Juan 7

Mix k'u'aji yuj ja smoj alijel jumasa ja Jesusi

1Tsa'an ja Jesusi, ch'ak sb'ejta ek' b'a ja lugar jumasa b'a Galilea. Jaxa b'a Judea mi sk'ana oj wajuk yuj ja wan lejel yuj ja ma'tik niwak ya'tel yuj ja judio jumasa b'a oj smil'e. 2Yuj ja wa'nxa mojxel ja sk'inil ja lejchupat sb'a judio jumasa, 3ti alji yab' yuj ja smoj alijel jumasa ja Jesusi:

—Jel t'ilan oj wajan ja b'a Judea, b'a jach' oj yil ja wa neb'uman jumasa ja niwak a'tel wa'na sk'u'lajeli. 4Ja ma' wa sk'ana spetsanil a chiknajuki, mi jas nak'ul oj sk'u'luk. —Wa sje'a yi b'a spetsanil ja kristyano jumasa ja jas wa sk'u'lani—

5Jach' yalawe jaxa ye'nle'i mini t'un wa sk'u'ane'a. 6Jaxa Jesusi, ti alji yabye yuj ja:

—Mitox k'ot ja sk'ak'u'il b'a oj ja na'ex a petsanilex yuj ja ke'n yuninon ja Dyosi. Ja we'nlexi, chikan jas k'ak'u ayex lekni waxa wilawexa. 7Ja we'nlexi, mixa taklayex ja kristyano jumasa b'a lu'um iti. Jaxa ke'n waxa taklayonex lek yuj lom wax kala mi lekuk ja jastal ayi. 8Ka'axik ja we'nlex ja b'a k'ini, jaxa ke'ni, mi oj wajkon yuj ja mitox k'ot ja k'ak'u oj sna'e jb'aj spetsanile machunkilon ja ke'ni.

9Yajni ch'ak yal ja jastal iti, jaxa Jesusi, ti kan b'a Galilea.

Ja Jesusi, ti' ajyi b'a sk'inil ja lejchupat jumasa

10Yajni ch'akta wajuk ja b'a k'in ja smoj alijel jumasa ja Jesusi, jaxa ye'n nak'ul waj ja b'a k'ini, mi ma yal yab'i.

11Jaxa ma'tik ay ya'tel yuj ja judio jumasa, snajtil ja janek' wa'n ajyel ja k'ini, ti wa'ne sle'jel ja Jesusi, ti wax yalawe'a: —¿B'a'ya tan winik jaw b'a?, xchiye.

12Ja kristyano jumasa, jel ja jas wax yalawe yuj ja Jesusi, ay ma' wax yala: —Ja Jesusi, jel lek ja ye'ni—. Jaxa tuki, wax yalawe: —mi ja slekil ay ja winik jawi kechan jel kalax—.

13Spetsanile nak'ul wa sta'awe ti', yuj ja lom wax xiwye yuj ja ma'tik ay ya'tel yuj ja judio jumasa.

14Ja janek' wa'n ajyel ja k'ini, jaxa Jesusi, ti och sje' ja yab'al ja Dyos b'a yoj snajtsil ja tsomjeli. 15Ja ma'tik ay ya'tel yuj ja judio jumasa, jel wax cham sk'ujole yuj ja wax yabye jas wax yala, ti wax yala sb'aje'a: —¿Jasyuj ja jel wa sna'a jas wax yala ja iti, mi ocheluk sneb'jel ju'un tak?—

16Ti alji yabye yuj ja Jesusi:

—Ja jas wax je'a mi ti wax el b'a j'olom ke'na. Ye'n sjekunejon ja Dyosi, cho ye'nani wax yala kab' jasunk'a oj je'i. 17Ta ay k'a ma wa sk'ana oj sk'u'uk ja jas wax yala ja Dyosi, oj b'ob' sna' ta yuj ye'n wax yala kab' ja Dyos ja jas wax je'a, ma yuj ke'n ita wax ka el b'a j'olom. 18Ja ma' ye'n ita wax ya el b'a s'olom ja jas wax yala, kechan ita wa'n sle'jel jastal oj toyjuk yuj ja kristyano jumasa. Jaxa ke'n kechan ja wax k'ana oj toyjuk lek ja jtat ma' sjekawon koni; ja'yuj spetsanil k'ak'u smeranil ja jas wax kala. 19Ja Moisesi, yala wabyex ja jas wax yala ja yab'al ja Dyosi, jasa mini sok ja jachuki, mini ma' sk'u'ana. ¿Jasyuj ja lom waxa k'ana oj a mil'onex ja ke'n b'a?

20Ti alji yab' yuj ja kristyano jumasa:

Jomel wa olom ja we'n— ¿Machunk'a wax yala oj smil'a b'a?

21Ti alji yabye yuj ja Jesusi:

—A petsanilex ja we'nlexi, kechan ita jun milagro a wilawex jk'u'lan, jelni cham a k'ujolexa. 22Ja Moisesi, yala a wabyex t'ilan oj kupxuk xet'an wa k'unilexi, jaxa we'nlexi, jach'ni a k'u'lanexa a'nima sk'ak'u'iluk jijlel. Ja jawi, mi ti'uk stulu yi b'a k'ak'u jumasa sb'a Moises, man najate ti'xani aya, ye'nto ya'we kan kulan ja Abrahami, ja Isaac sok ja Jacobi. 23Ja'yujil, yuj ja waxa k'u'anex ja mandar it a'ji yi ja Moisesi, ja'yuj wax kupxi xet'an ja sk'unil ja yal untiki, a'nima sk'ak'u'iluk jijlel, ¿Jasxa yuj ja lom wala tajkiyex jmok ja ke'n ja yajni ay ma wax ka tojb'uk ja sk'ak'u'il jijlel b'a? 24Mok a wal'ex yuj ay jas mi lek ay, kechan yuj jach' waxa k'anawex. Ja jas oj ja wal'exi, na'awik lek b'ajtan ja we'nlex ta yujni jachuka.

¿Machunk'a Jesusi?

25Ay chab' oxe ja ma' ti' aye b'a Jerusaleni, ti och sjob' sb'aje'a:

—¿Mi ma ja'uk ja it ja wa'ne sle'jel b'a oj smil'e b'a? 26Ti'ni ay ta'a, ti wa'n lo'il ek' sok ja kristyano jumasa; —Mi ma' jas wax alji yab' yuj ta— ¿Mi' ma yuj wa sk'u'ane ja ma' ay ya'tel kujtik yuj ye'n meran ja Mesiasi? 27¿Mi jachukuk? yuj ja yajni oj jakuk ja Mesiasi, mi ma oj sna' b'a' oj jakuka; jaxa winik iti, wax na'atik lek b'a jakela, xchiye.

28Jaxa Jesusi, ti wa'n sje'jel ja yab'al ja Dyos b'a snajtsil ja tsomjeli, ti yala'a, tsats lek k'umani:

—Ja smeranil ja we'nlexi, mixa na'awex machunkilon ja ke'n, cho mixa na'awex b'a jakelona. Mi ke'n kala oj jakon. Ja ma' sjekunejoni, oj b'ob' k'u'ajuk, jaxa we'nlexi, mixa na'awex sb'aj 29Ja ke'n wanix na'a sb'aja, yuj ye'n ja ti jakyoni, cho ye'nani sjekawona—.

30Ay chab' oxe winik b'a Jerusalen wa sk'ana oj syam'e ja Jesusi, mi b'ob' sk'u'luke, yuj ja mitox k'ot ja k'ak'u oj ch'ak sna'e sb'aj spetsanile machunk'a ye'n. 31Jasa, jel jitsan ja ma' sk'u'an ja Kajwaltik Jesús ja k'ak'u jawi, ti wax yalawe'a: —Mini ja Mesiasi, oj b'ob' sk'u'luk ja milagro jumasa wa'n sk'u'ljel ja winik iti—.

Ja fariseo jumasa wa sk'ana oj syam'e ja Jesusi

32Jaxa fariseo jumasa yajni yabye jas wax yala ja kristyano jumasa, ja'yuj ti schapawe oj syam'e ja Jesús sok ja pagre jumasa ma'tik mas niwak ya'teli sok chab' oxe ma'tik wa stalnaye ja snajtsil tsomjeli. 33Jaxa Jesusi, ti yala'a: —Jel t'usan ja k'ak'u ti oj ajyukon a mokexi. Tsa'an t'usan oj cho kumxukon ja b'ay k'ot ja ma' sjekawon koni. 34Jaxa we'nlexi, ti'to oj ja le'onexa, jasa mixa oj ja ta'onex, yuj ja mi oj b'ob' wajanik ja we'nlex b'a oj wajkoni—.

35Ja ma'tik niwak ya'tel yuj ja judio jumasa, ti och sjob'tala'uk sb'aje'a:

—¿B'a'xa oj wajuk ja wax yala mi oj ta'tik b'a? ¿Ma yuj wax ek' sk'ujol yuj ti oj waj sok ja judio jumasa b'a tuk niwak chonab' jumasa, b'a oj cho och sje' yi ja yab'al ja Dyos ja ma mi judio'uki? 36¿Jasun wa sk'ana yal ja it yala: Oj ja le'onex, jasa mi oj ja ta'onex, yuj ja mi oj b'ob' wajanik ja we'nlex ja b'a oj wajkon ja ke'n ja it xchi b'a?—

Niwan ja' wax ya'a sak'anili

37Ja tsa'an k'ak'u sk'inil ja lejchupat jumasa, ja mas niwan yujile. Ja k'ak'u jawi, ti k'e' tek'ana, ti yala'a, tsats lek k'umani: —Ta ay k'a ma' takin sti' a jak jmok ke'na. 38Ja ma' oj sk'u'ukon ja ke'n lajan sok oj b'ojtuk jun ja' b'a yaltsili. Yujni jach' wax yala ja b'a ts'ijb'anub'al ja yab'al ja Dyosi—.

39Ja yajni yala ja jastal it ja Jesusi, ja'ni wa'n yaljel ja Yespiritu ja Dyos oj a'juk yi ja ma' oj k'u'ajuk yuj ja ye'n. Yuj ja mitox chami sok mitox sak'wi ja Jesusi, mi oj b'ob' sje' sb'a ja Espiritu Santo.

¿Machun smeranil ja Jesusi?

40Yajni yabye ja jastal it ja chab' oxe ti aye tiwi, ti yalawe'a: —Ja smeranil ja winik iti, aluman Dyosni'a,#7:40 Yuj ja aluman Dyosi: K'ela jas wax yala ja snota'il b'a kapitulo 1:21. 41Ja tuki wax yalawe: —Ja winik iti, ye'nxa ja Mesiasi. Jaxa tuki ti wax yalawe'a: —Miyuk, ja Mesiasi, mi ti oj jak b'a lugar Galilea. 42Ja b'a ts'ijb'anub'al ja yab'al ja Dyosi, wax yala ja Mesiasi, t'ilan ti oj manxuk jan b'a yintil jumasa ja Davidi, sok ti' oj manxuk b'a Belen b'a schonab'il ajyi ja Davidi—. 43Jachuk minix b'ob' slaj sb'aje b'a oj sna'e machunk'a Jesusi. 44A'nima ay ma' jelxa lek wax yab' ja oj ya'we och lutani, mini ma'x b'ob' syam yujile'a.

Ja ma' niwak ya'tel yuj ja judio jumasa mi sk'u'ane ja Jesusi

45Ja ma'tik wa stalnaye ja snajtsil tsomjeli, kumxiye b'a ajyiye ja ma'tik niwak ya'tel yuj ja pagre jumasa sok ja fariseo jumasa, ti job'ji yi'e yuj ja winike jumasa jawi:

—¿Jasyuj ja mi a wi'ajex jan a Jesús b'a?

46Ti yalawe ja ma'tik wa stalnaye ja snajtsil tsomjel jumasa:

—Mini jun ma wax yala ja jas wa sk'u'lan ja winik jawi—

47Ti alji yabye yuj ja fariseo jumasa:

—¿Jaxa we'nlexi, mi kal yuj cho a wa'ata a b'ajex lo'lajel ta? 48¿Ma yuj ay b'a a wabyexta ay ma' sk'u'aneta ja ma' niwan ja ya'tel ay sok ja fariseo jumasa'i? 49Ja ma'tik wa sk'u'ane ja Jesusi, mi sna'awe ja jas wax yala ja mandar it a'ji yi ja Moisesi, ja'yuj ojni a'ji stup'e yuj ja Dyosi.

50Tey tiw ja fariseo Nicodemo, ja it yoj a'kwal waj sk'umuk ja Jesusi, ti alji yabye yuj ja:

51—Ja jas wax yala ja mandar kulan kujtiki, mini jun ma' oj b'ob' jk'u'ltik yi b'a mi sb'ejuka ta mi k'ax maklantik b'ajtan jasunk'a smuli.

52Jaxa ye'nle'i, ti yalawe'a:

—¿Yuj a ma wax cho a k'u'an ja we'n ay jas lek oj eluk ja b'a Galile'a b'a? K'ela ja jas wax yala ja b'a ts'ijb'anub'al ja yab'al ja Dyosi, ti oj ja wil ja tiwi, mini jun aluman Dyos wax ela.

53Tsa'an yuj ja iti, jujuntik ch'ak waj b'a snaje.

Currently Selected:

Juan 7: YABD

Highlight

Copy