Juan 13

Ja Jesusi, sak'a ja okali

1Jelxa mojan oj eljul ja k'in b'a sya'al k'inali, cho jach'ni ja Jesusi, wanxa sna'a jelxa mojan oj ya'kan sb'atjel ja lu'um iti, ojxa waj sok ja Dyos yuja jani stati. Ja ye'n tola bida jel syajta ja sneb'uman jumasa b'a lu'um iti, man ya'n wa'n syajtajel masan b'a stik'anal.

2B'ajtan ja yajni mi tox och wa'uke'i, ja tan pukuji, chapanxa yuj ja Judas Iscariote yunin ja Simoni, b'a oj sk'ul entregar ja Jesusi.

3Ja Dyosi, ye'n sjeka ja Jesusi, jaxa Jesusi, wani sna'a; cho wani sna'a yuj ja ojni kumxuka b'a ti oj ajyuk sok otro bwelta ja Dyosi, yujni ja stat ja Dyos ja ye'na, cho ak'ub'al yi spetsanil ja yipi. 4Ja'yuj ja yajni wa'nexa wa'eli, ti k'e tek'an ja Jesusi, sopo jun lame ja sk'u' b'a satilajeli, ti smocho jun twaya ja b'a snalani. 5Tsa'an ti ya och ya'lel jun vasija'a, och sak' yi ja yok ja sneb'uman jumasa, ja' stakjes sok ja twaya it smocho b'a snalani.

6Yajni el k'ot ja b'ay ja Pedro b'a oj sak' juk yi ja yoki, ti yal yab' ja Jesusi:

—Kajwal, mi sb'ejuk ja we'n oj a sak' ki ja koki, —xchi ja Pedro.

7Ti alji yab' yuj ja Jesusi:

—Ja ya'n mixa na'a ja sb'ej ja jas wa'non sk'u'lajeli, tsa'an oj a na', —x'utji ja Pedro.

8Jaxa Pedro ti yal yab' ja Jesusi:

—Ja ke'n mi oj ka' jb'aj b'a oj a sak' ki ja koki, xchi.

Ti alji yab' yuj ja Jesusi:

—Ta yuj k'a mi oj ja wa'a b'aj b'a oj sak'awi wa woki, yujni mixa jneb'umanuka'a, —x'utji yuj ja Jesusi.

9Ti yala ja Simon Pedro:

—Kajwal, ta yuj k'a jach' jastal jawi, mi malanuk sok ja oj a sak' ki ja koki, cho sak'a ki ja jk'ab' sok ja j'olomi, xchi ja Pedro.

10Ti alji yab' yuj ja Jesusi:

—Ja ma' wantox ch'ak atnuki, mini jun skuxil aya, kechan ja oj sak'xuk yi ja yoki. Jachuk ja we'nlexi, sak ayex, a'nima mi apetsanilukex.

11Ja Jesusi, wanxa sna'a ma' oj k'ulajuk entregar yuj; ja'yuj yala mi spetsaniluke sak aye.

12Tsa'an yajni ch'ak sak' yi ja yok ja sneb'uman jumasa ja Jesusi, ti'xa slapa ja sk'u'a, ti waj kulan ja b'a mesa. Ti sjob'o yi ja sneb'uman jumasa:

—¿Wa'n a maxa na'awex ja we'nlex jas sb'ej ja jas wantox ch'ak jk'u'luki? 13Ja we'nlexi, waxa walawex b'a Je'umanil sok ajwalalil, sb'ejni ja jas waxa walawex kab'a, yujni Je'umanona, cho ajwalaloni'a. 14K'elawilex, ja ke'n a wajwalonex sok a je'umanonex ni'a, y jachuk jsak'ani wa wokexa, jayuj ja we'nlexi, cho sak'awik yi ja yok ja wa mojex jumasa. 15Ja jas ch'akta je'awi'exi, jach' oj ja k'u'lukex ja we'nlexi, 16Ja we'nlexi, waxa na'awex lek jun ma moso ay mi yuj mas niwanuk ja ye'n yuj ja yajwali, cho jach'ni jun jekab'anum mi yuj mas niwanuk yuj ja ma' jekji yuji. 17Ta yuj k'a waxa wabyex sb'ej ja jastik jumasa iti, k'u'lanik jachuk, mas lek oj yil'ex ja Dyosi.

18—Ja jas wa'non yaljeli, mi a b'ajukex a petsanilex. Ke'n wax na'a mach'tik junuk ja jtsa'uneji. Ojni cho k'ot smeranil ja jas yala ja b'a ts'ijb'anub'al ja yab'al ja Dyosi, jach' wax yala jastal iti:

Ja ma' oj wa' jmok lajani,

ye'n ja ma' oj snak'ul satukoni.

19—Ja iti, b'ajtanxa wa'non yaljel a wabyex, jaxa yajnix waj k'ot smeranili, ti oj a na'ex ke'nani ja wa'non ta'jel ti'a. 20Ja ma wax yi'aj lek ja ma' ke'n wax jeka, ke'nani wax yi'ajon leka. Jaxa ma' wax yi'ajon lek ja ke'ni, wanix cho yi'aj lek ja ma' sjekawon koni—.

Ja Jesusi, oj k'uljuk entregar

(Mt 26:20-25; Mr 14:17-21; Lc 22:21-23)

21Tsa'an yajni ch'ak yal ja jastal it ja Jesusi, ti syats'a sb'aj ja yaltsili, ti yala'a: —Ja ke'n wax na'a we'nlex june ja ma' oj skulukon entregari—.

22Jaxa sneb'uman jumasa, ti och sk'eltala'uk sb'aje'a, yuj ja mi sna'awe machunk'a wa'n ta'jel ti'i.

23Yajni wa'ne'xa wa'eli, ti kulan sok lajan ja sneb'uman it jel yaj wax yab'i. 24Jaxa Simon Pedro ti sje'a yi senya a sjob' yi ja Jesús machunk'a it wa'n sta'jel ti'i. 25Ja sneb'uman jawi, ti och mojan sok ja Jesusi, ti sjob'o yi'a:

—Kajwal, ¿Machunk'a oj sk'u'luka entregar b'a?

26Ti alji yab' yuj ja Jesusi:

—Ye'n ja ma' oj syam ja xe'n pan oj ka po'xuki, —xchi ja Jesusi.

Jaxa Jesusi, ti ya po'xuk ja xe'n pan jawi, ti ya' yi ja Judas Iscariote yunin ja Simoni. 27Ja ora jawi, ti och ja tan pukuj ja b'a yaltsil ja Judasi.

Ti alji yab' yuj ja Jesusi: —Judas, k'u'lanxa jas waxa k'ana oj ja k'u'luki—.

28Mini june ja ma' tey tiwi, mi yab' sb'ej ja jas yala ja Jesusi. 29Yuj ja ye'n nolo tak'in yujile ja Judasi, ja'yuj ay chab' oxe ek' sk'ujole, yuj ye'n yala ja Jesús ay jas oj manxuk ja b'a k'in sya'al k'inali, ma yuj ay ma' oj ya' yi tak'in ja ma'tik jel ajula sb'aji.

30Tsa'an yajni ch'akta slo' ja pan ja Judasi, ti'xa waja. A'kwalxani'a.

Ja yajk'achil ab'ali

31Tsa'an yajni wajta ja Judasi, jaxa Jesusi, ti yal yab' ja tuk sneb'uman jumasa:

—Ja ya'n ojxa yil ja kristyano ja jastal jel niwanon sok jastal jel ja kip ja ke'n, ja yuninon ja winiki. Yuja ja ke'n, ja'yuj oj cho a wil'ex jastal jel niwan ja yip ja Dyosi. 32Ta yuj k'a wax je'a yi ja kristyano jumasa jastal jel niwan sok jastal jel ja yip ja Dyosi, cho jach'ni ja Dyosi, oj sje' yi ja kristyano jumasa jastal jel niwanon sok jastal jel ja kip ja ke'ni. Jaxa Dyosi, jelxa mojan oj sk'u'luk ja iti.

33—Cho kuntikil jumasa, mixa jel alb'eluk teyon a mokexa. Ojto a le'onex mixa oj a ta'onex. Jach' wax kala wabyex ja we'nlex jastal kala yabye ja ma'tik jel niwan ja ya'tele yuj ja judio jumasa: Ja we'nlexi, mi oj b'ob' wajanik ja b'a oj wajkoni.

34—Oj ka'wi'ex jun yajk'achil mandar: Yajta a b'ajik sok wa mojex jumasa.

—Jach' oj ja yajtan a b'ajex jastal wax yajtanex ja ke'n. 35Ta yuj k'a waxa yajta a b'ajex meran, jachuk petsanile ojni sna'e yujni jneb'umanexa.

Ja Pedro yala mi sna'a sb'aj ja Jesusi

(Mt 26:31-35; Mr 14:27-31; Lc 22:31-34)

36Ja Simon Pedro ti sjob'o yi ja Jesusi:

—Kajwal, ¿B'a oj wajan b'a?

Ti alji yab' yuj ja Jesusi:

—Ja ya'n mi oj b'ob' wajan jmok, tsa'an oj b'ob' wajan.

37Jaxa Pedro ti cho yala'a:

—¿Kajwal, jasyuj ja mi oj b'ob' wajkon a mok ja ya'n b'a? —Ja ke'n chapan ayon b'a oj chamkon a mok lajan—

38Ti alji yab' yuj ja Jesusi:

—¿Meran a ma ja chapan aya oj chaman yuj ja ke'n b'a? Ja smeranili oj kal a wab'i, ja yajni mitox ok' ja gallo ox majke oj ja wal mixa na'a jb'aj, —xchi ja Jesusi.

Currently Selected:

Juan 13: YABD

Highlight

Copy