Juan 6

Ja Jesusi, ya' wa' jitsan kristyano

(Mt 14:13-21; Mr 6:30-44; Lc 9:10-17)

1Tsa'an yuj ja iti, ja Jesusi, ti waj b'a sk'axil ja paman ja' b'a Galilea, ja pilan sb'i'il yujile ja paman ja'i, Tiberias. 2Jel jitsan nochji yuj ja kristyano jumasa, ja'yuj ja milagro jumasa yilawe sk'u'lan ja yajni ch'ak ya tojb'uk ja ma'tik malo ayi.

3-4Ja k'ak'u jawi, jelxa mojan ay ja sk'in ja judio jumasa b'a sya'al k'inali, jaxa Jesús sok ja sneb'uman jumasa, ti k'e'ye b'a jun wits yajni k'otye'i, ti och kulana.#6:3-4 Yuj ja och kulani, yuj ja och sje' ja yab'al ja Dyosi, ja yajni ti'to ay b'a lu'um ja Jesusi, yujni jach' kulan yujile'a, chikan jas maestro'il oj sje'i, yujni kulan oj ajyuka mi tek'anuk. 5Yajni yila ja Jesús jel jitsan ti jakum b'a oj ta'juk yuj ja kristyano jumasa, ti sjob'oyi ja Felipe:

—¿Jel jitsan jakum ja kristyano jumasa b'a'xa oj mantik jitsan wa'el b'a?

6Jaxa Jesusi, wanxani sna'a jasunk'a oj sk'u'luka, yuj ja jach' sjob'o, kechan ita b'a oj yab' jas oj yal ja sneb'umani. 7Jaxa Felipe ti yala'a:

—Mini sok ja lek wan la a'tijitik chab' syen (200) k'ak'u sok spetsanil ja jts'akoltiki, la ch'ak jmantik sok pan mini sok ja jachuk mi oj ya' oj eluke xe'ntiyaman ja janek' ja jitsanil ja kristyano jumasa.

8Jaxa Andres smoj alijel ja Simon Pedro, cho sneb'uman ja ye'n, ti yal yab' ja Jesusi:

9—It b'ay jul jun yal kerem ay yi'oj jo'e pan b'a ay yi'oj sebada, sok chab' chay. Kechan mini yuj oj ya' b'a oj sk'ep sb'aje xe'ntiyaman ja spetsanile'a.

10Ja Jesusi, ti yal yab' ja sneb'uman jumasa a yalwe yab' ja kristyano jumasa a kulanuke. Ja janek' aye'i, ay mojan jo'e mil (5,000) ja kechan ja winiki, ch'akni ochuke kulan spetsanile ja b'a yoj job'a. 11Jaxa Jesusi, ti syama ja pani, slika nalan cha'an sk'uman ja Dyosi, ya' yi ts'akatal ja Dyosi. Tsa'an ti sk'epa yi spetsanil ja kristyano jumasa, cho jach'ni sk'u'lan sok ja chab' chayi. Ch'ak wa'uke b'ut'ye lek.

12Yajni ch'ak wa'uke'i, b'ut'ye lek, jaxa Jesusi, ti yal yab' ja sneb'uman jumasa: —Ch'akan tsomowik ja janek' kan sobra, b'a jach' mi jas oj ch'aytik—.

13Yochele stsomjel ja sneb'uman jumasa, b'ut' lajchawe mo'och ja janek' kani. 14Yajni ch'ak yil'e spetsanile ja milagro iti, ti yalawe'a: —Ja smeranili, ja aluman Dyos it ja ma' ojto jakuk ja b'a lu'um iti—.

15Ja Jesusi, sna'a k'inal ke t'ilan wa'n i'jel yuj ja kristyano jumasa b'a oj a'ji och mandaranumil. Ja'yuj ti spila sb'aja, ti waj b'a man scha'anil ja wits b'a ti oj ajyuk stuch'il tiwi.

Ja Jesusi, b'ejyi b'a sat ja'

(Mt 14:22-27; Mr 6:45-52)

16-17Ja sneb'uman jumasa ja Jesusi, yajni och ja a'kwali, ti waj k'e'uke jun barco'a, och b'ejyuk ja barco, ek' sk'uts e' ja ja'i, b'a ti oj k'otuke b'a Cafernaum. K'ik'inalxa, jaxa Jesusi, mitox kumxi kon ja b'a witsi. 18Jun ita ch'ay k'ujol k'e jak jun tsatsal ik', jaxa ja' b'a niwan paman ja'i, tsats lek was puk'tsin sb'aj. 19Ja janek'xa b'ejyiyeta ja neb'uman jumasa iti, mojan jo'e ma wake kilometro, wajto yil'e ti wan b'ejyel jan ja Jesús b'a sat ja'. Ja Jesusi, takal takal mojxi och ja b'a barco, jaxa sneb'uman jumasa jelxa wa'ne xiwel. 20Ti alji yabye yuj ja Jesusi: —Ke'non, mi lom la xiwyex, —xchi ja Jesusi.

21Ja sneb'uman jumasa wa sk'ana oj ya'we k'e'uk ja Jesús b'a barco, juts'inxta ti'xta k'otye b'a wajume'i.

Ja pan it wax ya'a sak'anili

22Ja kristyano jumasa, ma' ti aye b'a k'ax sti ja'i, ja otro k'ak'u yabye ch'ak wajuke ja sneb'uman jumasa ja Jesús sok ja barco it kechanxta tey tiwi, jaxa Jesusi, mi b'i waj soke ja ye'nle'i. 23Ja tuk barco jumasa ti k'otye b'a chonab' Tiberias, ti k'otye tek'an b'a lugar sk'uman ja Dyos ja Jesús ja yora ya wa'uk ja kristyano. 24Yajni yilawe mi b'a'ye ja Jesús sok ja sneb'uman ja b'a barco jumasa jawi, ti yalawe oj waj sle'e'a. Ja'yuj ti k'e'ye ja b'a barco jumasa, sk'utsuwe ja ja'i, ti wajye b'a Cafernaum.

25Yajni elye k'ot ja b'a otro sti' ja'i, ti sta'awe tiw ja Jesusi, ti sjob'owe yi'a:

—¿Je'uman, jas k'ak'u julia ja il b'a?

26Ti alji yabye yuj ja Jesusi:

Ja we'nlex ja smeranili, jakta jk'ujol jasyuj ja lom waxa le'awonexi, ja'yuj ja jel tsamal b'ut'yex ja yajni ka wa'aniki, mi ja'uk yuj ja jel tsamal a wilawex ja milagro jumasa jk'u'lani. 27Mi lom xcham a k'ujolex yuj ja wa'elex it ek'um b'ej ita, mas lek ja' xcham a k'ujolex sok ja wa'el it wax alb'i, cho ojni ya'a sak'anilex b'a petsanil k'ak'u'a. Ja wa'el jaw ja oj ka'wi'ex ja ke'n ja yuninon ja winiki, jaxa Dyos ja jtati, sje'ata a wi'ex yujni ay ka'tel merana.

28Jaxa kristyano jumasa ti sjob'owe'a:

—¿Jasunk'a wa sk'ana ja Dyos oj jk'u'ltikon b'a?

29Ti yala ja Jesusi:

—Kechan wa sk'ana ja Dyosi, oj ja k'u'ukonex ke'n ja ma sjeka.

30Ja'yuj ti sjob'owe yi'a:

—¿Jas milagro'il oj ja k'u'luk b'a oj k'u'uktikon ja jas waxa wala? —Je'aki'tikon jun senya— 31Ja ma' ek' paxta kujtikoni, yabye ja manaj b'a ch'ayan lugari. Wax yala ja b'a ts'ijb'anub'al ja yab'al ja Dyosi, ja manaj jawi, jun wa'el ti jak b'a satk'inal.

32Ti alji yabye yuj ja Jesusi:

—Ja smeranili, oj kal a wabyex, mi ja'uk ja Moises ja ma ya'wi'ex ja pan b'a satk'inal b'a it wax ya'a sak'anili, ja ma' ya'wi'ex ja pan jawi, ja'ni ja Dyos ja jtati. 33Ja pan it wax ya'a sak'anili, ja it sjekakon ja Dyos b'a satk'inali.

34Ja'yuj ti yalawe ja kristyano jumasa:

—Kajwal, ta yuj k'a jach' jastal jawi, a'ki'tikon petsanil k'ak'u ja pan jawi.

35Ti alji yabye yuj ja Jesusi:

—Ja pan jaw b'a wax ya'a sak'anili, ke'nani'a. Ja ma' oj sk'u'ukon ja ke'n mini oj och wa'inx yab'a; cho mini oj takjuk sti'a. 36Yuj ja kalani a wabyexa, ja we'nlexi, mitonixa k'u'anonexa, iday b'ob'ni a wil'onexa. 37Spetsanil ja ma' stsa'unej ja jtat b'a oj och jneb'umanili, ojni jak sle'one'a; jaxa yajnix jakye'i, ja ke'n mini ma oj nutsa.

38—Ja ke'n ti'ni ko'elon jan b'a satk'inala, mi ja'uk jakel jk'u'luk ja jas wax k'ana ja Ke'ni, ja'ni jakel jk'u'uk ja jas wax yala ja Dyos ja jtati, yujni ye'n sjekunejon ja ila. 39-40Jaxa ye'n ja jtati, mini jun wa sk'ana oj ch'ayuk ja ma'tik ye'n stsa'unej b'a oj och neb'umanili. Yajnix k'ot ja stik'anali, ja jneb'uman jumasa, a'nima chamelukxa, ojni cho sak'wuke'a. Yuj ja jtati, wa sk'ana spetsanil ja ma' wax yilawoni, ta yuj k'a wa sk'u'anon ye'n yuninon ja Dyosi, ojni sta' ja sak'anile b'a mini oj ch'akuki.

41Ay chab' oxe judio och sta'e ti ja Kajwaltik Jesús yuj ja lom yala ke ye'n ja pan it ti ko' jan b'a satk'inali. 42Ti wax yalawe'a: —¿Mi ma ja'uk ja Jesús it ja yunin ja tan Jose b'a? —Ja ke'ntiki, wax na'atik sb'aj ja snan stati, ¿Jastal oj yal ti ko'el jan b'a satk'inal?—.

43Ti alji yabye yuj ja Jesusi:

—Ch'ab'ananikxa t'unuk ja jastal wanxta wats'wunuk wa waltsilexi. 44Ja Dyos ja jtati, ye'n sjekawon koni. Ta yuj k'a mi jach' wa sk'ana ja jtati, mini jun ma' oj snoch'ona. Jaxa yajnix k'ot ja stik'anali, ke'n oj ka sak'wuk ja jneb'uman jumasa, b'a ti oj ajyuke sok petsanil k'ak'u ja Dyosi. 45Ay june ja b'a sju'un ja aluman Dyos jumasa, jach' wax yala jastal iti: Ja Dyosi, wani sje'a yi b'a spetsanila. Ja'yuj spetsanil ja ma' was makla ja jas wax yala ja jtati, sok ja ma' wa sk'uan ja jas wax yala, wanix ochye jneb'umanila.

46—Komo kalani awabyexa, ja Dyos ja jtat ma' sjekawon koni, kechan ke'n kilunej ja jtati, mey pilan ma' yilunej. 47Ja smeranili, wax kala wabyex ja ma' wa sk'u'anon ja ke'n ojni sta' ja sak'anil b'a mini oj ch'akuki.

48—Ja ke'n ojni b'ob' ka' ja wa sak'anilexa, yujni ke'n ja pan it wax ya'a sak'anila. 49Ja ma' ch'akta ek' pax a wujilexi, yabyeni ja wa'el b'a chayan lugari, spetsanile ch'akni chamuke'a. 50-51Ja ma' wa sk'u'anon ja ke'n lajan sok ja'ni wa'non yab'jel ja pan it ko' jan b'a satk'inali, cho mini oj spil sb'aj sok ja Dyosi. Ja ke'n ti ko'elon jan b'a satk'inal, cho ojni b'ob' ka' wi'ex ja wa sak'anilex b'a mini oj ch'akuki. Ja ma' wa sk'u'anon ja ke'n, ke'n oj ka' jb'aj b'a oj chamkon b'a oj ka' yi ja sak'anil b'a mini oj ch'akuki; ja ma' oj yab' ja pan jawi, ojni sta' ja sak'anil b'a mini oj ch'akuki—.

52Jaxa judio jumasa, yajni yabye jas yala ja Jesusi, ti och b'ulb'unuke'a, ti wax cho yala sb'aje'a: —¿Ja sb'ej ja wax yala ja winik it ja oj ya kab'tik ja skwerpo?

53Ti alji yabye yuj ja Jesusi:

—Ja ke'n ja yuninon ja winiki, ja smeranili oj kal a wabyex ja we'nlexi, ta yuj k'a mixa wabyex ja jkwerpo sok mixa wu'ajex ja jchik'eli, mi oj ja ta' wa sak'anilex b'a mini oj ch'akuki. 54Ja m'a wax yab' ja jkwerpo sok wax yu'aj ja jchik'eli, ojni sta' ja sak'anil b'a mi oj ch'akuka. Yajnix k'ot ja stik'anali, ke'nani oj ka sak'wuke'a. 55Ja jkwerpo ja wa'el b'a sak'an lek, cho jach'ni ja jchik'eli, sak'an lek. 56Ja ma' oj yab' ja jkwerpo sok ja ma' oj yu' ja jchik'eli, ti'ni ay jmoka, cho tini ayon sok ja ke'na.

57—Ja jtati, ye'n ja Dyos wax ya'a sak'anili, ye'n ja ma' sjekawon koni, sok ye'n ya'oj ki ja jsak'anili, yujni kechan ye'n ay yip b'a oj ya'a. Ja'yuj spetsanil ja ma' oj yab' ja jkwerpo ojni sta' sak'anila. 58Ke'non ja pan it ti jak b'a satk'inali, ja ma' oj sku'ukon ja ke'n ojni sta' ja sak'anil b'a mi oj ch'akuki. Ja ke'n mi ja oj laj jastal ja pan it yabye ja ma'ek' paxta a wujilexi, ja ye'nle'i, yabyeni ja pan jawa, ch'akni chamuke'a—.

59Spetsanil ja jastik jumasa iti, ti ch'ak yal ja Jesús b'a snajtsil tsomjel b'a Cafernaum.

Ja ab'al it wax ya'a sak'anil petsanil k'ak'u

60Jitsan ja sneb'uman ja Jesusi, yajni yabye jastal wa sje'a'i, ti yalawe'a:

—Ja jastal it waxa wala jel wokol k'u'axuk. ¿Machunk'a oj b'ob' sk'u'uk a wuji?

61Ti alji yabye yuj ja Jesusi:

—¿Yuj mi lek waxa wabyex ja iti? 62Ta yuj k'a jachuki, ¿Jasma jun oj ja wal'ex ja oj ja wil'ex ja ke'n ja yuninon winik wa'non k'e'el k'e b'a satk'inal b'a it ti'ni ayon ajyi? 63Ja ma' wax ya'a sak'anil b'a mi oj ch'akuki, ja Yespiritu ja Dyosi; mey pilan ma' oj ya' ja sak'anil jawi. Ja lo'il it ch'akta kal a wabyexi, ja jak yuj Yespiritu ja Dyos it wax ya'a sak'anili. 64Jasa ayto chab' oxe ja we'nlex mitoxa k'u'anex.

Ti yala ja Jesusi, ja ke'n man najate wax na'a mach'tik junuk ja oj sk'u'uki, sok ja ma oj snak'ul satukoni. 65Cho yala mini jun ma' oj och neb'umanil ta yuj k'a mi ye'n wax yala ja Dyos tatali.

66Man k'ak'u jawi, jel jitsan ja ma' ti' nochan sok ajyi ja Jesusi, ch'ak kanuke. 67Ja'yuj ja Jesusi, ti sjob'o yi ja lajchawe sneb'uman jumasa:

—¿Jachuk ja we'nlexi, mi maxa k'ana oj cho wajanik b'a?

68Ti yala ja Simon Pedro:

—¿Kajwal machunk'a oj wajkotikon sok b'a? Kechani sok wa wab'al we'n ja wax ya'a sak'aniltak. 69Ja ke'ntikoni, we'nani jk'u'anatikon ta'a, sok wax na'atikon we'n yunina ja Dyosi.

70Ti alji yabye yuj ja Jesusi:

—Ja we'nlexi, lajchawe ja ma ke'n jtsa'a; b'a' ya, ay june ja janek' ayexi, ja smoj ja tan pukuji.

71Ja ma' wa'n sta'jel ti' ja Jesusi, ja Judas Iscariote yunin ja Simoni. Yuj ja Judasi, ti ay b'a yojol ja lajchawe'i, sok ye'n ja ma' oj snak'ul satuk ja Jesusi.

Currently Selected:

Juan 6: YABD

Highlight

Copy