Epacerero 12
12
Wiitthaniwa wa Abraamu
1Yave aamweerela Abraamu: “Muhiye elapwaanyu, asinaangolowaanyu ni vaate wa atithinyu, ni murowe elapo Miyo kineeraaka kiwoonihereni. 2Wa nyuwo kinookhaliha muloko mutokotoko. Kinimooreelihani ni Miyo kinimoovahani epili. Vano nyuwo munookhala nreeliho. 3Miyo nkaareelihe yaawo eneera yooreeliheni ni nkaalaphe yaawo eneera yoolapheeni. Vanonto, mwaha wa nyuwo nsireelihiwe miloko sootheene sa mweelaponi.” 4Abraamu aattimula ntoko Yave aamulamulenlaawe, ni Loti aarowa vamoha ni yoowo. Abraamu aarino iyaakha miloko mithannamiili ni iyaakha ithanu aavenyaawe oHarani. 5Aamukuxa mwaariye Sarai ni musulwaawe Loti ni mihakhu sootheene aarinaawe ni arumeiyaawe aathummaawe oHarani, enarowa elapo ya oKanaani. 6Abraamu aaphutula mweelaponi mmwe mpaka oXekhemi, vakhiviru wa mwiri wa ekarivalyu*, wa oMore. Mwa ehuhuweene yeele atthu a oKanaani ti yaamanke elapo ele. 7Vano vaavaale Yave aahiixoonihera wa Abraamu, anamweerela: “Kinoovahani elapo ela ni wa ekhapiraanyu yootheene.” Vanonto Abraamu aamutekela Yave altaari* vanipuroni nne iixoonihenraawe. 8Evinyero vaavaale aarowa mpaka omwaako ori mpatta ninkhuma nsuwa oBeteli. Vano aakunga eheemaawe eriyari ya oBeteli ni wookela ninkela nsuwa wAi. Aamutekela Yave altaari* ni aahiitthana Nsina na Yave. 9Vano aapwaherera arowaka oNegeba.
Abraamu ni Sarai wExipitu
10Vanonto etala yaawirima oKanaani ni Abraamu aarowa wExipitu ni aakhala weiwo aarerihelaka vakhaani. 11Ahaleelaka ophiya wExipitu, aamweerela mwaariye Sarai: “Miyo koosuwela weera nyuwo muthiyana ooreera. 12Vano yaawoonakani atthu a wExipitu, ankela weera: ‘Nyuwo amwaara a Abraamu,’ ni awo anoowera okiiva, weera ehale ni nyuwo. 13Tivawo, mweereke: ‘Ala acimweene’ weera miyo kaakheleliwe nnenesene ni okumaaka wuureliwe niwoko na nyuwo.” 14Ephiyaka wExipitu, atthu a elapo ele yaahoona weera owo ari muthiyana ooreeraxa. 15Yaamoonatho mapwattapwattha a Farawu*. Vano hiiho mwaariye Abraamu aakuxiwa aroihiwaka empa ya emwene ya Farawu*. 16Farawu* aamwaakhelela nnenesene Abraamu niwoko na Sarai, ni Abraamu aahaakhela ikhondoolo, imombe, abuuru alopwana ni athiyana, arumeiyi alopwana nitho athiyana mpaka ahaaci. 17Yave aamuttaruxa Farawu* vamoha ni atthu a vaatevawe, aattaruxaka ni iretta sitokotoko, mwaha wa Sarai, mwaara a Abraamu. 18Tivawo Farawu* aalamunlaawe wiitthaniwa Abraamu, aneera: “Eheeni nyuwo mukipankaanyu? Heeni mwahaakileelaanyu weera owo mwaarinyu? 19Heeni mweenraanyu weera murokorinyu? Tivawo miyo kimukunxaaka okhala mwaaraka. Amwaarinyu awo, mwaakuxeke ni muroweno.” 20Vahoolowaya Farawu* aahaalamula atthu akina mwaha wa Abraamu. Vano awo yaamuhoola Abraamu ni mwaariye vamoha ni itthu sootheene aarinaawe.
Currently Selected:
Epacerero 12: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
