Mateo̱ 16
16
Chu̱ba̱ xi yeꞌe Jona̱
(Mr 8.11-13; Lk 12.54-56)
1Tjín xu̱ta̱ fariseo̱ kju̱ saduseo̱ xi kitsitiñáre yajo̱ꞌe Jesuu̱ nga̱tꞌa mejénre nga ꞌbanachajo, ku ku̱i̱cha kitsúre̱:
—Mejénjni̱ nga niꞌín ngu najmi xi sꞌejinjínña, xi ngatakú nga Namiña Diuu̱ kitsingiyári.
2Ta̱nga kitsúre̱ Jesuu̱:
—Jún nga chaséjnu ndiu̱jmi nga ngixún, ku aní, bixujnu: “¡Ndá machun kjatꞌei!” 3Ta̱nga tsanga nga tꞌajñú aní ndiu̱jmi ku tjin yufi, bixujnu: “¡Ndáji kjamachjun kjatꞌei!” Jún, tuxi chan makjínjnu chuba̱ xi tsjuá ndiu̱jmi nga̱tꞌaꞌe kúcha ndiba ni̱tjin. Mí xá, makjinjínjnu tsani, nga najmi xi tetsiꞌinꞌan kjatjꞌe̱i̱ kui chuba̱ xi tjitsingiya Namiña Diuu̱. 4Jún, mejénjnu nga baꞌíjnu ngu chuba̱ nga̱tꞌa ndajíjnu xu̱ta̱ ku mejínjnu nisꞌejínjnu. Ta̱nga tu̱ chuba̱ xi mejéntsena beꞌéjnu, ngútse najmi xi kumataꞌin xi tsuya Enꞌen Namiña Diuu̱ xi kiꞌmi Jona.
Tukuátse kitsú Jesuu̱, ꞌyendu xu̱ta̱ ku kijí.
Najmi xi baku xu̱ta̱ fariseo̱
(Mr 8.14-21)
5Jesuu̱ ku ja xi kjibakuyáre̱ tsꞌatiu Chincha Ngalilea̱. Ta̱nga ja xi kjibakuyáre̱ kichayáre̱ nga tsaꞌa ni̱pan. 6Ku kitsúre̱ Jesuu̱:
—Nuꞌya̱jnu, chúnjnu yajo̱jnu sku̱a̱n si tsisanju̱n na̱ꞌyu̱ ni̱pan xu̱ta̱ fariseo̱ kju̱ saduseo̱.
7Ku tsichajo̱ xikjin kui ja, ku ku̱i̱cha inchatsú: «Tu̱kju̱a̱ranga kichꞌajíña ni̱pan kui kju̱a̱ nga kua kitsú Jesuu̱.» 8Kubéni Jesuu̱ najmi xi inchachja̱, ku ku̱i̱cha kitsúre̱:
—¡Mí xá tuxi sꞌejinjínjnu nga̱tꞌaꞌe Namiña Diuu̱! Mí kju̱a̱ nga nindusínjnu yajo̱jnu nga najmíjnu ni̱pan. 9Ndá tikjínjnu tkujun najmi xi mejénna xínjnu; a xu̱ je kichayánijnu ni̱tjin nga kitsikjénꞌa̱n ón mi xu̱ta̱ ku óntsema ma ni̱pan xi tjinña kjiaku̱a̱. A je kichayánijnu kó nisin kuma xi tsꞌangi kjiaku̱a̱. 10A ngite faitsjenjínjnu nga tekuácha ñujún mi ma xi kitsikjiéꞌan ku yatutse ma ni̱pan, ku jún tuxi kjín nisin kinikitséjnu. 11A makjinjínjnu nga ni̱panjín xi texinꞌa̱n. ¡Chúnjnu yajo̱jnu sku̱a̱n xi tsisan na̱ꞌyu̱ꞌe̱ ni̱pan xu̱ta̱ fariseo̱ ku saduseo̱!
12Kjiátse kukjínre̱ ja xi kjibakuyáre̱ Jesuu̱ nga mítsa kju̱a̱nisanꞌe̱n na̱ꞌyu̱ꞌe ni̱pan xi tjitsúre, kuíni nga ndáji tjin kju̱a̱kitakun xi bakuya xu̱ta̱ fariseo̱ kju̱ saduseo̱.
ꞌYáni Jesuu̱
(Mr 8.27-30; Lk 9.18-21)
13Nga je makjichú tiñá ngande xi ꞌmí Sesarea̱ꞌe̱ Filipo̱, tsinengiyáre̱ Jesuu̱, ja xi kjibakuyáre̱:
—Mí xi tsú xu̱ta̱ nga̱tꞌaꞌna, án nga Kjindiꞌe xu̱ta̱ ngasundeꞌan.
14Skengi ja xi kjibakuyáre̱:
—Tjín xi tsú nga Jua xi Batendai xu ji ku kjaꞌi xi tsú nga xi tsuya Enꞌen Namiña Diuu̱ xu jí xi ꞌmi Elia̱, ku kjaꞌi xi tsú nga Jeremia, kutsa tujmáni ja xi tsuya Enꞌen Namiña Diuu̱.
15Ku tsinengiyáre̱ Jesuu̱:
—Ku jún, kúcha bixujnu. ꞌYáña an.
16Ku̱i̱cha skengi Pe:
—Jí xi jajinri Namiña Diuu̱ nga kjuaꞌiꞌnatsjengíjni, Kjindiꞌe Namiña Diuu̱ xi tjikun ku tsjuáña kju̱a̱mijñachún.
17Ku̱i̱cha skengi Jesuu̱:
—¡Ngatsichakunnéri Namiña Diuu̱ Pe, tiꞌe̱ Jona! Nga̱tꞌa mítsa tuse̱n kumári kui najmi, namiꞌna xi kjitjián ndiu̱jmi xi ikuyári. 18Kui kju̱a̱ nga Pe tsikꞌinra, xi “ndi̱a̱jo̱” mejénre tsú. Ngasún kui ndi̱a̱jo̱ tsindaꞌa̱n ni̱ngu̱xi̱ꞌna̱, ku kja̱beya najmí ni̱tjin nga tsikixundu. 19Jí Pe, tsjuára ngaꞌñu jma kjibatexuma Namiña Diuu̱. Ngieje najmi xi ꞌbechjéri kꞌui kui nga̱sunde, jan ndiu̱jmi tekuácha ꞌbechjare̱ Namiña Diuu̱. Ku najmi xi baꞌi kju̱a̱ nga ku̱ma, tekuácha tsjuá kju̱a̱ Namiña Diuu̱.
20Kui nga Jesuu̱ kitsiꞌínre kjuakixi ja xi kjibakuyáre̱, nga ngují xi tsuyáre̱ nga kui xi jajin Namiña Diuu̱ nga ꞌBatsjengiña.
Nga tsichja Jesuu̱ kúcha ꞌme
(Mr 8.31—9.1; Lk 9.22-27)
21Janda kui ni̱tjin tsaꞌangíre̱ Jesuu̱ nga kitsuyáre̱ ja xi kjibakuyáre̱ najmi xi ku̱mataꞌin: «Tjín nga fueꞌa̱n Jerusalen, ku kiakua, xi inchatetjúnre̱ na̱xi̱nanda, kju̱ ja chanaꞌmi xi ngitku̱ kju̱ chjine Kju̱a̱kixi xi tuxi ón tsikjeyána. Kꞌi̱a̱ tsikꞌénna xu̱ta̱, ta̱nga xi ma ján ni̱tjin, fixꞌajin ngajónina.»
22Ku Pe kiju̱tꞌaxín Jesuu̱ ku kitsitiju̱ nga̱tꞌa ku̱a̱cha tsiꞌin tjichja: Ku̱i̱cha kitsúre̱:
—¡Kuajícha kumataꞌin, Ndi̱a̱ꞌna̱! ¡Ngují ni̱tjin ngatsjuá kjua Namiña Diuu̱ nga ku̱a̱cha kuma!
23Tsꞌuꞌbe Jesuu̱ ku ku̱i̱cha kitsúre̱:
—¡Pe, xuku Xindajin tjinukjuai! ¡Tꞌáin! Makjinjínri najmi xi tjindáre̱ Namiña Diuu̱, ku án tjichjínengini nga tsikitjusunjinꞌa̱n.
24Kui nga Jesuu̱ kitsúre̱ ja xi kjibakuyáre̱:
«Tsa mejénjnu nga án bakuyajnu, tjín nga nichayájnu nga najmi xi tjibixújnu ku kui xi ku̱ma. Tjín nga chꞌájnu kru xi kjimejénjnu ku nga najmi xi xinꞌan nikitjusúnjnu. 25Tsa tu̱ yajojnútse mejénjnu nga natsjengíjnu, tusátse chajájnu. Ta̱nga tsa jún xi ku̱a̱ bixujnu nga baꞌíjnu kju̱a̱mijñachunjnu nga̱tꞌaꞌe xá xi tsuꞌbaꞌa̱n, kjiátse nga bitjungijnu. 26Tsamí xi chjiꞌe nga ngu xu̱ta̱ sakúre ngieje najmi xi mejénre, tsanga kju̱etꞌa chajá anima̱ꞌen. Ku najmí ꞌyá xu̱ta̱ xi ma ꞌbechjitjai tuxi bitjungi. 27Nga̱tꞌa an, Kjindiꞌe xu̱ta̱ nga̱sunde, xati faꞌiña ku faiju̱ꞌa̱n ngieje ngaꞌñu xi tsjuána Namiña Diuu̱ kju̱ kjinditsjeꞌna, ku kjia tsjuána najmi xi tsubáre nga mejénre xi ndá kitsiꞌin ku tsijena xi kju̱a̱xaba kitsiꞌin. 28Kju̱a̱xikjain najmi xi xínjni, tjin xi tjimajnu kꞌui, tuku tjimajnu ngisa nga án batexuma.»
Currently Selected:
Mateo̱ 16: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
