Epacerero 11
11
Etoore* ya oBabel
1Vano mweehuhuweene yeele atthu ootheene yuuluma nuulumo nimoha, ni ootheene yaavarela muteko masu mamoharu yaawo. 2Vano ettimulaka atthu ekhumaka ninkhuma nsuwa, yaaphiya elapo yoothatawala ya oXineyari ni vaavaale yaamaka. 3Vanonto yaaheerelana: “Nipake indyerwa ni vahoolowaya nooxeke nnenesene.” Yaavarela muteko indyerwa vanipuroni na maluku ni yaavarela muteko ittoko ntoko sementte. 4Vahoolowaya yaaheera: “Vano nrowe niteke esidade emoha ni etoore* etokotoko eneera ephiyeke mpaka wiirimu. Hiiho hiyo nneereke okhalano epili, ni khanirwa nimwalamwaxiwa mweelaponi.” 5Yave aakhuruwa weera oone esidade ni etoore* atthu yaatekaaya. 6Vano Yave aahiixeerela: “Awo ari muloko mmoharu paahi ni anuuluma nuulumo nimoharu paahi. Yapwaherera hiiha, vano khaawotho mukina aneera awere waahiiha yeela yuupuwelenlaaya opaka. 7Nikhuruweke weera navirikanyihe nuulumonaya, weera awo ehiiwananeke mukina ni mukhwaawe.” 8Hiiho Yave aahaamwaramwaxela mweelaponi yootheene ni awo yaahiya oteka esidade ele. 9Tivawo esidade ele eniitthaniwaaya Babeli, niwoko ti weiwe Yave aavirikanyihalaawe nuulumo na atthu, nitho waari weiwe aamwaramwaxenlaawe mweelaponi yootheene.
Ekhapira ya Xemi mpaka Abraamu.
10Ela ti ekhapira ya Xemi: Siviraka iyaakha piili vahoolo wa mirupi, Xemi, areeneno iyaakha ncira, aamuyara Arpaksadi. 11Vahoolo wooyariwa Arpaksadi, Xemi aakhalatho ni okumi iyaakha macira mathanu, ni aari tiithi a anamwane asilopwana ni asithiyana. 12Arinweene iyaakha miloko miraru niithanu, Arpaksadi aamuyara Xela. 13Vahoolo wa oyariwa wa Xela, aakhalatho ni okumi iyaakha macira maxexe ni iyaakha tthaaru ni aari tiithi a anamwane asilopwana, ni asithiyanatho. 14Xela arinweene iyaakha miloko miraru, aamuyara Heberi. 15Vahoolo wa oyariwa wa Heberi, Xela aakhalatho ni okumi iyaakha macira maxexe ni iyaakha tthaaru ni aari tiithi a anamwane asilopwana, ni asithiyanatho. 16Heberi arinweene iyaakha miloko miraru ni iyaakha ixexe, aamuyara Pelegi. 17Vahoolo wa oyariwa wa Pelegi, Heberi aakhalatho ni okumi iyaakha macira maxexe ni iyaakha miloko miraru ni aari tiithi a anamwane asilopwana ni asithiyanatho. 18Pelegi arinweene iyaakha miloko miraru, aamuyara Rehu. 19Vahoolo wa oyariwa wa Rehu, Pelegi aakhalatho ni okumi iyaakha macira meeli ni iyakha ithanniixexe ni aari tiithi a anamwane asilopwana ni asithiyanatho. 20Rehu arinweene iyaakha miloko miraru ni iyaakha piili, aamuyara Serugi. 21Vahoolo wa oyariwa wa Serugi, Rehu aakhalatho ni okumi iyaakha macira meeli ni iyaakha ithannapiili, ni aari tiithi a anamwane asilopwana ni asithiyanatho. 22Serugi arinweene iyaakha miloko miraru, aamuyara Nahori. 23Vano vahoolo wa oyariwa wa Nahori, Serugi aakhalatho ni okumi iyaakha macira meeli ni aari tiithi a anamwane asilopwana ni asithiyanatho. 24Nahori arinweene iyaakha miloko miili ni iyaakha ithanniixexe, aamuyara Tera. 25Vahoolo wa oyariwa wa Tera, Nahori aakhalatho ni okumi iyaakha ncira ni iyakha muloko niithanniixexe ni aari tiithi a anamwane asilopwana ni asithiyanatho. 26Tera arinweene iyaakha miloko mithannamiili, aakhalano asinamwane araru: Abraamu, Nahori ni Harani. 27Ela ti ekhapira ya Tera: Tera aari tiithi a Abraamu, Nahori ni Harani. Ni Harani aari tiithi a Loti. 28Tera nlelo areene ni okumi, Harani aahookhwa wUri wa aKaldeya weiwo aayariwaawe. 29Abraamu ni Nahori yaathelasa. Amwaariye Abraamu yiithaniwa Sarai, ni amwaariye Nahori yaari Milka, mwaana a Harani. Harani aari tiithi a Milka ni Yiska. 30Vano Sarai aari mwali eekupa, ni khaarino anamwane. 31Vano Tera aavenya wUri wa aKaldeya amukuxaka Mwanawe Abraamu ni musulwaawe Loti, mwaana a Harani. Aamukuxatho Sarai, mwaara a Abraamu, erowaka oKanaani. Wa soothesene, yaaphiyalaaya oHarani, yaamakawo. 32Tera aakhala ni okumi iyaakha macira meeli ni iyaakha ithanu, anakhwa oHarani.
Currently Selected:
Epacerero 11: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
