Juan 16

1—Ja iti, ch'ak kala wabyex spetsanil ja b'a mok a wa'wex kan jk'u'ajeli. 2Yuj ja oj k'otuk ja k'ak'u oj ch'ak nuts janik el b'a yoj snajtsil tsomjeli; cho jach'ni oj k'ot jun sk'ak'u'il chikanxta ma' oj smil'ex, jaxa ma' oj smil'exi oj ek' sk'ujole' yuj jun lek wa'n sk'u'lajel yi ja Dyosi. 3Yuj ja jach' oj sk'u'luke ja winike jumasa jawi, ja'yuj ja me' sna'awe jb'aji, sok yuj ja me' sna'awe sb'aj ja Dyos ja jtati. 4Wax kala wabyex ja iti, jaxa yajnix waj k'ot smeranili, ti oj jak a k'ujolex ja jas kaloj a wabyexi.

Ja ya'tel ja Espiritu Santo

—Ja iti, mi kala wabyex ja k'ak'u k'e jtul t'an ja ka'tel yuj ja teyon a mokexi, 5jaxa ya'n yuj ja ojxa kumxukon ja b'ay ja Dyos ja jtati, mini jun ma' wa sjob'o a wulex b'a wajumona. 6Jasa, jelni wax cham a k'ujolex yuj ja jas kala wabyexi. 7Ja smeranili, jel lek oj ja wil'ex ja yaj la wajyoni. Yuj k'a mila wajyoni, mi oj jak skoltayex ja Espiritu Santo; wa'n k'a la wajyoni, ke'nxa oj jekoni.

8-11—Jaxa yajnix jak ja Espiritu Santo, oj a'ji sna'e ja swinkil ja lu'um iti, ja ma mi oj sk'u'ukon ja ke'n ojni sta' smule'a. Oj a'ji sna'e yuj ja ke'n mi jas mi lek jk'u'lunej sok mi ke'nuk ja ay jmuli, ye'nle ni'a. Oj cho a'ji sna'e yuj ja Espiritu Santo, ja Dyosi, sk'elata yi ja smul ja yajwalil ja lu'um iti, ojni a'ji stupa. Jaxa ke'ni ojxa ni kumxukon ja b'ay ja jtati, jaxa we'nlexi mixa ojto a wil'onex.

12—Jel ja jas wax k'ana oj kal a wabyexi, jaxa ya'n mito oj ja wabyex sb'ej. 13Ja yajnix jak ja Espiritu Santo ye'n oj yala wabyex ja smeranili, sok oj sje'a wi'ex, b'a jach' tola bida ti' oj ajyanik ja b'a smeranili. Ja jas oj yali mi yuj ye'n jach' wa sk'ana, ja oj yala wabyex ja jas smaklunej yaloj ja Dyos Tatali, oj cho sje'a wi'ex ja jas ojxa k'ot smeranili.

14Oj cho ya' na'ex spetsanil jastalon ja ke'n b'a jach' oj toy'on ja ye'n. 15Spetsanil ja jas yi'oj ja Tatali, cho jb'ajni ja ke'na; ja'yuj kala wabyex ja Espiritu Santo oj ya'a na'ex spetsanil ja jastalon ja ke'n.

16—T'un sk'ana mixa oj ja wil'onex. Oj cho ek' t'usan k'ak'u oj cho a wil'onex—.

Jel gusto oj ajyanik

17Chab' oxe ja sneb'uman jumasa ja Jesusi, ti och sjob' sb'aje ye'nle ita'a:

—¿Ja sb'ej ja it b'a? Wax yala kab'tik mi oj ek' k'ak'u ja mixa oj kiltiki, wax cho yala tsa'an t'usan oj cho kiltik. Cho yala yuj ja jach' oj ek'uk ja iti, ja'yuj ja oj kumxukon ja b'ay ja stati. 18¿Jas sb'ej ja wax yala t'usan sk'ana b'a? —Mi jas wax kab'tik sb'ej ja jas wax yala—.

19Ja Jesusi, sna'a yuj ay jas wa sk'ana oj sjob' ja sneb'uman jumasa, ja'yuj ti yal yabye'a:

—¿Yuj a ma ja' waxa k'ana oj ja job' ex jasun wax k'ana oj kali? 20Ja smeranili, ta yuj k'a wax kal awabyexi, jel oj chamuk wa k'ujolexi, sok oj ok'anik; jaxa spetsanil ja ma' kechan ja wajel sk'ujol sok ja kosa jumasa b'a lu'um iti, jel gusto oj ajyuke. Ja we'nlexi, jel cham k'ujol oj ajyanik, jasa, tsa'an t'usan jel gusto oj ajyanik.

21—Jun ixuk kuchan yuj niwan chamel, yajni wa'nxa tojb'eli, jelni wax yi'aj ja wokola. Jaxa yajni manxita ja alatsi, ja nanal jawi, wax ch'ay sk'ujol spetsanil ja wokol ek' yuji, jel wax gusto'axi yuj ja yal yalats manxi'i. 22Cho jach'ni ja we'nlexi, ja ya'n jel cham k'ujol ayex, mi jel najatuk oj cho jak kil'ex, jaxa k'ak'u jawi, jel gusto oj ajyanik, mi ma oj b'ob' ya' eluk a wi'ex ja gusto'il jawi.

23—Yajnix k'ot ja k'ak'u jawi, mixa jas oj ja job' ex ki ja we'nlexi. Ja smeranili, oj kala wabyex yuj ja jneb'umanexi, spetsanil ja jas oj ja k'an'exi, ojni ya'wi'ex ja jtati. 24Man ya'n mi jas waxa k'anawex b'a jb'i'ili. K'anawik yi, ja Dyos, ojni ya'wi'ex ja jas oj ja k'an'exa; b'a jach' gusto lek oj ajyanika.

Ja Jesusi sk'ulan ganar ja swinkil ja lu'umi

25—Spetsanil ja jas ch'akta kala wabyexi, sok senya lo'il. Jaxa ya'n jakum ja k'ak'u b'a toj lek oj kala wabyex ja jas wa sk'ana ja Dyos Tatali, mixa ojto kala wabyex sok senya lo'il. 26Ja ya'n mixa t'ilanuk ke'n oj k'an yi ja jtat yuj ja we'nlexi, ojxa b'ob' a kumukex we'nlex a tuch'ilex yuj ja jneb'umanexa. 27Ja Dyosi, jel yaj wax yabyex jach' jel yaj waxa wabyonex ja we'nlexi, yuj ja ak'u'anexta ke ye'n sjekawon kon ja Tatali. 28Ja jakyon ja ke'n ja b'a lu'um iti, yujni ye'n sjekawon ja jtata, jaxa ya'n ojxa ka' kan ja lu'um iti, ojxa kumxukon ja b'a'y ja jtati.

29Ti alji yab' yuj ja sneb'uman jumasa:

—Ja ya'ni toj lek wa'na yaljel kab'tikon, mi sok senya lo'iluk waxa wala— 30Ja ya'n mi t'ilan oj ja majla ma oj sjob'awi, yuj ja wax ch'aka na' spetsanili, ja ya'n mixa ma' ayto jas oj sjob' a wi. Ja'yuj wax k'u'anatikon ja we'n yujni Dyos sjekuneja'a.

31Ja'yuj ti alji yabye yuj ja Jesusi:

—¿Ja ya'ani waxaxa k'u'anex? 32K'elawilex, jelxa mojan ja oj ch'ak wajanik sak tantani, oj ja wa'wonex kan jtuch'il. Mi jtuch'il oj kankon, ti oj ajyuk jmok ja Dyos ja jtati. 33Wax ch'ak kala wabyex spetsanil ja kosa jumasa iti, ja' b'a mi oj ja pila b'ajex moki, b'a jach' gusto lek oj ajyanik ja smeranili. Kechan tsatsal k'ujolan a b'ajex: Ja ke'n ch'akta ekuj spetsanil, ja yajwalil ja lu'um iti, ti'xa kanta yib' kok, —xchi ja Jesusi.

Currently Selected:

Juan 16: YABD

Highlight

Copy