Máakúsʉ 8
8
Yěso zághʼə pye tóusʉ ləkwo
(Mat 15.32-39)
1Ə́ pə̂ lə̂ məleʼé mêi, ə lâʼ kə̂ ncí nkóʼ nzáa, ə́ mə́ mbûŋ zə̂u yi gháp wo zʉ́. Yěso fûŋ ngaŋə-jyêʼ-no yé, ə́ ndáʼ lə́ páp ngô: 2«Məjʉ̂ŋ lâʼ yo nkó ghâa gháʼate, ńté no ə́ pə́ mə́ mpfu wo leʼé tárə́ ghíʼ gháp kə́ mbə́ pə́ mbəʉ məŋ, káa pyér ghwô gháp zə̂u yi gháp wo zʉ́. 3N ndə̌i ndáʼ ńgó gháp pə̂ʉ lə̂ məlâʼ páp tə́ ghó gháp zʉ̂ zə̂u, gháp wo laŋə́-ndə̂u ngwʉ̌ nji, ńté ńgó pəcó pye təcər páp fú tə ndǐ təsə.» 4Ngaŋə-jyêʼ-no* yé pwor lə́ zʉ́ ngô: «Káa có zə̂u pə̂ yé yaʼa, paghʼ pǒu jwô məzʉ̂ gháʼa ghó ńŋə́ lə́ páp?» 5Yěso túŋu gháp ngô: «Pei yaa ngwǒ mbələ̂ghʼ ntâʼ sə́ʼə́?» Gháp pwor lə́ zʉ́ ńgó gháp ghwo mbələ̂ghʼ ntâʼ saambwô.
6Yěso lâʼ ńgó lâʼ nyáŋtə́ se, ə́ ncʉ́ʼ nkə́ mpfú mbələ̂ghʼ wêi ntâʼ saambwô, ə́ ŋə́ nkhwo mbó Sê, ə́ mbwóʼtə́ ńŋə́ lə́ ngaŋə-jyêʼ-no* yé ńgó gháp ghâptə́ lə̂ lâʼ. Gháp kə̂ ngáptə́. 7Ə́ ghi pə́ gháp kə̂ ncí ngwô məntâʼ shû məcó, ə́ nyêʼ nkhwóghʼtə́. Yěso nkə̂ ncí mpfú, ə́ ŋə́ nkhwo mbó Sê, ə́ nkə́ ncí ndáʼ ńgó gháp gháptə́ lə̂ lâʼ. 8Gháp pfâr ńjwə́r. Pə́ laghʼtə məkəm mi ə́ vuʼú, ə́ lóghʼə pətyép saambwô. 9Gháp lə pə́ no pye tóusʉ ləkwo. Yěso lâʼ ńgó gháp pə̂ʉ lə̂ məlâʼ páp. 10Gháp pə ngaŋə-jyêʼ-no* yé lêi-lěi nkə́u kənyúʼ lə̂ ndə́r lə̂ sʉ̂ paghʼə-ngoŋ Ndalmanúta.
Pəfalísia pə́ nkoŋ lə̂ njwó tâʼ nkəʼə-no
(Mat 16.1-4)
11Pye falísia* tô, gháp pə Yěso ji lə̂ nzóŋə́ məno, gháp lâʼ lə́ zʉ́ ńgó a ghʉ́ tâʼ nkəʼə-no ńdághʼ ńnyarə́ gháp ńgó Sê lə tə̂u yé. Ə́ ndaʼ yə́rə́ lə̂ ndághʼ ńkwaʼtə́ yé. 12Yěso zûʼ tə nkóʼó zəghʼə, ə́ mbǒu ndáʼ lə́ páp ngô: «Ə́ ńté hó pye mə́soŋ pi mpfu wo pə́ ntúŋu ńgó məŋ nyárə́ gháp tâʼ nkəʼə-no? Məŋ ndaʼ wéi kwaʼ lə́nə́ʉ, káa m mə́ ngwô ghâa nyarə́ pei cǒ nkəʼə-no!» 13Yěso lâʼ yə́rə́, ə́ ncʉ́ʼ nyér pəfalísia* yʉʼ wó, ə́ nkə́u kənyúʼ mə́ ntə̂u nci ńdə́r lə̂ cǒ njʉŋə́.
Pei páa lə̂ mbə́ ngaŋə-nkoŋə-mənyôghʼ
(Mat 16.5-12)
14Ngaŋə-jyêʼ-no* lə lyəghʼə lə̂ mbyé mbələ̂ghʼ tə a zâa, ə́ mbyé pə́ ndaʼ tâʼ ńdághʼ ńkə́u kənyúʼ. 15Gháp pə pǎp pə̂ ndə̂r yə́rə́, Yěso lâʼ lə́ páp ngô: «Pei laghʼə́ tû zéi lə̂ mvuŋ* pəfalísia* mbaa yi fou Elôdə*.» 16Ngaŋə-jyêʼ-no pə̂ ndâʼ təcər páp ngô: «A lâʼ gháʼa ńté no káa paghʼə yáa mbyé wághʼə mbələ̂ghʼ tə a záa.» 17Yěso jî no yi gháp pə́ ndǎʼ, ə́ ntúŋú gháp ngô: «Pei kwaŋ no pə́ lə̂ mbələ̂ghʼ yi káa pei yáa mbyé ńté hó? Pei kə̌ mbyér pə́ tə ghwǒ jîno áa? Káa pei zúʼ áa? Ntəʉ wéi təi mbǎa! 18Pei ghwô nyôghʼ, káa pə́ lǎghʼ jwô yʉʼ áa? Ə́ ngwǒ mətuŋú, káa pə́ zûʼ no áa? Pêi pətəkʉʉtə́-no#8.18 Jer 5.21 áa? 19Məŋ ndə pwóʼtə́ mbələ̂ghʼ wə̂ ntâʼ ntaa pei lâghʼ ńzághʼə́ pye tóusʉ tâa, ə́ nkəitə́ məkəm mî ə́ lə vuʼú ə́ lóghʼə pətyép pə́sə́ʼə́?» Gháp pwor ngô: «Ə́ lə lóghʼə pətyép ntsap pwô lə̂ ləghə̂m.» 20«Məŋ mbôu mbwóʼtə́ cǒ ntâʼ saambwô, pə́ laghʼ ńzághʼə́ pye tóusʉ ləkwo, ə pfuʼ lóghʼə pətyép pə́sə́ʼə́?» Gháp lâʼ ngô: «Ə́ lə lóghʼə pətyép saambwô.» 21A cʉ̂ʼ ntúŋú gháp ngô: «Tə pei kə̌ mbyér pə́ tə zûʼ?»
Yěso ghʉ̂ fwoghʼ-mə́nyôghʼ jwô yʉʼ
22Yěso gháp pə ngaŋə-jyêʼ-no yé lə kə́u Mbetsayída, pə́ laghʼ cǒ fwoghʼ-mə́nyôghʼ ntó, ə́ sʉ́ʉtə́ yé ńgó a kə̂u yé a shwítə́. 23Yěso ghwô pô fwoghʼ-mə́nyôghʼ wei ə́ ndághʼ yé fú lâʼ ńkwǎr, ə́ ntyəghʼtə́ mətê lə̂ nyôghʼ mé, ə́ nzápə́ mbô lə́ zʉ́, ə́ ntúŋú yé ngô: «O pə̌ njwô có zə̂u?» 24A ŋéʼe nyôghʼ mé, ə́ ndâʼ ngô: «M mə̌ njwô pye gháp pə̂ pə́ ghíʼ mətʉ̌, ə́ mə́ ŋə́i.» 25Yěso kə̂ ncí nzápə́ mbô lə̂ mənyôghʼ ŋuu wêi, a nâŋ yʉʼ, ə́ njwó zə̂u tsəm. Ə́ fú shwítə́, ə́ njǐ lə̂ njwó məzə̂u ghíʼ měi yǎa mbə́. 26Yěso lâʼ ńgó a pə̂ʉ lə̂ nzeʼ zʉ́, lə́ koo a kə̂u cər lâʼ.
Pyêh laʼ ńgó Yěso Nzaʼ-nkʉ yi Sê lə ghʉ̌ ndaʼá lə̂ ngʉ́ ŋə́
(Mat 1.13-23; Lks 9.18-22)
27Yěso gháp pə ngaŋə-jyêʼ-no* yé lə̂r ndə̂u məlâʼ mi ə́ pə́ məpar Sezarê yi Fílîp. Ə́ nkə́u laŋə́, a túŋu gháp ngô: «Ə lâʼ gháʼa mə́ ndâʼ ńgó məŋ wǒ?» 28Gháp pwor lə́ zʉ́ ngô: «Pəcó pye pə́ ndâʼ ńgó ô Jâŋ Mbaptísʉ, pəcó pə̂ ndâʼ ńgó o Elyê*, pəcó pye pə̂ ndâʼ záp ńgó ô cǒ ntsətə-nkəʉ-Sê*.» 29A túŋu gháp ngô: «Tû-mbəʉ zéi, pei lâʼ zéi ńgó məŋ wǒ?» Pyêh pwôr lə́ zʉ́ ngô: «Ô Kəlísto.» 30Ə́ pə̂ yə́rə́ Yěso sâa-sǎa tôʼ gháp lə̂ nkʉ́ʉ tə ŋuu ndeʼe jî ŋuu yi a pə̌ zʉ́.
Yěso pə̌ ndâʼ mbə̂u ləwʉ̂ yi a ghʉ̌ kwʉ́ wěi
31Ə́ fú mə́u, ə́ njǐ lə̂ ndáʼ lə́ páp ngô: «Ə́ pə́ ntúŋu ńgó Môu Ŋuu* jwó ngwôʼ gháʼate, pəkə̌m lâʼ gháp pə pəkeʼtə́-lə́pə́ʉ Mə̌usə̂i*, ə́ ngʉ̌ pətə́-ndə̂ pənuŋú-poʼ-Sê tyé ye, ə́ pə jwí yé. A pôu nzʉ́ʉ lə̂ ləwʉ̂ lə̂ mbâatə leʼé tárə́. 32Yěso lə pə́ ndáʼ gháp mêi mwo məno pə̂ sâa-sǎa, Pyêh fúŋ yé ntsəm, ə́ njí lə̂ sáʼ yé. 33Lə́ Yěso shə́rə ńnáŋ ngaŋə-jyêʼ-no* yé, ə́ sáʼ Pyêh, ə́ ndǎʼ lə́ zʉ́ ngô: Fú mbəʉ məŋ ńcʉ́ŋtə́ Sə́tə, ńté ńgó káa kwaŋtə zô pə̂ yé yi Sê; ə́ pə́ pə̂ kwaŋtə pye-mə́soŋ.»
34A pou fúŋ lâʼ gháp pə ngaŋə-jyêʼ-no yé, ə́ ndǎʼ lə́ páp ngô: «Ŋuu lə̌i mə́ ndôu lə̂ mbə̂ ghâa ŋuu, a wáʼa tû-mbəʉ yé, ə́ nkhwór yé tʉ̌-mbʉ̂ŋtə ńtsə́ʉ nzəm məŋ. 35Ŋuu lə̌i mə́ ndôu lə̂ mbáa ləcǐ-mbî ye, mə́i a wo cwí wěi, lə́ ŋuu póu ncwí ləcǐ-mbî ye ńté ghâa, mbaa ńté Nkəʉ Shʉʼʉ yi a pə̌ ntsətə́, mə́i a ghʉ̌ ghwǒ wěi. 36Ŋuu lə̌i nkhwór məzə̂u ndəu nzʉ̂ yo mə́tsəm ńdághʼ ngʉ̂ mé, lə́ ə́ pə́ yi a wo cwí mə́jʉ̂ŋtə ye, ə́ pfútə́ yé lə̂ hó? 37Mboʼ ŋuu lâghʼ hó ńkə́pə́ mə́jʉ̂ŋtə ye?» 38Ŋuu lə̌i nkó sə̂ʉ lə̂ mbə́ ghâa ŋuu, tə mbaa lə̂ ndêʼtə́ no zâa mbó pye pwo pi ə́ pə́ cər nzʉ̂ mpfu wo, ə́ mbə́ ngər pye tə́poŋ, ə́ mbə́ pətəpə̌i no Sê, mə́i məŋ Môu Ŋuu*, n ntáa kə́ kô zâa sə̂ʉ lə́wó lə̂ ndághʼ yé ngʉ̂ ghâa ŋuu, mpfu yi n táa pə̌ʉ nzəm cər ləghûʼ Tə́ ghâa, gháp pə yi pəcwôʼ pé.
Currently Selected:
Máakúsʉ 8: NLA
Highlight
Share
Copy
Want to have your highlights saved across all your devices? Sign up or sign in
