Hechos 2

Ja jas yala ja Jesusi

1Ja sk'ak'u'il ja k'in pentecostesi,#2:1 ja k'in pentecostesi: Yuj jun k'in wa sk'u'lan ja judio jumasa, chab' tajb'e k'ak'u sok lajune (50) wax ya'we ek'uk ja sya'al k'inali, ti wa sk'u'lane ja ita. ti tsomane b'a junxta na'its spetsanil ja sneb'uman jumasa ja Jesusi. 2Jun ita ch'ay k'ujol yabye och kululuk ja satk'inali, jach' ju'u'i jastal tsatsal b'itus, lajan sok tey b'a yoj na'its ja b'aye'i. 3Tsa'an cho yilawe' lajan sok jastal k'ak' ti wa'n ajlel sb'aje kada jujune ja ye'nle'i. 4Spetsanile jach' a'ji yi'e jastal it ja yipe yuj ja Espiritu Santo, tsa'an ch'ak och k'umanuke sok tuktukil ab'al. B'a kada jujune jach' k'umaniye jastal alji yabye yuj ja Espiritu Santo.

5Ja k'ak'u jawi, jitsan judio b'a slujmal ja Roma ma' yaj wax yab' ja Dyosi, ti wa'ne ulatanel k'ot b'a Jerusalen. 6Yajni yabye ja jastal jex kululi, jel jitsan ja ye'nle ochye mojan ja b'a niwan na'its b'a'y ja sneb'uman jumasa ja Jesusi, jel cham sk'ujole yuj ja wax yabye sb'ej ja jas wa'ne yaljel ja sneb'uman ja Jesusi. 7Yuj ja jel cham k'ujol aye'i, ti wax yala sb'a je'a:

—Ja it jumasa, ¿Mi ma yuj ti sb'ajuke b'a slujmal Galilea b'a? 8¿Jastal lek wax b'ob' k'umanuke sok ja jk'umal ke'ntik b'a? 9Ja janek' ti aytikon ili, b'a tuktukil chonab' jakelotikon, ay ma ti jakel kujtikon b'a Partia, Media sok Elam, jaxa tuki ti jakel kujtikon b'a Mesopotamia, b'a Judea, b'a Capadosia, b'a Ponto, b'a Asia, 10B'a Frigia, b'a Panfilia, sok b'a Egipto, cho jach'ni b'a lugar jumasa b'a Libia b'a mojan sok ja chonab' Cirene. Cho jitsan jakye b'a Roma, ja tuki, ti jakele b'a xe'n yal takin lu'um b'a paman ja' b'a Creta, sok man b'a slujmal ja Arabia. 11-12Aytikon chab' oxe yujni judio manxitikona, sok ayni ja'xa kristyano aytikon ja sutxitikon judio'ila. —Lajan sok mix b'ob' sk'u'ajel ja jastal wax b'ob' k'umanuke sok ja jk'umal ke'ntikoni, jel tsamal wax yab' ja Dyos ja jastal iti—.

Spetsanile mix ch'akye ja cham k'ujolili, sok mix ch'ak sjob' sb'aje: ¿Jasunk'a wa sk'ana yal ja it b'a? —xchiye.

13Ti'xta'a, k'e'ye chab' oxe och sk'e'naye ja sjekab'anum jumasa ja Jesusi, wa slokowe ab'al ke yuj yakb'ele ja jastal wa'ne k'umali. 14Ti ch'ak k'e'uke tek'an ja jekab'anum jumasa, ti k'umani tsats lek ja Pedro, ti yala'a:

—Israelenio jumasa sok kristyano jumasa sb'a Jerusalen, maklayik lek ja jas oj kala wabyexi. 15Yuj k'a waxa walawex ke yuj yakb'elotikon, mi lek ayukex. —Wantox ya'a ja b'alune ora b'a sakb'el tak— 16Yuj ya'n k'ak'u k'ot smeranil ya'ki'tikon ja Dyos ja jas sk'apunej ki'tikoni, ja iti, ye'n a'ji yal ja aluman Dyos Joeli, ti yala'a:

17b'a stik'anal ja k'ak'u jumasa,

B'a spetsanile oj ka'yi'e ja Kespiritu:

Ja winike sok ja ixuke jumasa yuj ja ke'n ay jas oj yal'e;

ja untik jumasa oj k'umuke yuxta mi oj yil'one,

Jaxa ma' ayxa sk'ujoli,

oj k'umuke b'a swayiche.

18Cho jach'ni, ja k'ak'u jumasa jawi

ojni ka'yi'e ja Kespiritu

ja winik sok ja ixuk jumasa ma'tik moso aye'i,

b'a oj sta'e ti ja jb'i'ili.

19Oj je' ja kip

b'a satk'inal sok b'a lu'umi:

oj ajyuk chik', k'ak' sok tab'.

20Ja k'ak'u mi oj ijlab'anuk,

ja nan ixawi chak lek oj wajuk,

lajan sok b'ats'an chik'.

—Ja iti b'ajtan oj ek'uk ja mitox k'ot

ja tsamal k'ak'u jaw

oj ka stup ja smule ja kristyano jumasa b'a lu'um iti.

21Ja ke'n ojni koltan spetsanile

ja ma' wa sk'u'ane yuj ke'n Dyoson yujile'i, —xchi ja Dyosi.

22—Maklayik lek ja jas oj kala wabyex, yuj ja' oj kala wabyex yuj ja Jesusi, ja ma ti ajyi b'a Nazareti. Jpetsaniltikon ja ke'ntikoni, wax na'atikon Dyosni jekjikon yuj ja. Sok wax cho jna'atikon a'ji yi niwan yip yuj ja Dyos, yuj ja kilatikon jastal jel tsamal sok jastal jel niwan ja milagro jumasa sk'u'lani.

23—Man k'e stulyi ja ya'teli, yujni jach' yala ja Dyos ojni yi' wokol ja Jesusi, oj cho k'uljuk entregar b'a sk'ab'e ja ma'tik mi lek wax ilji yuji. We'n a mochowex sok a wa'wex b'a sk'ab' ja swinkil ja Roma b'a oj smil'e'. 24—Jaxa Dyosi, ya'ni sak'wuk ja Jesusi—. —Ja chamel ch'akeli, mini jas oj b'ob' k'u'l sok ja ye'na—. 25Ayxa lek k'ak'u yala jastal it ja mandaranum David yuj ja Jesusi:

Ja ke'n tola bida ti aya jmoka;

ta yuj k'a ti aya b'a jts'e'el ja we'n,

mini ma' jas oj b'ob' sk'u'luk ki'a.

26Ja'yuj jel gusto ayon,

jel gusto wala ts'eb'aniyon,

sok ay lek sniwanil jk'ujol.

27—Ja we'n mi oj wa chamkon

cho mini oj a wa'won kan ja b'a jk'ejnala,

yujni toj wax ka'telta ya'a—.

28We'n a je'a ki jastal oj ajyukon

Ja'ni jastal waxa k'ana ja we'n.

Ja we'n ti aya mojan b'a jts'e'el

ja smeranili jel gusto ayon, —xchi ja Pedro.

29—Jmoj alijel jumasa israelenio, la k'umanukotik toj. Ja yajni cham ja Davidi, wajni mukana jpetsaniltik wax na'atik b'ay ja sk'ejnali. 30Ja Davidi, aluman Dyosni'a, ja'yuj alji yab' yuj ja Dyos oj och smandaranumil ja israelenio june ja yintili.

31—Ja Davidi sna'a ke ojni k'ot smeranil ja jas yala ja Dyosi. Ja'yuj ti yala'a: ja Mesiasi, mini oj kanuk ja b'a k'e'ena, ojni sak'wuka. 32Jpetsaniltik kilatikni ja Dyosi, ya'ni sak'wuk ja Jesusi. 33Ti'xa yi'a k'e b'a satk'inala, ti' ya kulan b'a lado stojol sk'ab'.

—Ja Dyosi ya'yi ja Espiritu Santo ja Jesusi. Ja Espiritu jawi, jani cho ya'kitik ja ke'ntik ja Jesusi, yujni jach' yaloj kab'tika. —Ja it ja wa'nex yiljel sok wa'nex smaklajel ja we'nlexi—.

34—Wax na'atik machunk'a i'jik'e b'a satk'inali, mi ja'uk ja Davidi, yuj ja ye'n wax yala:

—Ja Dyosi, yal yab' ja Kajwal Mesiasi:

Ti la kulani, b'a lado stojol k'ab' b'a kulanon ek'i

35Man oj ch'ak sk'ul ganar jas kontra jumasa, —x'utji.

36—Israelenio jumasa, jel t'ilan oj ja na'ex a petsanilex, ja smeranil ja Jesús it a milawex b'a cruzi, ja Dyosi ya'ta yi ya'tel b'a oj yal ja yab'al b'a spetsanil ja kristyano jumasa—.

37Spetsanil ja ma smaklan ja lo'il iti, jel jom ja s'olome'i sok jel cham sk'ujole, Ti sjob'owe yi ja Pedro sok ja tuk sjekab'anum jumasa:

—Moj alijel jumasa, ¿jasunk'a lek oj k'u'ltikon ja ya'n b'a?, —xchiye.

38Ti yala ja Pedro:

—A sutxuk wa k'ujolex sok ja Dyosi, cho k'u'anik, a ab'ajik b'a ke'n oj ka'tikon a wi'ex ja' b'a sb'i'il ja Kajwaltik Jesusi. B'a jach' oj sch'ay wa mulex ja Dyosi, oj cho ya'wi'ex ja Espiritu Santo. 39Ja jas oj ya'wi'ex ja Dyosi, a b'ajni a we'nlex sok wa wuntikilexi, sok spetsanil ja ma' wa sk'ana oj skolta ja Dyos b'a spetsanil ja lu'um iti.

Ja ma'tik b'ajtan sk'u'an ja Dyosi

40Ja Pedro mi k'ot tek'an yaljel yab' ja kristyano jumasa, ti wax yal yabye'a: —Pila a b'ajik sok ja ma'tik wa'n smajlajel ja wokol oj a'juk yi ja ma'tik mi lek ja jas wa'ne sk'u'lajeli, x'utji ye.

41Ja k'ak'u jawi, ay mojan oxe mil kristyano ja ma' sk'u'ane ja jas yala ja Pedro, ch'ak a'ji yi'e' ja', spetsanil ja kristyano jumasa jawi, ti'xa sta'a sb'aje sok ja sneb'uman jumasa ja Jesusi 42cho yalawe oj sta' sb'aje spetsanile b'a junxta oj ajyuke. Jaxa sjekab'anum jumasa ja Kajwaltiki, kada k'ak'u wa'ne sje'jel ja yab'al ja Dyosi, wax cho sk'u'lane ja wa'elal sb'a Kajwaltiki, lajan wa sk'umane ja Dyosi.

43Yajni yilawe ja kristyano ja milagro jumasa sok ja jastik jel tsamal sk'u'lane ja sjekab'anum jumasa ja Jesusi, jel cham sk'ujole.

44Ja ma'tik ti nochan sok ja Jesusi, wa sk'eptala'an sb'aje ja jastik yi'oj je'i. 45Wa schonowe ja jastik sb'aje'i, jaxa ts'akoli, wa sk'epa sb'aje spetsanile, jani chikan jastal ja swokole' b'a kada jujune'i. 46Mi kechanuka, spetsanil ja k'ak'u jumasa wax wajye b'a snajtsil ja tsomjeli, wa sk'u'lane ja wa'elal sb'a Kajwaltiki, sok spetsanil sk'ujol wa sk'epa sb'aje ja swa'ele'i, cho jel gusto wax ajyiye. 47Jel wa stoyowe ja Dyosi, sok jel wa syajtaye ja kristyano jumasa. Kada k'ak'u wa'n ya'jel sb'aj ja ma' wa'n sk'u'ajel ja Kajwaltiki, b'a jach' oj sta' ja skoltajele'i. Jach' jastal jawi, ja nole snochoman ja Kajwaltiki, kada k'ak'u wa'ne pojxel.

Currently Selected:

Hechos 2: YABD

Highlight

Copy