Mateo̱ 19
19
Nga ikú Jesuu̱ kúcha tjin nga tjuen xingiña nga je ixantsja ni̱ngu̱xi̱ña
(Mr 10.1-12; Lk 16.18)
1Nga je kumá nga ikuya Jesuu̱ kui kju̱a̱kitakun, itju nangi Ngalilea̱ ku ngatje̱n nangi Judea̱ kijí, nga bitju tsuꞌbi ndana Jordan. 2Tuxi kjín xu̱ta̱ kijitjengíre̱, ku kꞌi̱a̱ kitsindaya ngieje xi ndáji sindure.
3Yajin xu̱ta̱ fariseo̱ xi jichú nga mejénre nga tsiꞌin ndsen. Kui nga tsinengiyáre̱:
—A ma nga ngu xta̱ tsikjere̱ kju̱a̱bixatsja chjunꞌen nga tumínitse kju̱a̱.
4Ku̱i̱cha skengi Jesuu̱:
—A faitsjenjínjnu kju̱a̱kitakun xi kjitꞌa Xu̱ju̱n Enꞌen Namiña Diuu̱. Kꞌi̱a̱ kjitꞌa, janda nga tjutsꞌin, Namiña Diuu̱ kitsindá xi xiꞌin ku xi chjun. 5Kui kju̱a̱ nga ku̱i̱cha kitsú Namiña Diuu̱: “Xu̱ta̱ xiꞌin tsubáre nga beꞌe nami̱ꞌen ku naꞌe̱n, nga bixantsja ku jña ꞌbendu chjuꞌen. Ngiajó jña ꞌbema, xuku ngútse xu̱ta̱.” 6Nga ku̱i̱cha tjin najmi, xi bixantsja, je ngite̱ xukují nga jó xu̱ta̱ ꞌbema, xuku xi ngútse xu̱ta̱ tsubáre ꞌbema. Xi mejénre̱ tsu, tsa Namiña Diuu̱ je kitsingú ngu chjun ku ngu xiꞌin, najmí ꞌyá xi ma tsitsjuén xikjin.
7Kui nga tsinengiyá ja fariseo̱:
—Ku mí xá tsani, mí kju̱a̱ nga yeꞌe Moise ngu kju̱a̱kixi, xi tsú nga xi xiꞌin ma tsjuén chjunꞌen, ta̱nga tsubáre nga tsjuáre xu̱ju̱n nga je kju̱a̱bixantsja.
8Ku̱i̱cha skengi Jesuu̱:
—Kitsjuájnu kju̱a̱ Moise nga kitjuénjnu xingijún nga̱tꞌa tjeꞌñu tajajnu ku mejínjnu nuꞌyaꞌénjnu Namiña Diuu̱. Ta̱nga, janda nga tjutsꞌín, najmí ni̱tjin nga kumejénre̱ Namiña Diuu̱ nga tsjuén chjunꞌen xi xiꞌin. 9Ku án kꞌui ku̱i̱cha xinjnu, tsanga najmíre̱ jee xi chjun tsa kjaꞌi xiꞌin kisꞌeju̱, jún najmí mi kju̱a̱ nga tjuénjnu yachjinjnu ku majín tsa kjaꞌi chjun bixantsjaju̱jnu. Nga̱tꞌa tsa yakjajíjnu kju̱a̱bixantsja, ku majéjnu.
10Ja xi kjibakuyáre̱, nga tsichja, ku̱i̱cha kitsúre̱ Jesuu̱:
—Tsa ku̱a̱cha ma nga̱ya kju̱a̱bixantsja, ngisa ndá nga bixantsjaji.
11Ku̱i̱cha skengi Jesuu̱:
—Kui kju̱a̱kitakun tujma kuitse xu̱ta̱ makjínre̱, xi tsjuáre Namiña Diuu̱ ngu kju̱a̱tjocha nga bixantsjaji. 12Kjainni nga tjin xi majín bixantsja, nga̱tꞌa janda nga kje tjukjají, tjínre ngu najmi xi kjeꞌá. Kjaꞌi xi majín bixantsja nga̱tꞌa tjin xi kitsiꞌonre̱ yajo̱ꞌe. Ta̱nga te̱ tjin xu̱ta̱ xi bixantsjaji tuxi ma nga tsixá jma batexuma Namiña Diuu̱. Kui kju̱a̱ nga kui kju̱a̱kitakun tu̱tseꞌétse kui xu̱ta̱ xi tuxá kuácha tsikjao nga bixantsjaji.
Nga kitsichakunné Jesuu̱ niskindi
(Mr 10.13-16; Lk 18.15-17)
13Tjin na xi kijure kjindiꞌe Jesuu̱ tuxi banére̱ tsja yajo̱ꞌe ku minengíre̱ kju̱a̱ndá Namiña Diuu̱. Ta̱nga ja xi kjibakuyáre̱ Jesuu̱ kitsitiju̱tse. 14Ku ku̱i̱cha kitsúre̱ Jesuu̱ kui ja xi kjibakuyáre̱: «Titjuájnu ngande niskindi nga tsitiñána yajo̱ꞌe. Nga tu̱ ꞌbechjajíjnu; nga̱tꞌa xi kuacha kun xuku kui, kuíxi tseꞌe jma kjibatexuma Namiña Diuu̱.»
15Jesuu̱ kitsubetjai ngatsjatku nga ngu ngu kui niskindi ku kijíni kjaꞌi ngande.
Xta̱ nisti xi tjínre tao̱n
(Mr 10.17-31; Lk 18.18-30)
16Ngu xta̱ nisti jichú jma kjitjián Jesuu̱ ku tsinengiyáre̱:
—Jí kua Chji̱ne, mí najmi xi ndá tsubáre̱ tsiꞌinꞌan tuxi sakúna kju̱a̱mijñachún nguxikaꞌa.
17Ku̱i̱cha skengire Jesuu̱:
—Mí xá chjinengiyéina mí najmi xi ndá. Tujma Namiña Diuu̱ xi ndá. Tsa mejénri nga ndá tjabixí nuꞌyéi kjuakixi xi kjitjiánre̱ Namiña Diuu̱.
18Te tsinengiyáni xta̱ nisti:
—Jmá kjuakixi xi bixiji.
Kitsúre̱ Jesuu̱:
—Nga tu̱ nikꞌenjín xu̱ta̱; nga tu̱ chꞌanacheji ngaya kju̱a̱bixantsjari; nga tu̱ kju̱a̱ndesují nindái xi kju̱a̱ꞌonꞌe̱n xu̱ta̱ kuma; 19Nuꞌye̱i énri xi nami xi na mári; ti̱tjoi xu̱ta̱ xi ngisa xukúcha tjaori yajo̱ri.
20Ku ku̱i̱cha kitsú xta̱ nisti:
—Je kitsikitjusún ngieje kui kjuakixi. Mí xi ma tsiꞌinꞌan ngisa.
21Ku̱i̱cha kitsúre̱ Jesuu̱:
—Tsa mejénri nga tuxi naxu niꞌín, tateñéi ngieje najmi xi tjínri ku xi ni̱ma̱ takjanyéiri. Ku̱a̱cha nga tsjuári Namiña Diuu̱ ngu kju̱a̱ndá xi tse jan ndi̱u̱jmi. Ku kjia ndibi ku án tjabixitjengína.
22Ku nga kijí kui xta̱ nisti, tuxi ngi kumáre̱, nga̱tꞌa tuxi tse tao̱n tjínre.
23Ku ku̱i̱cha kitsúre̱ Jesuu̱ ja xi kjibakuyáre̱:
—Xi kju̱a̱xikjáin xi xínjnu nga xi tjínre tao̱n tuxi niꞌin kuasꞌen jma kjibatexuma Namiña Diuu̱. 24Nga xi kju̱a̱xikjain, niꞌinjín kuasꞌen xku̱n nindu ngu kameyo̱, ku nga xu̱ta̱ xi tjínre ton jmanga kjibatexuma Namiña Diuu̱.
25Tu̱ku̱a̱ kumáre̱ ja xi kjibakuyáre̱ Jesuu̱ nga tsitꞌe kui en, ku inchachja̱ju xikjin:
—Ku ꞌyá xi kꞌuangi tsani.
26Tsasére̱ Jesuu̱ ku ku̱i̱cha kitsúre̱:
—Xu̱ta̱ nga̱sunde kumajínre̱ kui najmi, ta̱nga Namiña Diuu̱ najmí ngu najmi xi majínre̱.
27Ku̱i̱cha kiskengíre Pe:
—Tikjaitsjéin nga ji̱n je kikꞌejñájni ngieje najmi xi tjínjni, ku jí tjimatjengíri. Mí kju̱a̱ndá xi sakújni.
28Ku̱i̱cha skengire Jesuu̱:
—Kju̱a̱xikjain én xi xínjnu nga kju̱ jún jña ñaꞌánña kjuakixi nga án xi Kjindiꞌe xu̱ta̱ nga̱sunde, batejñayaꞌa̱n yaxile xi ꞌñu tse ngaꞌñu tjínre. Ku kjiakua Namiña Diuu̱ basenkajó ngieje najmi ku tsikjatse. Nga ngu ngujnu ñaꞌánjnu kjuakixi nga ngu ngu xi tejó tje xi tjínre Israe. 29Ku ngieje xi nga̱tꞌa án tjimatjengína, xi yeꞌebasen chjuꞌen kju̱ kjindiꞌe, xi yeꞌebasen tsꞌe kju̱ ndichja, kutsa namiꞌen ku naꞌe̱n, kutsa niꞌyaꞌe̱ kútsa nangi, uchan ndiya nga ngasunꞌe̱n nga sakúnire̱, ku kꞌuére kju̱a̱mijñachún nguxikaꞌa. 30Ta̱nga kjín xu̱ta̱ xi ꞌñu chjiꞌe kjatꞌei, tusa kui ngite chjiꞌeji kuma, ku kjín xi chjiꞌeji kjatꞌei kui xi tusa ꞌñu chjiꞌe ku̱ma.
Currently Selected:
Mateo̱ 19: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
