Juan 12

Jun ixuk sok ja Jesusi

(Mt 26:6-13; Mr 14:3-9)

1Ayto sk'ana wake k'ak'u oj eljul ja k'in b'a sya'al k'inali, ja Jesusi ti waj b'a chonab' Betania. Ti kulan tiw ja winik Lazaro ja it ya sak'wuk ja Jesusi.

2Ja b'a chonab' jawi, ay chab' oxe yamigo ja Jesusi, schapawe jun wa'el. Jaxa Lazaro ti kulan sok b'a mesa ja Jesusi, jaxa swats Marta ye'n ya ek' jan ja wa'eli. 3Jaxa Maria otro swatsi, ti yi'aj jan jun perjume b'a jel cha'an sts'akola, ti spek'ayi b'a yok ja Jesusi. Tsa'an ti stakjes sok ja stso'otsil s'olomi, spetsanil ja b'a yoj na'itsi, xpukuki ek' ja yik'il ja perjume.

4Ay june ja sneb'uman jumasa, Judas Iscariote sb'i'il, ja ma' oj snak'ul satuk ja Jesús ja tsa'ani, ti yala'a:

5—Je'uman lek jchonuktik xta ja perjume jawi— Ja sts'akoli, oj k'ot mojan mil kiniento ajyi, sok ja tak'in jawi, oj b'ob' koltatik ajyi ja ma'tik jel ajula sb'aji.

6-8Ja'yuj ja Jesusi, ti yal yab' ja Judasi:

—Akta kan ja we'ni, lek ja jas wa'n sk'u'lajeli— Ja jas wa'n sk'u'lajel ja ixuk iti, ja'xa wa'n schapjel ja jastal oj wajkon mukani. Jaxa ma'tik jel ajula sb'aji, ti'ni oj ajyuk a mokexa, ja ke'n mini ti oj ajyukon a mokex tola bida'a.

Ja smeranil ja Judasi, mi wa stalna sya'ujlal ja ma' jel ajula sb'aji; jach' yala jastal jawi, ja yuj ja jel gusto wax yab' ja elk'aneli. Yuj ja ye'n wa snolo ja tak'in sb'a Jesús sok sb'a sneb'uman jumasa, ayni wax yelk'an kana.

Chapji yab'alil ja Lazaro

9Jitsan judio ja ma' ti aye b'a Jerusaleni, yabye yab'alil tey b'a Betania ja Jesusi; ti waj yil'e'a, mi kechanuk wajye b'a oj yil'e ja Jesusi, cho wajye b'a oj yil'e ja Lazaro it ya sak'wuk ja Jesusi.

10Yajni yabye ja pagre jumasa ma'tik niwak ja ya'teli, ti slajawe oj cho smil'e ja Lazaro, 11jitsan judio smul ye'nle ja mixa skisawe ja pagre jumasa, ja'yuj jel jitsan ma' och sneb'umanil ja Jesusi.

Ja Jesusi, och ja b'a Jerusaleni

(Mt 21:1-11; Mr 11:1-11; Lc 19:28-40)

12Jel jitsan ja ma' waj ja b'a Jerusalen yuj k'in b'a sya'al k'inali. Jaxa otro k'ak'u ay ma' yab' yab'alil ti oj k'otuk ja Jesús b'a chonab' jawi, 13sk'utsuwe k'ab' xa'an, ti waj sta'e'a, wa'nexta awanel, ti wax yalawe'a:

—Jtatikon Dyos, koltayotikon—

—Sts'akatal ja ma' jakum yuj ja sb'i'il ja Dyosi—

—Sts'akatal ja smandaranum ja israelenio—

14Jaxa ye'n ja Jesusi, ti k'e' jun yal burro ti sta'a b'a b'ej. Jach' k'ot smeranil ja jas wax yala b'a ts'ijb'anub'al ja yab'al ja Dyosi:

15—Mi lom la xiwyex

swinkil ja chonab' Jerusalen—

—Jakumxa ja wa mandaranumexi—

—Kajan jun yal burro jakum—

16-19Ja ma'tik tey b'a Betania ja yajni ya sak'wuk ja Lazaro ja Jesusi, ch'ak yal'e ja milagro jaw ja b'a Jerusaleni, ja'yuj ch'ak eluke ja kristyano jumasa waj sta'e ja Jesusi. Jaxa fariseo jumasa ti wax yala sb'aje'a: —K'elawilex tak, —Spetsanile ti nochane'a— Mi jas oj b'ob' jk'u'luktik ja ke'ntiki—.

Ja yajni k'e stul ja ya'tel ja Jesusi, mix jak sk'ujole ja sb'ej ja sneb'uman jumasa; jaxa yajni chami cho sak'wi, ti jak sk'ujole'a, spetsanil ja jas ch'ak sk'u'luk ja Jesusi, yaloj xa jan b'ajtan ja b'a ts'ijb'anub'al ja yab'al ja Dyosi.

Ja Jesusi, yala ke ojni chamuka

20Ja ma'tik ch'ak wajuk b'a Jerusalen ja b'a k'in sya'al k'inali, ay chab' oxe griego. 21Ja ye'nle'i ti waj ye b'a kada schonab'il ja Galilea, ja waj sle'e ja Felipe june ja sneb'uman jumasa ja Jesusi, ti yalawe yab'a:

—Tata, wax k'ana oj kiltikon ja Jesusi.

Jaxa Felipe ti sb'aj b'a Betsaida, 22ti waj yal yab' ja Andresi, scha'wanilexa waj yal'e yab' ja Jesusi. 23Ti alji yabye yuj ja Jesusi:

—Ja ya'n, k'ot ja k'ak'u spetsanil oj sna'e sb'aj smeranil machunk'a yunin ja winiki. 24Ja smeranili, oj kal a wabyex, ta yuj k'a mok' jun sat ixim b'a lu'um mi xolini jani, mini oj makunuka. Ta yuj k'a k'a'i, xolini, jelni a'ay oj jach'xuka. 25Jachuk ja we'nlexi, ja ma' kechan ye'n wa syajta sb'aj mi oj sk'u'ukon ja ke'n, ojni ch'ayuk ja yaltsila, mi oj a ta'ex ja wa sak'anilex b'a mi oj ch'akuki. Jaxa ma' mi kechanuk ye'n oj syajta sb'aji, oj cho sk'u'ukon ja ke'n, ojni sta' ja sak'anil b'a mi oj ch'akuka. 26Ta ay k'a junuk ja we'nlex waxa k'ana oj a wa'teltayonex, jel t'ilan oj a k'u'ukex ja jas wax kala. B'a oj ajyukon ja ke'n ti' oj ajyuk ja ma' wax ya'teltayoni, jaxa Jtati, ye'n oj ya' ki ja smajtani.

27—Ja ya'n jel wa'non yi'jel ja wokoli, jomel olomxta ayon. Wanikex k'ana oj kal yab' ja jtat mi lom xya ki' jachuk ja wokoli. Mi oj kal yab'i, yuj ja jakyon ja ke'n ja b'a lu'um iti, ja'ni jak jk'u'luk ja jas yala oj k'u'luki, —xchi ja Jesusi. 28Mas lek oj kal yab' jachuk: Tatey, je'a yi ja wa wip ja kristyano jumasa, b'a lu'um iti.

Yajni ch'ak yal ja jastal iti, ti ab'xi jun k'umal ja b'a satk'inali, ti yala'a: —Je'atani ja kipa, ojni cho je' otro bwelta'a—.

29Jaxa ma'tik tey tiwi, yabye b'i b'ojti jun chawuk. Jaxa tuki, wax yalawe: —Jun anjel k'umaji yuj ja Jesusi—. 30Ti alji yabye yuj ja Jesusi:

—Ja k'umal a wabyexi, mi k'umani yuj ke'na, k'umani yuj we'nlex, b'a oj skoltayex b'a oj a k'u'ukonex. 31Ja ya'n k'ot ja k'ak'u oj k'eljuk yi ja smule ja kristyano jumasa; jaxa yajwalil ja lu'um iti, ojxa jipjuk el najat. 32Jaxa yajnix a'ji k'e'kon lokan ja b'a cruzi, ojni ch'ak a k'u'ukonex a petsanilexa, xchi ja Jesusi.

33Jaxa yajni yala ja Jesús oj a'ji k'e' lokan ja b'a cruzi, ja'ni yal yab' ja kristyano jumasa ke ojni chamuka.

34Ti job'ji yuj ja kristyano jumasa:

—¿Jasyuj waxa wala ja we'n oj a'ji k'e' lokan b'a cruz ja yunin ja winiki? ¿Machunk'a yunin ja winik jaw b'a? Ja b'a ts'ijb'anub'al ja yab'al ja Dyosi, wax yala ja Mesiasi, sak'an oj ajyuk tola bida, —xchiyexta.

35-36Ti alji yabye yuj ja Jesusi:

—Jelxa t'usan ja k'ak'u teyon a mokexi. K'u'anonik ja janek' ti'to ayon ili. Ja iti wa sk'ana oj yal b'ejyanik lek ja ayto jas waxa wijlab'anexi, b'a jach' mi oj slaj'ex ja k'ik'inali, yuj ja ma' k'ik'inal wax b'ejyi'i, mi sna'a b'a wajuma, —xchi ja Jesusi.

Tsa'an yajni ch'ak yal ja jastal it ja Jesusi, ti'xa spila sb'aj sok petsanil ja ye'nle'i, ti waja b'a mi ma oj ta'juk yuj.

Ja kristyano jumasa mi sk'u'ane ja Jesusi

37Ja Jesusi, jel jitsan ja milagro jumasa sk'u'lan ja b'a sti' sat ja kristyano jumasa iti, sok jachuk mini sk'u'ane ja Jesusi. 38Ja iti, jach' ek'i, yuj ja t'ilan oj k'ot smeranil ja jas sts'ijb'a ja aluman Dyos Isaias, ja yajni yala jastal iti:

—Dyos kuj, ¿Mi ma sk'u'an

ja jas wax kalatik ta?

¿Machunk'a a je'a yi ja wa wip b'a?—

39Ja'yuj mi sk'u'ane, jach' cho sts'ijb'a jastal it ja Isaias ta:

40—Ye'n ja Dyos ya ch'u'uyb'uk ja sk'ujol'ei,

mi sk'ana ja Dyos ja oj yabye sb'eji,

b'a mi oj sutxuk ja sk'ujol

oj sk'u'uke ja Jesusi,

b'a jach' mi oj sta' ja skoltajele'i,

x'utji ye yuj ja Dyosi.

41Jach' sts'ijb'a ja Isaiasi, b'a' miyuka b'ajtan lek yila ja ye'n jastal jel ja yipi, sok jastal jel niwan ja a'tel oj sk'u'luki. 42B'a'ya jitsan judio sok ay chab' oxe ja ma' ay ya'tel yuji, sk'u'ane ja Jesusi, mi ma' wax yalwe yab' yuj ja lek xnutsjiye el ja b'a snajtsil ja tsomjel yuj ja fariseo jumasa. 43Ja ye'nle'i, ja gusto wax yabye ja niwan oj iljuke yuj ja kristyano jumasa, a'nima tix ya'we kan pilan ja Dyosi, ja'yuj jach' sk'u'lane jastal jawi.

Ja Jesusi, jak skolta ja kristyano jumasa

44Ja Jesusi, ti och k'umanuk tsats leka:

—Ta ay k'a ma' wa sk'u'anon ja ke'ni, cho wani sk'u'an ja Dyos ja ma sjekawon koni. 45Ta ay ka ma' wax yilawon ja ke'n, cho wanix yila ja ma' sjekawon koni. 46Ke'n jakel ka ijlab'anuk ja swinkil ja lu'um iti. Ja ma wa sk'u'anon ja ke'ni, mi ti oj ajyuk b'a yoj k'ik'inal.

47—Ja ke'n, mi ja'uk jakel kil ja ma' wa smakla ja jas wax kala sok mis k'u'ani. Mi jakelukon b'a oj ch'ay sna'jel ja swinkil ja lu'um iti, ja ke'n jakelon b'a oj kolta. 48Ja ma' mi skisawoni, sok mi sk'u'an ja jas wax je'a'i, ja jas kala oj ch'ayjuk sna'jele ja yajnix k'ot tik'an ja k'ak'u.

49Yuj ja mi ja'uk wax kala ja jas wax k'ana ja ke'n, sjekawon ja jtati, ja oj jk'u'l spetsanil ja jas wa sk'ana ja ye'n. 50Wax na'a, ja ma' wa sk'u'an ja mandar jumasa ja jtati, ojni sta' ja sbida b'a mi oj ch'akuki. Ja'yuj ch'ak kal a wabyex spetsanil ja jas yal kab' ja jtat oj je' a wi'exi, xchi ja Jesusi.

Currently Selected:

Juan 12: YABD

Highlight

Copy