JAN 14

Jezwi nɔn ali ásitó bɛn áyalí lephan ló Nthe yé

1– Jezwi ékranmán wo lée, ńthɛ́n ole lí hɔ́n. Tɛmɛ ɔ́n mú Yankan mímí, ló ɔ́n mú mɛn lɔ mímí. 2Mɛn Nthe bháthó, ápɛ áchrési búdúbúdú bháne, ló mɛɛ́n no tɛ́ si tré hɔ́n lé, kasé áleli mímí mɛn man nɛ́n tɔ sé hɔ́n yé. 3Ló lóka mɛn mán no tɛ́ si tré hɔ́n lé, mɛn mán sáji má, ló mɛn mán khwɛ́n hɔ́n há phɔ, ochɛ́sé hɔ́n lɔ ɔ́n má lósi mɛn ma. 4Ási lókɔn mɛɛ́n no, ɔ́n yɛn lóne sitó.

5Ló Toma ékranmán Jezwi lée:

– Hwánthe, hɛ si ɛ́lo ɔn, lo le yɛn lóne, ló kalósi lo bhá khɔ́ yɛ́n lóne sitó e?

6Jezwi krɛnmɛn lée:

– Mɛn nɔn mɛn ni ásitó, ábhwe mímí le ńmɛpɔ́bhá. Álepɛ lephan ábha kpá mɛn ká ló mɛn Nthe yé. 7Kasé ɔ́n yɛ́n mɛn, ka ɔ́n ma yɛ́n mɛn Nthe lɔ. Lókhɛ́n achan ncɛ́n élo, ɔ́n yɛn mɛn Nthe, ló ɔ́n wui.

8Ló Filíphu kranman Jezwi lée:

– Hwánthe, tɛmɛ ɛlie lo hɛ The, ló ábha nimán lo.

9Jezwi kranman Filíphu lée:

– Mɛn ma hɔ́n thethé ámɔn, wú ɛle yɛn mɛn? Lephan kasé ɛwu mɛn, mɛn Nthe nɔn ɛwu. Ló bítɛ khɛ́n ɛ́tɔlé: “Lie lo hɛ The?” 10Wú ɛ́le bhú mímí salé mɛn ma mɛn Nthe phɔ, ló mɛn Nthe lɔ bha mɛn phɔ? Ábhwe lókɔn mɛɛ́n tɔ sé hɔ́n khúnbrɛn ɔ́n yé, ále chan mɛn yé. Mɛn Nthe khɛ́n abha mɛn phɔ, mɛ́n nbrɛn nɔn anní mɛ́n júmán. 11Tɛmɛ ɔ́n mú mímí lóka mɛɛ́n tɔlé: mɛn ma mɛn Nthe phɔ, ló mɛn Nthe lɔ bha mɛn phɔ. Lókhɛ́n tɛmɛ ɔ́n mú mímí áyí khúnbrɛn lókɔn mɛn tɛ hɛ́nthé. 12Mímí mɛɛ́n kranmán hɔ́n: lephan kasé ɛbhu mɛn mímí, áyí khúnbrɛn lókɔn mɛn tɛ, hɛ lɔ ɛ́bha tɛ́ lóyábhɛ brɛ. Ɛ́bha tɛ́ yí ábha bánbrɛn lókɔn yí mɛn tɛ, átɛsalé mɛn nó mɛn Nthe yé. 13Áyí khúnbrɛn ɔ́n ma bhi mɛn hɛ́n hrómɛn, mɛn mán tɛ́ lókhúnbrɛn sé hɔ́n, ochɛ́sé mɛn Nthe nguhá okhɔ́ mɛ́n Bhi phɔ thándi. 14Kasé mɛn hɛ́n hrómɛn hɔ́n ébhi yíbɛn, mɛn mán tɛ́ lóyí sé hɔ́n.

Nánnánmi Créncré khɛ́n wo tɔ lóbhwe tre

15– Kasé ɔ́n pɔ mɛn, ɔ́n ma ji mɛn bidí. 16Mɛn mán mi mɛn Nthe ló ánman sé hɔ́n mɔ́ndɔ́nmánwo nankhɛ, ali ábhwe mímí Nánnánmi, ló ánman gɛ hɔ́n ɔ́nmɔn chré ákakhúnbrɛn. 17Nánnánmi lókɔn áthéjinɛ́n le dɛn do-e, átɛsalé ńni Nánnánmi bɛn áthéjinɛ́n le gɛ wú, ló wo le gɛ yɛ́n. Lókhɛ́n hɔ́n-ɛ ɔ́n yɛn Nánnánmi lókɔn, átɛsalé ńgɛ hɔ́n ɔ́nmɔn chre, ló ńma hɔ́n phɔ.

18Mɛn man nɛ́n yɔ́ hɔ́n míbrɛ kálé, lókhɛ́n mɛn mán sáji man gɛ hɔ́n. 19Ákhakpɛɛ́ áthéjinɛ́n bha le cu wú mɛn npɔhɔ́n, lókhɛ́n hɔ́n-ɛ, ɔ́n ma wú mɛn, átɛsalé mɛn ma mɛpɔ́, ló hɔ́n lɔ ɔ́n ma bhá mɛpɔ́. 20Lócí lókɔn, ɔ́n ma yɛ́n salé mɛn ma mɛn Nthe phɔ, ló hɔ́n lɔ ɔ́n ma mɛn phɔ, sa lósi mɛn lɔ mɛn khɔ ma hɔ́n phɔ.

21Lephan kasé ɛdɛn do mɛn bidí, lókhɛ́n ɛji mɛn bidí, hɛ nɔn ɛli lephan apɔ mɛn. Lephan kasé ɛpɔ mɛn, mɛn Nthe lɔ bha pɔ́ hɛ. Hɛ lephan lókɔn, mɛn lɔ mɛn mán pɔ́ hɛ, ló mɛn mán phwan mɛn bhwethé sé hɛ yé.

22Lephan bɛn óche Jude (lókhɛ́n léli Judasi Iskariɔthi) mɛ́n lɔ ántɔlé:

– Hwánthe, kalósi akhɔ tɛ khɛ́n ɛ́bha phwan hɛ bhwe thé sé lo, lókhɛ́n ɛbha le phwan hɛ bhwe thé sé áthéjinɛ́n e?

23Ló Jezwi ékrɛnmɛn lée:

– Lephan kasé ɛpɔ mɛn, ɛ́bha ji mɛn bhwetɔ́. Mɛn Nthe bha pɔ́ hɛ, ló mɛn Nthe lɔ, mɛn lɔ, lo mɔ́nmɔn lo bhá ló hɛ yé, ló lo bhá gɛ hɛ ɔ́nmɔn chré. 24Lephan kasé ɛle pɔ mɛn, átɛsalé ɛle ji mɛn bhwetɔ́. Ábhwe lókɔn mɛɛ́n tɔ sé hɔ́n yé, áleli mɛɛ́n nbrɛn hɛ́nphebhú bhwe bɛn, lókhɛ́n mɛn Nthe achɛ mɛn ma, mɛ́n yé nɔn ábhwe lókɔn chan.

25Mɛɛ́n tɔ ábhwe khúnbrɛn lókɔn sé hɔ́n, lóka mɛn ma hɔ́n thethé ntɔ́nyán. 26Mɔ́ndɔ́nmánwo ali Nánnánmi Créncré, khɛ́n mɛn Nthe bha chɛ́ bhá mɛn hɛ́n hrómɛn, mɛ́n nɔn ánman nie hɔ́n áyí khúnbrɛn, ló ábhwe khúnbrɛn mɛn phrɛ tɔ se hɔ́n ye, ánman tɛ́ di hɔ́n mwanhɛ́n.

27Ńthɛ́nkhwálé nɔn ali áyí mɛn yɔ́ ká hɔ́n lé. Mɛɛ́n nbrɛn thɛ́nkhwálé nɔn mɛn mo mɛn sé hɔ́n. Mɛn nɛn mo ńthɛ́nkhwálé se hɔ́n sa áthéjinɛ́n si ákhɔ́ sé néphan thɛ́nkhwálé. Ńthɛ́n ole jan hɔ́n, ɔ́n ne tɛ́ dandan, ló ɔ́n ne sókhú. 28Ɔ́n ye ábhwe mɛn phrɛ kranman hɔ́n sa: “Mɛɛ́n no, lókhɛ́n mɛn mán sáji man gɛ hɔ́n”. Kasé ɔ́n pɔ mɛn, áphɔ bha há hɔ́n salé mɛn nó mɛn Nthe yé, átɛsalé mɛn Nthe banbrɛn mɛn. 29Thénthé mɛn phrɛ mɛɛ́n tɔ ábhwe lókɔn sé hɔ́n yé khɛ́n odi lóka lóyí bha tɛ́, ochɛ́sé lóka lóyí tɛ, ɔ́n mú mímí. 30Mɛn man nɛ́n cu gɛ hɔ́n ɔ́nmɔn tɔ bhwe nó hɛ́nmɛn, átɛsalé áthéji bhringbi ebhá, lókhɛ́n ńnɛn pɛ sɛ́npɛ́ bhrií mɛn tho. 31Tɛmɛ áthéjinɛ́n oyɛ́n salé mɛn pɔ mɛn Nthe, lóhɛ́nthé nɔn mɛn tɛ́ áyí khúnbrɛn sa lósi ńkhɔ chɛ mɛn lée mɛn tɛ́. Ɔ́n ma ochán krɛn féne.

Currently Selected:

JAN 14: ENT96

Highlight

Copy