Lucas 6

Ja sneb'uman jumasa a'tijiye

(Mt 12:1-8; Mr 2:23-28)

1Jun sk'ak'u'il jijlel, ja Jesús sok ja sneb'umani, ti ek'ume b'a jun yaljil trigo. Jaxa sneb'uman jumasa, ochye ja b'a yoj alaj jawi, stuchuwe ja sat ja trigo ti schija b'a yoj sk'ab'e, ti och sk'ux'e'a.

2Ti jak chab' oxe fariseo jumasa'a, jak sjob'o'e yi ja sneb'uman ja Jesusi, ti yalawe'a:

¿Jasyuj ja lom a k'okowex ja mandar b'a? —Ja jachuki mi lek sk'u'lajel ja b'a sk'ak'u'il jijleli, xchiye.

3Ti yala ja Jesusi:

¿Jaxa we'nlexi mi ma waxa k'elawex ja b'a yab'al ja Dyos ja jas sk'u'lan ja David ja yajni och wa'inx yabye b'a? 4Och ja b'a snaj ja Dyosi, syama ja pan it mi kwalkyera'uki, slo'o cho ya'yi jas moj jumasa'i, iday kechan ja pagre jumasa oj b'ob' slo'e ja pan jawi. 5Ja ke'n ja yuninon ja winiki, ke'n oj kal jasunk'a oj b'ob' k'u'laxuk ja b'a sk'ak'u'il jijleli, sok ke'n oj cho kal jasunka mi oj b'ob' k'u'laxuki.

Ja Jesusi, a'tiji ja sk'ak'u'il jijleli

(Mt 12:9-14; Mr 3:1-6)

6Ja Jesusi, b'a pilan sk'ak'u'il jijlel ti waj b'a snajtsil tsomjel, b'a waj sje' ja yab'al ja Dyosi. Ja tiwi tey jun winik tsats ay ja stojol sk'ab'i.

7Jaxa fariseo jumasa sok ja ma'tik wa sje'a ja mandar it a'ji yi ja Moisesi, kechan wa sts'el satine ja Jesús b'a oj yil'e' ta oj ya tojb'uk ja winik jawi. Ta yuj k'a sk'u'lan oj b'ob' sta'e yi smul yuj ja wa'n a'tel ja sk'ak'u'il ja jijleli.

8Jaxa Jesusi, wani sna'a ja jas wan ek'el sk'ujole'i, ja'yuj ti spaya ja winik it mix b'ob' snik ja sk'ab'i, ti yal yab'a: —K'e'an tila och tek'an b'a snalane'.

Jaxa winiki, wego k'e tek'an ti'ni och tek'an b'a snalane'a.

9Tsa'an ja Jesusi, ti yal yab' spetsanile ja ma' ti aye tiwi: —Ay jas wax k'ana oj job' a wi'ex: ¿Jasunk'a lek oj k'ulaxuk ja b'a sk'ak'u'il jijleli? ¿Ja ma oj k'u'laxuk ja b'a leki, ma ja' b'a jas mi lekuki? ¿Oj ma b'ob' koltaxuk jun jmojtik, ma oj ch'ayxuk sna'jel?

10Tsa'an yajni ch'ak sk'el spetsanil ja ma' tey tiwi, ti yal yab' ja winiki: —Lika wa k'ab'i—.

Ti slika ja sk'ab' ja winiki, toj tojb'el kani.

11Jaxa kristyano jumasa jawi jel tajkiye, ja'yuj ti och schap'e yab'alil ja Jesusi.

Ja Jesusi stsa'a ja lajchawe sjekab'anumi

(Mt 10:1-4; Mr 3:13-19)

12Ja k'ak'u jumasa jawi, ja Jesusi ti waj b'a jun wits waj sk'umuk ja Dyosi. Snajtil ja a'kwal ti wa'n lo'il tiw sok ja Dyosi. 13Jaxa b'a pilan k'ak'u ti spaya ja sneb'uman jumasa, janek' aye'i, stsa'a lajchawe. Jaxa lajchawe iti, ya sb'i'iluk jekab'anumil. 14Ja sb'i'il ja ye'nle ja it jumasa, Simon ja ma' ya sb'i'iluk Pedro, sok ja smoj alijel Andresi; Santiago, Juan, Felipe, Bartolome, 15Mateo, Tomas, Santiago ja yunin ja Alfeo; Simon, ja ma wax a'ji sb'i'iluk Zelote, 16ja Judas yunin ja Santiago, sok ja Judas Iscariote ma snak'ul satin ja Jesusi.

Ja Jesusi, sje'a ja yab'al ja Dyosi

(Mt 4:23-25)

17Ja Jesús sok ja lajchawe sjekab'anum jumasa, yajni ko'ye jan b'a witsi, ti wajye b'a jun job', yuj ja ti stsomonej sb'aj tiw jitsan lek ja ma'tik wax nochji yuji, cho ti aye jitsan kristyano b'a sutanal ja Judea, b'a Jerusalen, b'a Tiro sok b'a Sidon.#6:17 Ja Tiro sok ja Sidoni: Tey b'a sti' sat ja niwan mar Mediterraneo, b'a lado k'e'el k'inal yuj ja Galilea, ja kristyano jumasa jawi, mi judio'uke. 18Ch'ak k'otuke b'a oj smaklaye ja jas wax yala ja Kajwaltik Jesusi, sok b'a oj a'juk tojb'uk ja ma'tik mi lek ayi. Jaxa ma'tik wa'n a'jel yi wokol yuj ja tan pukuj it jel malo cho tojb'iye ni'a. 19Spetsanil ja kristyano wa sk'ana oj syam'e ja skwerpo ja Kajwaltik Jesús, yuj ja wa sna'awe ke wanix tojb'iye yuj ja yipa.

Ja slekil jumasa

(Mt 5:1-12)

20Ja Jesusi, ti stojto k'ela ja sneb'uman jumasa, ti yala'a:

—Jel lek oj yil'ex ja Dyos ja we'nlex

ja ma'tik jel ajujla ab'ajexi,

ja b'a was sk'ulan mandar ja Dyosi

ojni a b'ajukexa.

21—Jel lek oj yil'ex ja Dyos ja we'nlex,

ja ma'tik jel wa'inxa wabyex ja ya'an,

yujni jel oj ja ta ja jas oj a wabyexi.

—Jel lek oj yil'ex ja Dyos ja we'nlex,

ja ma' jel cham k'ujol ayexi,

yuj ja tsa'ani, jel gusto oj ajyanik.

22—Jel lek oj yil'ex ja Dyos ta yuj k'a wa staklayex ja kristyano ma wax yutajex, ma mi la kisjiyex, ma mi ma sk'ana oj smojtayex. Yuj k'a ja ti wa sk'u'lane jachuk ja kristyano yuj ja waxa k'u'anonex ja ke'n ja yuninon ja winiki. 23Mok chamuk a k'ujolex ajyanik gusto, b'ajtanik yuj ja lek ayexi, yuj ja Dyosi, chapanxa yuj jun a majtanex b'a jel niwan oj ya'wi'ex. Cho jach'ni k'u'laji yi'e ja aluman Dyos jumasa ja najate, jel ixta iljiye—.

Ja jastik mi leki

24Jaxa Jesusi ti cho sk'ela ja tuk jumasa, ti yal yabye'a:

—Jel wokol oj ek'uk a wujilex ja we'nlex

ja ma'tik jel ja wa jastik a b'ajexi,

ja ya'an jelni lek wa'n ek'el a wujilexa—.

25—Jel wokol oj ek'uk a wujilex ja we'nlex,

ja ma'tik jel ja jas waxa wabyexi,

oj jakuk ja k'ak'u ja mi oj a ta' jas oj a wabyexi.

—Jel wokol oj ek'uk a wujilex ja we'nlex,

ja ma' kechan wa'nex tse'nel ja ya'an,

ja tsa'ani jel oj ok'anik

yuj ja wa wokolexi—.

26—Jel wokol oj ek'uk a wujilex ja we'nlex ja ma petsanil k'ak'u wa stoyowex ja kristyano jumasa—. Yujni jach' cho toyji ye yuj ja kristyano ja najate ja ma stoyo sb'aj ke aluman Dyos b'i.

Yajta wa kontra

(Mt 5:38-48; 7:12)

27—Maklayik lek ja jas wax k'ana oj kala wabyexi: yajtayik cho k'u'lanik yi b'a lek. 28Ja ma' wax yutajexi, mok a wut'ex ja we'nlexi, ay k'a ma mi skisawex k'umanik ja Dyos yuj ja ye'nle'i. 29Ay k'a ma' spojo yi junuk ja wa choji', cho sutuyi' ja juni, ay k'a ma' wa sk'anawi wa chompa, cho a'yi wa k'u'i. 30Ay k'a ma' jas wa sk'ana a wi, a'yi, ay k'a ma' wax yi'aja wi wa jasa b'aji, mok a k'an yi slok'ol. 31K'u'lanik yi ja we'nlex ja tuk jumasa ja jastal waxa k'ana oj k'u'lajuk a wi'ex ja we'nlexi.

32—Ja we'nlexi kechan k'a ja' waxa yajtayex ja ma wa syajtayexi, lomni ja jastal jawa. —Cho jach'ni ja mulanum jumasa wani sk'u'lane ja jastal jawa. 33Yuj k'a kechan waxa k'u'lanex yi lek ja ma wa sk'u'lan awi'ex leki, mini ay sb'eja. —Jach'ni ja mulanum jumasa wax cho sk'u'lane ja ye'nle ja jastal jawi. 34Cho kechan k'a ja' waxa wa'wex yi majan, ja ma' waxa wilawex ay jas yi'oji, mini sb'ejuk ja jastal jawa, jach'ni ja mulanum jumasa wax ya'a majan sb'aje, jach' wa smajlaye b'a jach' jel oj sta' ja ye'nle'i.

35—Yajtayik ja wa kontra'exi, k'u'lanik ja b'a leki, a'ab'ajik majan mok a majlayex oj a'ji kumxuk a'wi'ex slok'ol. Jach' k'a waxa k'u'lanex, jel niwan ja wa ts'akolex oj ya'wi'ex ja Dyos it jel niwani, yuj ja yuntikilex ni'a. Ja Dyosi jel lek cho jach'ni sok ja ma' mi lek jas modo. 36Ja we'nlexi, jel t'ilan oj ajyuk syajal a k'ujolex sok spetsanil ja kristyano jumasa, jach'ni jastal ja Dyos wa tatex jel lek sk'ujol sok b'a spetsanili.

Mok a waj a wochel ja wa moji

(Mt 7:1-5)

37Ja Jesusi, cho yal yabye:

—Mok a wa'a wochel wa mojexi, jach'ni ja we'nlexi mi oj ya'ex yochel ja Dyosi. Mok a t'en'ex ja tuki, jach'ni ja Dyosi mi oj st'en'ex ja we'nlexi. Mok a wa'wex stup ja smul wa mojexi, jach'ni ja we'nlexi, mi oj ya a tup wa mulex ja Dyosi. 38A'wik yi ja tuk jumasa ja jas t'ilan oj makunuk yuji, jachuk ja we'nlexi oj ya' wi'ex ja Dyos ja jas t'ilan oj makunuk a wujilexi. Ja smeranili jach' oj ya' wi'ex ja Dyos ja we'nlex ja jastal waxa wawex yi ja tuk jumasa. Trigo k'a waxa wa'awex, juni ye'tal trigo t'inan lek oj a'juk a wi'exa, mi t'ilanuk we'n oj wa ja le'ex.

39Ja Jesusi, cho yala ja lo'il iti:

—Jun ma mi xyila k'inal mi oj b'ob' sje' yi sb'ej jun smoj ma mi xyila k'inal, oj b'ob' mok'uke lajan b'a jun ita k'e'en. 40Ja neb'umani mi masuk was na'a ja ye'n yuj ja sje'umani, yajnix el ja b'a wan sneb'jeli oj ni sla ja jastal jas sje'umani.

41¿Jas lom waxa k'ela ja jas mi lek wa sk'u'lan ja wa moji, jaxa we'n mi maxa na'a ja jas mi lek wa'na sk'u'lajel b'a? Lajan sok jastal waxa k'ana oj ja k'elyi jun yal sts'i'lel b'a sat wa moji, jaxa b'a wa b'aj we'n jun k'ab' te' teya. 42¿Jastal oj a wal yab' ja wa moji: —Majla oj ka eluk a wi ja yal sts'i'lel tey b'a wa sati, mi maxa na'a ta jun k'ab' te' makan yuj b'a? —Chab' pensar aya, a el b'ajtan ja k'ab' te' tey b'a wa sati, b'a jach' oj ja wil ja yal ts'i'lel tey b'a sat wa moji.

Ja te' sok ja sati

(Mt 7:17-20; 12:34-35)

43Cho yala ja Jesusi:

—Mini jun te' b'a lek, oj satinuk malo, cho mini jun te' b'a mi lekuk oj ya' sat b'a lek. 44B'a kada tik'e te' wa xna'xi sb'aj, yuj ja sat wa xya'a: b'a jun ib'e k'i'ix mi oj ya b'ob' a tul igo sok mini sat ts'usub'. 45Ja ma leki, lekni ja jas wa sk'u'lana, yujni lek ja jas tey b'a sk'ujola. Ja ma mi lekuki, mi ni lekuk ja jas wa sk'u'lana, yujni tey sk'ujol ja b'a mi lekuka. Yuj ja jas wax yala, ja'yuj wa xna'xi jastal ay ja sk'ujoli.

Ay chab' tik'e kristyano

(Mt 7:24-27)

46Ti cho yala ja Jesusi:

—Ja we'nlexi waxa walawex kab', ke'n a wajwalonex, sok jb'ajex ke'na, pe mixa k'u'lanex ja jas wax kala a wabyexi tak. 47—Ja ma' wax och mojan jmok ja ke'n, wa smaklan ja jas wa'non sje'jeli, sok wa sk'u'lan, 48Ja lajan sok ja winik ma sk'u'lan ja snaj b'a yoj toni, sjoto jun niwan k'e'en man sta'a k'ot ja toni. Ti k'e stojb'es tiw ja snaji. Yajni jak ja b'ut ja'i, tsats lek spuk'tsin sb'aj ja b'a sat na'itsi, mi ni nijki ja na'its jawa yuj ja ts'unan leki.

49Jaxa ma wa smakla ja jas wa'non sje'jeli, mi sk'u'lan ja jas wax kala, wa slaja jastal jun winik wa sk'u'lan ja snaj b'a sat lu'um mi sts'unu lek. Yajni jak ja b'ut ja'i' tsats lek spuk'tsin sb'aj ja b'a sat na'its jawi, wego mok'i, ch'ak sna'jel ja na'its jawi.

Currently Selected:

Lucas 6: YABD

Highlight

Copy