Juan 15

Ja Dyos sok ja Jesusi

1Ja Jesusi, cho yal yab' ja sneb'uman jumasa:

—Ke'non ja sk'ab ja ts'usub'i, jaxa Dyos ja jtati, ye'n wa stalna. 2Ay k'a junuk ja sk'ab jumasa mix satini, ja jtati wa sk'utsu ele; jaxa k'ab' ts'usub' jumasa b'a wa'n satineli, wa sxajla, b'a jach' oj satinuk lek. 3Ja we'nlexi, sxajla nub'alexa, sts'akatal ja ab'al it kala wabyexi.

4—Ja we'nlexi, yuj k'a ti ayex jmoki, jach'ni ja ke'n ti'ni oj ayukon a mokexa. Wan xaxa na'awex jun k'ab' ts'usub' mi oj b'ob' satinuk ta mi k'a ti nok'anuk sok ja ste'ili. Cho jach'ni ja we'nlexi, ta yuj k'a mi ti' nok'anukex jmoki, mi jas oj b'ob' a k'u'lukex.

5—Ja jneb'uman ma' tey jmoki, sok ja ma' ti ayon sok ja ke'n, lajan sok ja yak'il ts'usub' b'a jel wax ya'a ja sati; ta ay k'a junuk ja we'nlex wa spila sb'aj jmok ja ke'n, mini jas oj b'ob' sk'u'luka. 6Ja ma' mi tey jmok ja ke'n, ja' oj slaj ja yak'il ts'usub' it mix satini: Tsa'an wax k'utsxi, wax jipxi ele yajni wax takji, ti wax lapxi sk'ajk'ala.

7Jaxa we'nlexi yuj k'a ti' ayex jmoki, wa'n k'ax cho a k'u'anex spetsanil ja jas je'unej a wi'exi, spetsanil ja jas oj a k'an'exi, ojni ya'wi'ex ja jtati. 8Ja we'nlexi, wan k'a la satiniyex, jach' k'a la ajyiyex jastal jneb'uman ke'na, jel gusto oj ajyuk a mokex ja jtati. 9Ja jastal wa syajtayon ja Tatal ja ke'n, jach' oj cho yajtayex ja we'nlexi. Mok a wa'wex kan jyajtajel ja we'nlexi. 10Yuj k'a waxa k'u'anex spetsanil ja jas je'unej a wi'exi, jach'ni ja ke'n tola bida oj yajtayex, jach' jastal wa syajtayon ja jtat ke'n yuj ja wax k'u'an spetsanil ja jas wax yala kab'i.

11—Wax ch'ak kala wabyex spetsanil ja iti, b'a gusto oj ajyanik jastal ja ke'n. 12Ja it ja wax kala wabyexi: Yajta a b'ajik sok wa mojex jumasa, jach' jastal yaj wax kabyex ja we'nlexi. 13Mini jun ma' oj b'ob' sje' ja syajal sk'ujola, kechan ja ma' oj ya' ja sbida yuj ja smoj jumasa. 14Ja we'nlexi, lek wax kila jb'ajtik ta yuj k'a waxa k'u'lanex ja jas wax kal a wabyexi. 15Mixa oj kala wabyex moso'il, jun moso mi wa sna'a ja jas wa sk'u'lan ja yajwali. Ja ya'n kamigo xa jb'ajtikik yuj ja ch'akta kala wabyex spetsanil ja jas sje'aki ja jtati.

16—Ja we'nlexi mi we'n a tsa'awonex, ke'n jtsa'awex ja we'nlexi. Jekawex b'a oj wajanik b'a jach' oj ajyanik jastal ja yak'il ts'usub' b'a tola bida wax satini. Jach'ni ja we'nlexi, ojni ya'wi'ex ja jtat ja jas oj ja k'an'ex yi yuj ja jb'i'il ke'n. 17Ja'yuj wax kala wabyex ja iti: Yajta a b'ajik sok wa mojex jumasa.

Ja ilk'ujoli

18—Ja ma' kechan ja wajel sk'ujole ja kosa jumasa b'a lu'um iti, mi lek oj yil'ex ja we'nlexi, na'awik yuj ke'n b'ajtan staklayone. 19Ja ye'nle'i, oj syajtayex ta yuj k'a jachukex ja we'nlex jastal ja ye'nle'i. Ja we'nlexi mixa jachukex jastal jawi, yuj ja ke'n jtsa'awexta b'a mixa jach' oj ajyani jastal ja ye'nle'i. Ja'yuj ja ye'nle'i, wa staklayex ja we'nlexi.

20—Na'awik ja jas kala wabyexi, jun moso mi yuj ye'n mas wa sna'a yuj ja yajwali. Ja'yuj ja kristyano jumasa ma kechan ja wa syajta ja kosa jumasa b'a lu'um iti, ke'nani mi skisawone'a, jach'ni ja we'nlexi ixta oj yil'ex. Mas lek wanuk skisawe ja jas wax kala ja kristyano jumasa jawi, cho jach'ni ja jas oj ja wal'ex ja we'nlexi, ojni cho skis'e'a. 21Spetsanil ja iti, jach' oj ek' a b'ajex yuj ja jneb'umanexi, yuj ja ma'tik tey b'a lu'um iti, mi sna'awe sb'aj ja Dyos ja ma' sjekawon koni.

22-24—Ja kristyano jawi, mini jun smul aye ja lek mokxta jas jak kal yabye'i, ja lek moxta ay jas jk'u'lan b'a sti' sate' yuj ja mini ma' wa sk'u'lani. Jasa, mini sok ja jachuki, wani staklayone'a, cho jach'ni ja jtati. Yuj ja ma' wa staklayon ja ke'n cho wani stakla ja jtata. 25Yujni jach' oj ch'ak ek' spetsanil ja ita, b'a jach' oj k'ot smeranil ja jas ts'ijb'anub'al b'a yab'al ja Dyosi: Jel lom ja wa staklayone'i.

26—Ke'n oj jek a wi'ex ja Espiritu Santo it ti wax jak b'a Tatali, b'a ye'n oj sje'awi'ex spetsanil ja smeranili. Ja Espiritu Santo ye'n oj skoltayex, sok jel tsamal oj sta'on ti' ja Ke'n, —xchi ja Jesusi. 27Cho jach'ni ja we'nlexi, jel tsamal oj ja ta'onex ti' yuj ja ti' ayex jmok ja k'ak'u k'e tulxuk ja a'teli.

Currently Selected:

Juan 15: YABD

Highlight

Copy