Juan 14

Ja b'eji

1Tsa'an ja Jesusi, ti yal yab' ja sneb'uman jumasa:

—Mi lom xcham a k'ujolex. K'u'anik ja Dyosi, cho k'u'anonik ja ke'ni. 2Ja b'a snaj ja jtati, jel ja b'a oj ajyukotiki. Ja' lek mi meranuki, mi oj kal a wabyex wajumon schapjel ja b'a ajyaniki. 3Tsa'an yajnix chapxi kuj ja b'a ajyaniki, ti oj jak ki'exa. B'a ti oj ayukotikik la jana, ja b'a'yon ja ke'n ti oj ajyanik ja we'nlexi. 4Ja we'nlexi, wanxa xa na'awex b'a wajumona, wax cho a na'awex ja b'eji, —xchi ja Jesusi.

5Ti alji yab' yuj ja Tomasi:

—Kajwal, mix na'atikon b'a wajuma'a, ¿Jastal oj na'tikon ja sb'ejil oj ki'tikon b'a? —xchi ja Tomasi.

6Ti alji yab' yuj ja Jesusi:

—K'en ja b'ejoni, ja smeranil sok jas sak'anili. Mokto yuj ke'nuk mini jun ma' oj k'otuk ja b'ay ja Dyos Tatali. 7Ta yuj k'a waxa na'awex jb'aj ja ke'n, ojni cho a na'ex sb'aj ja jtata. Man ya'n waxa na'awex sb'aj yuj ja ti' wa'nex yiljeli, —xchi ja Jesusi.

8Jaxa Felipe ti yala'a:

—Kajwal, je'aki'tikon ja Tatal b'a. Sok ja jawi, ja' spetsanil ja jas wax k'anatikon, —xchi ja Felipe.

9Ti alji yab' yuj ja Jesusi:

—Felipe, ja ke'n ayxa lek k'ak'u teyon a mokexa, ¿jachuk mitoxa na'a jb'aj? Ja ma' yilawonta ja ke'n, yujni cho yilata ja Tatala. ¿Jaxa we'n jas lom waxa wala kab' je'aki'tikon ja Tatal b'a? 10¿Mi' maxa k'u'an ja ke'n sok ja jtati, june ita aytikon b'a?

Ti yal yab' ja sneb'uman jumasa:

—Ja jas ch'ak kal a wabyexi, mi yuj ti' wax ka' el b'a j'olom ke'na. Ja ke'n, kechan ja wax k'u'lan ja jas wa sk'ana oj k'u'luk ja Tatali. Ja ke'n, ja wax k'u'lan ja jas wa sk'ana ja tatali. 11Ja'yuj k'u'anik ja yajni wax kala wabyex ja jtat sok ja ke'n june otikonita. Mik'a, k'u'anonik ja ke'n yuj ja jas wax k'u'lani. 12Ja smeranili wax kala wabyex, ja ma' wa sk'u'anon ja ke'ni, oj b'ob' sk'u'luk ja jas wax k'u'lan ja ke'ni. Ojxa wajkon ja ke'n ja b'ay ja jtati, jaxa we'nlexi, ayto jas mas niwan oj ja k'u'lukex yuj ja jas jk'u'lan ja ke'n. 13Ja ke'n oj ni ka'wi'ex spetsanil ja jas oj a k'an'ex ki'i. B'a jach' ke'n oj je' yi'e jastal jaw ja kristyano jumasa, ja yip ja Dyos Tatali. 14Chikan jas oj a k'an'ex yuj ja jb'i'il ke'n ojni ka'wi'exa, —xchi ja Jesusi.

Ja Jesusi, yala oj sjek ja Espiritu Santo

15—Ja we'nlexi ti oj ja je'ex ta yuj k'a yaj waxa wabyonex merani, ojni a k'u'lukex ja jastik wax kala'a. 16Jaxa ke'n oj kal yab' ja Dyos Tatal a sjek a wi'ex ja Espiritu Santo, b'a ye'n tola bida oj skoltayex, cho ti'ni oj ajyukon a mokexa. 17Ja jas oj sje'awi'ex ja ye'n, ja smeranili.

Ja ma' mi sk'u'an ja Dyosi, kechan ja cham k'ujolxta ay yuj ja jas wax ek' ja b'a lu'um iti, mi oj b'ob' yi' ja Espiritu Santo, yuj ja mix yilawe sok mi sna'awe sb'aj. Ja we'nlexi, waxa na'awex sb'aj yuj tey a mokexa, tola bida tey b'a wa nalanex.

18—Mi oj ka'ex kan meb'a'il, oj cho kumxukon b'a ti' oj ajyukon a mokexa. 19Mixa jel najatuk, ja kristyano jumasa b'a lu'um iti, mixa ojto yil'one. Jaxa we'nlexi, ojni a wil'onexa, a'nima la chamyon ojni sak'wukona, cho jach'ni ja we'nlexi ojni ka sak'wanika. 20Ja yajni la kumxiyon ja b'a'yexi, ti oj a na'exa, ja Tatal sok ja ke'ni, june itani aytikona; jaxa we'nlex sok ja ke'ni, june itani oj ajyukotikika, —xchi ja Jesusi.

21—Ja ma' wa sk'u'an ja kab'ali, sok wa sk'u'lan ja jas wax kala, yujni meran yaj wax yabyona. Ja ma' yaj oj yabyon jastal jawi, yajni oj ab'juk yuj ja jtati, cho jach'ni ja ke'n jel yaj oj kab'i, oj cho je' jb'aj yi jastalon ja smeranili.

22Jaxa otro Judasi, mi ja'uk ja Judas Iscariote, ti sjob'o yi ja Jesusi:

—Kajwal, ¿Jasyuj ja kechan sok ke'ntikon oj a je' a b'ajki'tikoni, jasyuj ja miyuk sok ja tuk jumasa b'a? —xchi ja Judasi.

23Ti alji yab' yuj ja Jesusi:

—Ta ay k'a ma' yaj wax yabyoni, wanix cho sk'u'an ja jas wax kala'a. Jaxa Dyos ja jtati, yajni oj cho ab'juk yuj ja ye'na, oj jakotikon lajan b'a ti oj ajyukotikon sok lajana. 24Jaxa ma'tik mi yajuk wax yabyone'i, mini wa sk'u'ane ja jas wax kala'a. Jaxa ke'n kechan ja kala yabyex ja jas yal kab' ja jtati, mi ja'uk kala ja jas wax k'ana oj kal ja ke'n.

25—Wax kala wabyex ja iti, yuj ja ti'to ayon amokexi. 26Oj jakuk ja Espiritu Santo ojni skoltayex leka, oj sjek ja Tatali, b'a ye'nxa oj kanuk ja b'a jlok'oli. Ja Espiritu Santo oj ch'ak sje'a wi'ex spetsanil ja kosa jumasa, ojto ch'ak ya juluk a k'ujolex spetsanil ja jas ch'ak je'a wi'exi.

27—Laman oj ka ajyanik, jastal laman ayon ja ke'n, ja iti, mi oj slaj ja jastal wa sk'ana ja swinkil ja lu'um iti. Mok chamuk a k'ujolex sok mi lom la xiwyex yuj ja jas jelxa mojan oj ek'uki. 28Yuj ja a wabyex kala oj wajkoni, oj cho kumxukon yuj ja we'nlexi. Ta yuj k'a meran ja yaj oj a wabyonexi, jel sb'ej jel gusto oj ajyanik yuj ja iti, yuj ja oj kumxukon ja b'ay ja jtati, ja ye'n mas niwan yuj ja ke'n.

29—Ja ya'n wax ch'ak kala wabyex ja iti, jaxa yajni waj k'ot smeranili, k'u'anonik ja ke'ni. 30Mixa jas tuk oj kal a wabyex yuj wa'nxa mojxel jan ja tan pukuj ma' wa a'tel b'a lu'um iti. Ja ye'n mini jun yip ay b'a oj yil jk'ujola. 31Jaxa ke'n jel t'ilan oj k'u'uk ja jas wax yala ja jtati, b'a jach' oj sna'e ja swinkil ja lu'um iti, jel yaj wax k'ab'i.

B'a oj sch'ak ja slo'il ja Jesusi, ti yal yab' ja sneb'uman jumasa:

—K'e'anikxa; la elkotikik ja ili, —xchi.

Currently Selected:

Juan 14: YABD

Highlight

Copy