Mateo 3

Juan Bautista tëtsta'aky itjötypy

(Mr 1.1-8; Lc 3.1-9,15-17; Jn 1.19-28)

1Nit'ämpy Juan Bautista kya'amay'axajjy Judea tyë'tsta'aky'itjotm. 2Najj jä' y'ijjty kya'amay: «¡Awimpittëtë Yës Teety, jä'ku winkonnë'p jä' xëëw maj Yës Teety kyuttujjk kyuytyunë't yaj it naxwiiny!»

3Juan y'ijjty yëknikkajpxp ku Isaías Yës Teety yyëk'ayuujknajxpë wyaany:

«Jäm tu'uk jaa'y kyajpxke'eky tëtsta'aky itjotm:

Yëkni'oyë'të yëknippaattëtë nëë' tuu' jäts Wintsën mpaattëtë't

wijtstëëkkëxtë tukkë'yë ka'oytyuu'.»

4Kamellë pëjjk y'ijjty Juan wyit'eepy jäts po' tintsum mëët tnityamutsum'ätyë, jömtypya'ak mëët mu' y'ijjty tyajüky'eepy. 5Nits Jerusalénkë'tjaa'y, jäts pën tsoo'ntë'p Judea y'itjotm mëët pënjäty tsoo'ntë'p Jordánkë't myu'awinkon jya'anajxtë jäts tmato'otë't Juan kya'amaa'yë'n. 6Jämts y'ijjty pyöky tmaywyatstë nits Juan y'ijjty yyëknëppetyë'të Jordánkë't nëjotm. 7Kuts Juan t'ijxy jäts mëët y'ijjty nyiminyë fariseostëjjk mëët saduceostëjjk nits mëjk twintso'ojy: «¡Miits mää'tspë jaa'y! ¿Pën miits mnëë'mxëtë'p jäts mkukkä'äktë'p ayoo'n mati' mnimiijnëtë'p? 8Jaa'yëtë jükyëtë yëkxon, wä'n tnikkä'äjxjë'ëky jäts tëë'm Yës Teety x'awmpittëtë, 9jäts katij jä'yë xnityamëjj'ätyë'të ku Abraham xteetyë'të. Jä'ku mayë'p Yës teety jäts tsaaj ttok'uu'nktijjt Habraham 10Jäänë poo'jtpujjx y'a'ijxy jäts ka'oytyëëm'eepyë kepy yëkpoo'jtjë'ëkt y'aatsjötypy nits yëknaxno'okt. 11Nëëj ëjts miits ixyam ntayëknëppejjtypy nits miits nnëëjmëtë jäts katij m'okpökytyunëtë, jäts jatu'uk ix'oojk myiny mati' nimëjknäxy kä' ëjts xpaatë nits kyë'ëk ëjts npakkoojnë't, jä'äts mtayëknëppättëtë'p jëën mëët Yës Teety Jyaa'wë'n. 12Jämnë tyëkminy mati' tsajpmoojk tyayëkwa'atsp, jawyiin pu'ux twinkonkëxt nits tsajpmokpajjk tpëjjkjë'ëkt to'okyjötypy, jäts pu'ux tjënpëjkpätt jënjötypy mati' nijunë ka'ookp.»

Jesús nyëppety

(Mr 1.9-11; Lc 3.21-22)

13Nits Jesús tsyoo'jny Galilea jäts nyijkxy Jordánkë't nyë'am maj jäm y'ijjty Juan jaa'y tyëknëppäjt'ooky jäts mëët yyëknëppättë't. 14Kä'äts Juan tjatsojjky jäts Jesús tyëknëppätt jakëjxts tnëëjmjaay:

—¡Mijts ëjts jyeexyë xyëknëppäjtp, nits ëjts mijts yaj xniminy!

15Nits Jesús y'atsooy:

—Kä' najj nwa'ant, wä'n tuu'nyë'n mati' xpaajt'ajjtyë'm jä'ku najj jä' Yës Teety tsöky nmuttuu'në'n.

Najjts Juan tkuppëjjky. 16Kuts Jesús nyëppejjty jäts pyitsëmnë në'am nits tsajpwiin y'awaajtsy jäts poop maaxyjyoonë'n t'ijxtë tyanaxkitaajkë Yës Teety Jyaa'wë'n 17Jäts yëkmatooy tsajpjotm tu'uk ayuujk mati' wamp: «Ya'at ëjts n'uu'nk'eepy pën ëjts ntsöjkypy njakyejpypy, yë' ëjts tëj nwin'ijxy nwinway.»

Currently Selected:

Mateo 3: YTYA

Highlight

Copy