Lə́ kâa ghwô yé lə̂ ḿbə́ yə́rə́ təcər pei. Ŋuu lə̌i mə́ nkôŋ lə̂ mbə́ ŋuu njwǐ təcər pei, a pə̂i lə̂ mbə́ ngaŋə-faʼ wei. 44Ŋuu lə̌i mə́ ndôu lə̂ ḿbə́ nduŋ-mbi təcər pei, ə́ pə̂ ntúŋu ńgó â pə́i puʼ ŋuu ntsəm. 45Ńté ńgó Môu Ŋuu* kâa lə tô yé ndəu ndesé ńgó pye-mə́soŋ fâʼ mbó zʉ́, a lə tô pə́ lə̂ fáʼ mbó pye-mə́soŋ, ə́ mbou nkwʉ́ ńté tû záp.»
No fwoghʼ-mə́nyôghʼ Mbatimê
(Mat 20.29-34; Lks 18.35-43)
46Gháp kə lər tə nkə́u Yeríko. Mpfu yi Yěso gháp pə ngaŋə-jyêʼ-no* yé ə́ nkʉʼʉ́ tâʼ nou lâʼ lə pə́ fû túsoŋ wêi ńkwár, cǒ fwoghʼ-mə́nyôghʼ nyâŋ nkaŋ laŋə́, ə́ mə́ ndóu, ləjôghʼ yé pə̂ Mbatimê, a pə̂ môu Timê. 47A zûʼ ńgó Yěso ŋuu Nǎzalêi pə̌ nděi, ə́ máʼ wâr ńdáʼ ngô: «Yěso môu fou Ndavîd, tsáa məjʉ̂ŋ mâa.» 48Pye tə nzáa pə̂ sâʼ yé ńgó a nâʼ, lə́ a fû ngáʼ lə̂ máʼ wâr ńdáʼ ngô: «Yěso môu fou Ndavîd, tsáa məjʉ̂ŋ mâa.» 49Yěso tə̂ʉ ńdáʼ ngô: «Pei fúŋ yé» Gháp fûŋ fwoghʼ-mə́nyôghʼ wêi ńdáʼ lə́ zʉ́ ngô: «Sáʼ təʉ, lěsê, a pə̌ fûŋ ghô.» 50A mêʼ ndǐ fwôghʼ ye, ə́ ntə́u sê ńtó ńcə́r Yěso. 51Yěso túŋu yé ngô: «O koŋ ńgó məŋ ngʉ́ gháʼá lə́ gho?» Fwoghʼ-mə́nyôghʼ wêi pwôr lə́ zʉ́ ngô: «Cícye, ghʉ n nkə́ ncí njwó yʉʼ.» 52Yěso lâʼ lə́ zʉ́ ngô: «Lər ghô, pə̂i-ntə̂ʉ zô ghʉ o shwîtə.» Pə̂ mpfu wêi mpfu wêi, a jî lə̂ nkə́ ncí njwó yʉʼ, ə́ ntsə́ʉ nzəm Yěso gháp pə pǎp lər.
Currently Selected:
Máakúsʉ 10: NLA
Highlight
Share
Copy
Want to have your highlights saved across all your devices? Sign up or sign in
