Mateo̱ 18
18
ꞌYa xi ꞌñu chjiꞌe ngisa
(Mr 9.33-37; Lk 9.46-48)
1Tuku kui ni̱tjin, ja xi tjibakuyáre̱, ngieje nga tsinengiyáre̱ Jesuu̱:
—ꞌYa xi ꞌñu chjiꞌe ngisa jma kjibatexuma Namiña Diuu̱.
2Jesuu̱ tsichjare ngu tichi, ku ngabasenꞌen xu̱ta̱ isén, 3ku kitsúre̱ ja xi kjibakuyáre̱:
—Kju̱a̱xikjain én xi xínjnu, tuxi ma bitjasꞌenjnu jma kjibatexuma Namiña Diuu̱, tsubáre nga basenkajójnu kúcha tjimajnu ku xuku niskindi nikꞌuyájnu yajojnu. 4Nga̱tꞌa jma kjibatexuma Namiña Diuu̱ xu̱ta̱ xi nimakju̱a̱ kui xi ꞌñu chjiꞌe xuku kui tichi̱. 5Tsa tjin xi tsijaꞌo kui tichi̱ án tjitsijaꞌóna.
6»Ta̱nga tsa tjin xi tsiꞌin nga tsikjínna yajoꞌe kui ja xixi xi je sꞌejínre̱ nga̱tꞌaꞌna, tsubáre nga ndi̱a̱jo̱tse ꞌbetꞌa yakasín ku nikjaꞌajinda ngandiu ndachaku̱n.
7»Kjín najmi tjin kui nga̱sunde xi tsiꞌin nga tꞌeꞌenjínre̱ Namiña Diuu̱ xu̱ta̱ ku najmí kúcha ñaꞌán ꞌbechjare̱. Ta̱nga ¡tuxi ndáji kjueyare̱ xi tsiꞌin nga kjaꞌi xu̱ta̱ tꞌeꞌenjínre̱ Namiña Diuu̱!
8»Tsa najmi xi niꞌín nga nichjein ndsaji kútsa saji xi tsiꞌin nga nuꞌyéꞌénjínri Namiña Diuu̱, ngisa ndá nga tichakjái ku tuxi kjin tikjaiꞌi. Ngisa ndátjin nga ꞌbema kui nga̱sunde tsa najmí ndsaji kutsa saji tukꞌuajíre̱ tsanga ngiajó ndsaji ku ngiajó saji ꞌmaijínji ngakꞌien. 9Tsanga xkunji xi tjichaséi xi tsiꞌin nga nuꞌyéꞌénjínri Namiña Diuu̱ tu̱kꞌu̱a̱re̱ natsjéi ku kjín tikjaꞌi. Ngisa ndá nga ngútse xkunña ꞌbema tu̱kꞌu̱a̱jíre̱ tsanga ngiajó nikjaꞌayajori ngaya ngakꞌien.
10-11»Tikjaitsjénjnu: Nga tu̱ ngují kui niskindi xi nichꞌaojnu, nga̱tꞌa kui ja xixi̱ xi tsixajoꞌe Namiña Diuu̱ inchabasére̱.
Chu̱tsa̱nga̱
(Lk 15.3-7)
12»Mí xi bixujnu Tsa jún ngu xi tjínre uchan chu̱tsa̱nga̱ ku bé nga ngu kichajá, a minchají kꞌi̱a̱ nginde ngijña xi ichate yachan ñajan ku faikangitsjái chu̱tsa̱nga̱ xi kichajá. 13Kutsa sakúre, kixi tjin nga tsjua kumáre̱ nga̱tꞌaꞌe kui chu̱tsa̱nga̱, tukꞌuajíre̱ nga xi ichate yachan ñajan xi kichajájí. 14Tekuácha, Namiña Diuu̱ xi Nami jmájnu mejínre nga ngu kui niskindi chaja ku̱tsa tsikjinre yajo̱ꞌe.
Tuxi ꞌñu chjiꞌe nga nichatꞌáre xingiña
(Lk 17.3)
15»Tsa ngu xu̱ta̱ xi sꞌejínre énꞌna tsꞌijúnri ngu najmi xi ndáji tjin, nukjuají subái ku ngatsibé yajo̱ꞌe nga ndáji kitsiꞌin. 16Tsa tsiꞌinjínri xki̱, Nukjuairi ngu kutsa jó xi sꞌejínre énꞌna xi ngatubé najmi xi kjima. Xu̱ju̱n Enꞌen Namiña Diuu̱ kjibakú nga bateje tsubáre nga ngixku̱n jó kútsa kjín xu̱ta̱ ngatase ku ngatubé kúcha tjisꞌendá. 17Kutsa tsiꞌinjín xki̱, ni̱ngu̱xi̱ tixu̱yájnu. Kutsa tekuácha tsiꞌinjín xki̱ ni̱ngu̱xi̱, janda nga ku̱a̱cha ꞌbendaji̱ xuku xi sꞌejinjínre̱ Enꞌen Namiña Diuu̱, xuku xi faꞌachji ton xi machjitjái nga nixá xi baꞌíre̱ xu̱ta̱ xá Roma̱.
18»Kju̱a̱xikjain najmi xi xínjnu, tumí najmi xi ꞌbejñakjajnu kui nangi, tekuácha beꞌekja Namiña Diuu̱ kui najmi janda ndiu̱jmi. Ku ngieje najmi xi jaꞌojnu nga kuma, tekuácha jaꞌore Namiña Diuu̱ nga ku̱a̱cha kuma.
19»Kju̱a̱xikjain najmi xi xinjnu, tsa jó xu̱ta̱ kꞌi̱a̱ ngajínjnu tsindsiji̱n yajo̱ꞌe, ngasun kui nangi, nga jña minengíre̱ Namiña Diuu̱ xi kjitjián ndiu̱jmi, tsjuáre. 20Nga̱tꞌa kꞌi̱a̱ jma nga jó kutsa ján májnu, nga matkiujnu nga̱tꞌana, kꞌi̱a̱ tejñajínjnu.
21Kui nga kitsitiña yajoꞌe Pe jma kjitjián Jesuu̱ ku tsinengiyáre̱
—Ndi̱a̱ꞌna̱, tsa ngu xu̱ta̱ xi chja̱ ni̱ngu̱xi̱ tsꞌijúnna ngu najmi xi ndáji tjin, kó ndiya tsubáre tsichatꞌana. A tu̱ yatutse ndiya.
22Ku̱i̱cha kiskengi Jesuu̱:
—Mítsa tu yatutse ndiya tsubáre nga nichatꞌáre tsꞌéña. Tsubáre̱ nga nichatꞌáre ngu ndiya, jó ndiya, tutsjái nga tsubáre nga nichatꞌáre.
Xi kumejínre kitsichatꞌa
23»Jma kjibatexuma Namiña Diuu̱, tekuácha ma, xukúcha kumá ngu na̱xi̱nanda, ngu ndiya. Xta̱xá tetjún xi chja̱ ngu na̱xi̱nanda tsichjáre̱ ngieje musuꞌe̱ nga ngatsuyáre̱ kúcha inchamá xá xi tjínre ku tuxi ma nga ngatꞌechjire ngieje xi yajáre.
24»Nga tsaꞌangíre̱ nga itsjé xki̱, tsangiju̱re̱ ngu musuꞌe̱ xi ichate kju̱ te̱ miyón ton tiaba kjitje̱nre̱. 25Nga̱tꞌa najmíre̱ ton xi ꞌbechji musu, xta̱xá tetjún, kitsiꞌin kjuakixi nga xuku musu bateña, tjiujun chju̱nꞌen kju̱ kjindiꞌe, kju̱ ngieje najmi xi tjínre. Ku ku̱a̱cha, ton xi mején nga je steña ngieje kui xu̱ta̱ kju̱ najmi xi tjínre, mangajo ton xi kjitje̱nre̱.
26»Ta̱nga kui musu isén tkiuꞌe ngakjáin xta̱xá tetjún ku tsinengíre̱ kju̱a̱ndá: “Ndi̱a̱ꞌna̱, titjuéna ngi chu̱ba̱ ni̱tjin ku ꞌbechjíra ngieje xi kjitje̱nna tsi.”
27»Ku kui xta̱xá tetjun kunima̱re̱ nga̱tꞌaꞌe kui musu ku ku̱i̱cha kitsúre̱: “Ndandá tꞌain; tsichatꞌára ngieje xi kjitje̱nri tsaꞌa̱n.”
28»Nga itjúni ndabaxaꞌe xta̱xá tetjun, kui musu tsenkja ngu xta̱ xi kjitje̱nre̱ uchan ton tiaba tse̱ꞌe̱. Kiskabé kasín ku ku̱i̱cha kitsúre̱: “¡Tꞌechjína kjatꞌama xi kjitje̱nri tsaꞌa̱n!”
29»Kui xta̱ xi jña musu isén tkiuꞌe ngakjáin ku ku̱i̱cha tsinengíre̱ kju̱a̱ndá: “Ngi chubama ni̱tjin titjuéna ku ꞌbechjíra ngieje xi kjitje̱nna tsi.”
30»Ta̱nga kui musu kuyujíre̱ nga kitsjuáre ni̱tjin ngisa ku kitsiꞌin manda nga nduya basen xi ndsiji̱n musu, janda nga ꞌbechjíre xi kjitje̱nre̱.
31»Ta̱nga ja xi ngisa, nga kube najmi xi kumá, tuxi kisasenjínre ku kitsuyáre̱ xta̱xá tetjun.
32»Ku tsichja̱re̱ kui musu xi ku̱a̱cha kitsiꞌín ku ku̱i̱cha kitsúre̱: “¡Mí xá kuꞌñu xabaiji! Kitsichatꞌára ngieje xi kjitje̱nri tsaꞌan, nga̱tꞌa jí xi ku̱a̱cha kichjinengina. 33Mí xá kunima̱jínri nga̱tꞌaꞌe kui jña musujnu xukúcha kunima̱na nga̱tꞌari.”
34»Kitsití xta̱xá tetjun, ku kitsiꞌin manda nga nijére kui musu, janda nga ꞌbechji ngieje xi kjitje̱nre̱.
35Ku ku̱i̱cha kitsikje enꞌen Jesuu̱: «Tekuácha tsꞌijúnjnu Namiña Diuu̱, xi Namiꞌna ma, nga ngu ngujnu, tsanga ngiejeji anima̱jnu nga nichatꞌajnu tsꞌejún ndichjajún.»
Currently Selected:
Mateo̱ 18: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
