Mateo̱ 17
17
Nga kisasenkajó asenꞌen Jesuu̱
(Mr 9.2-13; Lk 9.28-36)
1Nga je jaꞌa jún ni̱tjin, Jesuu̱ kiju̱ Pe kju̱ Santia kju̱ Jua, xi tsꞌe̱ ma xikjin janda ngu naxi xi kꞌa, tuxi ꞌbendu suba kꞌiakua. 2Kꞌi̱a̱ jma nga incha kui ja kisasenkajó asenꞌen Jesuu̱: Tuxi ꞌñu jatꞌai nga̱kjáin, ku tiaba kutsejen ñajñuꞌen xuku ndiꞌiꞌe tsuꞌbi nga nchisen. 3Kui nga ngiaján ja xi kjibakuyáre̱ Jesuu̱ kube nga kꞌi̱a̱ kjisián Moise kju̱ xi tsuya enꞌen Namiña Diuu̱ xi ꞌmí Elia̱ ku Jesuu̱ inchabasennijmi̱jún.
4Kui nga Pe ku̱i̱cha kitsúre̱ Jesuu̱: «Ndi̱a̱ꞌna̱, ¡ku janda nga kꞌui tinchaña! Tsa mejénri, ján niꞌya jmeten tsindaꞌa̱n: Ngu tsi, ngu tseꞌe Moise ku kjaꞌi tsindána Elia̱.»
5Nga tjicha Pe, ngu yufi xi tuxi kjifatꞌái jiꞌi ku jma incha ngiaján kitsjenne. Ku ngajín yufi kinuꞌyáre ngu nda̱ xi tjitsú: «Kjindiꞌna xikꞌu̱i̱, tuxi ꞌñu tjáona ku tsjua tjínna nga̱tꞌaꞌe. Jún tsubáre nga nuꞌyaꞌénjnu.»
6Nga tsitꞌe kui én ja xi kjibakuyáre̱ Jesuu̱ nangi kitsikjaꞌa̱ yajo̱ꞌe, ku inchamajín kakun nga inchabasé, nga̱tꞌa tuxi ndá inchatsakjun. 7Kitsitiña yajo̱ꞌe Jesuu̱, kiskingajun ku ku̱i̱cha kitsúre̱: «Tisitjénjnu ku tu̱ minchatkunjínjnu yajojnu.»
8Nga isitjén ja xi kjibakuyáre̱, kubeni nga kjisián suba Jesuu̱. 9Nga inchafajén na̱xi̱, kitsiꞌínre̱ kjuakixi Jesuu̱:
—Ngátu̱ ngují xi ꞌmiyájnu najmi xi kuya̱jnu janda nga án, Kjindiꞌe xu̱ta̱ nga̱sunde, je eyaꞌan ku je jixꞌajin ngajoꞌna.
10Tsinengiya ja xi kjibakuyáre̱:
—Mí kju̱a̱ nga ku̱a̱cha tsú chjine Kju̱a̱kixiꞌe̱ Namiña Diuu̱ nga tjún Elia̱ faꞌi nga xi fajin Namiña Diuu̱ nga ꞌBatsjengiña.
11Ku̱i̱cha kitsúre̱ Jesuu̱:
—Kjáin kui én. Tjún Elia̱ faꞌi, nga ndiukꞌenda ngieje. 12Ta̱nga xi kju̱a̱xikjain, je jiꞌi Elia̱; ku janda kubejí xu̱ta̱, ku xi mejénre kitsikjeyare̱. Ku án, Kjindiꞌe xu̱ta̱ nga̱sunde, tekuácha tsꞌijúnna xu̱ta̱, ku ꞌñu tse kju̱a̱ꞌon xi kju̱e̱yana.
13Ngiaján ja xi kjibakuyáre̱ Jesuu̱ kitsikjínre yajo̱ꞌe nga Jua xi Batenda xi tjitsúre̱.
Nga kitsindaya ngu xta̱ nisti Jesuu̱
(Mr 9.14-29; Lk 9.37-43)
14Nga jichú jma nga sindu xu̱ta̱, ngu xta̱ jichutꞌare Jesuu̱, ku isentꞌáre tkuꞌe 15ku ku̱i̱cha kitsúre̱:
—¡Ndi̱a̱ꞌna̱, on chutꞌai kjíndiꞌna ku tisinjín! Ndají tjínre ku tuxi chꞌao mare̱ nga ꞌmeya. Kjín ndiya, nga faꞌiné, janda ndiꞌi ku̱tsa ndijua mejin. 16Jiꞌiju̱ꞌa̱n nga̱tꞌa mejénna nga ja xi tjibakuyéiri tsindaya ta̱nga majín xi inchatsiꞌinre.
17Kiskengi Jesuu̱:
—Jún tjingujíjnu ku sꞌejinjínjnu nga̱tꞌaꞌe Namiña Diuu̱. A ngují najmi ma ñaꞌánjnu nga kju̱jí an. Kjiá janda nga kumájnu. ¡Ndibajújnu kꞌui kui xta̱chi!
18Jesuu̱ tsinchatiju̱ xindajin xi tsuꞌbajin yajo̱ꞌe kui xta̱ nisti, ku tsangatje̱ngi kju̱a̱ꞌñure. Kundayáni xta̱. 19Nga je tꞌajichi, ja xi kjibakuyáre̱ tꞌaxín tsichjare Jesuu̱ ku tsinengiyáre̱:
—Ku ji̱n, mí kju̱a̱ nga kumajín kiꞌnatsjejni̱ kui xindajin.
20-21Ku̱i̱cha skengire Jesuu̱:
—Nga̱tꞌa jún sꞌejinjínjnu nga̱tꞌaꞌe Namiña Diuu̱. Kju̱a̱xikjain najmi xi xínjnu, tsanga ndatsa xuku ngu tuchi̱ꞌe tujma nga sꞌejínjnu Namiña Diuu̱, má ñaꞌánjnu kjuakixi kui na̱xi̱ nga ngatasenkajó jma kjisián ku tꞌeꞌénjnu. ¡Ngují najmi xi kumajín siaꞌánjnu!
Nga te̱ kitsikjaꞌakjáni Jesuu̱ nga nikꞌen
(Mr 9.30-32; Lk 9.43-45)
22Nga jña tjima ngaya ndiya nangi xi chja̱ Ngalilea̱ ku̱i̱cha kitsú Jesuu̱ nga tsichjajo̱ ja xi kjibakuyáre̱: «Xi tao̱nre án kjabe ngatúnna, 23ku tsikꞌénna. Ta̱nga án Kjindiꞌe xu̱ta̱ nga̱sunde, xi ma ján ni̱tjin fixꞌajin ngajónina.»
Ngí kumáre̱ ja xi kjibakuyáre̱ nga tsitꞌe kui én.
Ku̱i̱cha ꞌyechjitjái Jesuu̱ ni̱ngu̱xi̱
24Nga jichú Jesuu̱ kju̱ ja xi kjibakuyáre̱ ngande xi ꞌmí Kafarnau̱m, xi faꞌachi tao̱n xi machjitái xi chja̱ niꞌya ni̱ngu̱xi̱ ku tsinengiyáre̱ Pe:
—A ꞌbechji chjineri tao̱n xi tsubáre̱ ꞌbechjitjai ni̱ngu̱xi̱.
25Kiskengí Pe:
—Jún, ꞌbechji.
Nga tsasꞌen Pe jma sindu ngieje, tjutjún Jesuu̱ ku̱i̱cha kitsúre̱:
—Tixuyéina Pe, ꞌyá xi faꞌachjíre tao̱n xi machjitjái jaxá tetjún. A xu̱ta̱ xi chja̱ jma inchabatexuma, a xu̱ xu̱ta̱ xi kjaꞌi nangi ndiba.
26Kiskengi Pe:
—Xi kjaꞌi nangi ndiba.
Kitsú Jesuu̱:
—Ta̱nga xu̱ta̱ xi chja̱ jma kjibatexumáre̱ Namiña Diuu̱ tsubajíre̱ nga ꞌbechjitjai ni̱ngu̱xi̱. 27Ta̱nga tuxi tsitijo xu̱ta̱ xi inchafaꞌachji tao̱n, tꞌáin ndachakún ku tikjaꞌi tsitinri. Chjuxꞌai tsꞌua ti̱ xi tjun sakúri, ku kꞌi̱a̱ kjitjiá ngu ton. Chjabí kui ton, ku tꞌechji tao̱n xi tsubáre nga ꞌbechjiꞌan kju̱ xi tjitsubári.
Currently Selected:
Mateo̱ 17: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
