JAN 15

Jezwi nɔn ali divɛn yá mímí

1– Mɛn nɔn mɛn ni divɛn yá mímí, ló mɛn Nthe nɔn ali divɛn nyá gɔn nthe. 2Áyá ncɛn khúnbrɛn abha mɛn phɔ khɛ́n ále sómí, ánman ján yɛn, ló áyá ncɛn khúnbrɛn khɛ́n esómí ánman cu mɛ mwámwá, ochɛ́sé lóphɔ si oká, ló ocu sómí thúbhɔ. 3Ábhwe lókɔn mɛɛ́n tɔ sé hɔ́n, ácho hɔ́n phɔ chan phu. 4Tɛmɛ ɔ́n má mɛn phɔ sa lósi mɛn lɔ mɛn khɔ ma hɔ́n phɔ. Áyá ncɛn kasé ńka njɛ, kasé ńnɛn ma áyá phɔ, ánnɛ́n gɛ sómí. Lóyábhɛ brɛ hɔ́n lɔ kasé ɔ́n ne bha mɛn phɔ, ɔ́n ma lé gɛ sómí.

5Mɛn nɔn mɛn ni divɛn yá, ló hɔ́n nɔn ɔ́n ni lóncɛn. Lephan kasé ɛbha mɛn phɔ, khɛ́n mɛn lɔ mɛn ma hɛ phɔ, ɛ́bha sómí búdúbúdú, átɛsalé kasé mɛn nɛn mɛ́ne, ɔ́n ma le gɛ tɛ́ yíɛkɛ. 6Lephan kasé ɛle bha mɛn phɔ, wo bhá hɔ́n hɛ fɔ́nká bu sa áyá ncɛn si okhɔ́ hɔ́n fɔ́nká bu khɛ́n áwɛ́. Áyá ncɛn khɛ́n awɛ, wo gba bhurɛhɛ́n, wo khwɛ́n hátɛn, ló ákhó liɛ́. 7Kasé ɔ́n ma mɛn phɔ, lókhɛ́n mɛn bhwetɔ́ lɔ bha hɔ́n phɔ, tɛmɛ ɔ́n mi áyí khúnbrɛn hɔ́n énɛn, ló ɔ́n ma gɛ. 8Kasé hɔ́n esómí búdúbúdú, lónɔn ábha chɛ́ mɛn Nthe nguhá bha thándi, ló ɔ́n ma lí mɛn yíchwɛmán. 9Mɛn pɔ hɔ́n sa lósi mɛn Nthe khɔ pɔ mɛn. Tɛmɛ ɔ́n má mɛn pɔ́ hrómɛn. 10Kasé hɔ́n éji mɛn bidí, ɔ́n ma bhá mɛn pɔ́ hrómɛn, sa lósi mɛn khɔ ji mɛn Nthe bidí ló mɛn ma mɛ́n pɔ́ hrómɛn.

11Mɛɛ́n tɔ ábhwe lókɔn sé hɔ́n yé, ochɛ́sé mɛn lɔ mɛn khɔ́ hɔ́n phɔ gɛ áphɔhá ló hɔ́n phɔhá osímɛ́n. 12Mɛn bidí nɔn ali sa: tɛmɛ ɔ́n pɔ́ hɔ́n bɛn nbrɛn sa lósi mɛn khɔ pɔ hɔ́n. 13Ápɔ́ abanbrɛn ápɔ́ khúnbrɛn, lónɔn ali sa, lephan, ɛbhó hɛ mɛpɔ́bhá sé hɛ jɔn. 14Kasé hɔ́n etɛ́ mɛn yí mɛn chɛ́ hɔ́n lée ɔ́n tɛ́, ɔ́n ma lí mɛn jɔn. 15Thénthé mɛn man nɛ́n cu che hɔ́n júmánmán npɔhɔ́n, átɛsalé júmánwo, ánnɛn yɛ́n mɛ́n hwánthe yí etɛ́. Lókhɛ́n mɛɛ́n che hɔ́n mɛn jɔn, átɛsalé ábhwe khúnbrɛn khɛ́n mɛn Nthe bho se mɛn, mɛn tɔ lókhúnbrɛn se hɔ́n ye. 16Léli hɔ́n nɔn ɔ́n san mɛn, lókhɛ́n mɛn nɔn mɛn san hɔ́n ló mɛn chɛ hɔ́n lée ɔ́n no, ló ɔ́n sómí búdúbúdú, ló hɔ́n mí hɔ́n esó, olí yíbɛn otré lóne ákakhúnbrɛn. Kasé hɔ́n etɛ́ lóyábhɛ nɛn, mɛn hɛ́n hrómɛn, áyí khúnbrɛn hɔ́n ébhi mɛn Nthe, ánman sé hɔ́n! 17Mɛn yí mɛɛ́n nɛn lée ɔ́n tɛ́ nɔn ali sa, tɛmɛ ɔ́n pɔ́ hɔ́n bɛn nbrɛn.

Áthéjinɛ́n ésa Jezwi le mɛ́n gbemán ɔ́nmɔn mɛ

18Kasé áthéjinɛ́n ésa hɔ́n mɛ, tɛmɛ odi hɔ́n mwanhɛ́n salé wo phrɛ sa mɛn mɛ khɛ́n áse hɔ́n. 19Kasé ɔ́n ní áthéji néphan, ka áthéjinɛ́n bha pɔ́ hɔ́n, átɛsalé ɔ́n ni mɛ́n néphan hɛ́nthé. Lókhɛ́n mɛn san hɔ́n, mɛn khwɛn hɔ́n yɛn áthéji, ló ɔ́n ne cu li áthéji néphan npɔhɔ́n: lóhɛ́nthé nɔn áthéji ésa hɔ́n mɛ. 20Tɛmɛ mɛn bhwe lócí mɛn tɔ, odi hɔ́n mwanhɛ́n: “Ábhwe lókɔn lónɔn ali salé, álepɛ nɛnkhwɛ́nwo abanbrɛn mɛ́n hwánthe.” Kasé wo élri mɛn gbre, hɔ́n lɔ wo bhá lri hɔ́n gbre, kasé wo éji mɛn bhwetɔ́, hɔ́n lɔ wo bhá ji hɔ́n bhwetɔ́. 21Lókhɛ́n mɛn hɛ́nthé, wo bhá tɛ́ hɔ́n lóyí khúnbrɛn lókɔn, átɛsalé wo le yɛn lephan achɛ mɛn ma. 22Kasé mɛn nɛn ma khɛ́n mɛɛ́n tɔ bhwe sé wo yé, ka wo bha le lí pɔn wo ne hrómɛn. Lókhɛ́n thénthé álepɛ wo ne nfɛkhuwú npɔhɔ́n. 23Lephan kasé ɛsa mɛn mɛ, mɛn Nthe nɔn ɛsa mɛ. 24Kasé mɛn nɛn ya wo thethé tɛ áyí lephan nankhɛ ka tɛ bhrɔ́ɔ́, ló wo bha le lí pɔn wo ne hrómɛn, lókhɛ́n thénthé wo wu mɛn yí mɛn tɛ, lótɛ khɛ́n wo ésa mɛn le mɛn Nthe ɔ́nmɔn mɛ. 25Lókhɛ́n lókhúnbrɛn hrómɛn, énɛn salé ábhwe wo lrɛ ha wo bidí hrómɛn, cíbɛn lóyí otɛ́ símɛ́n, lónɔn ali sa: “Wo sa mɛn mɛ wrɛ́, lókhɛ́n mɛn nɛn ni wo pɔn.”

26Hɔ́n mɔ́ndɔ́nmánwo bha bhá: mɛ́n nɔn ńni ábhwe mímí Nánnánmi achan mɛn Nthe yé bha. Mɛn mán chɛ anchán mɛn Nthe yé man gɛ hɔ́n, ló ántɔ mɛn phɔ bhwe sé hɔ́n yé. 27Lókhɛ́n hɔ́n lɔ, ɔ́n ma tɔ mɛn phɔ bhwe sé néphan yé, átɛsalé ɔ́n chan ásithwá cí-áan bha mɛn phɔ.

Currently Selected:

JAN 15: ENT96

Highlight

Copy