JAN 13
13
Jezwi echó mɛ́n yíchwɛmán nta
1Ácí agbali Phákhe fɛ́thi, Jezwi yɛn salé mɛ́n cí mɛ́n man yɔ́ áthéji nká nó mɛ́n The yé, lócí ási. Ákakhúnbrɛn ńpɔ néphan ali mɛ́n gbemán abha théji, ló ńpɔ wo ádi lómɛ́n.
2Ńjuka mɛn, Jezwi le mɛ́n yíchwɛmán ɔ́nmɔn khwa nɛn mɛ́n. Lóka lókɔn, logbo bho Jezwi phɛ́lí bhwe ka Judasi thɛ́n hrómɛn, Judasi lókɔn, mɛ́n nɔn ńni Simɔn Iskariɔthi mi. 3Jezwi yɛn salé mɛ́n chan Yankan yé ma, ló mɛɛ́n nó Yankan yé, ńyɛn salé mɛ́n The bho áyí khúnbrɛn ha mɛ́n mɔ́n mɛn. 4Ńchan tábrɛ mɛ́n fe, ńgbɔn mɛ́n ntráliɛ́ tho yɛn, ló ńmo ndugóyí mɔn thé. 5Ńhɔn ndu saha cánzɛn hromɛn anchó mɛ́n yíchwɛmán nta, ló ńmo ndugóyí abha mɛ́n thé ánphu nkɔn nta. 6Lóka Jezwi di Simɔn Piɛ yé ló Simɔn Piɛ étɔlé:
– Hwánthe, wú hɛ nɔn ɛbhá chó mɛn nta?
7Jezwi ékranmán Simɔn Piɛ lée:
– Mɛn yí lókɔn mɛn tɛ́, ncɛ́n ɛbha le yé lóthé, ábha mɔ́n kpɛ́bɛn, lókhɛ́n ɛ́bha yé lóthé.
8Ló Piɛ ékranmán nkɛ sa:
– Mɛn nɛn dɛn, ɛleli lephan ágɛ chó mɛn nta!
Jezwi tɔ se Piɛ sa:
– Kasé mɛn nɛn cho hɛ nta, ɛbha le lí mɛn yíchwɛ́wo.
9Ló Simɔn Piɛ ékrɛnmɛn lée:
– Hwánthe, kasé áli lónɛn, áleli mɛn nta brɛ pán ɛ́bha chó, lókhɛ́n tɛmɛ ɛchó mɛn mɔ́n le mɛn hɛ́nphe lɔ!
10Ló Jezwi kranman Piɛ lée:
– Lephan khɛ́n ago ndu ɔn, lephan lókɔn mɛ́n phɔ chan, ló áleyɔn sa áncu go ndu, lókhɛ́n énɛn sa anchó nta pán. Hɔ́n khúnbrɛn hɔ́n phɔ chan, lókhɛ́n ákha lephan bɛn.
11(Jezwi phrɛ yɛn lephan khɛ́n ebhá hɔ́n-ɛn phɛ́lí, lóhɛ́nthé nɔn ántɔlé: “Hɔ́n khúnbrɛn hɔ́n phɔ le chan.”)
12Lóka Jezwi cho wo nta phu, ńcu mo mɛ́n ntráliɛ́ sɔ, ńsáji no chre tábrɛ mɛ́n ló ánmi mɛ́n yíchwɛmán sa:
– Áyí lókɔn mɛn tɛ ɔn, wú ɔ́n ye lóthé? 13Hɔ́n éche mɛn “Yíliéwo” le “Hwánthe”, hɔ́n bhwe yɔn a, átɛsalé mímí nbrɛn, mɛn hɛ́n tɛɛ mɛn ni e. 14Ló mɛn lókɔn mɛn ni hɔ́n Hwánthe le hɔ́n Yíliéwo, kasé mɛn cho hɔ́n nta, hɔ́n lɔ áyɔn sa ɔ́n chó hɔ́n jɔn nta, ló wo lɔ wo chó hɔ́n nta. 15Lókɔn yí áli áyíbɛn nɔn mɛn tɛ se ɔ́n wu, ochɛ́sé hɔ́n lɔ áyí lókɔn mɛn tɛ, ɔ́n tɛ́ lóyábhɛ brɛ. 16Mímí mɛɛ́n kranmán hɔ́n: álepɛ nɛnkhwɛ́nwo ábha bánbrɛn mɛ́n hwánthe, saji álepɛ mranchɛ́wo abanbrɛn lephan achɛ mran. 17Thénthé ɔ́n yɛn ábhwe mímí, ló kasé hɔ́n etɛ́ lóyí, ɔ́n ma gɛ áphɔhá.
18Léli hɔ́n khúnbrɛn bhwe mɛɛ́n tɔ, mɛn yɛn néphan mɛn san. Lókhɛ́n ábhwe lókɔn Yankan hrɔ́ tɔ, áyɔn salé lóyí otɛ́ símɛ́n, lónɔn ali sa: “Lephan khɛ́n agɛ mɛn ɔ́nmɔn sɔ nɛn mɔ́n elí, ńgɛ mɛn ɔ́nmɔn ánswan.” 19Ábhwe lókɔn, thénthé mɛn phrɛ mɛɛ́n tɔ sé hɔ́n khɛ́n odi lóka lóyí bha tɛ́, ochɛ́sé lóka lóyí tɛ, mɛn “Lephan yábhɛ mɛn ni”, ɔ́n mú mímí. 20Mímí mɛɛ́n kranmán hɔ́n: kasé ɛdɛn do lephan khɛ́n mɛn chɛ yí, mɛn nbrɛn nɔn ɛdɛn do mɛn kábrɛ, ló kasé ɛdo mɛn, átɛsalé lephan achɛ mɛn ma, mɛ́n nɔn ɛdo-e.
Jezwi étɔlé Judasi ebhá hɔ́n-ɛn phɛ́ lí
(Ɔ́n wú Mat 26.20-25; Ɔ́n wú Mák 14.17-21; Ɔ́n wú Lwik 22.21-23)
21Lóka Jezwi tɔ bhwe lókɔn phu, ńthɛ́n éjɛn kranmɛn ló ántɔ sa:
– Mímí mɛɛ́n kranmán hɔ́n: hɔ́n hrómɛn lephan bɛn ebhá phɛ́ mɛn lí.
22Mɛ́n yíchwɛmán éhamɛ nɛ́n wo bɛn nbrɛn, ló ékhrɛ wo phɔ, wo le yɛ́n lólephan brɛ bhwe Jezwi étɔ. 23Wo hromɛn lephan khɛ́n Jezwi pɔ mɛ́n nɔn ńgbali Jezwi chre. 24Ló Simɔn Piɛ chɛ lephan lókɔn obhi Jezwi lée abɛn bhwe ántɔ. 25Ló yíchwɛ́wo lókɔn, ńme hɛ́n no Jezwi phɔ, ló ánmi nkɛ sa:
– Hwánthe, yán abɛn bhwe ɛ́tɔ ɛ?
26Ló Jezwi ékrɛnmɛn lée:
– Mɛn mán mó kpánhɔn sɔ́ ńtɛ́ndu hrómɛn: ló lephan kasé mɛn mo se hɛ, hɛ nɔn ɛli lólephan.
Jezwi bho kpánhɔn sɔ ńtɛ́ndu hrómɛn, ló ńmo se Judasi ali Simɔn Iskariɔthi mi. 27Lóka Judasi bho kpánhɔn lókɔn, lótɛ Abhɔsɛ́mɔ́n ka mɛ́n thɛ́n hrómɛn, ló Jezwi ékrɛnmɛn lée:
– Hɛ yí ɛ́nɛn ɛtɛ́, tɛmɛ ɛtɛ́ gbraa!
28(Jezwi bhwe atɔ se Judasi, wo khúnbrɛn wo khwa tábrɛ mɛ́n, álepɛ lephan aye lóthé. 29Lónian mɛn khɛ́n jɛtɛn láka bha Judasi mɔ́n mɛn ɔn, lóhɛ́nthé yíchwɛmán fe ebhú salé Jezwi énɛn ochɛ́ nkɛ lo phɛ́ yí bha sé wo lí fɛ́thi, saji wo ebhú salé Jezwi ékranmán Judasi onɛn yí bhri bɛn sé gbremán.) 30Lóka Judasi bho kpánhɔn lókɔn, lóyámɛ́n ńthándi. Lóka lókɔn ácí gu.
Ábidí pɔ́pɔ́
31Lóka Judasi thandi, Jezwi étɔlé:
– Thénthé wo hɔn Lephan Mi nguhá thándi, ló Yankan nguhá lɔ sakhɔ mɛ́n phɔ thandi. 32Ló kasé Yankan nguhá sakhɔ mɛ́n phɔ thandi, Yankan bɛn nbrɛn lɔ bha hɔ́n mɛ́n Bhi nguhá thándi, lókɔn yí, áli yíbɛn Yankan bha tɛ́ gbraa. 33Mɛn miɔn thénthé mɛn ma hɔ́n phɔ, lókhɛ́n abha le mɔ́n. Ɔ́n ma nɛn mɛn lókhɛ́n ábhwe lókɔn mɛɛ́n kranmán hɔ́n, mɛn phrɛ ntɔ se Jwifunɛ́n ye, lónɔn ali sa: ɔ́n ma le gɛ ló lósi mɛɛ́n no. 34Ló thénthé mɛn sé hɔ́n ábidí pɔ́pɔ́: tɛmɛ ɔ́n pɔ́ hɔ́n bɛn nbrɛn. Áyɔn sa ɔ́n pɔ́ hɔ́n bɛn nbrɛn, sa lósi mɛn khɔ pɔ hɔ́n. 35Kasé hɔ́n epɔ́ hɔ́n bɛn nbrɛn, lónɔn néphan khúnbrɛn bha yɛ́n salé ɔ́n ni mɛn yíchwɛmán.
Jezwi étɔlé Piɛ bha sa mɛ́n mɛ́n phɔ
(Ɔ́n wú Mat 26.31-35; Ɔ́n wú Mák 14.27-31; Ɔ́n wú Lwik 22.31-34)
36Simɔn Piɛ ébhi Jezwi lée:
– Hwánthe, bánne ɛbhá hɛ́n lo ɛ?
Ló Jezwi krɛnmɛn lée:
– Mɛn si mɛɛ́n no, thénthé ka lókɔn ɛbha lé gɛ bhó mɛn mánji pɛ bhá lóne, ábha mɔ́n lókhɛ́n ɛ́bha bhó mɛn mánji bhá.
37Piɛ ébhi Jezwi lée:
– Hwánthe, ló bítɛ khɛ́n thénthé mɛn man nɛ́n gɛ mó hɛ mánji má? Mɛn gɛlé ya mɛn mán khú sé hɛ!
38Ló Jezwi étɔlé:
– Wú mímí nbrɛn ɛgɛlé ya ɛ́bha khú sé mɛn? Mímí mɛɛ́n kranmán hɛ: kɔsɔ bha le thɔ́n lɔ khɛ́n, ɛ́bha sa mɛ́n ńdɔn bhwaliá lée ɛle yɛn mɛn.
Currently Selected:
JAN 13: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
