Juan 11

Ja Lazaro

1-2Ja Lazaro sok ja swats jumasa ja Marta sok ja Maria, ti kulane b'a chonab' Betania. Ye'n ja Maria it ma' spek'a yi perjume ja yok ja Jesusi, ja it ja' stakjes sok ja stso'otsil s'olomi.

K'ot jun k'ak'u ko' chamel ja Lazaro 3jaxa swats jumasa ti sjekawe spayjel ja Jesusi, ti yalwe yab' ja ma' waj spayi, alawik yab' jastal iti: —Kajwal, ja wa wamigo, mi lek ay. Utajik.

4Jaxa Jesusi, yajni yab'i, ti yala'a: —Sok ja chamel jawi, mi oj chamuk. Oj cho makunuk lek b'a oj je'xuk ja yip ja Dyosi, sok ja kip ja ke'n yuj ja ye'n yuninon ja Dyosi—.

5Ja Jesusi, jel wa syajta ja Marta ja Maria sok ja Lazaro. 6Jasa, yajni yab' mi lek ay ja Lazaro, yala ojto kan chab' k'ak'u b'a wa'n a'teli. 7B'a yoxil k'ak'u ti yal yab' ja sneb'uman jumasa:

—La kumxukotik b'a lugar jumasa b'a Judea.

8Ti alji yab' yuj ja sneb'uman jumasa:

—Je'uman, ay chab' oxe judio ja b'a ch'in chonab' jumasa jawi, ajk'achto wa'ne sle'jel jastal oj miljan. ¿Jachuk ti waxa k'ana oj cho kumxan ja tiwi?

9Ti alji yabye yuj ja Jesusi:

—B'a kada k'ak'u, lajchawe ora wax ijlab'ani ja k'ak'u. Ay k'a ma' sat k'ak'u wax b'ejyi mini jas oj spak'tsuk sb'aj soka, yuj ja yijlab' ja k'ak'u wax ijlab'ani b'a b'ej. 10-11Kechan ta yuj a'kwal oj b'ejyuk, ayni jas oj spak'tsuk sb'aj soka, yuj ja mi oj yil ja sb'eji. Jaxa jmoj alijeltik Lazaro kechan wa'n wayel, ke'n oj waj yujkes.

12Ti alji yab' yuj ja sneb'uman jumasa:

—Kajwal, ta yuj k'a kechan wa'n wayel ja Lazaro, jas lom wax cham a k'ujol b'a.

13Ja jas wa sk'ana oj ya yab' sb'ej ja sneb'uman jumasa ja Jesusi, yuj ja Lazaro chamta, jaxa sneb'uman jumasa, wax yalawe yuj kechan wa'n jijlel. 14Ja'yuj, ja Jesusi, ti yal yabye ja sb'ej ja:

—Ja Lazaro chamta. 15Jel gusto kab' ja mi ti ayukon k'ot sok tiwi, b'a jach' oj ja k'u'ukonex lek ja we'nlexi. Ja ya'n wajtikik ja b'ay ja ye'ni.

16Jaxa Tomas ma' loj wax alji sb'a, ti yal yab' ja tuk neb'uman jumasa: —Cho wajtikik ja ke'ntik b'a oj waj chamkotik sok ja Jesusi, xchi ja Tomasi.

Ja Jesusi, ye'n ja bida

17-19Mi jel najatuk yi'oj sb'aj ja chonab' Betania sok ja chonab' Jerusaleni, ay ma mojan oxe kilometro, ja'yuj ay jitsan judio ja ma' mojan aye'i, waj yulataye ja Marta sok ja Maria, b'a waj ya'we yi kulan sk'ujol yuj ja cham ja yijts'ine'i. Yajni k'ot ja Jesús b'a Betania, ti alji yab'a ke chanexa k'ak'u mukan ja Lazaro.

20Yajni yab' ja Marta k'ot ja Jesusi, ajnel waj sta'e, ja Maria ti kan b'a na'its. 21Jaxa Marta ti yal yab' ja Jesusi:

—Kajwal, ja' lek ti'ukto aya il jmoktikoni, mi cham ja kijts'ina. 22Jaxa spetsanil ja jas ch'ak ek'uki wax na'a, ojni ya'wi ja Dyos ja jas oj ja k'anyi'i, ja jawi, wanix k'u'ana.

23Ti alji yab' yuj ja Jesusi:

—Ja wa wijts'ini, ojni sak'wuka.

24Jaxa Marta ti yal yab'a:

—Merani ye'na, ja b'a sti'k'anali, spetsanil ja ma' chamelxa ojni sak'wuke'a.

25Ti alji yab' yuj ja Jesusi:

—Jaxa ke'n oj ka' yi'e ja sak'anile'i, cho ke'n oj ka sak'wuk ja ma' chamelxa. Ja ma' wa sk'u'anon ja ke'n a'nimax chami ojni sak'wuka. 26Ja ma' sak'aneto ja ya'n, ta yuj k'a wa sk'u'anone ja ke'n, mini oj chamuke'a. ¿Wa'n a maxa k'u'an ja iti? —x'utji.

27Ti yala ja Marta:

—Wa'n, Kajwal. Wax k'u'an ke we'n ja Mesiasi Yunin ja Dyos it oj jak ja b'a lu'um iti.

Ok' ja Jesús yuj ja yamigo

28Tsa'an yajni ch'ak yal ja jastal iti, jaxa Marta ti spaya ja Maria, ti yal yab' nak'ula: —Ja Je'umani ti'xa aya, wa spayawa—.

29Jaxa Maria wego stulu sb'aj waj yil b'a'y ja Jesusi. 30Jaxa Jesusi, mitox k'ot ja b'a na'itsi, ti'to ay ja b'a wa tajuk yuj ja Marta.

31Yajni yilawe stulu sb'a ja Maria, el ja b'a'yi, jaxa judio jumasa ma' wa'ne ya'jel yi kulan sk'ujol b'a snaji, snochowe b'a oj yil'e b'a oj wajuka. Ek' sk'ujole ta yuj ti oj waj ok' b'a sk'ejnal ja smoj alijeli.

32Yajni k'ot ja Maria ja b'ay ja Jesusi, ti ko' mek'an b'a sti' sat ti yal yab'a:

—Kajwal, ja lek ti'ukxta ajyi ya ili, mi cham ja jmoj alijeltikona, —xchi ja Maria.

33Yajni yila ja Jesús jel wax ok' ja Maria sok ja judio jumasa ma' waj mojtajuk yuji, cho jach'ni ja Jesusi, jel cham ja sk'ujoli, syats'a sb'aj ja yaltsili. 34Ti sjob'o yi'e'a:

—¿B'a a mukuwex ja lazaro b'a?

Ti yalawe ja ye'nle'i:

—La' Kajwal; ti mukan ili.

35Jaxa Jesusi, ti och ok'uka, 36Jaxa judio jumasa ma' tey tiwi, ti yalawe'a: —Ja Jesusi, jel wa syajta ja ma jel lek wax yila sb'aj soki—. 37Jaxa tuki, ti wax yalawe'a: —Ja Jesusi, ya yil k'inal ja winik it mix yila k'inal ajyi. Cho jach'ni sok ja Lazaro ay jas oj b'ob' sk'u'l sok ajyi b'a mi oj chamuki—.

Sak'wi ja Lazaro

38-39Ja Jesusi, ti'to paman ja ya'lel ja sati, och mojan ja b'a k'e'en mukan ja Lazaro, ti yala a ya'we eluk ja ton makan sok ja sti' k'e'eni. Jaxa Maria ti yala'a:

—Kajwal, ayxa yik'il, chanexa k'ak'u mukan, —xchi ja Maria.

40Ti alji yab' yuj ja Jesusi:

—¿Mi' ma kala wab' ta yuj k'a waxa k'u'anon oj ja wil ja yip ja Dyos b'a?

41Ti'xa waj ya'we eluk ja ton makan sok ja sti' sk'ejnali. Jaxa Jesusi, ti sk'ela k'e ja satk'inali, ti yala'a:

—Tatey, wax ka'wi ts'akatal yuj ja a maklayoni. 42Ja ke'n wanix na'a spetsanil k'ak'u waxa maklayon, wax kala yuj ja' b'a slekilal spetsanil ja ma' ti' aye ili, b'a jach' oj sk'u'uke yuj we'n a jekunejon—.

43Tsa'an yajni ch'ak yal ja jastal iti, ti awani tsats lek ja Jesusi, ti yala'a: —Lazaro, elan jani— 44Jaxa Lazaro ti' el ja b'a sk'e'jnali, jasa, mochan lek sok jun k'u'uts ja yok sk'ab'i. Jaxa sati, mochan sok jun mojchilal. Ja'yuj ja Jesusi, ti yal yab' ja ma'tik tey tiwi: —Ch'akan tukuwik yi ja smocholab'ili, a'wikan libre—.

Ja jastal oj smil'e ja Jesusi

(Mt 26:1-5; Mr 14:1-2; Lc 22:1-2)

45Ja judio jumasa ma' wajye b'a Betania waj smojtaye ja Maria, yajni yilawe ja jas sk'u'lan ja Jesusi, ay jitsan sk'u'ane ja ye'nle'i. 46Jaxa tuki, waj sle'e ja fariseo jumasa, ch'ak waj yalwe yabye ja jas sk'u'lan ja Jesusi. 47Jaxa pagre jumasa ma'tik niwak ya'teli sok ja fariseo jumasa, stsomo sb'aje sok ja ma'tik ay schol b'a niwan tsomjeli, ti yalawe'a:

—¿Jasun oj k'u'ltik sok ja winik iti, jel jitsan ja milagro jumasa wa'n sk'u'lajel tak? 48Ta wan k'ax ka'atik ek' jachuk ja jas wa'n sk'u'lajeli, spetsanil ja kristyano jumasa, oj k'u'ajuk ke yuj ye'n ja Mesiasi. Ti oj jakuk ja swinkil ja Roma b'a oj jak sjom'e ja snajtsil tsomjeli, oj jak sch'ay'e sna'jel spetsanil ja swinkil ja jchonab'iltiki, —xchiyexta.

49Jaxa Caifas ma' ye'n niwan ja ya'tel yuj ja pagre jumasa ja jab'il jawi, ti alji yabye yuj ja:

—Ja we'nlexi, mini jas wax ek' a k'ujolexa. 50¿Mi maxa na'awex b'a? Lek ja kechan a cham jun winik b'a spetsanil ja kristyano jumasa, yuj ja lom oj ch'ay sna'jel spetsanil ja swinkil ja jchonab'iltiki.

51Mi ye'nuk jak sk'ujol ja Caifas ja yala ja jastal iti, ja a'ji jul sk'ujol yuj ja Dyos yuj ja ye'n niwan ya'tel yuj ja pagre jumasa. 52Ja smeranil ja Jesusi, mi cham b'a kechan ja oj skolta ja judio jumasa, cho ja'ni b'a oj stsom jan spetsanil b'a oj och yuntikilil ja Dyos ja ma' tey b'a lu'um iti.

53Man k'ak'u jawi, yala ja ma'tik ay schol b'a niwan tsomjel jumasa yujni oj smil'e ja Jesusi. 54Jaxa Jesusi, mini june ja judio jumasa b'a ch'in chonab' jumasa b'a Judea mi ya' sna' b'a' ay ek' ja ye'n. El ja b'a lugar jumasa jawi, ti waj b'a jun chonab' Efrain sb'i'il, ja chonab' iti, tey mojan b'a chayan lugar. Ti ajyi tiw sok ja sneb'uman jumasa.

55Jelxa mojan oj eljul ja k'in b'a sya'al k'inali, ja'yuj jelxa jitsan wa'n k'otel ja kristyano jumasa b'a chonab' Jerusaleni, b'a jach' chapanxa aye ja yajni oj eljul ja k'ini. 56Spetsanile, wa'ne sle'jel ja Jesusi, yajni k'otye b'a snajtsil tsomjeli, ti wax yala sb'aje'a: —¿Jas la chiyex ja we'nlex b'a? ¿Oj ma jak yil ja k'in ja Jesusi, ma miyuk?, xchiye.

57Jaxa pagre jumasa ma'tik niwak ya'teli sok ja fariseo jumasa, yalaweta, ta ay k'a ma' wax yilawe b'a' ay ja Jesusi, a b'i waj aljuk yabye, oj b'i syam'e b'a oj slut e'.

Currently Selected:

Juan 11: YABD

Highlight

Copy