Máakúsʉ 7
7
Ləpə̌ʉ pye-mə́soŋ gháp pə ləpə̌ʉ Sê
(Mat 15.1-20)
1Pəfalísia gháp pə pəkeʼtə́-lə́pə́ʉ Mə̌usə̂i* pǐ fú Yelúsalêm tô ńkə́itə́ mbəʉ Yěso, 2ə́ njwó ngaŋə-jyêʼ-no* yé pə̂ nzʉ̂ zə̂u tə́ tsə̌mbi sóghʼ mbô máp ghíʼ nôghʼ-lâʼ gháp pə́ ntúŋú.
3Lə́ mə́i pəfalísia* gháp pə pəyúda pə́tsəm lə̌i ngáʼa nzʉ̂ gháp zə̂u tə́ tsə̌mbi ntsúŋú sǒghʼ mbô máp po, ə́ pə̂ zə̂u yi nôghʼ-lâʼ gháp túŋú ńgó pə ghʉ́ zěi. 4Ə́ ngwó mətǎa tə mbə̂ʉ, gháp ghi zʉ́ zə̂u, ə́ ntsə̌mbi sóghʼ mbô máp. Gháp kə́ ncí ngwô məcó məzə̂u tə nzáa mi nôghʼ-lâʼ gháp túŋú ńgó gháp ghʉ́ měi ghíʼ: ə́ sóghʼ pətə́tóʼ, ə́ sóghʼ məkhʉŋ gháp pə məkâŋ.
5Ə́ pə̂ yə́rə́, pəfalísia* gháp pə pəkeʼtə́-lə́pə́ʉ Mə̌usə̂i* cʉ̂ʼ ntúŋu Yěso ngô: «Ńté hó ngaŋə-jyêʼ-no* zô káa pə́ ngʉ̂ gháp zə̂u yi nôghʼ-lâʼ wághʼ ntúŋú ńgó pə ghʉ́? Ńté hó gháp zʉ̂ zə̂u pə́ tə́ sǒghʼ mbô máp ghíʼ nôghʼ-lâʼ wághʼ pə́ ntúŋú?» 6Yěso pwôr lə́ páp ngô: «Pəghaŋə nkoŋə mənyôghʼ, Esǎya ntsətə-nkəʉ Sê* lə tsuŋu ndǎʼ yo no ńté wéi, ə́ pə̂ ghíʼ pə́ ŋwaʼá cər ŋwaʼa Sê ngô:
“Pye pwo laghʼ pə̂ ndaʼ məkəpə-ntsʉ máp ńgûʼtə ghâa,
Lə́ káa pə́ ncôghʼ gháp ntə̂ʉ lə́ məŋ. 7Gháp ghûʼtə ghâa pə̂ fefe,
ńté no məno mi gháp jyêʼ pye měi pə́ pə̂ məkwaŋtə pye-mə́soŋ#7.7 Esa 29.13.”
8Pei cʉ̌ʼ meʼ məntǎghʼ Sê, ə́ nkapə lə̂ nôghʼ-lâʼ wéi.» 9Yěso kʉ́ʼʉ ńdáʼ ngô: «Pei fǔ měʼ məntǎghʼ Sê, ə́ ncʉ́ʼ nkápə́ pə́ lə̂ nôghʼ-lâʼ wéi. 10Ńté no Mə̌usə̂i lə lâʼ ngô: “Ŋə́ məkuʼ tə́ gho gháp mə́ gho”, ə́ nkə́ ncí ndáʼ ngô: “Ŋuu lə̌i nzôutə́ tə́ ye kəʉ pə́ mə́ ye, pə́ jwî yé#7.10 Ezd 21.17.” 11Lə́ ə́ ngwǒ lə́ pei, pei lâʼ zéi ńgó ŋuu lə̌i ndáʼ lə́ tə́ ye kəʉ pə́ lə́ mə́ ye ngô: “Zə̂u yi mboʼ n ntə̂i ndághʼ ḿpfútə́ ghô cʉ́ʼ mbə́ pə́ yi poʼ Sê”, ə́ ndâghʼ ńdâʼ ngô: “ə́ cʉ́ʼ mbə́ pə́ yi a ghwǒ lə̂ ŋə́ lə̂ Sê”, 12mə́i pei wo pə́i ńgó káa a kə́ ngwô yé lə̂ mpfútə́ tə́ ye kəʉ pə́ mə́ ye ló. 13Pei cʉ̂ʼ ngʉ̂ yə́rə́, ə́ ndaghʼ nôghʼ-lâʼ wéi yi pei kə nuŋú pə́ pei mbə̂ghʼ tsâr Sê. Pei pou nkə́ ncí mə́ ngʉ̂ məcó məno mi zǎa ghíʼ měi.»
Məzə̂u mi ə́ coŋ ŋuu mbi Sê
(Mat 15.10-20)
14Yěso pou nkə́ ncí fúŋ lâʼ, ə́ ndǎʼ lə́ páp ngô: «Pei pə́tsəm, pei tsúŋú nzʉ́ʼtə́ ńzúʼ no yi məŋ ndaʼ wéi. 15Có zə̂u yi mboʼ ə́ fû pə́ nzəm pěi, ə́ nkə́u lə́ ŋuu tə ncóghʼ lǒʼ* lə́ zʉ́ kâa pə̂ yé wó, yi ə́ fû cər ntə̂ʉ zʉ́ lə́ côghʼ lǒʼ* lə́ zʉ́. 16[Ŋuu lə̌i ngwô mətuŋú lə̂ ndághʼ nzúʼ no, a tsúŋu nzúʼ.]»
17Yěso pôu nyér lâʼ, ə́ kə́u ndə̂, ngaŋə-jyêʼ-no* yé laʼ lə́ zʉ́ ńgó a kéʼtə́ saghʼ-ləghaa wə̂ ə́ ndǎʼ gháp. 18A lâʼ lə́ páp ngô: «Njí ńgó pei zei, pei kə̌ mbyér mbə́ zéi pə̂ məghəghəʉ áa? Ńjí ńgó káa pei pə́ njî wéi ńgó zə̂u yi ə́ fû pə́ nzəm pěi ńkə̂u lə́ ŋuu, kâa pə̂ ncóghʼ yé lǒʼ lə́ zʉ́ áa? 19Ńté no mêi məzə̂u kâa kə́u yé pə́ cər ntə̂ʉ ngaŋ, ə́ kə̂u pə́ ləpəm zʉ́, ə́ fú yʉʼ wó ńkwár ńkə̂u korə.» Yěso laghʼ mətsâr mwo ndâʼ gháʼá ńgó məzʉ̂ mə́tsəm gháʼá ḿbə́ mi mboʼ pə́ zʉ̂. 20Yěso kə̂ ncí ndáʼ ngô: «Ə zə̂u yi ə́ fû ntə̂ʉ ŋuu ńkwár lə́ côghʼ lǒʼ* lə́ zʉ́.» 21Məkwaŋtə tə́poŋ yaa fû pə́ cər ntə̂ʉ ŋuu mə́soŋ ńkwár, ə́ ncʉ́ŋə yé a fâʼ kwarə, ə́ ncʉ́ŋə a jû, ə́ ncʉ́ŋə yé a jwî ŋuu, 22ə́ mə́ ncʉ́ŋə yé a ghʉ̂ məghap, ə́ ncʉ́ŋə yé a ghwô lóŋ nguʼú, ə́ ngwô ntə̂ʉ shʉ́ŋə́, ə́ ngʉ́ ŋuu cʉ̂ʼ ngaŋə-məfutə́, ə́ ngʉ̂ pye coŋ məmbəʉ máp, ə́ ngwo ŋwə́itə́, ə́ nkʉ́ʉ pye tə́poŋ, ə́ ngʉ ŋuu cʉ̂ʼ ngaŋə-ŋâʼtə, ə́ ngʉ ŋuu cʉ̂ʼ ghəghəʉ. 23Ndwuŋ məno tə́poŋ mwo mə́tsəm fû pə́ ntə̂ʉ ŋuu ńkwátə́ ńcôŋ yé.
Cǒ məngyě tə̂u côghʼ ntə̂ʉ yé lə́ Yěso
(Mat 15.21-28)
24Yěso fú yʉʼ wó ndə̂r lə̂ cər paghʼə-ngoŋ Tîr, ə́ nkə́u cər cǒ ndə̂, káa pə́ kôŋ yé ńgó ŋuu jí ńgó a pə́ yé cər wó. Lə́ pə́ kə̂ njí jí. 25Ńté no cǒ məngyě yi có zəghʼə tə́poŋ* lə pə́ mbə̂u môu ye yi məngyě zûʼ pə́ pə̂ nkʉ̂ʉ Yěso, a tôghʼ ncʉ́ŋə mbáatə́ yé ə́ núŋ məku zʉ́, 26ə́ sʉ́ʉtə́ yé ńgó a zûŋ zəghʼə tə́poŋ* zêi, ə̂ kwâr lə́ môu ye. Məngyě wêi kâa lə pə̂ yé môu pəyúda. A lə pə́ môu Fenisî, ə́ cər ngoŋ Silə̂i. 27Yěso lâʼ lə́ zʉ́ ngô: «Nyér ghəpə́ tsə́mbi nzʉ́ tə njwə́r, kâa pôŋ yé lə̂ mpfú məzʉ̂ ghəpə́ ə́ mǎʼ lə̂ pôu ngwʉ̂.» 28Məngyě wêi pwôr lə́ zʉ́ ngô: «Ə̂ŋ Nde, o lâʼ no lə́nə́ʉ, lə́ pôu ngwʉ̂ pə́ ndaghʼtə mənyuʼ məzʉ̂ mǐ fû mbó ghəpə́ mpfúŋtə́ cʉŋə tə́pələ.» 29Yěso cʉ̂ʼ ndáʼ lə́ zʉ́ ngô: «Mbə̂u yi o lǎghʼ ḿbwǒr tsâr yo ghʉ môu gho shwítə, pəʉ ghô lə̂ nzeʼ gho, ə zəghʼə tə́poŋ* kwar mə́ lə́ môu gho.» 30A pə̂ʉ tə nkə́u nzeʼ, ə́ njwó môu nûŋ kə̌u, mə́i zəghʼə tə́poŋ* kwar mə́ lə́ zʉ́.
Yěso ghʉ tâʼ cípúʼ shwítə
31Yěso fû lâʼ Tîr ə́ mə́ mbə̂ʉ lə́ nkaŋ lətʉŋ-nci Galilêi, ə́ nzáp ndə̂u yi ə́ lei Sidôŋ gháp pə cər lâʼ yi pə́ fûŋ ńgó Mətúsoŋ Ləghə̂m. 32Pə́ laghʼ cǒ ŋuu ńtó ńcə́r yé, a pə̂ kʉʉ-tû, ə́ mbou káa pə́ tsâr yé tə ə̂ kwâr, ə́ sʉ́ʉtə́ Yěso ńgó a zápə́ mbô mé lə́ zʉ́ a shwítə́. 33Yěso lâghʼ yé fú nou pye ńkwár, ə́ ncóghʼ pəshí-mbô pé cər mətuŋú mé, ə́ ndǎghʼ ndʉʉ mətê mé zʉ́ Yěso, ə́ nkə́u lə̂ʉ yé, 34ə́ mbəʼə́ nyôghʼ mé ńnáŋ tʉ́, ə́ nkóʼó Zəghʼə, ə́ ndáʼ ngô: «Efáta!» Ə́ ndaghʼ ndâʼ ngô: Tsóʼó! 35Mətuŋú mé lêi-lěi ntsóʼó, lə̂ʉ yé kéʼe, a jî lə̂ ntsár shʉʼʉ. 36Yěso lâʼ lə́ pye pi gháp yǎa ndǎghʼ yé ntó ngô: «Koo pei kʉʉ tə ŋuu zûʼ.» Lə́ ə́ ntǒʼ gháp tə nkə́u ghó, gháp kə̂ mə́ ndêʼtə leʼtə́. 37Pye pə́tsəm zúʼ, ə́ fú ndyár tə ndáʼ ńgó a kə̌ ngʉ̂ yé pə̂ məno shʉʼʉ. Ə́ ngʉ pəkʉʉ-mə́tuŋú zûʼ yʉʼ mbaa pəcípə́uʼ tsâr.
Currently Selected:
Máakúsʉ 7: NLA
Highlight
Share
Copy
Want to have your highlights saved across all your devices? Sign up or sign in
