Juan 2

Ja Jesús sok ja yalel ts'usub'i

1Ek' oxe k'ak'u, ja Maria snan ja Jesusi, waj b'a jun ch'ak ab'al b'a chonab' Cana b'a lado Galilea. 2Ja Jesús sok ja sneb'uman jumasa cho lokob'alni ja ye'nle'i.

3Ja janek' alb'ita ja k'in sb'a nupaneli, ch'ak ja pajal ya'lel ts'usub'i. Ja'yuj ja Maria ti yal yab' ja Jesusi:

—Ch'ak ja pajal ya'lel ts'usub'i.

4Ti alji yab' yuj ja Jesusi:

—Nan ja jawi, mi kocheluk ke'ntiki. Cho mitox k'ot ja ora oj kala wab' machunkilukon ja ke'n.

5Ja'yuj ja Maria, ti yal yab' ja a'tijum jumasa: —K'u'lanik spetsanil ja jas oj yala wabyex ja Jesusi—. 6Ja tiwi, tey wake niwak tinaja b'a wax nolxi ja', ja'ni b'a wax makuni yuj ja judio jumasa b'a kada k'in wa sk'u'lane'i. B'a kada tinaja wax och mojan jo' tajb'e (100) litro. 7Ja Jesusi, ti yal yab' ja a'tijum jumasa: —B'ut'uwik ya'lel ja tinaja jumasa jawi, xchi.

Jaxa a'tijum jumasa, ch'akni sb'ut' e a. 8Ti cho yala ja Jesusi: —Ja ya'an a'wik el t'unuk, i'ajik och yi ja b'ankilal jumasa a yabye yajb'al—.

Jaxa ye'nle'i, jach'ni sk'u'lane'a. 9Yajni yabye yajb'al ja b'ankilal ja ja' it pax ya'lel ts'usub'ili, jel cham jas k'ujole'i, yuj ja mi sna'a we b'a jak ja ya'lel ts'usub' jawi. Jaxa a'tijum jumasa wani sna'awe b'a jaka.

Ja'yuj ja b'ankilali, ti spaya ja kerem ma' wa'n nupaneli. 10Ti yala yab'a: —Ja jastal k'ajyel wax k'ulaxi, tola bida ja wax el b'ajtan ja ya'lel ts'usub' b'a leki, tsa'an yajni yu'ajta jitsan ja lok jumasa, ti'xa wax el ja b'a mas k'un yu'jela. Jaxa we'n ja a wa'kan tsa'an ja b'a leki—.

11Ja iti, ja sb'ajtanil milagro sk'u'lan ja Kajwaltik Jesús b'a chonab' Cana sb'a Galilea. Jach' k'e stul sje'jel ja yip it jel niwani, jachuk ja sneb'uman jumasa ti k'u'ane' leka.

12Tsa'an yajni ch'ak ek'uk ja k'in jawi, jaxa Jesusi, waj soke jas snani, ja smoj alijel jumasa sok jas sneb'uman jumasa, ti'xa wajye b'a chonab' Cafernaum, ti kanye chab' oxe k'ak'u tiwi.

Ja Jesús b'aj snajtsil tsomjeli

(Mt 21:12-13; Mr 11:15-18; Lc 19:45-46)

13Jelxa mojan ay ja k'in b'aj sya'al k'inal yuj ja judio jumasa, jaxa Jesusi, ti waj b'a chonab' Jerusalen. 14Ja yajni k'ot ja b'a snajtsil tsomjeli, ti sta'a chab' oxe winike wa'ne schonjel wakax, chej, yal pumus; jaxa tuk jumasa, ti naka kulane b'a kada smesa'e wa'ne spojel yi ja stak'in ja ma tuk chonab' jakele'i, ja' wax ya'we yi ja stak'in ye'nle ja judio jumasa. 15Jaxa Jesusi, yajni yila ja jastal jawi, ti yi a jun tsu'm chak sb'its' tala'uk yi'e, ch'ak snutsel spetsanil b'a snajtsil tsomjeli, ja cheji sok ja wakax jumasa. Jaxa stak'ine ja ma'tik wa'ne spojeli, ch'ak sjiptala'uk el b'a lu'um, jach'ni ja smesa'e jumasa ch'ak swichpuk ele—. 16Jaxa ma'tik wa'ne chonoj pumusi, ti yal yabye'a: —Ch'akan awik eluk ja kosa jumasa iti. Ja ili ja snaj ja Dyos ja jtati, mi jun snajtsiluk chonoj kosa.

17Yajni yilawe ja jastal it ja sneb'uman jumasa, ti jak sk'ujole ja jas ts'ijb'anub'al b'a yab'al ja Dyos it wax yala: —Ja syajal jk'ujol wax kab' yuj ja snajtsil wa tsomjeli, wa stsikawon jastal jun k'ak'—.

18Jaxa ma'tik ay ya'tel yuj ja judio jumasa, ti sjob'owe yi ja Jesusi:

—¿Ma'chun yala wab' oj ja k'u'luk ja jastal it b'a?

19Ti yala ja Jesusi:

—Jomowik el ja snajtsil tsomjel iti, b'a yoxil k'ak'u yajk'achil oj ka kan a wi'ex tek'an.

20Jaxa ma'tik niwak ja ya'teli, ti yalawe'a:

—Ja yora k'e' k'ulaxuk ja snajtsil ja tsomjel iti, yi'aj chab' taj b'e sok wake jab'il, ti'to tojb'i'a, ¿Jaxa we'n waxa wala b'a yoxil k'ak'u oj ch'ak tojb'uk a wuj?

21Jaxa Kajwaltik Jesusi, ja'ni wa'n yaljel jas kwerpo'a. 22Ja'yuj ja yajni sak'wi ja Kajwaltik Jesusi, jak sk'ujol ja sneb'uman jumasa, ye'na ni jach' yalunej jastal ita. Ja'yuj sk'u'ane ja jas wax yala ja ju'un b'a ts'ijb'anub'al ja yab'al ja Dyosi, sok ja jas yaloj ja Kajwaltik Jesusi.

Ja Jesusi, wax ch'ak sna' jb'ajtik

23Ja yajni tey b'a chonab' Jerusalen ja Kajwaltik Jesusi, snajtil ja janek' wa'n ajyel ja k'in sya'al k'inali, jel jitsan ja ma k'u'aji yuji, yuj ja yilawe ja milagro jumasa sk'u'lani. 24-25Jaxa Jesusi, mini mojxi schik'el soke'a, cho mini t'ilanuk ma' jas oj aljuk yab' yuj ja, komo wanix ch'ak na'juk sb'aje spetsanile'a, wax cho sna'a ja jastal wa'n ek'el sk'ujole'i.

Currently Selected:

Juan 2: YABD

Highlight

Copy