Juan 3

Ja Jesús sok ja Nicodemo

1-2Ajyi jun fariseo sb'i'il Nicodemo, ay ya'tel yuj ja judio jumasa, jun a'kwal ti waj sk'umuk ja Jesusi, ti yal yab'a:

—Je'uman, wax na'atikon ke Dyos, sjekawa b'a oj ja je ki'tikon ja yab'al ja Dyosi, porke mini ma' oj b'ob' sk'u'luk ja milagro jumasa waxa k'u'lan ja we'n ta yuj k'a mi tey sok ja Dyosi.

3Ti alji yab' yuj ja Jesusi:

—Ja smeranili, wax kala a wab'i, ja ma' mix manxi otro bwelta, mi oj b'ob' yil ta lek ja b'a wa sk'u'lan mandar ja Dyosi.

4Jaxa Nicodemo ti sjob'o'a:

—¿Jastal oj b'ob' manxuk otro bwelta ja ma' ayxa sk'ujoli? ¿Mi oj kal ojto cho och otro bwelta b'a slukum ja snan tak?

5Ti alji yab' yuj ja Jesusi:

—Ja smeranili, wax kala a wab'i, ta ay k'a ma' mix k'okxi b'a oj yi' ja' sok oj yi' ja Espiritu Santo, mi oj b'ob' ochuk ja b'a wa sk'u'lan mandar ja Dyosi. 6Spetsanil ja kristyano jumasa, ja'ni wax manji ye yuj ja snan state'a; jaxa yuntikil ja Dyosi, kechani ja' wax b'ob' manxuke yuj ja Espiritu Santo. 7Mi lom xcham a k'ujol ja lom wax kala a wab' oj ajyuk manxel otro bwelta. 8Ja ik'i, ti wax ju'u'i, b'aj wa sk'ana ja ye'n jaxa we'n mixa na'a b'a wax jaka sok mini b'a wax waji. Jach' jastal jaw ja ma' wax manxi yuj ja Espiritu Santo.

9Jaxa Nicodemo ti cho sjob'o pilan majke'a:

—¿Pero ja sb'ej ja jastal it b'a?

10Ti yala ja Jesusi:

—Ja we'n jun niwan je'uman a yuj ja israelenio, ¿Mixa na'a ja sb'ej ja jas wax kala tak? 11Ja smeranili oj kal a wab'i, ja ke'ntikoni wax na'atikon ja jas wax kalatikon yuja kilunejtikoni; jaxa we'nlexi, mixa k'u'anex ja jas wax kalatikon a wabyexi. 12Ta mi k'axa k'u'anonex ja yajni ja' wax kal a wabyex ja jas ay b'a lu'um iti, ¿Jastal oj b'ob' a k'u'ukex ta ja k'a oj kala wabyex ja jastal ay ja b'a satk'inali? 13Mini june ma' wax k'e' ja b'a satk'inali, kechan ja ma' ko'jani, la kaltik ja'ni ja ke'n ja yuninon winiki.

14—Ja Moisesi, ya' k'e' lokan te' ja b'its'il chan it k'u'lub'al sok tak'in ja b'a ch'ayan lugar, cho jach'ni ja ke'n ja yuninon ja winiki, ojni a'ji k'e'kon lokan b'a cruza, 15b'a jach spetsanil ja ma' oj sk'u'ukon ja ke'n ojni sta' ja sak'anile b'a mini oj ch'akuki.

16—Ja Dyosi, jel yaj yila ja kristyano b'a lu'um iti, ke'n ya ki b'a wax ka a jb'aj sok kechan ke'n yuninon ja winiki, jaxa spetsanil ja ma' oj sk'u'ukon ja ke'n mini oj chamuka, ojni sta' ja sak'anil b'a mi oj ch'akuki. 17Me' sjekawon ja Dyos ja b'a lu'um it b'a oj jak ch'ay sna'jel ja ixuke sok ja winike jumasa, sjekawon b'a oj jak jkoltaye.

18—Ja m'a wa sk'u'anon ye'n yuninon ja Dyosi, mi oj ch'ayjuk sna'jel yuj ja Dyosi. Jaxa ma' mi sk'u'ani, ch'ayelxa ni aya, ja'ni yuj ja mi sk'u'ane ja kechan ye'n Yunin ja Dyosi. 19Jach'ni wa sk'ela jastal it ja Dyosi: Ja ke'n ti ayon ja b'a lu'um it jastal jun k'ak' b'a wa'n ijlab'anel b'a yoj k'ik'inali, jaxa kristyano jumasa, ja mas lek wax yilawe ja b'a mi lekuki, cho jach'ni jel lek wax yilawe ja k'ik'inal ke yuja ja b'a wax ijlab'ani. 20Spetsanil ja ma' ja jel lek wax yila ja b'a mi lekuki, jel koraja wax yilawe ja b'a wax ijlab'ani, cho mix ochye sok mojan, b'a mi oj iljuk ja jas mi lekuk wa'ne sk'u'lajeli. 21Jaxa ma'tik ja wa'ne sle'jel ja smeranili, wax ochye b'a wa'n ijlab'aneli, wa sk'anawe spetsanil ja tuk jumasa a sk'u'uke spetsanil ja smandar jumasa ja Dyosi.

Ja Juan it ya'a yijel ja'i

22Tsa'an yuj ja iti, ja Jesús sok ja sneb'uman jumasa, ti wajye b'a chonab' jumasa b'a Judea, ti tejk'ajiye jun tiempo tiwi, cho wa'ne ya'jel yi' ja' ja kristyano jumasa. 23-24Ja k'ak'u jaw ja Juan it ma wax ya'a yijel ja'i mitonix lutji, cho wa'n ya'jel yi' ja' ja swinkil ja chonab' Enoc it ti mojan ay sok ja chonab' Salimi. Ja b'a chonab' Enoni, jel ja ja'i, jaxa kristyano jumasa ja wa sle'awe b'ay ja Juan b'a ye'n oj a'ji yi'e ja' yuj.

25Ay chab' oxe sneb'uman ja Juan och k'e'uke ab'al k'umal sok jun judio yuj ja jastal wa sak'a sb'aje'i.#3:25 Jun smodo'il jastal wa sak'a sb'aje ja judio jumasa: Ja ye'nle'i, ay tuktukil modo jastal wa sk'u'lane', wax noxjiye, wa sak'a ja sk'ab'e'i. Wax cho spensarane, ta yuj k'a oj syam sk'ab' sb'aje sok ja ma' mi judio'uki, ma oj syam'e jun cham winik, wax yala ja Dyos kux wax kanye, sok mi oj b'ob' stoy'e ja Dyosi. 26Ja'yuj ti wajye ja b'ay ja Juani, ti yalawe yab'a:

—Je'uman, ¿Wa'nto maxa na'a ja winik it a ta'aki'tikon ti' ja it ti aya sok lajan b'a sk'axil ja niwan ja' Jordani? Jaxa ja ye'n ja ora jawi wa'n ya'jel yi' ja' ja kristyano jumasa, spetsanil ja ma wa'ne yi'jel ja'i, wanxax ch'ak noch juk yuj.

27Ti yala ja Juani:

—Mi ma' ay jas oj b'ob' sk'u'luk ta yuj k'a mi ye'n jach' wa sk'ana ja Dyosi. 28We'n mismo a wabyex ja jas kala, toj lek kala a wabyex, ja ke'n, mi ke'nukon ja Mesiasi, kechan yuj ja ke'n jekjiyon b'ajtan b'a oj ch'ak jchap spetsanili.

29—B'a jun ch'ak ab'al, ja ma' oj nupanuki ja keremi, jaxa yajni wax yab' ja sk'umal ja yamigo jel gusto wax yab'i. Jach' jel gusto ayon ja ke'n ja yuj ja ti'xa ay il ja Mesiasi. 30Ja ye'n kada k'ak'u jel niwan oj iljuk, jaxa ke'n mas ko'el oj iljukon.

31—Ja Yunin ja Dyosi, ti jak b'a satk'inal, sok jel niwan ja ye'n yuj jpetsaniltik ja janek' ti aytik il b'a lu'umi, sok ja wax kalatik ja jas wax kilatik wax ek'i. Ja ma' ti jak b'a satk'inali, jel niwan ja ye'ni, 32sok ja wax yala ja jas yila sok ja jas makla ja b'a satk'inali. Jachuk jitsan ja ma' mi sk'ana oj sk'u'uke ja jas wax yala. 33Ta ay k'a ma' wa sk'u'ani, oj sna' ke yujni smeranil ja jas wax yala ja Dyosi, 34ja yajni wa'n k'umal ja Uninali, Ye'nani wa'n k'umal ja Dyosi, yuj ja spetsanil ja yip ja Yespiritu ja Dyosi, Ye'n ya'oj yi.

35—Ja Dyos Tatali, jel wa syajta ja yunini, cho ya'oj yi yip b'a oj sk'el spetsanil ja jas ay ja b'a lu'um k'inali. 36Ja ma wa sk'u'an ja yunin ja Dyosi, sta'atani ja sak'anil b'a mini oj ch'akuki, jaxa ma' mi sk'u'an ja Yunin ja Dyosi, mini oj sta' ja sak'anil b'a mini oj ch'akuki, oj jipjuk el jun lado yuj ja Dyosi.

Currently Selected:

Juan 3: YABD

Highlight

Copy