Hechos 3

Ja Pedro ay ma tojb'uk

1Jun k'ak'u mojan oxe ora b'a och k'ak'u ja Pedro sok ja Juani, wajye b'a snajtsil tsomjel. Yujni jach' kulan yujile ja judio jumasa wa sk'umane ja Dyosi. 2Kada k'ak'u, ti wax i'ji och jun winik mix b'ob' b'eyuk, b'a kada jujune ja pwerta b'a snajtsil tsomjeli, ja sb'i'il yujile ja pwerta jawi, jel tsamal. Ja winik jawi, ja wa sk'anayi slimosna ja kristyano jumasa ma'tik wax och ja b'a snajtsil tsomjel jawi. 3Waj yil ja winik jawi, ti ochume k'ot ja Pedro sok ja Juan ja b'a snajtsil tsomjeli, ti sk'ana yi' ja slimosna'a. 4Jaxa ye'nle'i tojxta och sk'el'e ja winik jawi, ti yala ja Pedro: —Makla ja jas oj kaltikon a wab'i—.

5Jaxa winik jawi, tojxta och k'eljuke yuj, ek' sk'ujol yuj ay jas oj a'juk yi. 6Jasa, ja Pedro ti yal yab'a: —Me'y ki'oj tak'in b'a oj kawi, ja jas ki'oji ojni ka'wi'a: B'a sb'i'il ja Kajwaltik Jesús b'a Nazareti, wax kala wab'i, k'e'an sok b'ejyan—.

7Tsa'an ja Pedro ti'xa syama yi ja stojol sk'ab'i slika k'e'e. Jaxa winik ja ora jawi, ti'xta sta'a yip ja yechmal sok ja yoki 8ti b'ajti'a ti'xa och b'ejyuka. Mixa kani, snocho ja Pedro sok ja Juani, lajanxa ochye b'a yoj snajtsil ja tsomjeli, stuch'il wa'n b'ejyel sok wa'nxta b'ajtel wa'n stoyjel ja Dyosi.

9-10Spetsanil ja ma yila wa'n b'ejyel sok wa'n stoy jel ja Dyos ja winik jawi, jel cham sk'ujole yuj ja jas wa'n ek'eli. Ja winik jawi, wani sna'awe sb'aj ye'n ja ma it ti wax ajyi kulan b'a pwerta b'a snajtsil tsomjel sk'anjel limosna, it sb'i'il yujile, ja b'a pwerta sb'i'il b'a jel tsamali.

Ja Pedro ti k'umani b'a sti' snajtsil tsomjel

11Ja winik jawi, mini t'un spila sb'aj sok ja Pedro sok ja Juani. Jaxa kristyano jumasa cham k'ujolxta aye sak ajnel ti nochan wajume b'a lajan oj ochuke ja b'a otro pwerta, wax na'ji sb'a ja pwerta mas niwan jawi ja sb'a Salomoni, ti sjoyb'ane'a. 12Yajni yila ja Pedro ja jastal jawi, ti yal yabye'a:

—Jmoj alijel jumasa israelenio, ¿Jasyuj ja jex chama k'ujolex b'a? ¿Jasyuj jach' waxa k'elawotikonex b'a? ¿Ma yuj waxa walawex yuj ke'n ka'tikon tojb'uk ja winik jaw sok kechan kipuk ke'ntikon? 13Ja ma' ch'akta ek' paxta kujtikoni, ja Abrahami, ja Isaac sok ja Jacobi, stoyowe ja Dyosi, ja Dyos jawi, ye'n ja ma' sjeka kon ki'tikon ja Jesús ja ma' cho ye'n ja Mesiasi, cho ye'n sje'a ki'tikon jastal jel tsamal sok jastal jel ja yip ja Jesusi. Jaxa we'nlexi, ti waj ja wa'wex b'a sk'ab' ja ma' ay ya'tel b'a Roma, a'nima wa sk'ana ja Pilato oj sijpa, jaxa we'nlexi mini t'un a k'anawexa.

14—Ja Jesusi, kechan ja wa sk'u'an ja jas wax yala ja Dyosi, spetsanil k'ak'u toj lek ja jas wa sk'u'lani. Jaxa we'nlexi mi a kisawex, a walawex yab' ja pilato a sijpa ja tan milwanumi. 15Jach' a wa'wex miljuk jastal jaw ja Jesusi, ja ma' kechan ye'n oj b'ob' ya'wi'ex ja wa sak'anilex b'a mini nunka oj ch'akuki. Jaxa Dyosi, ya'ni sak'wuk ja Jesusi, ja jastal sak'wi, kilatikni ja ke'ntika.

16—Ja ke'ntikoni, ja niwan jk'ujoltikon ja yip ja Jesusi; a wilawexni apetsanilex ja we'nlexa, ja sniwanil jk'ujoltikon jawi, ja ya' tojb'uk ja winik it mix b'ob' b'ejyuk ajyi.

17—Jmoj alijel jumasa israelenio, mini ja we'nlexi, sok mini ja ma' ay ya'tel a wujilex mi sna'awe ja jas ch'ak sk'u'luke'i. 18Jaxa Dyosi, b'ajtan lek ya yal'e ja aluman Dyos jumasa, ja Mesiasi, t'ilani oj yi' lek wokola, sok jach'ni ek'a. 19Ja'yuj aktayikxa kan t'un sle'jel wa mulexi, a'xa sutxuk wa k'ujolexi, k'u'anik ja yab'al ja Dyosi. Jachuk ja ye'n oj sch'ay sk'ujol spetsanil ja jas mi lek a k'u'lunejexi, oj cho ya'wi'ex yajk'achil wa wipex 20Oj sjek ja Jesús ke ye'n Mesiasi, yuj ja jach'ni yalunej a wabyex ja Dyos ojni sjek a wi'exa. 21Jaxa ya'n yujni ti'xa oj ajyuk b'a satk'inal ja Jesusi, man oj ch'ak ya ajk'achb'uk spetsanil ja kosa jumasa ja Dyosi, jach'ni yalunej ja aluman Dyos jumasa ma' stsa'unej ja Dyosi.

22—June ja aluman Dyos jumasa iti, ja Moisesi, ja ye'n yala: —Dyos oj stsa' june ja swinkil ja jchonab'iltiki, b'a oj och aluman Dyosil jastal ja ke'n, jaxa we'nlexi oj ch'ak a k'ulukex ja jas oj yal ja ye'ni. 23Jaxa ma mi oj sk'u'uki, oj ka'tik eluk ja b'a jchonab'iltiki, —xchi ja Moisesi.

24—Cho jach'ni ja Samueli sok ja tuk aluman Dyos jumasa, cho yalawe'ni ja jastik wa'n ek'el ja ya'n. 25Najate lek ja Dyosi, ya'a jun trato sok ja ma' ek' paxta a wujilexi, spetsanil ja jas yalunej yab' ja aluman Dyos jumasa we'n oj ya wi'ex ja ya'ni, ja jas k'apayi ja Abraham ja ma' ek' paxta kujtik, ja iti:

—Spetsanil ja kristyano b'a lu'umi

jel lek ja jas oj ka' yi'e'i

ja'yuj ja wa wi'ntilex jumasa.

26—Jaxa ya'n, yuj ja ya'ta sak'wuk ja yunin Jesús ja Dyosi, ja jas sk'u'lan b'ajtani, ke'n b'ajtan sjekaki'tik, b'a oj sk'u'l a wi'ex ja b'a leki, b'a jach' oj a wa'wex kan sle'jel ja wa mulexa, xchi ja Pedro.

Currently Selected:

Hechos 3: YABD

Highlight

Copy