Mateo̱ 24

Nga kitsuya Jesuu̱ nga bixundu ni̱ngu̱xi̱

(Mr 13.1-2; Lk 21.5-6)

1Nga itju Jesuu̱ niꞌya ni̱ngu̱xi̱, kitsitiña yajo̱ꞌe ja xi kjibakuyáre̱ ku ikúre̱ kúcha tjin niꞌya ni̱ngu̱xi̱. 2Ku̱i̱cha kitsú Jesuu̱: «A tjichasejnu ngieje kui niꞌya. Kju̱a̱xikjain nga ngieje nga bixundu. ¡Ngují chꞌuaꞌe xi xinchakixi!»

Tijñandájnu kjatꞌei nga fichúña kúcha fetꞌa

(Mr 13.3-23; Lk 21.7-24; 17.22-24)

3Jaskan nga kijí Jesuu̱ kju̱ ja xi kjibakuyáre̱ tjengi jma tjin ya olibo̱. Kisꞌejñá Jesuu̱ ku nga je kisꞌendu suba, tsinengiyáre̱ ja xi kjibakuyáre̱:

—Kjiá nga bixundu ni̱ngu̱xi̱. Kúcha yájni̱ ngáte̱ faꞌíniji̱, ku nga kjue nga̱sunde. Mí chuba̱ xi sꞌejña.

4Ku̱i̱cha skengire Jesuu̱:

—¡Chuyárajnu! Ngátu̱ najmí xi ngatꞌanachajújnu. 5Kjín xi kjuaꞌi, ku ku̱i̱tsu̱ nga ngajoꞌna tjima, ku kuitsure xu̱ta̱: “Án xi jajínna Namiña Diuu̱ nga ꞌbatsjengijnu”. Jínꞌna tsichjen ku kjín ku̱ma xi kꞌu̱a̱nachajú.

6»Sinuꞌyájnu en nga kꞌue na̱xi̱nanda jma kju̱a̱bixkán tsꞌiju̱n xikjin, ku nga kjaꞌi xi je inchaꞌbendá yajo̱ꞌe nga kján. Ta̱nga tu̱ tkunjínjnu; tuxá ku̱a̱cha ku̱ma, ta̱nga kje fejí nga̱sunde. 7Nga̱tꞌa ndsi̱nji̱n kjaju̱n xikjin na̱xi̱nanda, kꞌuejíre̱ xi chine xu̱ta̱, ku kjín nga̱nde nga kju̱a̱ꞌa chaon. 8Tu̱ nga kuaꞌangítsere̱ nga ku̱a̱cha ku̱ma, ta̱nga tsé kju̱a̱ꞌón xi kjueyáre̱.

9»Jun kuaijuꞌñújnu xu̱ta̱, ku tsikasꞌenjnu ngaya tsja jaxá xi tsꞌiónjnu, xi tsikjesúnjnu. Ngieje nga̱sunde xi chꞌao kuasejnu nga̱tꞌa án ikuyájnu. 10Kjín xu̱ta̱ xi tjimatjengina xi kite sꞌejinjínreꞌan; tjin xi kjabe nga̱tun xi kjaꞌi ku ontakún ku̱ma nga̱tꞌaꞌe. 11Ku kjín ku̱ma chji̱ne̱ꞌen ndesu xi kjaꞌikꞌanacha̱ju xu̱ta̱. 12Tuxi xaba kuma xu̱ta̱ nga kjín ku̱ma xi kite tsitjojí xinkjin. 13Ta̱nga án ꞌbatsjengiꞌan xi tjimatjengina ku sꞌejínre án janda nga kju̱etꞌa. 14Fe nga̱sunde nga je jiꞌí en tjatseꞌe xi tsuya kju̱a̱texumaꞌe̱n Namiña Diuu̱ nga ngieje nangi, ku nga je tsitꞌe ngieje xu̱ta̱.

Baku chubara nga biyuña

15Tuku tsichaju̱ Jesuu̱ já xi kjibakuyáre̱ nga̱tꞌaꞌe kúcha ku̱ma nga kju̱e̱ nga̱sunde, ku ku̱i̱cha kitsúre̱:

—Xi ꞌbexkiya kui kju̱a̱kitakun tsubáre̱ ngatukjínre Ndanie xi chjineꞌenꞌen Namiña Diuu̱ kumá. Kui xi kitsuya nga ngu ni̱tjin tjin xi ꞌbesun chje̱ xi tuxi chꞌao tjin ngaya ni̱ngu̱xi̱.

»Nga yájnu nga ku̱a̱cha kuma kui Nga̱nde Tsje xukúcha kitsú Ndania, tiyújnu kjiaku̱a̱. 16Xi sindu nangi xi chja̱ Judea̱ ngatje̱n na̱xi̱ ngatanga; 17xi ngatsja niꞌyaꞌe̱ kjitsuꞌba ngatu̱ ngují najmi ngatjajenkjaꞌa; 18ku xi ngajnuꞌe̱n tsuꞌba tu ngatjaikjaꞌají najñu xi tsajáni. 19¡Tuxi ndáji kjueyare̱ yachjin xi kui chu̱ba̱ kjindi inchayaꞌa, kju̱ xi tjínre kjindinda! 20Chjinengíjnu kju̱a̱ndá Namiña Diuu̱ chan chꞌanjín ku̱ma ngieje kui najmi, ku̱tsa ngu ni̱tjin nikjaya, 21nga̱tꞌa kui ni̱tjin tuxi tsé kju̱a̱ꞌáon xi kju̱a̱ꞌa xu̱ta̱. Ngují ni̱tjin, janda nga kitsindá Namiña Diuu̱ nga̱sunde, nga ku̱a̱cha tse kju̱a̱ꞌáon jaꞌa xu̱ta̱, xukúcha kjueyare̱ kjiaku̱a̱; ku ngi ngují ni̱tjin nga ku̱a̱cha on kjueyare̱. 22Tjaore̱ Namiña Diuu̱ xi je jajin, ku kui kju̱a̱ nga ngutjútse nga tsé kju̱a̱ꞌáon kju̱a̱ꞌa. Tsa kuajícha, ngieje nga kju̱e̱sún.

23»Tsa tjin xi kuitsujnu kui ni̱tjin: “Chaséjnu, nga̱i kjisián xi jajin Namiña Diuu̱ nga ꞌBatsjengiña”, ku̱tsa “kꞌi̱a̱ kjisián xi jajin Namiña Diuu̱ nga ꞌBatsjengiña”, Ngatu̱ nisꞌejinjínjnu. 24Nga̱tꞌa kju̱a̱ꞌí xi tsuya Enꞌen Namiña Diuu̱ xi ndesu kju̱ xi kuitsu án xi jajinna Namiña Diuu̱ nga ꞌBatsjengijnu, xi tekuácha ndesu, ku tsiꞌín ngixku̱n xu̱ta̱ najmi xi tsjua kumáña ku kꞌu̱a̱na̱cha̱juña. Kutsa ma xi tsiꞌín, tekuácha kꞌu̱a̱nachajú xu̱ta̱ xi je tsichjare Namiña Diuu̱ nga kui faitjengíre̱. 25Jé sa kuacha kixiyájnu xuku nga jun 26Tsa kjaꞌi xi faꞌi ku ku̱i̱cha kuitsu̱jnu: “¡Xi jajin Namiña Diuu̱ nga ꞌBatsjengiña, jan nangi kixí kjitjián!”, nga tu̱ mangijíjnu. Kutsa kuitsu̱jnu: “¡Kꞌui kjitjianꞌma xi jajin Namiña Diuu̱ nga ꞌBatsjengiña!” Tu̱ nisꞌejinjínjnu. 27Nga án, Kjindiꞌe xu̱ta̱ nga̱sunde, xi faꞌi a̱n, mítsa mangaꞌmaꞌa̱n. Ngieje nga skuena, nga̱tꞌa nga án xi faꞌiꞌa̱n xukútse nga fatꞌai ku tsitsejen ngieje ndiu̱jmi. 28Ngieje xu̱ta̱ bé nga jma matku tarisku̱, mikꞌen tjin. Ku̱a̱cha kuma nga án xi faꞌiꞌan: Ngieje xu̱ta̱ nga skue.

Kucha tjin tse̱ꞌe nga jatjíni Kjindiꞌe xu̱ta̱ nga̱sunde

(Mr 13.24-37; Lk 17.26-30,34-36; 21.25-33)

29Tuku tsichja Jesuu̱:

—Nga kju̱a̱ꞌa kui ni̱tjin nga on kjueyáre̱ xu̱ta̱:

“Sꞌejñú tsuꞌbi,

ku kite kju̱a̱tꞌaiji sá.

Kuixungi niñú,

ku kju̱a̱tse ngieje ngaꞌñu

xi sindu ndiu̱jmi.”

30»Ngieje nga skue ngu chuba̱ ndiu̱jmi, xi kuitsuya nga án, Kjindiꞌe xu̱ta̱ nga̱sunde, te̱ kjuaꞌiñaꞌa̱n. Ku nga béna nga faꞌiꞌan ngajin yufiꞌe ndiu̱jmi, nga tjínna ngaꞌñu, kjia fatsetkún ngieje na̱xi̱nanda xi tjin nga̱sunde. 31Ku tsingiyaꞌa̱n ngieje nga̱sunde xi inchatsixatꞌána ku ngandiutsikjane tjiáo, nga ndiukꞌetkú xu̱ta̱ xisꞌejínreꞌa̱n.

Kúcha ikú nga̱tꞌaꞌe ingera̱

32»Ngatumájnu kju̱a̱kitakun xi tjitsjuá ya ingo̱. Nga bitjure̱ kui ya tjia chjinde kju̱ xka̱ tjatse, yájnu nga je ndiba tiña chu̱ndaba. 33Ku tekuácha, nga yáre̱ nga ku̱ma ngieje najmi xukunga texínjnu, xi mejénre tsú nga je xati faꞌiꞌan. 34Kju̱a̱xikjain nga ku̱a̱cha kuma tekjie nga fesún yakaꞌa xi tjimajnu nga̱sunde ngisa. 35Je kite kꞌueji ndiu̱jmi kju̱ nangi, ta̱nga énná najmí ni̱tjin nga kju̱e̱.

36»Najmí xi bé mí ni̱tjin ku mí chuba̱ nga faꞌiꞌa̱n; janda xi inchatsixandaire Namiña Diuu̱ xi chja̱ ndiu̱jmí bejí. Ku a̱n, tekuácha bejíꞌa̱n. Tujma Namiña Diuu̱tse, Namiꞌna xi bé.

37»Nga án xi te̱ faꞌiñan, Kjindiꞌe xu̱ta̱ nga̱sunde, tuku ku̱a̱cha tsiꞌín kꞌuema xu̱ta̱ xuku ni̱tjin nga kisꞌebixi Noe. 38Kui ni̱tjin tuku ku̱a̱cha inchatsiꞌín xu̱ta̱ nga inchakjen, nga inchaꞌbi ku nga inchabixantsja janda nga tsasꞌen Noe ngaya niꞌya xi kjitje̱nsún; ku kjia kunanga̱ ndijua. 39Kubejí xu̱ta̱ najmi xi kjima, janda nga tsaꞌaꞌñú tsi ku ngieje nga jesún kitindá. Tu̱mejen ku̱a̱cha kuma nga án, Kjindiꞌe xu̱ta̱ nga̱sunde, xi te̱ faꞌiñaꞌan. 40Tsa kui chu̱ba̱ nga jó xu̱ta̱ xiꞌin inchatsixa ngajnu, ngu xi faiju̱ꞌa̱n ku ngu xi tsikeꞌeꞌan. 41Tsa jó yachjin inchaꞌo ngu xi faiju̱ꞌa̱n ku ngu xi tsikeꞌeꞌan. 42Kui kju̱a̱, nga ndá chaséjnu, nga̱tꞌa jun yajíjnu, nga Ndia̱jnu án, mí ni̱tjin nga faꞌiꞌan, ngi ngu ndiyá. 43Ta̱nga xiyájnu, xi kju̱a̱xikjain, tsanga ndia̱ꞌe ngu niꞌya bé mí chuba̱ fichú chejé, ku ndára̱ niꞌyaꞌe̱ ku tsjuajíra̱ nga̱nde nga basꞌen cheje. 44Ku tekuácha jún, tsubáre̱ nga chaséjnu ku mijñandájnu, nga̱tꞌa án, Kjindiꞌe xu̱ta̱ nga̱sunde, janda yajíjnu mí ni̱tjin nga faꞌiꞌan.

Kúcha tjin tseꞌe musu

(Lk 12.41-48)

45»ꞌYá musu xi kixii̱ ku ndá tsiꞌin xki̱ xáꞌe. Kui xi tsikeꞌenda xu̱ta̱ niꞌyaꞌe̱ xi ndi̱aꞌe̱ niꞌya, xi tsikjen chu̱ba̱ nga tjitsubáre̱ 46¡Tuxi tsjuára mare̱ musu xi nga kjuaꞌí ndia̱ꞌe tjitsikitjusún xá xi kitsiꞌíre! 47Kixii̱ tjin nga kui ndia̱ꞌe tusa kui tjingatsja ngieje najmi xi tjínre. 48Ta̱nga kꞌuejñáña tsa ngu musu xi ndáji xu̱ta̱ ku ku̱i̱cha tsikjáo: “Ndi̱a̱ꞌna̱ tjin jma kijí ku matsére̱ nga faꞌíni”, 49ku beꞌére xu̱ta̱ xi jña inchatsixa, ku kjen ku jña ꞌbijú jachꞌi. 50Nga faꞌíni ndia̱ꞌe, ni̱tjin ku ura xi tjikuyajíre̱ musu, 51tuxi ꞌñu tsijére xukúcha tsubáre̱ nijére ngieje xi ꞌbanachajo ndia̱ꞌe. Ku kjia kjiaku̱a̱ kjinda ku kjineyaꞌñu naꞌñu̱ nga̱tꞌaꞌe kju̱a̱tkiun.

Currently Selected:

Mateo̱ 24: MZI

Highlight

Copy