Mateo 2

Winjaa'w'eepyëttëjjk mati' xëëwpitsempy mintë'p

1Tu'uk kajjp Judea y'itjotm mati' txëëw Belén jäm Jesús kye'ejxy, nit ku y'ijjty Herodes yëkkuttüky jä' it naxwiin. Nits jya'atë Jerusalén nitu'ukë'n winjaa'w'eepyëttëjjk mati' mintë'p xëëwpitsemp muttëy 2Jäts Herodes tyëktëëtë:

—¿Maj jä' y'ity Judíostëjjk yëkkuttujkpë mati' tëj kye'exy? Jä'ku tëj ëëts n'ijxë myatsa' pyitsemy jä'äts ëëts nniminpy jäts nwintsë'ëkë't.

3Nits yëkkuttujkpë Herodes tka'oyjyaa'w'ëëy ku najj tmatooy jäts Jerusalénkë'tjaa'y tsyë'ëjk'eetyë. 4Nits Herodes twaamujjky teety niwintsën mëët pawaa'n yëk'ixpëjkpëttëjjk jäts tyëktëëy, maj it jä' kyä'äxwa'any Yëknitsokpë. 5Jäts jä' y'atsoote:

—Belén, Judea y'itjotm, najj jä' tjaypyejjty yëk'ayuujknajxpë:

6"Jäts mijts Belén, mijts tu'uk mëjj'ijxy mëjjkexy m'ijtp

nii'xyë'n naajx kajjp Judeat itjotm,

jä'ku mijts mkajjpjotm kyä'äxt tu'uk yëkkuttujkpë

jä'äts tuu'wawë'p ëjts nnaajx nkajjp Israel."

7Nits Herodes tjë'waay winjaa'w'eepyëttëjjk nits amää'tsk tyëktëëy junë jä' matsa' kyä'äjxjë'ëjky. 8Nits tpakkejjxy Belén kajjpjotm jäts tnëëjmjaay:

—Nëjkx xni'ijxtë xnijawëtë, kuts xpattë't nits xnikkajpxtë't jäts ëjts mëët nnëjkxt jäts nwintsë'ëkë't.

9Kuts najj Herodes nyëë'mxëtë nits winjaa'w'eepyëttëjjk nyëjkxtë. Jäts matsa' mati' y'ijjty pya'ijxtë'p y'attëy'ajjty jä' muttëy maj jäjp y'ijjty tëj maaxy'uu'nk kye'exy. 10Ku winjaa'w'eepyëttëjjk najj t'ijxtë matsa', jotkujjknäxy nyajyaa'w'ajjtëtë. 11Nits tyëjjk'eetyë tijkypy jäjpts tpat'të maaxy'uu'nk tyaak María tsyää'n'ityë; nits kujxtänääpy twintsë'ëjk'eetyë jäts këëjä'ätë tyëk'awatstë kyoo'n'ëë'ny nits tmoytyë pu'ts pujjx mati' këjx'am tsowatp, poom mëët kepy'üü'pky mati' pa'akxuu'kpë nëëj yëk'oy'eetyë'p. 12Kuts y'ijjty wyimpitwanëtë y'itjötypy nits kuma'ajnyjötypy Yës Teety nyëë'mxëtë jäts kä' Herodes twaajnëtë't, jakëjxts ayam tuu' nyajxtë jäts wyimpijtnëtë kyajjpjötypy.

Jesús yyëkmunijkxy Egipto

13Ku tëj y'ijjty wyimpijtnëtë winjaa'w'eepyëttëjjk nits José tu'uk tsajpjaa'y kuma'ajnyjötypy myukkajpxë jäts nyëë'mxë: «Puttë'ëk, mëëtkä'äk yë' maaxy'uu'nk mëët tyaak, mmëëtë Egipto. Jämts m'a'ijxtë't kunë'm ëjts nnikkajpxt junë mwimpit'të't, jä'ku yëk'ookwämpy Herodes yë' maaxy'uu'nk.»

14Jä' tsuuj José tmëët'tsoo'jny tyo'oxytyëjjk mëët maaxy'uu'nk jäts tmëët'ajjty Egipto, 15Jämts tsyënäätyë kunë'm Herodes y'oo'knë. Jakëjx jä' najj jyajjty jäts kyuytyunë't naa'xkë'n Yës Teety wyaany yyëk'ayuujknajxpë y'am: «Egipto ëjts n'uu'nk n'ajtsway.»

Herodes tnakyëk'oo'kexyë una'ajnk

16Ku Herodes tkumaay jäts tëj y'ijjty wyin'ëënyë winjaa'w'eepyëttëjjk, jä'äts mëjknäxy y'ampëjjk jakëjxts tyëknikuttujjk'ëëy jäts nitukkë'yë mijxy'uu'nk tyëk'oo'këxtë't mati' mäjtsk jumëjjt mëët nitukkë'yë myutskjätypyë, Belén kyajjpjotm mëët tukkë'yë kajjp mati' myu'awinkon, jä' mupaat nii'xyë'n y'ijjty tëj xëëw jumëjjt wyaa'xyë'të winjaa'w'eepyëttëjjk. 17Najjts kyuytyuujnë mati' jyaay yëk'ayuujknajxpë Jeremías:

18«Yëk'ayoopënäxy yëkmatooy

tu'uk jaa'y ya'axy jäm Ramá,

Raquel y'uu'nk tniyaxp mati' y'ijjty

tëj y'oo'këjxnë

jäts kä' pën myayë yëk'amonë't.»

19Kuts Herodes y'oo'jky, najyäm y'ijjty José Egipto, nits tu'uk tsajpjaa'y myukkajpxë kuma'ajnyjötypy jäts nyëë'mxë: 20«Puttë'ëk, jäts mëëtwimpijtnë mto'oxytyëjjk mëët una'ajnk Israel y'itjotm, jä'ku tëj jä' y'oo'knë pën y'ijjty una'ajnk tyëk'ookwamp.»

21Nits José pyuttë'ëjky nits tmëëtwimpijtnë tyo'oxytyëjjk mëët una'ajnk Israel y'itjotm. 22Kuts tnijaa'w'ëëy jäts Arquelao y'ijjty tëj tmuttaajnë tyeety Herodes kyuttujktaajk jäm Judea, jä'äts atsë'ëjk'ajjtë jäts kä' jäm najj nyijkxy, nits Yës Teety nyëë'mxë jäts nyëjkxt Galilea y'itjotm. 23Nits jya'ataktë tu'uk kajjpjotm mati' txëëw Nazaret, najjts jä' kyuytyuujnë ayuujk ku yëk'ayuujknajxpëttëjjk wyantë: Nazaretë'tjaa'y yyëkkuxëëwë't Jesús.

Currently Selected:

Mateo 2: YTYA

Highlight

Copy