Mateo̱ 23
23
Nga kitsuya Jesuu̱ kúcha tsubáre̱ nikitjusun Enꞌen Namiña Diuu̱
(Mr 12.38-40; Lk 11.37-54; 20.45-47)
1Nga je jaꞌa ni̱tjin, kitsuyáre̱ xu̱ta̱ Jesuu̱ kju̱ ja xi kjibakuyáre̱:
2«Xu̱ta̱ fariseo̱ kju̱ chjine Kju̱a̱kixiꞌe̱ Namiña Diuu̱, kui xi ꞌñu bé kju̱a̱kixiꞌe Moise. 3Tiaꞌánjnu ngieje najmi xi tsú; ta̱nga tu ñaꞌanjínjnu najmi xi tsiꞌín, nga̱tꞌa kjaꞌi najmi bakuyare xu̱ta̱ ku kjaꞌi najmi xi tsiꞌín. 4Kju̱a̱ꞌñu tsiꞌinre xu̱ta̱ nga tsikitjusún kjuakixi xi beꞌe, ta̱nga ngují ngaꞌñu tsiꞌín kui tsa tsikitjusún en xi chja̱. 5Ngieje kui najmi tsiꞌín tuxi ngatubé xu̱ta̱ ku ngatasen. Kui kju̱a̱ nga xu̱ju̱n xixi ꞌbendutꞌa en xi yaꞌa Xu̱ju̱n Enꞌen Namiña Diuu̱ ku ngaya kaxa tjiuxin xixi faya ku tjen ku ngasuꞌe ꞌbendutꞌa. Nga faꞌa ni̱tjin tusamá ꞌñu yiꞌi tsiꞌín kui kaxa ku tsja̱ tsikangibaꞌangíre̱ najñu xi tsajáni, tuxi tsikjao xu̱ta̱ nga tuxi tꞌeꞌenre Namiña Diuu̱. 6Nga fái ni̱ngu̱xi̱ kutsa nga fái sꞌui, tuxi tsjuáre nga sꞌejín xu̱ta̱ nga xuku xi kui xi tuxi ꞌñu chjiꞌe. 7Tsjuáre̱ nga betkun xu̱ta̱ ku tsikundáre ngaya jma tjin ndetsi̱n, ku nga chjine ꞌmíre̱.
8»Ta̱nga jun tu chuyajíjnu nga chjine tsújnu xu̱ta̱, nga̱tꞌa tsꞌejún ma xingii̱jún, ku ngútse chjine xi tjinjnu. 9Ngátu̱ ngují xi nami bixujnu, nga̱tꞌa tujma Namiña Diuu̱tse xi Namijnu, xi kjitjián ndiu̱jmi. 10Ku te̱ chuyajíjnuya tsa xi inchatetjúnre̱ na̱xi̱nanda kuitsujnu xu̱ta̱ nga̱tꞌa tuꞌántse, Xi ꞌbatsjengiña, xi tasentetjúnjnu. 11Xi ꞌñu chjiꞌe ngajínjnu kui xi tsubáre̱ nga tsiꞌin xki̱ ngieje xi ngisa. 12Nga̱tꞌa xi inchasꞌejinre nga kui xi ꞌñu chjiꞌe nga xi ngisa tusá kui xi xuku xi chjiꞌejí feyare̱. Ku xu xuku xi chjiꞌejí tsiꞌín kui xi ꞌñu nichjiꞌe nga ngieje.»
¡Nga kitsuya Jesuu̱ nga ndáji kjueyáre̱ xi jóngakjain!
13-14Ku̱i̱cha kitsúre̱ Jesuu̱ ngieje xu̱ta̱ fariseo̱ kju̱ chjine Kju̱a̱kixiꞌe̱ Namiña Diuu̱:
«¡Tuxi on kjueyáre̱ xi jóngakjain! Tjiꞌbechjajnu xu̱ta̱ kjindetjuaꞌe jma batexuma Namiña Diuu̱. Bitjasꞌenjínjnu jún ku te̱ baꞌijíjnu ngande nga basꞌen xi kjaꞌi.
15»¡Tuxi on kjueyáre̱ xi jóngakjain! Tjimajnu ngieje nga̱sunde nga tjiminchitsjaijnu xi sꞌejínre ngatꞌajnu, ku nga sakujnu, tusátse janda jó ndiya ngakꞌen tjimangijújnu tukꞌuajíre̱ nga jún.
16»¡Tuxi on kju̱e̱yájnu! Tjiꞌmíre̱ nga jún xi kjinéjnu nga bakuyajnu xu̱ta̱ nga tꞌeꞌenre Namiña Diuu̱, ta̱nga janda jún kuajícha ñaꞌánjnu. Tjibakújnu xu̱ta̱ nga ma nikitjusunjín ngu en ngatu̱ nga̱tꞌaꞌétse ni̱ngu̱xi̱; ta̱nga nga tsubáre̱ nikitjusun en, tsanga nga̱tꞌaꞌe ton sine xi tjínre ni̱ngu̱xi̱ baꞌi. 17¡Ngují najmi yájnu, xu̱ta̱ ndsenjnu xi ku̱a̱cha kúnjnu! Makjinjínjnu nga chjiꞌe ngisa ni̱ngu̱xi̱ nga ton sine, nga̱tꞌa ni̱ngu̱xi̱ xi tsiꞌín nga chjiꞌe ton sine ngixku̱n Namiña Diuu̱.
18»Tekuácha tjibakújnu xu̱ta̱ nga ma nikitjusunjín ngu en xi je kitjúña, tsanga tu̱ nga̱tꞌaꞌétse nachanꞌe̱n ni̱ngu̱xi̱; ta̱nga nga tsubáre̱ nga nikitjusun tsanga nga̱tꞌaꞌe chje̱ xi tjisún nachan. 19¡Xu̱ta̱ kjijñú jún kua! Nachanꞌe̱n Namiña Diuu̱ xi chjiꞌe tukꞌuajíre̱ chje̱ xi tjisún, ku nachan xi tsiꞌín nga chjiꞌe ngakjáin Namiña Diuu̱, chje̱ xi tjisún . 20Nga ngu xu̱ta̱ tsjuá enꞌen ngixku̱n Namiña Diuu̱, ku tsú nga tsikitjusún nga̱tꞌaꞌe nachanꞌe̱n ni̱ngu̱xi̱, tjitsjuá enꞌen mítsa tu nga̱tꞌaꞌétse nachan, kju̱ nga̱tꞌaꞌe nga ngieje najmi xi sindusún kui nachan. 21Kutsa tjin xi tsjuá enꞌen nga̱tꞌaꞌe ni̱ngu̱xi̱ judio̱, mítsa tu̱ ni̱ngu̱xítse tjitsjuáre én, tjiujún Namiña Diuu̱, nga̱tꞌa kꞌi̱a̱ tjingaꞌya. 22Tsa ndiu̱jmi tsjuáre enꞌen, tjiujún Namiña Diuu̱ tjitsjuáre én, nga̱tꞌa ndiu̱jmi kjisián yaxile chakunꞌen Namiña Diuu̱.
23»¡Áchichi nga on kju̱e̱yájnu jún chjine Kju̱a̱kixi kju̱ fariseo̱! ¡Jó ngakjáin jún kua! Nindusínjnu yajo̱jnu nga baꞌíjnu xi te̱ nga uchan nga machájnu xka̱ ndiumiꞌa, xka̱ aní kju̱ xka̱ komino̱ nangijnu. Ta̱nga nikitjusunjínjnu kju̱a̱kixi xi bakuya Namiña Diuu̱ xi ꞌñu chjiꞌe: nga naxu natsjéjnu yajo̱jnu nga̱tꞌaꞌe xu̱ta̱, nga nitjáojnu ku nga sꞌejínjnu Namiña Diuu̱ nga ngieje najmi. Tubáre̱ nga ñaꞌán ngiajan kui kju̱a̱kitakun, ku tekuácha nikitjusun ngieje kjuakixi xi ngisa. 24¡Jun xi tinchatetjúnjnu na̱xi̱nanda, majínjnu! Nikitjusúnjnu najmi xi chjiꞌejí ngaya kju̱a̱kixi, ta̱nga nikitjusunjínjnu xi ꞌñu chjiꞌére̱. Jun xukútse xi ꞌbatsjejinda natseꞌbí ngajin bino, ta̱nga tjiujun kameyo xi kjijinda ꞌbi.
25-26»¡Tuxi ndáji kju̱e̱yájnu júnku̱a̱ xu̱ta̱ jó ngakjáin! Xuku xi ndájnu xu̱ta̱, tanga xabájnu nga xi kju̱a̱xikjain, ngují xu̱ta̱ minchajújnu, ku tusá chejé tjiñaꞌánjnu xu̱ta̱. ¡Ndsenku̱a̱ xi ku̱a̱cha kúnjnu! Ndá xu̱ta̱ tiaꞌánjnu yajo̱jnu, nga̱tꞌa tsa kuajícha ñaꞌánjnu, xukútse tiba xi tsje nga̱tu̱n tanga ndí ngaya uyájnu. Ta̱nga tsa tsje ngaya baso kutsa tiba̱, kjia nga xi kju̱a̱xikjain nga tsje kuma.
27-28»¡Achichí nga ndáji kju̱e̱yájnu! Tjichꞌanachajújnu xu̱ta̱ nga ndájnu ku nga chejejíjnu, ta̱nga nga xi kju̱a̱xikjain jó ngakjainjnu ku xabajnu. Xukú nga tiaba kitsꞌiya jma kjiñajín mikꞌen, tsje tsejen ngatun, ta̱nga ninda ku najmi ndí tjikitse ngaya.
29»¡Xi xꞌanxujnu, achichí nga ndáji kju̱e̱yájnu, xu̱ta̱ jó ngakjáin! Nindájnu asenꞌen yajo̱ꞌe xi tsuya Enꞌen Namiña Diuu̱ xi je jesún ku ninaxújnu jma sinduñajín xu̱ta̱ xi naxu kisꞌema. 30Ku ku̱i̱cha bixujnu: tsa kui ni̱tjin kisꞌebixiꞌan, janda ndsijinjín kumájni kju̱a̱kitakunꞌen xi kitsikjesún xi tsuya Enꞌen Namiña Diuu̱. 31Ta̱nga, nga kju̱a̱xikjáin, tjibakújnu yajo̱jnu nga ngundsijínjnu xuku xi kitsikjesún kui ja. 32¡Tindujújnu tsani xá xi tsaꞌangíre̱ kui xu̱ta̱!
33»¡Jun, xu̱ta̱ ndesújnu ku xabajnu! Ngundsijín nga xabajnu xuku xanꞌen ye̱. ¡Kui kju̱a̱ nga bitjungijíjnu nga mangíjnu ngakꞌien! 34Kui nga án, tsingiyájnu xu̱ta̱ xi chjinenꞌenꞌen Namiña Diuu̱, kju̱ xi chjine, ta̱nga tjin kui xu̱ta̱ xi te̱ júnni nikjesúnjnu kutsa kru ꞌbendutꞌájnu, ku tjin xi fájnu xi ꞌbéjnu ngaya ni̱ngu̱xi̱, ku kjaꞌi xi biyutjengíjnu ngieje ngaya na̱xi̱nanda. 35Kui kju̱a̱ nga jún ku̱ma jeejnu nga nikjesún xu̱ta̱ xi naxu tjima nga̱sunde; janda nga kinikꞌen Abe ku janda nga kinikꞌen Sakaria̱, xi tiꞌe̱ Berekia kuma. Kui chjinenꞌenꞌen Namiña Diuu̱ ngabasenyaꞌe̱ niꞌya ni̱ngu̱xi̱ ku jma tjen nachan tkunꞌen Namiña Diuu̱ kinikꞌenjnu. 36Xi kju̱a̱xikjain nga jún tsijéjnu Namiña Diuu̱ nga̱tꞌaꞌe ngieje kui najmi.
Kju̱a̱niꞌin faꞌa Jesuu̱ ngaya tsja xu̱ta̱ xi chja̱ Jesuralen
(Lk 13.34-35)
37»¡Jún xu̱ta̱ na̱xi̱nanda Jerusalen, xu̱ta̱ na̱xi̱nanda Jerusalen! Jún, nikjesúnjnu chji̱ne̱ꞌen xi tsingiyájnu Namiña Diuu̱. Kjín ndiyá mejenna nga kiskúnjnu, xukúcha tsiꞌin xa̱nda̱na nga nginde tji̱u̱nga̱ꞌe̱ minchangi kjindiꞌe, ta̱nga jún xi kuyujíjnu. 38Sasen basen ni̱ngu̱xi̱ judio̱jnu. 39Kju̱a̱xikjain xi xinjnu nga janda kui ni̱tjin ngite yajíjnu, janda nga jún suba nukju̱a̱jnu: “Kuchakunné xi jajin Namiña Diuu̱ nga ꞌbatsjengiña, xi ngajoꞌe̱ Namiña Diuu̱ jindibá”.»
Currently Selected:
Mateo̱ 23: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
